Buku Jandanda ja Mbili 13:1-14
13 Sambano Daudi ŵakambilene ni achakulungwa ŵakulongolela ŵandu masausande soni ŵakulongolela ŵandu mahandede nambosoni ŵakulongolela ŵane wosope.
2 Kaneko Daudi ŵasalile Ayisalayeli wosope ŵaŵasongene kweleko kuti, “Naga akuyiwona kuti yili yambone soni yakwitichika pameso pa Yehofa Mlungu jwetu, kwende twatumisye ŵandu kuti akapeleche utenga kwa achalongo achimjetu kuti ayiche akuno ni kuŵa pampepe ni m’weji. Utengawo ujawule kwa achalongo achimjetu wosope ŵasigalile m’chilambo chosope cha Isalayeli. Akaŵilanjesoni ŵakutaga mbopesi pampepe ni Alefi ŵakutama m’misinda jawo jakola malo gakulichisya yilango.
3 Kaneko tukajigale libokosi lya chilanga lya Mlungu jwetu ni kwika nalyo akuno.” Jwalakwe ŵaŵechete yeleyi ligongo libokosilyo nganalisamalilaga mundaŵi ja Sauli.
4 Ŵandu wosope ŵaŵasongenewo ŵakamulene kuti atende yeleyi, ligongo ŵayiweni kuti yili yakuŵajilwa kwa ŵandu wosope.
5 Myoyo Daudi ŵasongangenye Ayisalayeli wosope, kutandila ŵandu ŵaŵatamaga ku Lusulo lwa Iguputo* mpaka kuja kwika ku Lebo-hamati.* Ŵasongangenye ŵanduwo ni chakulinga chakuti akajigale Libokosi lya Chilanga lya Mlungu jwakuwona ku Kiliyati-yelimu.
6 Daudi pampepe ni Ayisalayeli wosope ŵapite ku Baala, wawuli msinda wa Kiliyati-yelimu ku Yuda. Ŵapite kweleko kuti akajigale Libokosi lya Chilanga lya Yehofa Mlungu jwakuwona jwakusatama pampando wakwe waumwenye penani pa akelubi. Pelepo ni pakusaŵilanjila ŵandu lina lyakwe.
7 Nambope jemanjajo ŵalikwesisye libokosi lya Mlungu jwakuwona lila pa ngolo jasambano, kulityosya ku nyumba ja Abinadabu. Usa ni Ahiyo ni ŵaŵajilongolelaga ngolojo.
8 Daudi pampepe ni Ayisalayeli wosope ŵaliji mkusangalala ni mtima wawo wosope pameso pa Mlungu jwakuwona. Jemanjaji ŵajimbaga nyimbo pakamulichisya masengo yida yakwimbila mpela yakwimbila yangonji yakulekanganalekangana, tugoma,* yakwimbila yakusyungulila yakuwoneka mpela mbale, soni malipenga.
9 Nambo jemanjaji paŵayiche pamalo gakuputila mbeju ga Kidoni, Usa ŵatambasukwile mkono wakwe ni kukamula libokosilyo, pakuŵa ng’ombesyo syasigele panandi kuligwisya libokosilyo.
10 Pelepo Yehofa ŵamtumbilile mnope Usa, mwamti ŵamwuleje ligongo lyakutambasukula mkono wakwe ni kukamula Libokosi lya Chilanga. Jwalakwe ŵawilile pameso pa Mlungu papopo.
11 Nambo Daudi ŵatumbile mnope ligongo lyakuti Yehofa ŵamtumbilile Usa, mwamti malo gelega gakusakolanjidwa kuti Pelesi-usa* mpaka lelojino.
12 Myoyo Daudi ŵamjogwepe mnope Mlungu jwakuwona palisiku lyeleli, ni ŵatite, “Ana chinalijigale chamtuli Libokosi lya Mlungu jwakuwona kuti likayiche kwangutama une?”
13 Pelepo Daudi nganajigala Libokosi lya Chilangalyo ni kwika nalyo ku Msinda wa Daudi kwaŵatamaga. Mmalomwakwe jwalakwe ŵalijawisye libokosilyo ku nyumba ja Obedi-edomu jwa ku Gati.
14 Libokosi lya Mlungu jwakuwonalyo lyatemi ku liŵasa lya Obedi-edomu, mwamti lyaŵele m’nyumba jakwe kwa myesi jitatu. Kweleko Yehofa ŵaliji mkulipa upile liŵasa lya Obedi-edomu pampepe ni yindu yosope yaŵakwete.
Maloŵe Gamwiŵanda
^ Kapena kuti, “kutandila ku Siholi ku Iguputo.”
^ Kapena kuti, “mlango wa Hamati.”
^ Kagoma keleka kaŵaga ni tuyindu mumbali mwakwe, mwamti pakukagomba kapikanikaga mpela mchekeche.
^ Kugopolela kuti “Ukali Ukumgwila Usa.”
