Buku Jandanda ja Ayimwene 8:1-66
8 Pandaŵi jelejo Solomo ŵasongangenye achakulungwakulungwa ŵa Ayisalayeli, achimlongola wosope ŵa mbumba,* soni achimlongola ŵa achinangolo ŵa nyumba sya Ayisalayeli. Jemanjaji ŵayiche kwa Mwenye Solomo ku Yelusalemu kuti akanyakule libokosi lya chilanga lya Yehofa kutyochela mu Msinda wa Daudi, kwakuli ku Siyoni.
2 Achalume wosope ŵa ku Isalayeli ŵasongene pameso pa Mwenye Solomo kuti atende chisangalalochi* m’mwesi wa Etanimu,* wawuli mwesi wa 7.
3 Myoyo achakulungwakulungwa wosope ŵa Ayisalayeli ŵayiche, soni ŵakutaga mbopesi ŵanyakwile Libokosi lya Chilangalyo.
4 Jemanjajo ŵanyakwile Libokosi lya Yehofa, chitenti chakusimanilana soni yiwiya yosope yeswela yayaliji mu chitenticho ni kwawula nayo ku nyumba ja Mlungu. Ŵakutaga mbopesi pampepe ni Alefi ni ŵaŵanyakwile yinduyi.
5 Mwenye Solomo pampepe ni gulu josope ja Ayisalayeli ŵaŵaŵilanjidwe kuti akasimane ni mwenyewo ŵasongangene pasogolo pa Libokosilyo. Jemanjajo ŵawuleje ngondolo soni ng’ombe syejinji ni kusipelekaga mbopesi. Ngondolo soni ng’ombesyo syaliji syejinji mnope mwamti nganakombola kusiŵalanga.
6 Kaneko ŵakutaga mbopesi ŵayiche nalyo libokosi lya chilanga lya Yehofa lila ni kuliŵika pamalo pakwe. Ŵaliŵisile mu chipinda chamkati mnope cha nyumbajo kukwaliji ku Malo Geswela Mnope pasi pa mapapiko ga akelubi gala.
7 Myoyo akelubiwo ŵatambasukulile mapapiko gawo penani pa malo gaŵaliŵisile Libokosilyo, mwamti mapapiko ga akelubiwo gasiŵile penani pa Libokosilyo pampepe ni ndodo syakunyakulila Libokosilyo.
8 Ndodo syakunyakulila libokosilyo syaliji syelewu mwamti songa syakwe syawonechelaga ku Malo Geswela kusogolo kwa chipinda chamkati mnope. Nambo nganisiwonechelaga kusa kwa Malo Geswelago, mwamti yeleyi yipalipe papopo mpaka lelojino.
9 Mu Libokosilyo mwaliji mwangali chilichose akaŵe maganga gaŵilipe gele Mose ŵagaŵisile mu Libokosilyo ku Holebe. Ŵatesile yeleyi pandaŵi jele Yehofa ŵatesile chilanga ni Ayisalayeli paŵakopokaga m’chilambo cha Iguputo.
10 Ŵakutaga mbopesi paŵakopweche ku malo geswela, liwunde lyagumbele m’nyumba ja Yehofajo mpaka kusa.
11 Ŵakutaga mbopesiwo ŵalepele kupitilisya kutumichila ligongo lya liwundelyo pakuŵa uchimbichimbi wa Yehofa wagumbele pa nyumba josope ja Yehofajo.
12 Pelepo Solomo jwatite, “Wawo Yehofa ŵaŵechete kuti chachitama m’mawunde gachipi mnope.
13 Une ngombwele kwataŵila wawojo nyumba japenani mnope jajili malo gakutamilichika gakuti wawojo atameje mpaka kalakala.”
14 Kaneko mwenyewo ŵagalawiche ni kutanda kujipa upile gulu josope ja Ayisalayeli. Pandaŵiji gulu josopejo jaliji jili jijimi.
15 Jwalakwe ŵatite, “Nguŵenda kuti Yehofa achimbichikwe jwele ni pakamwa pakwe jwasasile yachachatendela Daudi baba ŵangu, soni ni mkono wakwe jwalakwe ayitesile yaŵaŵecheteyi. Jwalakwe ŵaŵechete kuti,
16 ‘Kutyochela pa lisiku lyanakopwesye ŵandu ŵangu Ayisalayeli m’chilambo cha Iguputo, une nganisagula msinda pasikati pa mbumba syosope sya Ayisalayeli wakuti ndaŵemo nyumba jakuti ŵandu achimbichisyejemo lina lyangu. Nambo une namsagwile Daudi kuti ŵalongoleleje ŵandu ŵangu Ayisalayeli.’
