Chikalata Chandanda Chakwawula kwa Akolinto 12:1-31
12 Achalongo achimjangu, pakwamba ya mituka jakutyochela kwa Mlungu, ngangusaka kuti mŵe ŵangamanyilila.
2 Jemanja mkumanyilila kuti pamwaliji ŵandu ŵamitundu,* mwakuyaga milungu jakusepa jele ngajikusaŵecheta, mpaka mwasokonechele ligongo lyakujikuya kulikose kwajamlongolelaga.
3 Sambano ngusaka mmanyilile kuti pangali mundu jwele msimu wa Mlungu ukumlongolela jwampaka ajile kuti, “Yesu ali jwamlweseche.”* Myoyosoni, mundu jwele msimu weswela ngawukumlongolela nganaŵa aŵechete kuti, “Yesu ali Ambuje.”
4 Sambano mituka jipali jakulekanganalekangana, nambo msimu wawukusapeleka mituka josopejo uli umpepe.
5 Panasoni mautumiki gakulekanganalekangana, nambo gosopego tukusatendela Ambuje ŵamo.
6 Nambosoni pana masengo gakulekanganalekangana, nambo Mlungu jwakusapeleka machili gakutendela masengoga mwa jwalijose, ali jumo.
7 Nambo chikamuchisyo chawukusapeleka msimu weswela mwa jwalijose chikusawonechela chenene. Mlungu ni jwakusapeleka chikamuchisyochi kuti chapindulichisyeje ŵane.
8 Mwachisyasyo, mwa msimu uwowo jwine akusapochela machili kuti aŵecheteje mwalunda, soni mwa msimu uwowo jwine akusapochela machili kuti aŵecheteje yindu yakuti ŵane ngakuyimanyilila.
9 Mwa msimu uwowo jwine akusakola chikulupi, soni mwa msimu umo pewo jwine akusapochela machili gakwaposya* ŵane.
10 Jwinesoni akusapochela machili kuti atendeje yakusimonjesya, jwine kuti akomboleje kusala yamsogolo, soni jwine kuti apikanichisyeje maloŵe gakutyochela kwa Mlungu. Jwine akusapochela machili kuti aŵecheteje yiŵecheto yachilendo, soni jwine kuti agopoleleje yiŵechetoyo.
11 Nambotu msimu umo pewo ni wawukusamtendekasya jwalijose kutenda masengo gelego, mwakamulana ni yawukusaka msimuwo.
12 Pakuŵa chilu chili chimpepe nambo chikwete yiŵalo yejinji. Soni yiŵaloyo, atamose kuti yili yejinji, nambo yikusapanganya chilu chimpepe. Mwelemu ni mwaŵelelesoni Klistu.
13 Pakuŵa ni msimu umo wosopewe twabatisidwe ni kuŵa chilu chimpepe, chinga tuli Myuda kapena Mgiliki, chinga tuli kapolo kapena mfulu,* mwamti wosopewe twapochele msimu umo pewo.
14 Yisyene, chilu changapanganyidwa ni chiŵalo chimpepe nambo ni yiŵalo yejinji.
15 Naga lusajo lukuŵecheta kuti, “Pakuŵa une nganimba mkono, nikuti nganimba mbali ja chilu,” lyeleli nganiliŵa ligongo lyakutendekasya kuti lusajolo lukaŵa mbali ja chilu.
16 Naga liwiwi likuŵecheta kuti, “Pakuŵa une nganimba liso, nikuti nganimba mbali ja chilu,” lyeleli nganiliŵa ligongo lyakutendekasya kuti liwiwilyo likaŵa mbali ja chilu.
17 Naga chilu chosope chikaŵe lisope, ana tukakombolaga kupikana? Naga chilu chosope chikaŵe liwiwipe, ana tukakombolaga kupikana kununjila?
18 Nambotu Mlungu ŵaŵisile chiŵalo chilichose pamalo gakwe, mpela muŵasachilaga jwalakwejo.
19 Yikaŵe kuti yiŵalo yosope yaliji chiŵalo chimpepe, ana chilu chikaŵele kwapi?
20 Nambotu yiŵalo yejinji ni yayikusapanganya chilu chimpepe.
21 Liso nganiliŵa liwusalile mkono kuti, “Mmwetu mli ŵangali masengo kwa une.” Soni mtwe nganiwuŵa ulisalile lusajo kuti, “Mmwetu mli ŵangali masengo kwa une.”
22 Nambo yiŵalo ya chilu yayikusawoneka mpela yangali machili nombenayo yili yakusosekwa.
23 Soni mbali sine sya chilu syasikusawoneka mpela syangachimbichika, tukusasichimbichisyaga mnope. Myoyo, yiŵalo yetu yangawoneka chenene ni yatukusayisalalisya,
24 nambo yiŵalo yakuwoneka chenene yangasosekwa kuyisalalisya. Mlungu ŵachipanganyisye chilu m’litala lyakuti yiŵalo yangachimbichika yiŵeje yakuchimbichika.
25 Ŵatesile yeleyi kuti chilu chosope chikaŵa chagaŵikangana, nambo kuti yiŵalo yosope yisamalilaneje.
26 Naga chiŵalo chimo chikupikana kupweteka, yiŵalo yine yosope yikusapikana nawo kupweteka. Soni naga chiŵalo chimo chipochele uchimbichimbi, yiŵalo yine yosope yikusasangalala nawo.
27 Sambano jemanja mli chilu cha Klistu mwamti jwalijose ali chiŵalo cha chilucho.
28 Myoyo, Mlungu aŵisile yiŵalo yakulekanganalekangana mumpingo, chilichose pamalo gakwe. Chandanda ŵandumetume, chaŵili ŵakulochesya, chatatu ŵakwiganya, kaneko masengo gakusimonjesya, kaneko machili gakwaposya ŵane, masengo gakwakamuchisya ŵane, lunda lwakombola kulongolela, soni kuŵecheta yiŵecheto yachilendo.
29 Ana wosope ali ŵandumetume mpela? Kapena wosope ali ŵakulochesya? Ana wosope ali ŵakwiganya? Ana wosope akusatenda masengo gakusimonjesya?
30 Ana wosope akwete machili gakwaposya ŵane? Ana wosope akusaŵecheta yiŵecheto yachilendo? Ana wosope akusagopolela yiŵecheto?
31 Myoyo, mpitilisye kusosasosa* mituka japenani mnope. Nambope une chinamlosye litala lyakupunda yosope yene.
Maloŵe Gamwiŵanda
^ Pelepa akwamba mkanaŵe ŵakulupilila.
^ Ŵane akusati “kutapana; kutembelela.”
^ Ŵane akusati “kwalamisya.”
^ Ŵane akusati “mlukosyo.”
^ Kapena kuti, “msosesoseje mwakulimbichila.”
