Buku Jaŵili ja Mbili 29:1-36
29 Hesekiya ŵaŵele mwenye ali ni yaka 25, soni ŵalamulile ku Yelusalemu kwa yaka 29. Lina lya mamagwe lyaliji Abiya mwanache jwamkongwe jwa Sekaliya.
2 Jwalakwe ŵapitilisye kutenda yambone pameso pa Yehofa mpela muŵatendele nangolo jwakwe Daudi.
3 M’chaka chandanda cha ulamusi wakwe, m’mwesi wandanda, jwalakwe ŵawugwile matanga ga nyumba ja Yehofa ni kugalinganyasoni.
4 Kaneko jwalakwe ŵajigele ŵakutaga mbopesi soni Alefi ni kwasonganganyila paluŵala mbali jakungopokolyuŵa.
5 Jwalakwe ŵasalile jemanjajo kuti, “Mumbikane jemanja Alefi, sambano mliswejesye, soni mswejesye nyumba ja Yehofa Mlungu jwa achinangolo ŵenu, ni kutyosya chindu chilichose chachili changaswejela m’malo geswela.
6 Mtende yeleyi, pakuŵa achinangolo ŵetu aŵele ali mkutenda yindu yangakulupichika soni atesile yindu yakusakala pameso pa Yehofa Mlungu jwetu. Jemanjajo ŵamlesile jwalakwe soni ŵalesile kulola nyumba ja Yehofa ni kugalawuka kumleka jwalakwejo.
7 Jemanjajo ŵawugelesoni matanga ga chipinda cha pamlango wakwinjilila m’nyumba ja Mlungu soni ŵasimisye nyali. Jemanjajo ŵalesilesoni kutinisya mbopesi sya yakununjila soni kupeleka mbopesi syakutinisya pamalo geswela kwa Mlungu jwa Ayisalayeli.
8 Myoyo, Yehofa ŵatumbilile ŵandu ŵa ku Yuda soni ŵa ku Yelusalemu, mwamti ŵayikasisye yipwetesi pa jemanjajo. Yaliji myoyo ni chakulinga chakuti ŵandu ŵachayiwone ni kupikana yeleyi atendeje woga, asimonje mnope, soni ŵanyosye* jemanjajo, mpela mwamkuyiwonela jemanja ni meso genu.
9 Ni ligongo lyakwe achinangolo ŵetu ŵawile ni upanga,* soni ŵanache ŵetu ŵachalume ni ŵachakongwe nambosoni achiŵamkwetu ŵajigalidwe kwawula ku ukapolo.
10 Sambano mumtima mwangu ngusachilila kutenda chilanga ni Yehofa Mlungu jwa Ayisalayeli, ni chakulinga chakuti jwalakwejo aleche kututumbilila.
11 Jemanja achiŵanangu, ajino nganijiŵa ndaŵi jakwamba kupinda makono.* Yehofatu ŵamsagwile jemanja kuti mjimeje pameso pakwe ni kumtumichilaga jwalakwe mpela ŵakutumichila ŵakwe, nambosoni kuti mjocheje pamoto mbopesi syakwe kuti sikoposyeje lyosi.”
12 Pelepo Alefiwo ŵatandite kukamula masengo. Alefi ŵakwe ŵaliji aŵa: kutyochela mwa Kohati papali Mahati mwanache jwa Amasayi soni Yoweli mwanache jwa Asaliya. Kutyochela mwa Melali papali Kisi mwanache jwa Abidi soni Asaliya mwanache jwa Yehalele. Kutyochela mwa Gelisoni papali Yowa mwanache jwa Sima nambosoni papali Edeni mwanache jwa Yowa.
13 Kutyochela pa ŵanache ŵa Elisafani papali Simuli soni Yeuweli. Kutyochela pa ŵanache ŵa Asafu papali Sekaliya soni Mataniya.
14 Kutyochela pa ŵanache ŵa Hemani papali Yehiyele soni Simeyi. Kutyochela pa ŵanache ŵa Yedutuni papali Semaya soni Usiyele.
15 Kaneko jemanjaji ŵasongangenye pampepe achalongo achimjawo ni kuliswejesya. Panyuma pakwe, ŵayiche kukujiswejesya nyumba ja Yehofa mpela muŵalamulile mwenye mwakamulana ni maloŵe ga Yehofa.
16 Kaneko ŵakutaga mbopesi ŵajinjile m’nyumba ja Yehofa kuti akaswejesye mkatimo. Jemanjajo ŵakopwesye yindu yosope yakwayana ni milungu jaunami yaŵayisimene m’nyumba ja Yehofajo ni ŵajile kuyiŵika paluŵala lwa nyumba ja Yehofa. Pambesi pakwe, Alefi ŵayijigele yinduyo ni kwawula nayo kusa ku Chitiŵi cha Kidiloni.
