Buku Jandanda ja Ayimwene 12:1-33
12 Lehobowamu ŵapite ku Sekemu pakuŵa Ayisalayeli wosope ŵayiche ku Sekemuko kuti amŵiche jwalakwejo kuŵa mwenye.
2 Sambano Yelobowamu mwanache jwa Nebati ali agambile kupikana yeleyi (jwalakwe ŵaliji chiŵela ku Iguputo ligongo lyakumtila Mwenye Solomo mwamti jwatamaga ku Iguputoko),
3 Ayisalayeli ni paŵatumisye utenga wakumŵilanga jwalakwe. Panyuma pakwe Yelobowamu ni gulu josope ja Ayisalayeli ŵayiche kwa Lehobowamu ni kumsalila kuti,
4 “Baba ŵenu ŵatendekasisye likongwa lyetu kuŵa lyakupweteka. Nambo naga mmwejo mkutendekasya masengo gakupweteka ga baba ŵenu kuŵa gangasawusya soni naga mkutupepuchisya likongwa lyakusitopa lyele baba ŵenu ŵaliŵisile pa m’weji nikuti m’wejo tuchimtumichila.”
5 Pelepo jwalakwe ŵajanjile ŵanduwo kuti, “Ajawuleje akayichesoni panyuma pa masiku gatatu.” Myoyo ŵanduwo ŵawujile.
6 Kaneko Mwenye Lehobowamu ŵapite kukuwusya lunda kwa ŵandu ŵachikulile ŵele ŵamtumichilaga Solomo babagwe ŵa Lehobowamujo pandaŵi jiŵaliji umi. Jwalakwe ŵawusisye kuti, “Ana akuyiwona kuti ngajanje kuti chichi ŵandu ŵeleŵa?”
7 Jemanjajo ŵamjanjile jwalakwejo kuti, “Naga mmwejo mkuŵa jwakutumichila jwa ŵandu ŵeleŵa lelo soni naga mkutenda yakumŵenda jemanjajo ni kwajanga mwakwasalalila mtima, ŵandu ŵeleŵa chachiŵa ŵakutumichila ŵenu kwandaŵi syosope.”
8 Nambo jwalakwe nganapikanila lunda lwaŵamsalile ŵandu ŵachikulile ŵala, mwamti ŵapite kuja kuwusya lunda kwa ŵachinyamata ŵaŵakusile yimpepe ni jwalakwejo ŵele pandaŵiji ŵaliji ŵakutumichila ŵakwe.
9 Jwalakwe ŵawusisye jemanjajo kuti, “Ana akuyiwona kuti twajanje kuti chichi ŵandu ŵeleŵa ŵakuŵecheta kwa une kuti, ‘Mtupepuchisye likongwa lyele baba ŵenu ŵaliŵisile pa m’weji’?”
10 Anyamata ŵaŵakusile yimpepe ni jwalakwejowo ŵamjanjile kuti, “Ŵandu ŵakwasalila wawojowo kuti, ‘Baba ŵenu ŵatendekasisye likongwa lyetu kuŵa lyakusitopa nambo mmwejo mkusosekwa kutupepuchisya, akajanje jemanjajo kuti, ‘Chala changu chamwana chichiŵe chejimbale kupunda chiwunu cha baba ŵangu.
11 Baba ŵangu ŵamtwichiche jemanja likongwa lyakusitopa, nambo une chinjonjechesye usito wa likongwa lyenulyo. Baba ŵangu ŵamkwapulaga jemanja ni yikoti wamba, nambo une chinjimkwapula ni yikoti yamiŵa.’”
12 Yelobowamu pampepe ni ŵandu wosope ŵala ŵayiche kwa Lehobowamu palisiku lyatatu mpela muŵaŵechetele mwenyewo kuti, “Akayichesoni panyuma pa masiku gatatu.”
13 Nambo mwenyewo ŵajanjile ŵanduwo mwachipongwe. Jwalakwe nganapikanila lunda lwaŵampele ŵandu ŵachikulile ŵala.
14 Jwalakwe ŵajanjile jemanjajo mwakamulana ni yaŵaŵechete ŵachinyamata achimjakwe ŵala kuti, “Baba ŵangu ŵatendekasisye likongwa lyenu kuŵa lyakusitopa mnope, nambo une chinjonjechesye usito wa likongwa lyenulyo. Baba ŵangu ŵamkwapulaga jemanja ni yikoti wamba, nambo une chinjimkwapula ni yikoti yamiŵa.”
15 Myoyo mwenyewo nganiŵapikanila ŵanduwo pakuŵa Yehofa ni juŵatendekasisye yeleyi. Yaliji myoyo ni chakulinga chakuti gakwanilichikwe maloŵe ga Yehofa gakwawula kwa Yelobowamu mwanache jwa Nebati gele ŵagaŵechete kupitila mwa Ahiya jwa ku Silo.
16 Sambano Ayisalayeli wosope paŵayiweni kuti mwenyewo akanile kwapikanila jemanjajo, ŵanduwo ŵamsalile mwenyejo kuti, “Ana m’weji mwa Daudi mwana chetu chilichose? M’weji pangali chatuchipochela mwa mwanache jwa Jese. Jemanja Ayisalayeli, jwalijose awujile ku milungu jakwe. Sambano jemanja yisukulu ya Daudi, chimlamulileje nyumba jenupe basi.” Ni maloŵe gelega, Ayisalayeliwo ŵawujile m’nyumba syawo.