17 Baba ŵangu Daudi ŵasachililaga kutaŵa nyumba jakumanyika ni lina lya Yehofa Mlungu jwa Ayisalayeli.
18 Nambo Yehofa ŵamsalile Daudi baba ŵanguwo kuti, ‘Mtima wenu waliji wakusachilila kuti mtaŵe nyumba jakumanyika ni lina lyangu, sonitu nganimlemwa kusaka kutenda yeleyi.
19 Nambope mmwejo ngamtaŵa nyumbaji, nambo mwanache jwenu juchapagwe mwa mmwejo* ni juchachitaŵa nyumba jakumanyika ni lina lyangu.’
20 Yehofa atesile yindu yaŵasasile kuti chachitenda, pakuŵa une njinjile mmalo mwa baba ŵangu Daudi soni ndemi pampando waumwenye wa Isalayeli mpela muŵaŵechetele Yehofa. Nambosoni une ndaŵile nyumba jakumanyika ni lina lya Yehofa Mlungu jwa Ayisalayeli.
21 Une linganyisyesoni malo mwelemo gakutama Libokosi lyakola chilanga cha Yehofa chaŵatesile ni achinangolo ŵetu pandaŵi jele jwalakwejo ŵakoposyaga jemanjaji m’chilambo cha Iguputo.”
22 Kaneko Solomo ŵajimi pasogolo pa malo gakupelechela mbopesi ga Yehofa kusogolo kwa gulu ja Ayisalayeliwo, soni jwalakwe ŵakwesisye makono gakwe mwinani,
23 ni kutanda kuŵecheta kuti, “Wawo Yehofa Mlungu jwa Ayisalayeli, pangali Mlungu jwakulandana ni wawo chinga kwinani kapena pa chilambo chapasi. Wawo akusasunga chilanga soni kwalosya chinonyelo chakulupichika ŵakutumichila ŵawo ŵakusajenda pameso pa wawojo ni mtima wawo wosope.
24 Wawo atesile yaŵasasile kuti chachimtendela jwakutumichila jwawo jwali Daudi baba ŵangu. Wawojo ŵaŵechete yeleyi ni pakamwa pawo, soni lelo ayitesile ni mkono wawo.
25 Sambano wawo Yehofa Mlungu jwa Ayisalayeli atende yaŵasasile kuti chachimtendela jwakutumichila jwawo Daudi ŵali baba ŵangu. Paja wawo ŵasasile kuti, ‘Ngasipalepela kusimanikwa mundu kutyochela mumsela wenu wakupagwila jwakutama pampando waumwenye wa Isalayeli. Yichiŵa myoyo naga ŵanache ŵenuwo chachijendaga pameso pangu mwakusamala mpela yimwatite mmwejo pakwenda pameso pangu.’
26 Sambano wawo Mlungu jwa Ayisalayeli nguŵenda kuti yitendekwe yaŵasasile kuti chachimtendela jwakutumichila jwawo Daudi ŵali baba ŵangu.
27 “Nambo ana yili yisyene kuti wawo Mlungu chatame pachilambo chapasi? Alole! Wawo nganaŵa akwanile kwinani, elo kwinani kusyesyeneko. Sambano naga nganaŵa akwanile kweleko ni kuli uli nyumba jindaŵileji?
28 Wawo Yehofa Mlungu jwangu sambano apikane lipopelo lya jwakutumichila jwawo soni kuŵenda kwakwe kwakuti amsalalile mtima. Chonde apikane kulila kwa kuŵenda chikamuchisyo soni lipopelo lyakupopela jwakutumichila jwawo pameso pawo lelo.
29 Nguŵenda kuti meso gawo galoleje pa nyumba ajino chilo ni musi, galoleje pamalo gele wawojo ŵaŵechete kuti, ‘Lina lyangu lichiŵa pamalo gelego,’ ni chakulinga chakuti apikane lipopelo lya jwakutumichila jwawo pakupopela ali alolite malo agano.
30 Chonde apikaneje lipopelo lya jwakutumichila jwawo lyakuŵenda kuti amsalalile mtima. Soni apikaneje lipopelo lya ŵandu ŵawo Ayisalayeli pakuŵenda ali alolite malo agano. Chonde apikaneje kuŵendaku wawo pali kwinaniko kumalo gawo gakusatama. Elo, wawo apikaneje ni kululuka.
