Buku Jandanda ja Mbili 14:1-17
14 Sambano mwenye Hilamu ŵa ku Tulo ŵatumisye ŵamitenga kwa Daudi. Ŵatumisye ŵamitengawo pampepe ni matabwa ga mkungusa, ŵandu ŵakusepa maganga gakutaŵila mapupa, soni ŵandu ŵakukamula masengo ga yindu yamatabwa. Ŵatumisye jemanjaji kuti akamtaŵile nyumba* Daudijo.
2 Daudi ŵamanyilile kuti Yehofa atendekasisye kuti jwalakwe atamilichiche mpela mwenye pasikati pa Ayisalayeli. Yaliji myoyo pakuŵa Mlungu ŵawukwesisye mnope umwenye wakwewo ligongo lya Ayisalayeli ŵandu ŵa Mlungujo.
3 Daudi ŵalombele achakongwe ŵajinji ku Yelusalemu, mwamti jwalakwe ŵaŵeleche ŵanache ŵajinji ŵachalume soni ŵachakongwe.
4 Mena ga ŵanache ŵaŵaŵeleche ali ku Yelusalemu gali aga: Samuwa, Sobabu, Natani, Solomo,
5 Ibihali, Elisuwa, Elipeleti,
6 Noga, Nefegi, Yafiya,
7 Elisama, Beliyada, soni Elifeleti.
8 Afilisiti paŵapikene kuti Daudi amŵisile kuŵa mwenye jwa Ayisalayeli wosope, Afilisiti wosope ŵayiche kukumsosasosa Daudi. Daudi paŵapikene yeleyi, ŵapite kuti akamenyane ngondo ni jemanjajo.
9 Afilisitiwo ŵayiche ni kutanda kwajimuchila ŵandu ŵaŵatamaga mu Chitiŵi* cha Lefaimu.
10 Sambano Daudi ŵawusisye kwa Mlungu kuti, “Ana njawule kukulimbana ni Afilisitiŵa? Ana chakapeleche jemanjajo mmyala mwangu?” Pelepo Yehofa ŵamjanjile jwalakwejo kuti, “Elo mjawule. Une nditu chingapeleche jemanjajo mmyala mwenu.”
11 Myoyo Daudi ŵapite ku Baala-pelasimu, ni ŵawuleje jemanjajo kweleko. Kaneko Daudi ŵatite, “Mlungu jwakuwona ŵagwisisye adani ŵangu ni mkono wangu, mpela mugakusatendela mesi pakugwisya lipupa.” Ni ligongo lyakwe malogo ŵagapele lina lyakuti Baala-pelasimu.*
12 Afilisitiwo ŵajilesile milungu jawo kweleko, mwamti Daudi paŵalamwile, milungujo ŵajijochiche pamoto.
13 Kaneko Afilisiti ŵala ŵayichesoni kukwajimuchila ŵandu ŵaŵatamaga mu chitiŵicho.
14 Pelepo Daudi ŵawusisyesoni kwa Mlungu. Nambo pandaŵi jeleji Mlungu jwakuwonajo ŵamjanjile jwalakwejo kuti, “Mkagamba kuyichila kwajawulila jemanjajo. Mmalomwakwe mjende mwakwasyungulila ni mkapite kunyuma kwawo. Kaneko mkalimbane ni jemanjaji kusogolo kwa mawukutu gakolanjidwa kuti baka.*
15 Pachimkapikane masegwe gampela kuguba kwa asilikali penani pa mawukutu ga bakago, mkajimuchile jemanjajo. Ligongo pelepo yichiŵa kuti Mlungu jwakuwona alongolele pasogolo penu kukwawulaga asilikali ŵa Afilisitiwo.”
16 Myoyo Daudi ŵatesile yaŵamlamwile Mlungu jwakuwona. Jemanjajo ŵawuleje gulu ja ngondo ja Afilisitiwo kutandila ku Gibiyoni mpaka kuja kwika ku Geseli.
17 Mbili ja Daudi japikaniche pachilambo chosope, soni Yehofa ŵatendekasisye ŵandu ŵa mitundu jine josope kuti amjogopeje jwalakwejo.
Maloŵe Gamwiŵanda
^ Kapena kuti, “nyumba jaumwenye.”
^ Chitiŵi chakusala pelepa chaliji chana malo gekulungwa gafulati.
^ Kugopolela kuti “Jwamkulungwa jwa Kugumula.”
^ Gelega gali maloŵe gakutyochela ku Chihebeli. Nambo kawoneche kasyesyene ka mawukutu gelega ngakakumanyika.