17 Nambo Lehobowamu ŵapitilisye kwalamulila Ayisalayeli ŵaŵatamaga m’misinda ja Yuda.
18 Kaneko mwenye Lehobowamu ŵamtumile Adolamu juŵaliji jwakwalolela ŵandu ŵaŵakamulaga masengo gakwakanganichisya kuti ajawule kwa Ayisalayeli. Nambo Ayisalayeliwo ŵamponyisye maganga jwalakwe mpaka kumwulaga. Mwenye Lehobowamu jwakombwele kukwela ligaleta* lyakwe ni kutilila ku Yelusalemu.
19 Kutandila pelepo, Ayisalayeli aŵele ali mkujijimuchila nyumba ja Daudi mpaka lelojino.
20 Ayisalayeli wosope paŵapikene kuti Yelobowamu awusile, ŵamŵilasile jwalakwe kuti ayiche kwaŵasongene jemanjajo ni ŵamŵisile kuŵa mwenye jwakuti ŵalamulileje Ayisalayeli wosope. Pangali ŵaŵaliji ku mbali ja ŵandu ŵa m’nyumba ja Daudi akaŵe ŵa mumbumba ja Yudape basi.
21 Lehobowamu paŵakopochele ku Yelusalemu, mwachitemachitema jwalakwe jwasongangenye asilikali wosope ŵakumanyilila kuputa ngondo ŵakwana 180,000 ŵakutyochela mumbumba ja Yuda soni Benjamini. Ŵatesile yeleyi ni chakulinga chakuti amenyane ni ŵandu ŵa m’nyumba ja Ayisalayeli pakusaka kuwuchisya umwenyewo kwa Lehobowamu mwanache jwa Solomo.
22 Kaneko maloŵe ga Mlungu jwakuwona gamyichile Semaya mundu jwa Mlungu jwakuwona. Maloŵe gakwe galiji gakuti,
23 “Mkaŵechete kwa Lehobowamu mwanache jwa Solomo mwenye jwa Yuda soni kwa ŵandu wosope ŵa m’nyumba ja Yuda soni Benjamini ni kwa ŵandu ŵane wosope kuti,
24 ‘Yehofa aŵechete kuti, “Mkajawula kuja kumenyana ni Ayisalayeli ŵali achalongo achimjenu. Jwalijose awujile kumangwakwe pakuŵa une ni jwandendekasisye yeleyi.”’” Myoyo jemanjajo ŵapikanile maloŵe ga Yehofa mwamti jwalijose ŵawujile kumangwakwe mwakamulana ni yaŵasalile Yehofa.
25 Kaneko Yelobowamu ŵataŵile* msinda wa Sekemu mu dela jamatumbi ja Efulayimu ni kutamaga kweleko. Panyuma pakwe jwalakwe ŵatyosile kweleko ni kuja kutaŵa* msinda wa Penueli.
26 Yelobowamu ŵatandite kuŵecheta mumtima mwakwe kuti, “Sambanotu umwenye chiwuwujile ku nyumba ja Daudi.
27 Naga ŵandu ŵeleŵa akupitilisya kwawula kukupeleka mbopesi ku nyumba ja Yehofa ku Yelusalemu nikuti mitima ja ŵanduŵa chijiwujile kwa ambuje ŵawo Lehobowamu, mwenye jwa Yuda. Nditu jemanjaji chambulaje une kaneko ni kuwujila kwa Lehobowamu mwenye jwa Yuda.
28 Mwenyejo ali awusisye lunda, ŵapanganyisye ŵanache ŵaŵili ŵang’ombe ni kwasalila ŵanduwo kuti, “Yili yakusawusya kuti jemanja mjawuleje ku Yelusalemu. Jemanja Ayisalayeli, aju ni Mlungu jwenu juŵamkopwesye m’chilambo cha Iguputo.”
29 Kaneko jwalakwe ŵamŵisile mwanache jwa ng’ombe jumpepe ku Beteli soni jwinejo ŵamŵisile ku Dani.
30 Yeleyi yatendekasisye kuti ŵanduwo alemwe, soni ŵanduwo ŵajawulaga mpaka ku Dani kuja kumtindiŵalila mwanache jwa ng’ombe juŵaliji kweleko.
31 Jwalakwe ŵataŵilesoni nyumba syakutindiŵalila milungu m’malo gakwela, soni ŵasagwile ŵandu wamba ŵanganaŵa Alefi kuti aŵe ŵakutaga mbopesi.
32 Konjechesya pelepa, Yelobowamu ŵatesile yakuti ŵandu asangalaleje m’mwesi wa 8 palisiku lya 15 lya mwesiwo mpela muyaŵelaga ni chisangalalo chachatendekwaga ku Yuda. Pamalo gakupelechela mbopesi gaŵataŵile ku Beteli ŵapelechelagapo mbopesi kwa ŵanache ŵa ng’ombe ŵaŵapanganyisye ŵala. Soni ku Beteliko ŵaŵisile ŵakutaga mbopesi kuti atumichileje pamalo gakwela gele jwalakwe ŵapanganyisye.
33 Jwalakwe ŵatandite kupeleka mbopesi pamalo gakupelechela mbopesi gaŵataŵile ku Beteli gala pa lisiku lya 15 lya mwesi wa 8, mwesi wele jwalakwe ŵawusagwile msyene. Nambosoni jwalakwe ŵatamilikasisye chisangalalo chakuti Ayisalayeli achitendeje. Jwalakwe ŵakwesile pamalo gakupelechela mbopesi kuti akapeleche mbopesi ni kutenda yakuti sikoposyeje lyosi.
Maloŵe Gamwiŵanda
^ Ligaleta lili ngolo jakuwutidwa ni mahachi.
^ Kapena kuti “ŵataŵile lutenje lwa msinda.”
^ Kapena kuti “kutaŵa lutenje lwa msinda.”