17 Myoyo jemanjaji ŵatandite masengo gakuswejesyaga palisiku lyandanda lya mwesi wandanda. Palyakwanaga lisiku lya 8 lya mwesiwo, jemanjajo ŵayiche pa chipinda chapamlango wakwinjilila m’nyumba ja Yehofa. Papitilesoni masiku gane 8 ali mkujiswejesya nyumba ja Yehofajo, mwamti palyakwanile lisiku lya 16 lya mwesi wandanda ni paŵamalisisye masengo gosope gakuswejesyago.
18 Panyuma pakwe, jemanjajo ŵapite kwa Mwenye Hesekiya ni kwasalila kuti, “Tumalisisye kujiswejesya nyumba josope ja Yehofa, malo gakupelechela mbopesi pampepe ni yiwiya* yakwe yosope, nambosoni tebulo jakuŵika mikate* jesajikanye* pampepe ni yiwiya yakwe yosope.
19 Konjechesya pelepa, yiwiya yosope yaŵayityosisye Mwenye Ahasi m’nyumba ja Mlungu mu ulamusi wakwe pandaŵi jaŵatendaga yindu mwangakulupichika tuyiswejesye, mwamti mpaka yitande kukamula masengo. Patukuŵecheta pano yiwiyayo yili pasogolo pa malo gakupechela mbopesi ga Yehofa.”
20 Kaneko Mwenye Hesekiya ŵajimwiche kundaŵindaŵipe ni kusisonganganya pampepe nduna sya mumsinda. Panyuma pakwe wosopewo ŵanyakwiche ni kwawula ku nyumba ja Yehofa.
21 Jemanjaji ŵayiche nasyo ng’ombe syamkambako 7, ngondolo syamkambako 7, soni ŵanache ŵa ngondolo ŵamkambako 7. Ŵayichesoni ni achitonde ŵa mbusi ŵakwana 7 kuti aŵe mbopesi jakusimasya ulemwa wa umwenyewo, nyumba ja Mlungu ni wosope ŵakutumichila kweleko, nambosoni ulemwa wa ŵandu wosope ŵa ku Yuda. Myoyo mwenyewo ŵasalile ŵakutaga mbopesi, ŵali yisukulu ya Aloni kuti apeleche mbopesi yilangoyo pamalo gakupelechela mbopesi ga Yehofa.
22 Panyuma pakwe, ŵasikite ng’ombesyo. Kaneko ŵakutaga mbopesiwo ŵajigele myasi jakwe ni kujimisila pamalo gakupelechela mbopesi. Paŵatesile yeleyi, ŵasikitesoni ngondolo syamkambako sila ni kujigala myasi jakwe ni kuja kujimisila pamalo gakupelechela mbopesi. Kaneko ŵasikitesoni ŵanache ŵa ngondolo ŵamkambako ŵala, ni kujigala myasi jakwe kuja kujimisilasoni pamalo gakupelechela mbopesi.
23 Pambesi pakwe, jemanjajo ŵajigele achitonde ŵa mbusi ŵa mbopesi jaulemwa ŵala ni kwika nawo pameso pa mwenye soni pameso pa ŵandu wosope ŵaŵasongene kweleko. Kaneko jemanjajo ŵasajiche makono gawo pa achitondewo.
24 Ŵakutaga mbopesiwo ŵasikite mbusisyo ni kusipeleka kuti siŵe mbopesi jaulemwa. Kaneko ŵajigele myasi jakwe ni kujimisila pamalo gakupelechela mbopesi kuti asimasye ulemwa wa Ayisalayeli wosope. Yeleyi yaliji myoyo ligongo lyakuti mwenye ŵasasile kuti mbopesi jakutinisya soni mbopesi jaulemwa jikusosekwa kuŵa ja Ayisalayeli wosope.
25 Pandaŵi jiŵapelekaga mbopesisyo, mwenye ŵasalile Alefi kuti ajime ku nyumba ja Yehofa ali ajigele yakwimbila yakusyungulila yakuwoneka mpela mbale, nambosoni yakwimbila ya ngonji yakulekanganalekangana. Ŵatesile yeleyi pakukuya dongosolo jakwimbila jiŵajitamilikasisye Daudi, Gadi jwakulola yamsogolo juŵatumichilaga kwa mwenye, nambosoni jwakulochesya Natani, pakuŵa Yehofa ni juŵalamwile yeleyi kupitila mwa ŵakulochesya ŵakwe.
