Aloma 3:1-31
3 Sambano ana kuŵa Myuda kwana umbone wamtuli? Nambi kuwumbala kwana umbone wamtuli?
2 Kukwete maumbone gejinji. Chandanda, Mlungu ŵapeleche maloŵe gakwe geswela kwa Ayuda.
3 Nambi uli naga ŵane mwa jemanjajo ŵaliji ŵangakulupichika? Ana ungakulupichika wawowo ukulosya kuti Mlungu ali jwangakulupichika?
4 Iyayi. Mlungu chachiŵape jwakuwona ata mundu jwalijose ali aŵele jwaunami, mwakamulana ni yagakusasala Malemba kuti, “Maloŵe gawo gachilosya kuti wawojo ali ŵakulungama, soni ŵandu pakwajimba magambo, wawojo chachipunda.”
5 Nambo naga kulemwa kwetu kukusalosya chenene kuti Mlungu ni jwali jwakulungama, nikutitu Mlungujo ngakulemwa pakutulosya kutumbila kwakwe. (Nguŵechetatu mpela mwakusaganichisya ŵandu ŵane.)
6 Iyayi! Mlungu ngakulemwa! Yikaŵe kuti ali jwakulemwa, ana akakombwele chamtuli kuŵa jwakuwelusya jwa chilambochi?
7 Nambo naga ngusaŵecheta yaunami, soni yaunamiyo yikusimichisya kuti Mlungu akusaŵecheta yakuwona nambosoni yikutendekasya kuti ŵandu amchimbichisyeje jwalakwejo, sambano ligongo chichi Mlungujo akundenda kuŵa jwakulemwa?
8 Uli ngagamba kuŵecheta maloŵe gele ŵandu ŵane akusatulambuchisya kuti tukusaŵechetaga? Maloŵe gakwe gakuti, “Kwende tutende yakusakala kuti yindu yambone yiyiche.” Ŵandu ŵakusaŵecheta yeleyiŵa chachawelusya, mwamti kuwelusya kwakwe kuchiŵa kwakamulana ni chilungamo.
9 Sambano tujile uli? Ana m’weji Ayuda tuli ŵakwapunda ŵandu ŵane? Iyayi! Pakuŵa tuŵechete kala kuti wosope ŵene, Ayuda ni Agiliki ŵakwe, akwete ulemwa.
10 Yeleyi yili yakamulana ni yagakusasala Malemba kuti, “Pangali mundu atamose jumo jwali jwakulungama.
11 Pangali mundu jwali jwakupikanichisya yindu, soni pangali mundu jwakulingalinga kuti ampate Mlungu.
12 Ŵandu wosope amlesile jwalakwejo mwamti wosopewo aŵele ŵangali mate. Pangali mundu atamose jumo jwakwaganichisya ŵane.”
13 “Maloŵe gawo gali gakuwulaga, soni akusaŵecheta yaunami ni lulumi lwawo.” “Ngomo syawo sikusakoposya ululu mpela wa lijoka.”
14 “Pakamwa pawo pagumbele maloŵe gakutembelela soni gaukali.”
15 “Jemanjajo ali ŵachiwawa soni ŵakwawulaga achimjawo.”
16 “Yindu yosope yakusatenda yikusaŵa yakwawulasya soni kwapweteka ŵane,
17 nambosoni ŵangamanyilila yampaka atende kuti aŵe pamtendele ni ŵane.”
18 “Jemanjajo ŵangamchimbichisya Mlungu.”
19 Sambano tukumanyilila kuti yindu yosope yayili mu Chilamusi yikusajawula kwa ŵandu ŵakusakuya Chilamusicho. Chakulinga chakwe chili kwalekasya ŵandu kuliŵichila kunyuma soni kulosya kuti wosope ali ŵakulemwa pameso pa Mlungu, mwamti akwenela kusimana ni yakogoya.
20 Myoyo pangali mundu jwakusaŵa jwakulungama pameso pa Mlungu ligongo lyakuya Chilamusi. Nambo masengo ga Chilamusicho gali kutukamuchisya kuti tuwumanyilile chenene ulemwa.
21 Nambo sambano Mlungu mpaka amwone mundu kuŵa jwakulungama ngaŵaga ligongo lyakukuya Chilamusi, mwamti yeleyi ŵayilembilesoni mu Chilamusicho soni mu yakulemba ya ŵakulochesya.
22 Mundu mpaka aŵe jwakulungama pameso pa Mlungu ligongo lyakulupilila Yesu Klistu, soni yeleyi yili yakomboleka kwa ŵandu ŵakwete chikulupi, mwangajigalila kuti ali ŵa mtundu wapi.
23 Pakuŵa ŵandu wosope ali ŵakulemwa soni ali ŵakupelembela pa uchimbichimbi wa Mlungu.
24 Nambo Mlungu akusiŵawona jemanjajo kuŵa ŵakulungama ligongo lya malipilo gaŵapeleche Klistu Yesu pakwawombola. Mlungu ŵatendele yeleyi ŵandu ligongo lya umbone mtima wakwe wekulungwa.
25 Mlungu ŵatupele m’weji litala lyakuti tuŵesoni paunasi ni jwalakwejo. Litala lyakwe lili kukulupilila myasi ja Yesu. Mlungu ŵatesile yeleyi pakusaka kulosya kuti jwalakwejo ali jwakulungama. Jwalakwe ŵalosisyesoni kuwusimana mtima kwakwe pakwakululuchila ŵandu yakulemwa yawo yakala.
26 Nambosoni mundaŵi ajino jwalakwe akutulosya kulungama kwakwe mwakumwona mundu jwakukulupilila mwa Yesu kuŵa jwakulungama.
27 Sambano ana pana ligongo lililyose lyakuti tulikwesyeje? Iyayi pangali. Kapena tulikwesyeje ligongo lyakukuya Chilamusi? Iyayi, nambo akaŵe naga tukukuya lilamusi lyalikusati tukoleje chikulupi.
28 Pakuŵa tukumanyilila kuti Mlungu akusamwona mundu kuŵa jwakulungama ligongo lya chikulupi, ngaŵaga ligongo lyakutenda yayili mu Chilamusi.
29 Ana kapena jwalakwe ali Mlungu jwa Ayudape? Ana nganaŵasoni Mlungu jwa ŵandu ŵamitundu jine? Elo, jwalakwe ali Mlungu jwa ŵandu ŵamitundu josope.
30 Pakuŵa Mlungu ali jumo, jwalakwe akusiŵawona ŵandu ŵawumbale soni ŵangawumbala kuti ali ŵakulungama ligongo lya chikulupi chawo.
31 Sambano ana pelepa tukumasya Chilamusi ligongo lya chikulupi chetu? Iyayi. Mmalomwakwe tukulosya kuti Chilamusicho chili chakusosekwa.