Chiwunukuko 1:1-20
1 Chiwunukuko chele Mlungu ŵamsalile Yesu Klistu kuti ŵalosye achikapolo ŵakwe yindu yayaliji yili yisigele panandi kutendekwa. Yesu ŵalitumile lilayika lyakwe kwa Yohane jwali kapolo jwa Mlungu,* mwamti lyamsalile yindu yeleyi kupitila mu yiwanichisyo.
2 Yohanejo ŵatendele umboni maloŵe gaŵapeleche Mlungu soni umboni uŵapeleche Yesu Klistu, elo, ŵatendele umboni yindu yosope yaŵayiweni.
3 Jwana upile mundu jwakwaŵalanjila ŵane maloŵe ga yakulochesyayi mwakwesya, soni ŵana upile wosope ŵakugapikana maloŵega nambosoni wosope ŵakutenda yagakusala maloŵe gagali mu yakulochesyayi, ligongo ndaŵi jiŵaŵisile Mlungu kuti yeleyi yitendekwe jiŵandichile.
4 Une Yohane ngujilembela mipingo 7 jajili mu chigawo* cha Asiya.
Ngupopela kuti mpochele umbone mtima wekulungwa soni mtendele kutyochela kwa “Mlungu jwele ŵapali kutandila kalakala, jwele apalipe mpaka apano, soni jwele jwakwika,” soni kutyochela kwa misimu 7 jajili pameso pa mpando wakwe waumwenye,
5 nambosoni kutyochela kwa Yesu Klistu, jwali “Mboni Jakulupichika,” “jwandanda kupagwa soni jwandanda kwimuka ku chiwa,” soni jwali “Jwakulamulila jwa mamwenye gosope ga pachilambo chapasi.”
Yesu akusatunonyela soni ŵatugopwele ku yakulemwa yetu kupitila m’myasi jakwe.
6 Jwalakwejo ŵatuŵisile m’weji kuŵa mamwenye soni ŵakutaga mbopesi ŵakutumichila Mlungu jwakwe jwalisoni Atati ŵakwe. Yesujo akwenela kupochela uchimbichimbi ni machili mpaka kalakala. Ame.
7 Mlole, jwalakwejo akwika m’mawunde, mwamti liso lililyose lichimwona, atamosesoni ŵandu ŵaŵamsomile jwalakwejo ni lipanga chachimwona. Pelepo mitundu josope japachilambo chapasi jichiliputa pamtima mwachanasa ligongo lya jwalakwejo. Nditu, yeleyi yichitendekwa. Ame.
8 Yehofa Mlungu akuŵecheta kuti, “Une ndili Alefa ni Omega.* Mbele ndili mbali kutandila kalakala, mbalipe mpaka apano, soni ngwika. Une ndili Mlungu Jwamachiligosope.”
9 Une Yohane mlongo mjawo, ngusimana ni yakusawusya soni ngupilila mpela jemanja, nambosoni chinjilamulilaga pampepe ni jemanja mu uchimwene ligongo lyakamulana ni Yesu. Une ŵambisile pachilumba cha Patimo ligongo lyakuŵecheta yakwamba Mlungu soni kutendela umboni yakwamba Yesu.
10 Mwamachili ga msimu weswela, nasimanikwe ndili mu lisiku lya Ambuje. Kaneko napikene maloŵe gamachili kunyuma kwangu mpela kulila kwa lipenga,
11 gali mkuti, “Yindu yachimyiwone, myilembe ni kuyitumisya ku mipingo 7 aji, mpingo wa ku Efeso, wa ku Simuna, wa ku Pegamo, wa ku Tiyatila, wa ku Sade, wa ku Filadefiya, soni wa ku Laodikaya.”
12 Nagalawiche kuti namwone juŵaŵechetaga ni unejo, nambo panagalawiche, nayiweni yakuŵika nyali yagolide yakwana 7.
13 Pakatikati pa yakuŵika nyaliyo papali jwinejwakwe jwakuwoneka mpela mwanache jwa mundu. Jwalakwe ŵawete chakuwala chelewu chakwika mpaka kusajo soni ŵawete lamba janguwo ja golide pamtima pakwe.
14 Mtwe wakwe soni wumbo syakwe yaliji yeswela mnope mpela ubweya* wa ngondolo weswela wamti mbee, soni meso gakwe gawonekaga mpela lilamba lya moto.
15 Sajo syakwe syanyesimilaga mnope mpela chisyano cha kopa chambone mnope chachiŵisile mu chilangali cha moto, soni maloŵe gakwe gapikanikaga mpela mkokomo wa mesi gejinji.
16 Kumkono wakwe wamlyo kwaliji ndondwa 7, soni mkamwa mwakwe mwaliji mkukopoka upanga welewu wakutema kosekose, nambosoni ngope jakwe jaliji mkuŵala mpela lyuŵa lyalikuŵala mnope.
17 Panam’weni jwalakwe, nagwilile pasajo syakwe mpela kuti mbwile.
Kaneko ŵatambasukwile mkono wakwe wamlyo ni kungamula, ni ŵatite, “Mkatenda woga. Une ndili Jwandanda soni Jwakumalisya,
18 nambosoni jwaumi. Nawile nambo sambano ndili ni umi soni chinjitama mpaka kalakala, soni ngwete makiyi gakuwugulila litanga lya chiwa soni Malembe.*
19 Myoyo mlembe yindu yamyiweni, soni yindu yayikutendekwa pandaŵi ajino, soni yindu yayichitendekwa panyuma pa yeleyi.
20 Nambo pakwamba ya ndondwa syakwana 7 syamsiweni kumkono wangu wamlyo soni yakuŵika nyali yagolide yakwana 7 yili yindu yakusisika, nambo kugopolela kwakwe ni aku: Ndondwa syakwana 7 sikwimila malayika ga mipingo 7, soni yakuŵika nyali yakwana 7 yikwimila mipingo 7.
Maloŵe Gamwiŵanda
^ Kapena kuti, “kapolo jwa Yesu.”
^ Ku Mozambique akusati “província.”
^ Kapena kuti, “Une ndili A ni Z.” Alefa chili chilembo chandanda mu alifabeti ja Chigiliki soni Omega chili chilembo chakumalisya.
^ Ŵane akusati “manyunya.”
^ Alole Kugopolela kwa Maloŵe Gane.
