Watch Tower Bible and Tract Society of Pennsylvania (Fikamban̈ana Tilikambo Fiambenana) io fikambanan̈a natsangana tamy taon̈o 1884, mifan̈araka amy Lalàn̈an’ny Pennsylvanie, an Etazonia. Fikambanan̈a io tsy natao hitadiavam-bola. Izio ampiasain’ny Vavolombelon̈on’i Jehovah hampadihanan̈a asandrô eran-tany, an̈isan’izen̈y fan̈amboaran̈a ndreky fan̈aboahan̈a Baiboly, boky, baka iô gazety.

 Izikoa raha mombamomba fikambanan̈a io zahan̈a, “han̈ano raha momba fivavahan̈a ndreky hampianatra, baka iô han̈ano asa soa” ten̈a tanjon̈on’izio, intsaka eky fa “hitory ndreky hampianatra filazantsaran’ny Fanjakan̈an’ny Zan̈ahary indesin’i Kristy Jesosy.” Ke zay olo voakaiky fo mahazo miditry mpikamban̈a amy fikamban̈ana io, fa tsy miankiny aminy habezany vola amiany. Ke irô mpikamban̈a ndreky irô mpitantan̈a am’izio man̈ampy Filan-kevi-pitantan̈an’ny Vavolombelon̈on’i Jehovah.

Miaraka Miasa amy Fikambanan̈a Ara-dalàna Hafa

 Ankoatran’ny Watch Tower Bible and Tract Society of Pennsylvania, Vavolombelon̈on’i Jehovah manan̈a fikambanan̈a ara-dalàn̈a maromaro miparitaka amy firenena maro. “Watch Tower” na “Watchtower” (amy volan̈a angiley na volan̈a an-toeran̈a) fikahian̈a sasany amy fikambanan̈a aby zen̈y.

 Rango nisiandrô fikambanan̈a ara-dalàn̈a hafa aby io, ten̈a maro raha vitanay. An̈isan’izen̈y raha aby ty:

•   Manoratra sady man̈aboaka boky ndreky gazety. Kadiriny 253 tapitrisa Baiboly efa nataonay pirinty. Boky ndreky gazetinay koa efa misy amy volan̈a mandilatra 1 050. Olo efa afaka mamaky Baiboly amy volan̈a mandilatra 300 amy jw.org ao. Anao ndray tsisy vola, anao mety mamaky Baiboly am’izio ao. Maro koa fan̈ontanian̈a momba Baiboly valin̈y ao, ohatra: “Ino ma Fanjakan̈an’ny Zan̈ahary Zen̈y?”

•   Mampianatra. Misy fampiofan̈ana isan-karazany koa alamin̈inay hampianaran̈a Baiboly. Vavolombelon̈on’i Jehovah mandilatra 10 000 ziôty efa nampiofan̈iny tamy Sekoly Ara-baibolin’i Gileada, nanomboko tamy taon̈o 1943. Ampiofan̈iny tsarabe irô baka ho lôso misiônera ndreky hahavita hampandeha asa ataonay eran-tany. Isaka herin̈iandra koa zahay miaraka mivory amy fiangonan̈a misy zahay. Mianatra dianay an̈y. An-tapitrisany olo man̈aton̈o izio, an̈isan’izen̈y koa olo tsy Vavolombelon̈on’i Jehovah. Zahay koa mandamin̈y kilasy fianaran̈a mamaky teny ndreky manoratra, aviô efa misy boky fianaran̈a mamaky teny ndreky manoratra naboaka amy volan̈a mandeha 136.

•   Man̈ano asa soa. Izikoa fa misy olo sahiran̈a mare, zahay man̈ampy irô. Ndraikindraiky raha mahazo irô zen̈y baka amy raha ataon’olombelon̈o fo, karaha ataony fandripahan̈a foko ta Rwanda tamin’ny 1994. Fa ndraikindraiky koa izio nohon’ny antambo, karaha ataony hôrohôron-tany tan Haïti tamy 2010.

 Marin̈y ndraiky fa maro raha vitanay rango zahay nanangana fikamban̈ana aby io, fa tsy miankiny amindrô io zaraiky fo asa jiaby ataonay. Mifen̈y koa zahay mitory ndreky mampianatra vaovao tsara, fôtony Zan̈ahary nan̈iraka Kristianin̈y tsiaraikiaraiky han̈ano zen̈y. (Matio 24:14; 28:19, 20) Zahay matoky fa Zan̈ahary han̈ampy zahay amin’ny asa ataonay ndreky tsy vôly ‘hampitombo.’​—1 Korintianina 3:6, 7.