Buku Jandanda ja Samuyele 19:1-24
19 Panyuma pakwe Sauli ŵamsalile mwanache jwakwe Yonatani soni ŵakutumichila ŵakwe wosope kuti akusaka kumwulaga Daudi.
2 Pakuŵa Yonatani mwanache jwa Sauli ŵamnonyelaga mnope Daudi, Yonatanijo ŵamsalile Daudi kuti, “Sauli, baba ŵangu, akusaka kumwulaga mmwejo. Ni chonde mŵe ŵakusamala mnope malaŵi kundaŵi, soni mjawule mkajuŵe kumalo kwakusisika ni mkatame kukoko.
3 Unejo chinjawule ni kuja kwima chiŵandika ni baba ŵangu kwitinji kwachimkajuŵeko. Une chingaŵechete ni baba ŵanguwo yakwamba mmwejo. Ni naga ngapikane chilichose, ngumsimichisya nditu kuti chinjimsalila.”
4 Myoyo Yonatani ŵaŵechete yambone yakwamba Daudi kwa Sauli babagwewo. Ŵasalile babagwewo kuti, “Mwenye akamlemwechesya jwakutumichila jwawo Daudi, pakuŵa jwalakwe pangali chilichose chaŵalemwechesye wawojo, soni yosope yatesile jwalakwe yiŵele yakamuchisya kwa wawojo.
5 Jwalakwe ŵaŵisile umi wakwe pangosi kuti amwulaje Mfilisiti jula, mwamti Yehofa ŵakulupwisye Ayisalayeli wosope pangondo. Wawojo ŵayiweni yeleyi, mwamti ŵasangalele mnope. Sambano ligongo chichi akusaka kujileŵela myasi jangalemwa mwakumwulaga Daudi pali pangali ligongo lililyose?”
6 Pelepo Sauli ŵampikanile Yonatani, mwamti Saulijo ŵalumbile kuti, “Nditu ngulumbila pameso pa Mlungu jwaumi kuti jwalakwe ngawulajidwa.”
7 Panyuma pakwe Yonatani ŵamŵilasile Daudi ni kumsalila yosope yaŵaŵechetene ni Sauli. Myoyo Yonatani ŵamjigele Daudi ni kumjawusya kwa Sauli, mwamti Daudijo ŵapitilisye kumtumichila Sauli mpela muyaŵelele pandanda.
8 Pali papite ndaŵi, jabuchilesoni ngondo mwamti Daudi ŵapite kukumenyana ni Afilisiti soni ŵawuleje Afilisiti ŵajinji mpaka ŵane ŵakusigalawo ŵatisile pameso pakwe.
9 Sambano msimu wakusakala wakutyochela kwa Yehofa wayiche pa Sauli ali m’nyumba jakwe soni ali akamulile lipanga mmyala mwakwe. Pandaŵiji Daudi ŵaliji ali mkwimba nyimbo pakamulichisya masengo chida chakwe chakwimbila changonji.
10 Myoyo Sauli ŵalinjile kumsoma Daudi kuti amtwinyichisye kwipupa ni lipanga lila. Nambo Daudi jwalisyembile lipangalyo, mwamti lipangalyo lyajile kuja kusoma pepupa. Chilo chelecho Daudi ŵatisile ni kusyemba.
11 Pali papite kandaŵi Sauli ŵatumile ŵamitenga ku nyumba ja Daudi kuti akajilondele soni kuti akamwulaje jwalakwe kundaŵi kwakwe. Nambo Mikala ŵamkwakwe Daudi ŵamsalile jwalakwejo kuti, “Mkusosekwa mtile chilo chino naga ngamkutila pakwikana malaŵi chiŵe mli m’wile.”
12 Ndaŵi jijojo Mikala ŵamkopochesye Daudi kupitila pewindo, ni chakulinga chakuti Daudijo atile ni kukulupusya umi wakwe.
13 Mikala ŵajigele chindu chakusepa cha telafi* ni kuchiŵika pabedi.* Kaneko jwalakwe ŵajigele lwawu lwa ubweya* wa mbusi ni kuluŵika ku mtwe kwakwe, soni ŵajigele nguwo ni kuchiwunichila chakusepacho.
