Chikalata Chandanda Chakwawula kwa Akolinto 5:1-13
5 Mbili jipikaniche kuti pasikati penu pakutendekwa yachikululu.* Chikululu* chakwe chili chakuti atamose ŵandu ŵamitundu jine ŵangatenda. Mbikene kuti mundu jwine akugona ni ŵakongwe ŵa babagwe.
2 Sambano ana jemanja mkusangalala ni yeleyi? Ana ngamkusosekwa kulitendela chanasa, ni chakulinga chakuti mundu jwatesile yeleyo mumtyosye pasikati penu?
3 Atamose nganimba kweleko, nambo munganisyo* ndili ni jemanja. Mwamti mundu jwatesile yeleyi namlamwile kala mpelaga ndili kukoko ni jemanja.
4 Sambano pachimsongane pampepe m’lina lya Ambuje ŵetu Yesu, mmanyilile kuti munganisyo ndili ni jemanja pampepe ni machili ga Ambuje ŵetu Yesu.
5 Pelepo mumpeleche mundujo kwa Satana kuti nganisyo syakusakala syaŵayiche nasyo mumpingo sityoche. Yeleyi yichitendekasya kuti pa lisiku lya Ambuje, mpingowo ukole nganisyo syambone pangani ja ulemwa.
6 Kulikwesya kwenu nganikuŵa kwambone. Ana ngamkumanyilila kuti chakusasaŵisya chamnono chikusasasaŵisya mtanda wosope?
7 Mtyosye chakusasaŵisya chakalacho pasikati penu kuti mŵe mtanda wasambano, pakuŵa jemanja mli ŵangali chakusasaŵisya. Pakuti Klistu, jwali mwanache jwangondolo jwetu jwa Pasika, apelechedwe mpela mbopesi.
8 Myoyo, kwende tutendeje chisangalalochi, ngaŵaga ni chakusasaŵisya chakala kapena chakusasaŵisya chakwimila yakusakala ni ulemwa, nambo ni mikate* jangali chakusasaŵisya jakwimila yambone soni yakuwona.
9 M’chikalata changu, namlembele jemanja kuti mleche kukamulana ni ŵandu ŵakutenda yachikululu.*
10 Nambotu nganingopolelaga kuti mwaŵambaleje ŵandu ŵachikululu* ŵa m’chilambochi, ŵaumbombo, ŵawiyi kapena ŵakutindiŵalila milungu jakusepa. Yikaŵe myoyo, nikuti mkasosekwe kutyoka m’chilambochi.
11 Nambo sambano ngumlembela kuti mleche kukamulana ni jwalijose jwakulikolanga kuti ali jwakulupilila jwali jwachikululu,* kapena jwaumbombo, jwakutindiŵalila milungu jakusepa, jwakulalata, jwakolelwa, kapena jwawiyi. Atamose kulya, mkalyaga najo mundu jwelejo.
12 Ana une ngusosekwa nalamuleje ŵandu ŵali kusa kwa mpingo? Ngati jemanja ni ŵamkusimwalamula ŵele ŵali mkati,
13 nambo Mlungu ni jwakusiŵalamula ŵele ŵali kusa? “Mumtyosye mundu jwakusakalajo pasikati penu.”
Maloŵe Gamwiŵanda
^ Mu Chigiliki akusati, por·neiˈa. Alole Kugopolela kwa Maloŵe Gane.
^ Mu Chigiliki akusati, por·neiˈa. Alole Kugopolela kwa Maloŵe Gane.
^ Maloŵe gakwe gandanda, “mwausimu.”
^ Mikate jakala ŵajipanganyaga ni utandi wa tiligu kapena balele.
^ Mu Chigiliki akusati, por·neiˈa. Alole Kugopolela kwa Maloŵe Gane.
^ Mu Chigiliki akusati, por·neiˈa. Alole Kugopolela kwa Maloŵe Gane.
^ Alole Kugopolela kwa Maloŵe Gane.