31 “Mundu pakumjimba magambo gakuti amlemwechesye mjakwe, ni mjakwejo akumtendekasya jwalakwe kulumbila, naga mundujo akwika pasogolo pa malo gawo gakupelechela mbopesi gagali m’nyumba ajino ligongo lyakulumbila kwatesileko,
32 chonde wawo apikane pali kwinaniko soni atendepo kandu ni kwalamula ŵakutumichila ŵawo mwakusala jwali jwakulemwa nambosoni amwuchisye yakusakala yaŵatesileyo pamtwe pakwe. Asalesoni mundu jwali jwangalemwa ni kumwuchisya yambone mwakamulana ni yindu yakulungama yaŵatesile.
33 “Ŵandu ŵawo Ayisalayeli pagomechedwe ni adani ŵawo ligongo lyakuti akwalemwechesya wawojo mwakuwilisyawilisya, kaneko jemanjajo akuwujila kwa wawojo ni kuchimbichisya lina lyawo soni kupopela ni kuŵenda kuti ŵasalalile mtima jemanjajo ali m’nyumba ajino,
34 wawojo ŵapikane jemanjajo ali kwinaniko soni kwakululuchila yalemwisye ŵandu ŵawo Ayisalayeli soni ŵatendekasye jemanjaji kuwujila ku chilambo chele wawojo ŵapele achinangolo ŵawo.
35 “Kwinani pakuwugaliche mwamti wula ngajikugwa ligongo lyakuti jemanjaji akwalemwechesya wawojo mwakuwilisyawilisya ni kaneko jemanjaji akupopela ali alolite kumalo agano ni kulichimbichisya lina lyawo, soni jemanjaji akuleka yakulemwa yawo ligongo lyakuti wawojo ŵajamwiche,
36 wawojo ŵapikane jemanjajo ali kwinaniko soni kwakululuchila yalemwisye ŵakutumichila ŵawo ŵali ŵandu ŵawo Ayisalayeli pakuŵa wawojo chachajiganya jemanjaji ya matala gambone gakusosekwa kwendamo. Soni chachiyikasya wula m’chilambo chawo chele wawojo ŵachipeleche kwa ŵandu ŵawo kuti chiŵe chawo.
37 “Naga m’chilambomo mukugwa sala kapena milili, mbepo jamtukuta jakonanga, mbeju sikukamulwa chimbulukuku, sombe kapena yitete yine yakonanga, kapenasoni naga adani ŵawo akwajimuchila jemanjajo mu umo mwa misinda ja m’chilambo chawo kapena naga ukugwa mlili uliwose wakuwulaga kapena ulwele,
38 kaneko ŵandu ŵawo wosope Ayisalayeli kapena mundu jwalijose akupopela lipopelo lililyose, kapena kuŵenda kwa mtundu uliwose kwakuti ŵasalalile mtima (pakuŵa jwalijose akusamanyilila kupweteka kwakuli mumtima mwakwe) nambosoni pakutenda yeleyi ali akwesisye makono gawo mwinani soni ali alolite ku nyumba ajino,
39 wawojo ŵapikane jemanjajo ali kwinaniko kumalo gawo gakusatama soni ŵakululuchile ni kutendapo kandu mwakamulana ni nganijo. Nambosoni amwuchisye jwalijose mwakamulana ni matala gakwe, pakuŵa wawojo akusamanyilila yayili mumtima mwakwe (wawojo jikape ni ŵakusamanyilila yayili mumtima mwa mundu jwalijose).
40 Atendeje yeleyi ni chakulinga chakuti jemanjajo ŵajogopeje wawojo kwa masiku gawo gosope gachachitama ni umi m’chilambo chele wawojo ŵachipeleche kwa achinangolo ŵetu.
41 “Nambosoni pakwamba ya mlendo jwanganaŵa mu gulu ja ŵandu ŵawo Ayisalayeli soni jwatyochele ku chilambo chakwakutalika ligongo lyakupikana ya lina lyawo*
42 (pakuŵa jemanjajo chachipikana yakwamba lina lyawo lyekulungwa soni ya machili gawo gekulungwa), ni jwalakwejo akwika ni kupopela ali alolite ku nyumba ajino,
43 wawojo ŵapikane jemanjajo ali kwinaniko kumalo gawo gakusatama. Nambosoni atendeje yosope yele mlendojo ŵaŵendile wawojo. Myoyo ŵandu wosope ŵa pachilambo chapasi chachimanyilila lina lyawo soni chachajogopa mpela mwakusatendela ŵandu ŵawo Ayisalayeli. Nambosoni jemanjaji chachimanyilila kuti ŵandu akusaŵilanjila pa lina lyawo m’nyumba ajino jandaŵileji.