14 Sambano Sauli jwatumisye ŵandu kuti akamjigale Daudi. Nambo Mikala jwasalile ŵanduwo kuti, “Jwalakwe akulwala.”
15 Myoyo Sauli ŵatumisye ŵanduwo kuti akamlole Daudijo soni ŵasalile jemanjajo kuti, “Mkamjigale jwalakwejo pabedi pepo ni kwika najo kuti tumwulajile kunokuno.”
16 Ŵanduwo paŵajinjile m’nyumba ja Daudijo ŵagambile kuchisimana chindu chakusepa cha telafi* chila chili pabedi, soni lwawu lwa ubweya wa mbusi luli cha ku mtwe kwa chakusepacho pamalo pawukaŵele mtwe wa Daudi.
17 Pelepo Sauli ŵamwusisye Mikala kuti, “Ligongo chichi muloŵesye une chamti myiyi mwakumkunda mdani jwangu kuti atile ni kukulupuka?” Pelepo Mikala ŵamjanjile Saulijo kuti, “Jwalakwetu ŵasalile une kuti, ‘Mungunde kuti njawuleje naga ngamkukunda chinamwulaje.’”
18 Sambano Daudi ŵatisile ni kukulupusya umi wakwe, mwamti jwalakwe ŵapite kwa Samuyele ku Lama. Ali ayiche kweleko ŵamsalile Samuyelejo yosope yele Sauli ŵamtendele jwalakwe. Kaneko jwalakwe pampepe ni Samuyele ŵatyosile kweleko ni kuja kutama ku Nayoti.
19 Pali papitile ndaŵi ŵandu ŵamsalile Sauli kuti, “Daudi julatu ali ku Nayoti mumsinda wa Lama.”
20 Ndaŵi jijojo Sauli ŵatumisye ŵandu kuti akamkamule Daudi. Ŵanduwo paŵaweni achakulungwa ŵa ŵakulochesya ali mkulochesya soni Samuyele ali ajimi ni kwalongolelaga jemanjaji, msimu wa Mlungu wayiche pa ŵandu ŵaŵatumisye Sauliwo, mwamti jemanjajosoni ŵatandite kutenda yindu mpela ŵakulochesya.
21 Ŵandu paŵamsalile yeleyi Sauli, ndaŵi jijojo jwalakwe ŵatumisyesoni ŵandu ŵane. Nambo nombenawo ŵatandite kutenda yindu mpela ŵakulochesya. Myoyo Sauli ŵatumisyesoni ŵandu ŵane ŵaŵaliji gulu jatatu. Nambo nombenawo jemanjajo ŵatandite kutenda yindu mpela ŵakulochesya.
22 Pambesi pakwe nombenajo Sauli ŵapite ku Lama peko. Jwalakwe paŵayiche pachisima chine chekulungwa cha ku Seku ŵawusisye ŵandu kuti, “Ana Samuyele ni Daudi ali kwapi?” Jemanjajo ni ŵamjanjile kuti, “Ali ku Nayoti mu msinda wa Lama.”
23 Sambano Sauli paŵajendaga kutyoka paŵalijipo kwawula ku Nayoti mu msinda wa Lama, msimu wa Mlungu wayichesoni pa jwalakwejo. Myoyo jwalakwe ŵajendaga ali mkutenda yindu mpela jwakulochesya mpaka ŵayiche ku Nayoti mu msinda wa Lama.
24 Jwalakwe ŵawusilesoni yakuwala yakwe ni kutanda kutenda yindu mpela jwakulochesya pameso pa Samuyele, soni jwalakwe ŵagonile kweleko pasi ali makonope* lisiku lyosope mpaka chilo chosope chene. Ni ligongo lyakwe pana maloŵe gakuti, “Ana nombenajo Sauli ali jwakulochesya?”
Maloŵe Gamwiŵanda
^ Kapena kuti “mlungu jwapanyumba; mlungu jwakusepa.”
^ Ŵane akusati “pachindanda.”
^ Ŵane akusati “manyunya.”
^ Kapena kuti “mlungu jwapanyumba; mlungu jwakusepa.”
^ Kapena kuti “ali awete yamkatipe.”
