Chikalata Chakwawula kwa Agalatiya 3:1-29
-
Kutenda yindu mwakuya Chilamusi soni mwakuya chikulupi (1-14)
-
Jwakulungama chachiŵa ni umi ligongo lya chikulupi chakwe (11)
-
-
Yiŵalangene Mlungu ni Abulahamu ngayikukwayana ni Chilamusi (15-18)
-
Klistu ali chisukulu cha Abulahamu (16)
-
-
Kuchatyochele Chilamusi soni chakulinga chakwe (19-25)
-
Wosope mli ŵanache ŵa Mlungu ligongo lya chikulupi (26-29)
-
Wosope ŵali ŵa Klistu ali ŵanache ŵa Abulahamu (29)
-
3 Jemanja Agalatiya mli ŵangali lunda eti. Jemanja mwaŵele mpela mwam’weni Yesu Klistu ali amkomele pachitela. Sambano ana ni ŵanisoni ŵamsokonasisye nganisyo?
2 Ngusaka musalile kwanga kwa chiwusyo achi, Ana jemanja mwapochele msimu weswela ligongo lyakupikanila chilamusi kapena ligongo lyakulupilila yindu yimwapikene?
3 Ana jemanja mli ŵangali lunda myiyi? Jemanja mwatandite ni kwegamila msimu weswela, ana sambano mkumalisya mwakwegamila yindu yakutyochela kwa ŵandu ŵakulemwa?
4 Ana mwakundile kusimana ni yakusawusya yila mwalulele basi? Ngukulupilila kuti nganiyiŵa myoyo.
5 Sambano jwele jwakusampa jemanja msimu weswela soni jwakusatenda yamachili yejinji pasikati penu, ana akusatenda yeleyi ligongo lyakupikanila kwenu chilamusi kapena ligongo lyakukulupilila kwenu yindu yimwapikene?
6 Aganichisye ya Abulahamu, jwalakwe “ŵamkulupilile Yehofa, mwamti ŵam’weni kuŵa jwakulungama.”
7 Mwangakayichila jemanja mkumanyilila kuti ŵandu ŵakusaŵa ni chikulupi ni ŵali ŵanache ŵa Abulahamu.
8 Malemba gasasile chile kuti Mlungu chachawona ŵandu ŵamitundu jine kuŵa ŵakulungama ligongo lya chikulupi. Malembago gatesile yeleyi mwakumsalila Abulahamu ngani syambone, syakuti, “Kupitila mwa mmwejo mitundu josope ja ŵandu jichipochela upile.”
9 Myoyo wosope ŵakwete chikulupi akupochela upile pampepe ni Abulahamu, juŵakwete chikulupi.
10 Ŵandu wosope ŵakusajegamila chilamusi ali ŵalweseche, pakuŵa Malemba gakusati, “Jwalijose jwangakuya soni kutenda yosope yakulembedwa m’buku* ja Chilamusi ali jwamlweseche.”*
11 Nambosoni, yili yakumanyika chenene kuti Mlungu jwangamwona mundu kuŵa jwakulungama ligongo lyakukuya chilamusi, pakuŵa “jwakulungama chachitama ni umi ligongo lya chikulupi chakwe.”
12 Pakuŵa kukuya Chilamusi kwangajegamila kuti mundu akole chikulupi. Mmalomwakwe, “mundu jwakukuya chilamusi chachiŵa ni umi ligongo lya chilamusicho.”
13 Klistu ŵatusumile soni ŵatugopwele ku malweso ga Chilamusi. Ŵatesile yeleyi mwakuŵa jwamlweseche mmalo mwa m’weji. Pakuŵa yalembedwe kuti, “Jwalijose jwakukomeledwa pachitela ali jwamlweseche.”
14 Yeleyi yili myoyo ni chakulinga chakuti mitundu ja ŵandu jipochele upile wele Mlungu ŵamsalile Abulahamu kuti chachimpa kupitila mwa Klistu Yesu. Myoyo tuchipochela msimu waŵatusalile kuti chachitupa ligongo lya chikulupi chetu.
