Koa fa vita Ady Lehibe Faharoe, taminy 1945, robadrobaka tanànany Allemagne. Tanàna potipotiky, ravan̈a koa lekoly jiaby, baka io lopitaly tsy nety nampiasain̈a. Feno bomby mbala tsy nipoaka koa tany jiaby. Tsy basinizen̈y fo fa ten̈a sasatra hanin̈y, baka io lafo mare. Tamy zen̈y, dibiera 500 gramo nalafondro pan̈ano bizinesy aby io efa nitovy tamy karamanolo araiky tan̈atiny fanjava araiky sy sasany!

 Vavolombelon̈o Jehovah an̈isanolo sahiran̈a mare tamy zen̈y. Mandeha anjatony tamindro nigadrain̈y ndreky nalefa tamy toby fitanan̈a, azony finoan̈andro. Taon̈o taon̈o iro tan̈y. Iro koa fa nafaka gadra taminy 1945, tsisy raha nanan̈andro koa tsy lamba tankoditrindro fo. Vavolombelon̈o sasany ndraiky, tsy basiny tran̈ondro ravan̈a, fa mbala very koa fanan̈anandro jiaby. Sasany ndraiky tsisy raha nihoanin̈y foeky, ke nisy toran̈a mosary foeky tampivorian̈a tan̈y.

 Niaraka ren̈indro Vavolombelon̈o Jehovah tamy tany hafa aby io fa tsisy hanin̈y ndreky lamba piaramanompo tan Allemagne, iro efa nan̈ano raha edy. Iro rahalahy tamy foibe ta Etazonỳ nivolan̈a tamy birôny sampan̈a ta Berne, a Suisse, fa iro tokony handefa fan̈ampian̈a tamindro rahalahintsika tan Allemagne. Tamy zen̈y, rahalahy Nathan Knorr nandeha ta Eropy, baka handamin̈y fomba hizaran̈a fan̈ampian̈a aby io, ndreky han̈ampy piaramanompo aby io hizara fan̈ampian̈a io malaky.

 Piaramanompo ta Suisse aby io ten̈a tsy natity. Iro nan̈amia hanin̈y, lamba ndreky vola. Fan̈amezan̈a jiaby in̈y nalefa ta Berne, ke iro tan̈y nandamin̈y izin̈y. Baka tan̈y amy zay, izin̈y nalefandro sambo nandeha tan Allemagne. Nisy Vavolombelon̈o Jehovah tamy tany hafa, ohatra, baka ta Suède, Kanada, ndreky Etazonỳ koa nandray anjara tamy fandrasan̈a fan̈ampian̈a tan̈y. Ke tsy panompony Jehovah tan Allemagne fo nahazo fan̈ampian̈a, fa firaka iro tamy firenena hafa ravan̈any lagera ta Eropy ndreky Asie koa.

 Fanjava vitsivitsy tafaranizin̈y, Betela ta Suisse nandefa kafe, ronono, siramamy, voandraha madiniky, voankazo nasaly, legimo, hena ndreky laoko. Iro koa nandefa vola ndreky entan̈a isankarazany.

 Iro Vavolombelon̈o Jehovah ta Soisy koa nandefa lamba nandeha dimy tonnes: Lamba mafana, lambany man̈angy, baka io kôtrony lelahy. Ty raha nikoran̈iny Tilikambo Fiambesan̈a 15 Zanvie 1946: “Ny ten̈a tsara tamindro namezandro. Iro nan̈ano soron̈o maventy han̈ampian̈a iro rahalahy tan Allemagne.”

 Iro Vavolombelon̈o Jehovah ta Suisse aby io koa nan̈amia kiraro kadiriny 1000 tio. Talohaniro kiraro aby io nalefa, nifidin̈a antsendriky ny tsaratsara. Iro rahalahy ndreky ranabavy ta Wiesbaden, tan Allemagne tan̈y gaga izikoa fa nanokatra entan̈a aby io, fotony raha io isankarazany sady maro tsara koa. Nisy Vavolombelon̈o Jehovah araiky zay nanoratra karaha ty: “Zaho matoky tsarabe fa tsisy labotiky manan̈a lamba ndreky kiraro maro tsara ndreky isankarazany karaha ty an Allemagne eto.”

 Fandifasan̈a fan̈ampian̈a in̈y nitohy firaka taminy Aoty 1948. Izikoa atao konty, 444 kesiky entan̈a nalefandro Vavolombelon̈o Jehovah baka ta Suisse tamindro piaramanompo tan Allemagne. Izio nandeha 25 tonnes. Karaha fa navoavolan̈a tio, tsy Vavolombelon̈o Jehovah ta Suisse fo nandefa fan̈ampian̈a io, fa nisy piaramanompo baka tamy firenena maromaro hafa koa. Iro an̈isany ten̈any vitsy tamindro jiaby nandray anjara tamy fan̈ampian̈a in̈y, fotony nisy 1 600 fo Vavolombelon̈o tan̈y tamy zen̈y.

 Jesosy nivolan̈a: “Baka amy zen̈y ahaizanolo fa anaro pianatranaka ankitin̈y, izikoa anaro mifankatia.” (Jaona 13:34, 35) Fitiavan̈a nandrisiky panompony Jehovah aby io han̈amia raha olo. Tsy raha efa tsy nilaindro koa namiandro io fa raha ten̈a tsara nanan̈andro. (2 Korintianina 8:1-4) Nisy piaramanompo baka a Zurich nanoratra karaha ty: “Maro piaramanompo efa tsy nanan̈a vatsy eky, fa iro mbala nan̈amia vola fo fotony iro tihan̈ampy namandro.”

 Betibetiky fo panompony Jehovah tan Allemagne tan̈y efa tafianko edy taminy iro sahiran̈a nazony ady ndreky fan̈injehan̈a aby in̈y. An̈isany antony araiky nahavy zen̈y, fotony piaramanompo sasany ten̈a tsy natity ndreky be fitiavan̈a sady nahafoe ten̈a. Voalamin̈y tsara koa fomba nandrasan̈a fan̈ampian̈a io tamindro.