Chikalata Chandanda cha Yohane 4:1-21
4 Achalongo achimjangu ŵapamtima, mkakulupililaga maloŵe galigose gagakuwoneka mpela gakutyochela kwa Mlungu, nambo mgalinjeje kaje maloŵego kuti mlole naga gakutyochela yisyene kwa Mlungu, pakuŵa ŵakulochesya ŵaunami atupile m’chilambo.
2 Amu ni mwampaka tumanyilile naga maloŵego gakutyochela kwa Mlungu: Maloŵe gagakusajitichisya kuti Yesu Klistu ŵayiche pachilambo mpela mundu, gali gakutyochela kwa Mlungu.
3 Nambo maloŵe galigose gagakusasisya kuti Yesu ŵayiche pachilambo mpela mundu, nganigaŵa gakutyochela kwa Mlungu. Gelega gali maloŵe gakutyochela kwa jwakusisya Klistu gele mwapikene kuti gakwika, mwamti apano gali kala m’chilambo.
4 Ŵanache ŵangu ŵapamtima, jemanja mli ŵakutyochela kwa Mlungu, soni mwagomeche ŵakulochesya ŵaunami, ligongo jwele jwali jwakamulana ni jemanja ali jwamkulungwa kupunda jwele jwali jwakamulana ni chilambo.
5 Ŵakulochesya ŵaunamiŵa ali ŵakutyochela ku chilambo, ni ligongo lyakwe akusaŵecheta yakutyochela m’chilambo soni chilambo chikusichapikanila.
6 M’weji tuli ŵakutyochela kwa Mlungu. Jwalijose jwakummanyilila Mlungu akusapikanila maloŵe getu nambo jwalijose jwangatyochela kwa Mlungu ngakusapikanila. Mwelemu ni mwatukusagamanyilila maloŵe gasyesyene gakutyochela kwa Mlungu soni maloŵe gaunami.
7 Achalongo achimjangu ŵapamtima, kwende tupitilisye kunonyelana, ligongo chinonyelo chikusatyochela kwa Mlungu, soni jwalijose jwakwanonyela ŵane ali mwanache jwa Mlungu soni akusammanyilila Mlungu.
8 Jwalijose jwanganonyela ŵane jwangammanyilila Mlungu, ligongo Mlungu ali chinonyelo.
9 Mlungu ŵatulosisye chinonyelo mwakutumisya Mwanagwe jumopejo pachilambo kuti tupate umi kupitila mwa jwalakwejo.
10 Chinonyelo chelechi ngachikugopolela kuti m’weji twamnonyele Mlungu, nambo jwalakwejo ni juŵatunonyele ni kutumisya Mwanagwe mpela mbopesi jajapelechedwe kuti tuŵesoni pamtendele ni Mlungujo.*
11 Achalongo achimjangu ŵapamtima, naga Mlungu ŵatunonyele myiyi, nikuti m’wejisoni tukusosekwa kunonyelanaga.
12 Pangali mundu juŵam’weni Mlungu. Naga tukupitilisya kunonyelana, Mlungu chachiŵa ni m’weji soni chinonyelo chakwe mwa m’weji chichiŵa chakwanila.
13 Tukumanyilila kuti tuli ŵakamulana najo soni kuti jwalakwejo ali jwakamulana ni m’weji ligongo atupele msimu wakwe.
14 Nambosoni, m’weji twayiweni soni tukutendela umboni kuti Atati ŵatumisye Mwanagwe kuti aŵe mkulupusyo jwa chilambo.
15 Jwalijose jwakusajitichisya kuti Yesu ali Mwanache jwa Mlungu, akusaŵa jwakamulana ni Mlungu soni Mlungu akusaŵa jwakamulana najo.
16 Soni tukuchimanyilila chinonyelo chakwete Mlungu pa m’weji soni tukuchikulupilila.
Mlungu ali chinonyelo, soni mundu jwakusalosya chinonyelo akusaŵa jwakamulana ni Mlungu soni Mlungu akusaŵa jwakamulana ni mundujo.
17 Paligongo lyeleli chinonyelochi chiŵele chakwanila mwa m’weji kuti chitukole ufulu wakuŵecheta* pa lisiku lyakulamula, ligongo mpela mwaŵelele Yesu Klistu, ni mwatuŵelelesoni m’weji m’chilambochi.
18 Mu chinonyelo mwangali woga, nambo chinonyelo chakwanila chikusamasya* woga, ligongo woga ukusamtendekasya mundu kuŵa jwakutaŵika. Yisyene, mundu jwakwete woga chinonyelo chakwe chili changakwanila.
19 M’weji tukusalosya chinonyelo ligongo Mlungu ni juŵatandite kutunonyela.
20 Naga jwine akusati, “Ngusamnonyela Mlungu,” nambo ni kumŵengaga mlongo mjakwe, nikuti ali jwaunami. Pakuŵa mundu jwangamnonyela mlongo mjakwe jwakusamwona, nganaŵa amnonyele Mlungu jwanganamwoneje.
21 Soni jwalakwe ŵatupele lilamusi lyakuti, jwalijose jwakusamnonyela Mlungu akusosekwasoni kumnonyela mlongo mjakwe.
Maloŵe Gamwiŵanda
^ Kapena kuti, “mbopesi jakumasya ulemwa.”
^ Kapena kuti, “kuti chitusimichisye mumtima.”
^ Kapena kuti, “chikusatopola.”