15 Achalongo achimjangu, ngusaka nape chisyasyo chakamulana ni yindu yayikusatendekwa pasikati pa ŵandu. Naga ŵandu atamilikasisye chilangano, atamose chiŵe cha ŵandupe, pangali mundu jwampaka akase chilanganocho kapena konjechesyapo maloŵe gane.
16 Sambano yindu yiŵasasile Mlungu kuti chachipeleka ŵayisasile kwa Abulahamu ni chisukulu chakwe. Pakuŵa Malemba gangasala kuti, “kwa yisukulu yenu,” kwambaga ŵandu ŵajinji. Mmalomwakwe gakusati, “kwa chisukulu chenu,” kwambaga mundu jumo, jwali Klistu.
17 Nambosoni une nguŵecheta kuti, Chilamusi chele chayiche yili yimasile yaka 430 panyuma pakuti Mlungu atamilikasisye chilangano chila, chilamusichi nganichiŵa chimasisye chilanganocho kapena kusokonasya yaŵasasile Mlungu kuti chachitenda.
18 Pakuŵa naga Mlungu akupeleka upile kwa mundu ligongo lyakuti mundujo akukuya chilamusi, nikuti upilewo nganiwuŵa wele Mlungu ŵasasile kuti chachipeleka. Nambotu Mlungu mwa umbone wakwe apeleche upile kwa Abulahamu kupitila mu chilanga chiŵatesile najo.
19 Sambano, ana chilamusi chapelechedwe ligongo chichi? Mlungu ŵachipeleche* kuti ulemwa uwonechele, mpaka mwanachejo ali ayiche,* jwelesoni chachipochela yele Mlungu ŵatesile chilanga. Chilamusichi chapelechedwe kupitila mwa malayika soni kupitila mwa namangoswe.
20 Sambanotu ngapakusaŵaga namangoswe naga mundu jumope ni jwakupeleka chilanga. Pajatu Mlungu ŵaliji jikape paŵapelekaga chilanga.
21 Ana pelepa nikuti Chilamusi chikusisyana ni yele yiŵasasile Mlungu kuti chachipeleka? Ngaŵa myoyo. Yikaŵe kuti papelechedwe chilamusi chakupeleka umi, nikuti tukaŵele ŵakulungama ligongo lyakuya chilamusi chelechi.
22 Nambo Malemba galosisye kuti ŵandu wosope ali pasi pa ulemwa, ni chakulinga chakuti yindu yiŵasasile Mlungu kuti chachipeleka kwa ŵandu ŵakulupilila mwa Yesu Klistu yipelechedwe kwa ŵakulupililawo.
23 Nambope chikulupicho mkanichiyiche, chilamusi chaliji mkutulongolela, soni chatuŵisile mu ukapolo. Pandaŵi jelejo, twagambaga kwembecheya chikulupi chele chaliji chisigele panandi kuwonechela.
24 Myoyo Chilamusi chaŵele jwakutulongolela mpaka kuja kwika pa Klistu, kuti Mlungu atuwone kuŵa ŵakulungama ligongo lya chikulupi.
25 Nambo pakuŵa chikulupicho chiyiche sambano, ngatukusosekwasoni jwakutulongolela.
26 Jemanja wosope mli ŵanache ŵa Mlungu ligongo lya chikulupi chenu mwa Klistu Yesu.
27 Pakuŵa jemanja wosope ŵamwabatisidwe mwa Klistu mwawete ndamo sya Klistu.
28 Myoyo pasikati penu pangali Myuda kapena Mgiliki, pangali kapolo kapena mfulu,* pangalisoni jwamlume kapena jwamkongwe. Pakuŵa jemanja wosope mli ŵakamulana mpela ŵakulijiganya ŵa Klistu Yesu.
29 Nambosoni, naga jemanja mli ŵa Klistu nikuti mli ŵanache ŵasyesyene ŵa Abulahamu, ŵakwenela kupochela yindu yiŵasasile Mlungu kuti chachipeleka.
Maloŵe Gamwiŵanda
^ Maloŵe gakwe gandanda, “mu mpukutu.”
^ Ŵane akusati “kutapana; kutembelela.”
^ Kapena kuti, “ŵachijonjechesye.”
^ Kapena kuti, “chisukulucho chili chiyiche.”
^ Ŵane akusati “mlukosyo.”
