Mbala ho Foan̈a ma Problemony Toekarena Io?
Maro olo mandeha milahatra amy lalabe, man̈ano lagirevo, fotony hitandro fa misy raha tsy rariny amy toekarena. Izikoa fa nan̈adary COVID-19 in̈y, nahainitombo fo problemo io. Nifahatra baka olo tamizin̈y, tsy ampy hanin̈y ndreky raha hafa ten̈a ilainolo, ke tsy ravoravo olo. Avio amy fomba fikarakaran̈a fahasalaman̈a koa, nahainisy fiavahany fo olo manan̈a ndreky tsy manan̈a.
Izio ma mbala ho voavaha fo problemony toekarena mampijaly olo io? Ia. Baiboly man̈azava raha handeha hataony Zan̈ahary, baka hampilamin̈y problemo mahazo atsika.
Problemony toekarena halaminy Zan̈ahary
Problemo: Tsisy olombelon̈o mahavita man̈apetraka lamin̈y momba toekarena, ke olo manjary tsy mahazo raha ten̈a ilaindro amy fiain̈ana.
Vahaolan̈a: Zan̈ahary han̈adoso fanjakan̈anolombelon̈o, ke izio hisoloany Fanjakan̈anany. Baka andan̈itry an̈y izio hitondra tany jiaby.—Daniela 2:44; Matio 6:10.
Vokany: Ho voakarakara tsarabe raha jiaby ambony tany eto, izikoa fa mitondra Fanjakan̈any Zan̈ahary. Tsisy olo tsy manan̈a eky amy zen̈y. Tsisy olo havozo tsao ho sahiran̈a aminy amaray eky amy zen̈y. (Salamo 9:7-9, 18) Olo jiaby ho ravoravo aminy asany tan̈andro, sady ho ravoravo miaraka amy fianakavian̈andro. Baiboly efa nampan̈anten̈a karaha ty: “Olo han̈amboatra tran̈o ke hipetraka ao, baka io iro hitsabo rezain ke hihina vokatra amy zen̈y. Olo tsy han̈amboatra tran̈o hipitrahanolo hafa zen̈y, baka io koa iro tsy hitsabo raha hohaninolo hafa.”—Isaia 65:21, 22.
Problemo: Olo tsy afaka milefa jaly ndreky raha mampavozo.
Vahaolan̈a: Zan̈ahary hampiasa Fanjakan̈anany han̈adoso raha jiaby mampijaly ndreky mampavozo.
Vokany: Tsisy raha hampijaly olo ke tsy hahavitany hamelon̈o fianakavian̈any zen̈y eky, fotony Zan̈ahary mikarakara. Tsy ho hisy eky raha karaha ataony lagera, mosary, ndreky valan̈aretin̈y amy zen̈y. (Salamo 46:9; 72:16; Isaia 33:24) Zan̈ahary nivolan̈a: “Iro olonaka aby io hipetraka amy tany milamin̈y anjakany fiadan̈ana, ndreky amy tany tsy isiany asaloha foeky, baka io amy tany fangalan̈a ain̈y tsisy pan̈elingelin̈y.”—Isaia 32:18.
Problemo: Ny raha pohisy, olo tia ten̈a ndreky tsy afapo fo tia man̈araraotro olo.
Vahaolan̈a: Vahoakany Fanjakan̈any Zan̈ahary hifen̈y ho tia olo mandilatra fitiavandro ain̈indro.—Matio 22:37-39.
Vokany: Fanjakan̈any Zan̈ahary koa fa mitondra, olo jiaby ho tia olo, ke ‘tsy raha mahatsara ain̈indro tompiny fo tadiavindro.’ (1 Korintianina 13:4, 5) Baiboly mivolan̈a karaha ty: “Iro tsy handratra na handrobadraha amy bongonaka masin̈y, fotony ho feno fahaizan̈a ny marin̈y momba Jehovah a tany ty, karaha ataony rano mandrakotro jia ambaniny ranomasin̈y.”—Isaia 11:9.
Koran̈iny Baiboly fa efa aminy andra farany atsika izioty, ke efa tsy ela eky Zan̈ahary han̈afoan̈a problemony toekarena jiaby, fotony zen̈y fampan̈antinan̈anany. b (Salamo 12:5) Mandrapavianizen̈y, torohevitriny Baiboly efa afaka man̈ampy anao izikoa anao misy problemo momba vola. Ohatra, mety zahavanao lahatsoratra “Ahoana Raha Lasa Mihena ny Vola Miditra Aminao?” ndreky “Ahoana no Fiheveranao ny Vola?”
a Jehovah io an̈aran̈any Zan̈ahary amy Baiboly ao.—Salamo 83:18.
b Izikoa tianao hay nan̈ino ma mety atokisan̈a raha koran̈iny Baiobly io, zahava lahatsoratra “Milaza ny Marina Foana ny Baiboly.”
