Iro tamy fiangonan̈a ta Roma koa fa naharen̈y fa Paoly ho avy, nisy rahalahy maromaro nandeha lalan̈a 64 kilometara hitsena izy. Ino vokatrany fitiavan̈a be zen̈y tamy Paoly? “Niaraka Paoly nahita iro efa nan̈ano mersy Zan̈ahary edy, ke nahainisy korazy fo izy.” (As 28:15) Nalaza nahay nankahery fiangonan̈a nitsidihiny i Paoly, fa taminio izy nigadra, ke ten̈a nila olo nankahery.—2 Ko 13:10.

Iro piandraikitry faritry izioty koa mitety fiangonan̈a, mankahery rahalahy ndreky ranabavy. Iro io mba mahay kajo, miasa loha, ndreky malemy trôko, mira panompony Zan̈ahary jiaby fo. Amy fitsidihan̈a man̈araka, ino raha iritriretinao hatao baka anao “hahavita hifankahery” amindro fivadiany?—Ro 1:11, 12.

• Man̈aton̈a fivorian̈a alohany fanompoan̈a. Mankahery piandraikitry faritry izikoa pitory mifen̈y baka hahazo hatsaran̈a amy fanompoan̈a atao aminy herin̈iandra manokan̈a io. (1 Te 1:2, 3; 2:20) Diniha tsao anao afaka man̈ano pisava lalan̈a pan̈ampy amy fanjavany fitsidihan̈a io. Manorata an̈aran̈a hiaraka hitory na hampianatra Baiboly amindro fivadiany. Ten̈a tiandro miaraka amy pitory isankarazany, na izy pitory vaovao na izy mahatsiaro tsy mahay mitory.

• Raisa tsara iro. Asa anao afaka mangala iro antran̈o, na man̈atriky hanin̈indro? Zen̈y han̈aboahanao amindro fivadiany fa tianao marin̈y iro. Iro tsy mitaky raha be aby.—Lk 10:38-42.

• Tandrin̈esa toromariky ndreky torohevitry koran̈iny, avio areha. Piandraikitry faritry aby io ten̈a tia atsika, ke iro man̈ampy atsika hahita raha tokony hatsarain̈y amy fanompoantsika Jehovah. Ndraikindraiky iro mety han̈amia torohevitry mafimafy. (1Ko 5:1-5) Ravoravo iro, izikoa atsika man̈eky ndreky man̈araka torohevitry amiandro. —He 13:17.

• Volàn̈a amindro fa anao mankasitraka iro. Volàn̈a amy piandraikitry faritry ndreky vadiny ino hatsaran̈a nazonao tamy fitsidihan̈a io. Mety koran̈inao mivantan̈a amindro raha zen̈y, na soratinao amy taratasy na karty, avio amianao iro.—Kl 3:15.