Yuda 1:1-25
1 Une Yuda, kapolo jwa Yesu Klistu, nambo mlongo mjakwe Yakobo, ngumlembela jemanja ŵakuŵilanjidwa wosope ŵamli ŵapamtima ŵa Mlungu, Atati ŵetu, ŵelesoni ŵamsunjile kuti mŵe ŵakamulana ni Yesu Klistu.
2 Nguŵenda kuti Mlungu ajonjechesye umbone soni mtendele wakwe pa jemanja nambosoni amnonyeleje mnope.
3 Achalongo achimjangu ŵapamtima, atamose kuti naliji jwakusachilila kuti namlembele ya chikulupusyo chatukwete wosopewe, nambo nayiweni kuti kuli kwakusosekwa kumlembela yakumlimbikasya kuputa mwamachili ngondo jakuchenjela chikulupi chele chapelechedwe kampepe basi kwa ŵandu ŵaswela.*
4 Ndesile yeleyi ligongo lyakuti ŵandu ŵane ajinjile sikati jetu mwakusyemba. Malemba gasasile kala kuti ŵandu ŵeleŵa tachalamula. Jemanjaji ali ŵangajogopa Mlungu, ŵele ajigele umbone mtima wekulungwa wa Mlungu jwetu kuŵa ligongo lyakutendela ndamo jakulijasilila,* ŵelesoni ali ŵangakulupichika kwa Yesu Klistu, Ambuje ŵetu ŵamopewo ŵaŵatusumile.*
5 Atamose kuti jemanja mkumanyilila chenene yosopeyi, ngusaka kumkumbusya kuti Yehofa, paŵakulupwisye ŵandu pakwakoposya m’chilambo cha Iguputo, panyuma pakwe ŵajonasile ŵele ŵanganakola chikulupi.
6 Nambosoni malayika gele nganigasunga malo gawo gandanda nambo galesile malo gawo gakuŵajilwa kutama, Mlungu ŵagasunjile kwangamala m’maunyolo, mu chipi chakogoya mnope kuti chagape chilango* pa lisiku lyekulungwa.
7 Nombenajo misinda ja Sodomu ni Gomola ni misinda jakuŵandikana najo japochele chilango cha moto wangamala. Myoyo jiŵele chisyasyo chakutukalamusya. Ŵandu ŵakwe ŵatesile mwakulandana ni malayika gala, mwakutenda yachikululu* yakusakala mnope soni kugonana m’litala lyanganiliŵa lyachipago.
8 Atamose yili myoyo, ŵandu ŵeleŵa akusanonyela yakwamba kusagamila, akusasakasya chilu, akusadelela ulamusi, soni akusaŵecheta mwakwanyosya ŵandu ŵele Mlungu akwachimbichisya.
9 Nambo Mikayeli, jwamkulungwa jwa malayika, paŵalekangene nganisyo ni Satana soni paŵakanganaga najo pakwamba ya chilu cha Mose, nganalinga kum’welusya kapena kumŵechetela maloŵe gakunyosya, nambo ŵagambile kuti, “Yehofa amjamuche.”
10 Nambo ŵandu ŵeleŵa akusaŵecheta mwakunyosya ya yindu yele ngakuyipikanichisya chenene. Soni pa yindu yosope yakusatenda, akusakombola kuyitenda mwachipago mpela yinyama yele yangali lunda, soni pakutenda yeleyo akusaŵa ali mkulisakasyape.
11 Ŵana likungu* jemanjajo, ligongo ajesile m’litala lya Kaini. Awutuchile m’litala lyakulemwecheka lya Balamu kuti apochele mboto,* soni ajonasiche pakujigalila kaŵechete kakwimuchila ka Kola!
12 Ŵandu ŵeleŵa ali mpela maganga gakusisika m’mesi pamkulya nawo pampepe pakulosyana chinonyelo. Alisoni mpela abusa ŵakusalilisya achimsyenepe mwangali woga, mpela mawunde gangagwisya wula gakujigalika aku nakuku ni mbungo, mpela yitela yangasogola pandaŵi jakwe jakusogola, yele yiwile kusyene* soni ayichuŵile.