26 Myoyo Alefi ŵajimijimi ali ajigele yida yakwimbila yaŵalinganyisye Daudi, soni ŵakutaga mbopesi ŵajigele malipenga.
27 Kaneko Hesekiya ŵalamwile kuti atande kupeleka mbopesi syakutinisya pamalo gakupelechela mbopesi. Paŵagambile kutanda kupeleka mbopesi syakutinisyasyo, nyimbo syakumchimbichisya Yehofa syatandite kwimbidwa, nambosoni ŵatandite kwimba malipenga pakuya yida yakwimbila ya Mwenye Daudi ŵa ku Isalayeli.
28 Ŵakwimba nyimbo paŵaliji mkwimba, soni ŵakulisya malipenga paŵaliji mkulisya malipengago, ŵandu wosope ŵaŵasongene pelepo ŵajinamisye mitwe jawo. Ŵanduwo ŵapitilisye kwinamisya mitwe jawo aku nyimbo sili mkwimbidwa mpaka paŵamalisisye kupeleka mbopesi syakutinisya.
29 Paŵagambile kumalisya kupeleka mbopesisyo, mwenye pampepe ni ŵandu wosope ŵaŵaliji nawo ŵatindiŵele ni kwinama mpaka ngope syawo pasi.
30 Kaneko Mwenye Hesekiya soni nduna syakwe ŵasalile Alefi kuti amchimbichisye Yehofa ni maloŵe ga nyimbo ja Daudi soni ja Asafu jwakulola yamsogolo. Myoyo jemanjajo ŵajimbile nyimbo syakumchimbichisya Mlungu ali mkusangalala mnope. Kaneko ŵatindiŵele ni kwinama mpaka ngope syawo pasi.
31 Kaneko Hesekiya ŵaŵechete kuti, “Pakuŵa sambano mŵele ŵaswela kuti mumtumichileje Yehofa, myiche ni mbopesi syenu syakuyamichila soni mbopesi sine ku nyumba ja Yehofa.” Myoyo ŵanduwo ŵatandite kwika ni mbopesi syakulekanganalekangana soni mbopesi syakuyamichila, mwamti ŵane mwa jemanjajo ŵaŵakwete mtima wakusachilila ŵapelechesoni mbopesi syakutinisya.
32 Chiŵalanjilo cha yilango ya mbopesi syakutinisya yaŵayiche nayo ŵanduwo chaliji ng’ombe 70, ngondolo syamkambako 100, nambosoni ŵanache ŵa ngondolo ŵamkambako 200. Yilango yosopeyi yaliji yakuti ayipeleche kuŵa mbopesi syakutinisya kwa Yehofa.
33 Konjechesya pelepa, ŵapelechesoni ng’ombe 600 nambosoni ngondolo 3,000 kuŵa mbopesi sine syeswela.
34 Nambo ŵakutaga mbopesi ŵapali ŵamnono mwamti ngamkanakombola kusa yilango yosope ya mbopesi syakutinisya. Myoyo Alefi, ŵaŵaliji achalongo achimjawo, ŵakamuchisye jemanjaji mpaka paŵamalisisye masengogo soni mpaka ŵakutaga mbopesi ŵane ali aliswejesye. Yeleyi yatendekwe ligongo lyakuti Alefiwo ŵalipeleche mnope pakuliswejesya kulekangana ni muŵatendele ŵakutaga mbopesi.
35 Yaliji myoyo ligongo lyakuti papali mbopesi syejinji syakutinisya syakuti asipeleche. Papalisoni mawuta gejinji ga mbopesi syamkamulano, nambosoni mbopesi sya yakumwa syejinji syakuti asipelechele kumpepe ni mbopesi syakutinisya. Mwelemu ni muwatandilesoni utumiki wa pa nyumba ja Yehofa.
36 Myoyo Hesekiya pampepe ni ŵanduwo ŵasangalele ni yindu yaŵatesile Mlungu jusyesyene kwa jemanjajo, pakuŵa yindu yosopeyi yatendekwe mwangajembecheya.
Maloŵe Gamwiŵanda
^ Mu Chihebeli ŵatiga, “ŵajimbile lulusi.”
^ Upanga ukusawoneka mpela chipula chekulungwa chakutema kosekose.
^ Kapena kuti, “jakwamba kutama.”
^ Ŵane akusati “yisuso.”
^ Mikate jakala ŵajipanganyaga ni utandi wa tiligu kapena balele.
^ Jeleji jili mikate jakulosya kwa Mlungu.