44 “Naga ŵandu ŵawo akwawula kungondo jakulimbana ni adani ŵawo mwakamulana ni kwaŵasalile kuti ajawule, jemanjajo ni akupopela kwa wawojo Yehofa ali alolite ku msinda wele wawojo ŵawusagwile soni ali alolite ku nyumba jele une ndaŵile jakumanyika ni lina lyawo,
45 pelepo wawojo ali kwinaniko apikane lipopelo lya jemanjaji soni kuŵenda kwawo kwakuti ŵasalalile mtima ni kwakamuchisya.
46 “Naga jemanjajo akwalemwechesya wawojo (pakuŵa pangali mundu jwangalemwa), mwamti wawojo akwatumbilila jemanjajo ni kwaleka mmyala mwa adani ŵawo, soni adani ŵawowo akwajigala jemanjaji kuti akaŵe achikapolo ku chilambo chawo chinga chilambo chakwakutalika kapena chapakuŵandika;
47 ni kaneko jemanjajo lunda lukwayichila ali kuchilambo chaŵajigalidwe kuti akaŵe achikapolocho, ni akuwujila kwa wawojo soni kwaŵenda kuti ŵasalalile mtima ali kuchilambo cha adani ŵawocho ni kuŵechetaga kuti, ‘M’weji tulemwisye, tutesile yindu yakulemwecheka soni yakusakala,’
48 kaneko jemanjajo akuwujila kwa wawojo ni mtima wawo wosope soni ni umi wosope ali kuchilambo cha adani ŵawocho ŵele ŵajigele jemanjajo kuti akaŵe achikapolo soni naga jemanjajo akupopela ali alolite kuchilambo chakumangwawo chele wawojo ŵachipeleche kwa achinangolo ŵawo soni ali alolite kumsinda wele wawojo awusagwile soni kunyumba jakumanyika ni lina lyawo jandaŵileji,
49 wawojo apikane lipopelo lyawo ali kwinaniko kumalo gawo gakusatama soni apikane kuŵenda kwawo kwakuti ŵasalalile mtima ni kwakamuchisya. Nambosoni wawojo akululuche yakulemwa ya ŵandu ŵawo.
50 Ŵakululuchile yakulemwa yosope yaŵatesile pameso pawo. Wawojo chachatendekasya jemanjajo kuŵa chindu chakutesya chanasa pameso pa adani ŵawo mwamti adani ŵawowo chachatendela chanasa jemanjajo,
51 (pakuŵa jemanjaji ali ŵandu ŵawo soni ali chipanje chawo. Jemanjaji ŵalasile mnope ku Iguputo. Ŵalasile mpela kuti jemanjaji ali yisyano yayili mu ufuni wakolela moto. Nambo ŵalakwe ŵakopwesye m’chilambomo).
52 Chonde apikane kuŵenda kwa jwakutumichila jwawo kwakuti amsalalile mtima soni apikaneje kuŵenda kwa ŵandu ŵawo Ayisalayeli pandaŵi jilijose jakupopela kwa wawojo kuti ŵasalalile mtima.*
53 Pakuŵa wawojo Ambuje Ŵakulungwa Mnope Yehofa ŵasagwile jemanjaji kuti aŵe chipanje chawo kutyochela pasikati pa ŵandu wosope ŵa pachilambo chapasi. Ŵatesile yeleyi mwakamulana ni yele wawojo ŵaŵechete kupitila mwa jwakutumichila jwawo Mose pandaŵi jele wawojo ŵakoposyaga achinangolo ŵetu kutyochela m’chilambo cha Iguputo.”
54 Solomo paŵagambile kumalisya kupopela kwa Yehofa lipopelo lyosopeli soni kuŵenda kwakwe kwakuti amsalalile mtima, jwalakwe ŵajimwiche pasogolo pa malo gakupelechela mbopesi ga Yehofa gala pamalo pele jwalakwe jwatindiŵele ali akwesisye makono gakwe mwinani.
