Chikalata Chaŵili cha Petulo 1:1-21
1 Une Simoni Petulo, ndili kapolo soni jwandumetume jwa Yesu Klistu. Ngumlembela jemanja ŵamkwete chikulupi mpela chatukwete m’weji. Jemanja mwapochele chikulupi chelechi ligongo lya umbone wa Mlungu jwetu soni Mkulupusyo Yesu Klistu.
2 Umbone mtima wekulungwa soni mtendele yigumbale mwa jemanja kupitila mu kummanyilila kwenu chenene Mlungu soni Yesu jwali Ambuje ŵetu.
3 Machili ga Mlungujo gatutendekasisye m’weji kupata yindu yosope yakutukamuchisya kuti tukole umi wakulipeleka kwa Mlungu. Yeleyi yikomboleche pakuŵa tummanyilile chenene jwele juŵatuŵilasile ligongo lya uchimbichimbi wakwe soni umbone wakwe.
4 Kupitila mu yindu yeleyi Mlungu atusalile kuti chachitupa yindu yamtengo wapenani soni yekulungwa mnope, kuti kupitila mu yindu yachachitupa Mlunguyo jemanja mkole uchimbichimbi mpela wakwete Mlungujo. Jwalakwe asasile kuti chachitupa yeleyi ligongo m’weji tulesile ndamo syakusakala sya m’chilambochi syasikusayika ligongo lya yakumbila yakulemwecheka.*
5 Paligongo lyeleli, mtendeje yiliyose yakomboleka kuti pa chikulupi chenu mjonjechesyepo ndamo syambone, pa ndamo syambone mjonjechesyepo kumanyilila yindu,
6 pa kumanyilila yindu mjonjechesyepo kulilekasya, pa kulilekasya kwenu mjonjesyepo kupilila, pa kupilila kwenu mjonjechesyepo kulipeleka kwa Mlungu,
7 pa kulipeleka kwenu kwa Mlungu mjonjechesyepo kwanonyela achalongo achimjenu,* pa kwanonyela achalongo achimjenu mjonjechesyepo kwanonyela ŵandu wosope.
8 Pakuŵa naga yeleyi yikuŵa mwa jemanja soni yikutupilatupilape, yichimkamuchisya kuti mŵe ŵakulimbichila soni kuti mŵe mpela chitela chakusogola yisogosi mwakamulana ni kwamanyilila chenene Ambuje ŵetu Yesu Klistu.
9 Pakuŵa jwalijose jwakupelembela pa yindu yeleyi ali jwangalola, awugele meso gakwe kuti akalola lilanguka, soni aliŵalile kuti ŵaswejele ku yakulemwa yakwe yaŵatendaga kala.
10 Myoyo achalongo achimjangu, mtendeje yiliyose yakomboleka kuti mpitilisye kuŵa ŵakulupichika ni chakulinga chakuti mŵe pasikati pa ŵandu ŵele Mlungu ŵaŵilasile soni kwasagula. Naga mkupitilisya kutenda myoyo ngasimlepela ata panandi.
11 Yisyene, pamkutenda yeleyi chimchikola upile wekulungwa soni chimchijinjila mu Uchimwene wangamala wa Ambuje soni Mkulupusyo jwetu Yesu Klistu.
12 Paligongo lyeleli chindolechesyeje kuti ngumkumbusya yindu yeleyi ndaŵi syosope, atamose kuti mkuyimanyilila kala soni kuti mli ŵakutamilichika pa yindu yisyesyene yamwalijiganyisye.
13 Nambo nguyiwona kuŵa yakuŵajilwa kuti namtenganyeje jemanja mwakumkumbusya yindu yeleyi pandaŵi jandili mu msakasa* awuno.
14 Pakuŵa ngumanyilila kuti sigele panandi kukopoka mu msakasa welewu, mpela muŵatendele Ambuje ŵetu Yesu Klistu pakumanyikasya yeleyi.
15 Myoyo ndaŵi syosope chindendeje yiliyose yampaka ngombole kuti namkumbusyeje ni chakulinga chakuti patinjityokapo jemanja chimkombole kuyikumbuchila* yindu yeleyi.
16 Pandaŵi jatwammanyisye jemanja ya machili ga Ambuje ŵetu Yesu Klistu soni ya kuŵapo* kwakwe, nganitumsalila mwakujigalila ngani syaunami syele ŵandu ŵagambile kupeka, nambo twamsalile yakwamba uchimbichimbi wakwe watwawuweni ni meso getu.
17 Pakuŵa jwalakwe ŵapochele uchimbichimbi wekulungwa mnope kutyochela kwa Mlungu jwali Atati. Yeleyi yatendekwe pandaŵi jele msyene uchimbichimbi wekulungwawo jwaŵechete kwa jwalakwejo kuti, “Aju ali Mwanangu, jwapamtima, jwangusasangalala najo.”
18 Yisyene, twapikene maloŵe gelega kutyochela kwinani pandaŵi jitwaliji yimpepe ni jwalakwejo pa litumbi lyeswela.
19 Ligongo lya yeleyi, m’weji twaliji ŵakusimichisya kuti yakulochesya yaŵechete Mlungu yichitendekwa, sonitu jemanja mkutenda chenene pakuyiganichisya mnope yindu yeleyi. M’mitima mwenu, maloŵe gelega gaŵeje mpela nyali jakumulichila m’chipi. Mpitilisye kugaganichisya maloŵega mpaka kusa kuli kulangwiche soni ndondwa jakundaŵi* jili jikopweche.
20 Jemanja mkumanyilila chenene kuti, yakulochesya ya m’Malemba yangatyochela munganisyo sya mundu.
21 Pakuŵa yakulochesya nganiyiyika ligongo lya kusaka kwa mundu, nambo msimu weswela ni wawalongolele ŵandu kuti aŵechete maloŵe gakutyochela kwa Mlungu.
Maloŵe Gamwiŵanda
^ Kapena kuti, “ligongo lyakusachilila mnope kutenda yakulemwecheka.”
^ Kapena kuti, “kwanonyela ŵakulupilila achimjenu mpela yamkusati pakwanonyela ŵamwiŵasa mwenu.”
^ Kapena kuti, “mu chitenti.” Pelepa akwamba “chilu chakwe.”
^ Kapena kuti, “kuyiŵecheta.”
^ Alole Kugopolela kwa Maloŵe Gane.
^ Ŵane akusati “mng’andu.”