13 Alisoni mpela matumbela gakogoya gagakukoposya chiwulo cha yindu yakutesya sooni kwa achimsyenepewo, nambosoni mpela ndondwa syakwamba kulijendela syele chipi chakogoya mnope changamala chikwajembecheya.
14 Elo, atamose Enoki jwa m’bado* wa 7 kutyochela pa Adamu ŵalochesye pakwamba ya jemanjajo paŵatite, “Alole! Yehofa ŵayiche ni masausande gangaŵalanjika ga malayika gakwe geswela
15 kukwawelusya ŵandu wosope, soni kukwalamula wosope ŵangajogopa Mlungu pa yindu yosope yatesile mwangamjogopa Mlungu, soni pakwamba ya maloŵe gakupweteka mnope gele ŵakulemwa ŵangajogopa Mlungu ŵamŵechetele.”
16 Ŵandu ŵeleŵa ali ŵakunyinyita, ŵakunonyela kudandawula pakwamba ya umi wawo, ŵakukuya yakumbila yawo, soni pakamwa pawo pakusakopoka yakulikwesya. Akusiŵalapililaga ŵane pakusaka kupata yineyakwe.
17 Nambo kwa jemanja achalongo achimjangu ŵapamtima, mkumbuchile maloŵe gagaŵechetedwe* kalako ni atumiki ŵa Ambuje ŵetu Yesu Klistu,
18 pele ŵaliji mkwasalila jemanja kuti, “Mundaŵi jakumalisya, kuchiŵa ŵakunyosya, ŵakukuya yakumbila yawo yangachimbichisya Mlungu.”
19 Ŵandu ŵeleŵa ni ŵakusatandisya kugaŵikana, ŵakusatenda yindu mpela yinyama,* soni msimu weswela wa Mlungu ngawukusiŵalongolela.
20 Nambo jemanja achalongo achimjangu ŵapamtima, mlilimbisyeje ni chikulupi chenu cheswela mnope, soni mpopeleje mwakulongoleledwa ni msimu weswela,
21 ni chakulinga chakuti Mlungu apitilisye kumnonyela, pamkwembecheya chanasa cha Ambuje ŵetu Yesu Klistu chele chichiwugula litala lyakupochelela umi wangamala.
22 Nambosoni, mpitilisye kwalosya chanasa ŵane ŵali ŵakukayichila.
23 Mwakulupusye jemanjajo mwakwakwakula pamoto. Nambo mpitilisye kwalosya ŵane chanasa soni mtendeje yeleyi mwawoga, kwineku mli mkuŵengana ni yakuwala yesakasidwe ni yitendo yachilu.
24 Sambano kwa Mlungu jwetu jwakwete machili gakumchenjela jemanja kuti mkakuŵala, soni kumkamuchisya kuti mŵe ŵangali ulemwa pa uchimbichimbi wakwe* ni chisangalalo chekulungwa,
25 kwa Mlungu jumopejo jwalisoni Mkulupusyo jwetu mwa Yesu Klistu Ambuje ŵetu, kuŵe uchimbichimbi, ukulu, machili, soni ulamusi kutyochela kalakala kwika apano, soni mpaka kalakala. Ame.
Maloŵe Gamwiŵanda
^ Alole Kugopolela kwa Maloŵe Gane.
^ Kapena kuti, “ndamo jakutesya sooni; ndamo jangalilekasya; ndamo jakulilechelela.” Mu Chigiliki akusati, a·sel′gei·a. Alole Kugopolela kwa Maloŵe Gane.
^ Kapena kuti, “msyene.”
^ Ŵane akusati “chamuko.”
^ Alole Kugopolela kwa Maloŵe Gane.
^ Ŵane akusati “utapani.”
^ Ŵane akusati “mbote; chakupochela.”
^ Maloŵe gakwe gandanda, “yiwile kaŵili.”
^ Ku Mozambique akusati “geração.”
^ Kapena kuti, “yindu yayaŵechetedwe chile.”
^ Kapena kuti, “ŵandu ŵakukuya yachilu.”
^ Kapena kuti, “pa kuŵapo kwakwe kwa uchimbichimbi.”