55 Kaneko jwalakwe ŵajimi kuti ajipe upile gulu josope ja Ayisalayeli mwakwesya maloŵe. Jwalakwe ŵaŵechete kuti,
56 “Achimbichikwe Yehofa jwapeleche malo gakupumulila kwa ŵandu ŵakwe Ayisalayeli. Jwalakwe atesile yeleyi mwakamulana ni yaŵasasile kuti chachitenda. Pa yindu yambone yosope yaŵasasile kupitila mwa jwakutumichila jwakwe Mose kuti jwalakwe chachitenda, pangali maloŵe atamose gamo gele nganigakwanilichikwa.
57 Nguŵenda kuti Yehofa Mlungu jwetu aŵe ni m’weji mpela yiŵatite pakuŵa ni achinangolo ŵetu, soni nguŵenda kuti jwalakwe akatujasa m’weji kapena kutuleka.
58 Nguŵenda kuti awute mitima jenu ni kuŵa pa jwalakwe ni chakulinga chakuti tujendeje m’matala gakwe, kupikanila malamusi gakwe soni kuti tutendeje yosope yaŵalamwile achinangolo ŵetu kuti ayikuyeje.
59 Nguŵenda kuti maloŵe ganguga gele une mbendile kwa Yehofa kuti atusalalile mtima, gakatyoka pameso pa Yehofa Mlungu jwetujo musi ni chilo chakwe. Nguŵendasoni kuti jwalakwe amkamuchisye jwakutumichila jwakwe soni ŵandu ŵakwe Ayisalayeli mwakamulana ni yakusosechela ya lisiku lililyose.
60 Atende yeleyi ni chakulinga chakuti ŵandu wosope ŵa pachilambo chapasi amanyilile kuti Yehofa ali Mlungu jwakuwona. Pangalisoni Mlungu jwine.
61 Myoyo, mlipelecheje kwa Yehofa Mlungu jwetu ni mtima wenu wosope mwakukuya yosope yaŵatulamwile soni kupikanila malamusi gakwe mpela mwamkutendela lelojino.”
62 Sambano mwenyewo pampepe ni Ayisalayeli wosope ŵaŵaliji nawo ŵapeleche mbopesi syejinji pameso pa Yehofa.
63 Solomo ŵapeleche mbopesi sya mkamulano kwa Yehofa. Jwalakwe ŵapeleche ng’ombe syakwana 22,000 soni ngondolo syakwana 120,000. Myoyo mwenyewo soni Ayisalayeli wosopewo ŵawugulile nyumba ja Yehofa.
64 Palisiku lyelelyo mwenyewo ŵaswejesye pasikati pa luŵala lwekulungwa lwalwaliji pasogolo pa nyumba ja Yehofa, pakuŵa pamalo pelepa ni paŵasosekwaga kupelechela mbopesi syakutinisya, mbopesi syambeju, soni nduli syamawuta kuti siŵe mbopesi syamkamulano. Ŵatesile yeleyi ligongo malo gakupelechela mbopesi gakopa gagaliji pasogolo pa nyumba ja Yehofa galiji gamwana mwamti nganigaŵa gakwanila kupelechelapo mbopesi syakutinisya, mbopesi syambeju soni nduli syamawuta kuti siŵe mbopesi syamkamulano.
65 Pandaŵi jeleji Solomo ŵatesile chisangalalo pampepe ni Ayisalayeli wosope ŵaŵaliji gulu jekulungwa jakutyochela ku Lebo-hamati mpaka kuja kwika ku Chitiŵi* cha ku Iguputo. Ŵatesile chisangalalochi pameso pa Yehofa Mlungu jwetu kwa masiku 7 soni kwa masiku gane 7. Masiku gosope pampepe galiji 14.
66 Palisiku lyakuyichisya, mwenyewo ŵasalile ŵandu wosope kuti ajawuleje kumangwawo mwamti ŵanduwo ŵapele upile mwenyewo soni ŵawujilaga kumangwawo ali mkusangalala ni kupikana chenene mumtima ligongo lya yindu yambone yele Yehofa ŵamtendele jwakutumichila jwakwe Daudi pampepe ni Ayisalayeli ŵaŵaliji ŵandu ŵakwe.
Maloŵe Gamwiŵanda
^ Alole Kugopolela kwa Maloŵe Gane.
^ Chelechi chili chisangalalo cha masakasa.
^ Alole Yakumbesi B15.
^ Mu Chihebeli ŵatiga, “juchachikopoka m’chiwunu mwenu.”
^ Kapena kuti “ligongo lyakuti apikene ya mbili jawo.”
^ Kapena kuti “ŵapikaneje jemanjajo pakuŵenda chilichose kwa wawojo.”
^ Chitiŵi chakusala pelepa chaliji chana lusulo.
