Ezaka Ataon’ny Mpampandry Tany aby io ma Ten̈a Hampisy Filaminan̈a Ankitin̈y?
Misy ady ndreky korontan̈a fo eran-tany. Zen̈y mahavy Firenena Mikamban̈a ndreky fikambanan̈a maro mandefa solonten̈a a amy tany misy ady, baka hampilamin̈y tany. Irô man̈anten̈a fa ho vitandrô mandamin̈y tany ten̈a miady ndreky mikorontan̈a aby io. Karaha ty volan̈in’ny Sekretera Zeneralin’ny ONU, António Guterres: “Irô mpampandry tany amy Firenena Mikamban̈a ten̈a angôvonay amin’ny ezaka atao baka hisian’ny filaminan̈a eran-tany.”
Tan̈atin’ny taon̈o maro zay efa misy hatsaran̈a nazo baka amin’ny ezaka ataon’ny mpampandry tany. Ohatra, amy resaka fiarovan̈a sivily, fan̈ampodianan̈a mpitsoa-ponenan̈a amy firenenandrô, man̈atriky fan̈ampian̈a, ndreky man̈ampy amy fan̈amboaran̈a raha robaka. Fa ndray zen̈y, misy raha sarotro maventy koa tojy irô, ke mahavy irô tsy mahavita man̈ano tsara asandrô eraka fan̈irian̈andrô. Mbala ho hisy ma vahaolan̈a maharitry tsarabe baka hisian’ny ten̈a filaminan̈a eran-tany? Ino raha koran̈in’ny Baiboly momba zen̈y?
Raha sarotro tôjy mpampandry tany ndreky vahaolan̈a koran̈in’ny Baiboly
Raha sarotro: Tsy mahay miaraka miasa. Tsy voatery ho mora maramila ndreky sivily maro baka amy firenena isan-karazany miaraka miasa. Ndraikindraiky irô tsy mahavita miaraka miasa tsara fôtony irô tsy mifankahazo hevitry aviô tsy mira raha mahasôfy irô.
Vahaolan̈a koran̈in’ny Baiboly: “Zan̈aharin’ny lan̈itry hanangana fanjakan̈a. ... Izio hanôrotôro ndreky han̈afoan̈a fanjakan̈a [nin’olombelon̈o] jiaby io, ke izio zaraiky fo ho tavela mandrakizay.”—Daniela 2:44.
Tsy ho ela Zan̈ahary han̈afoan̈a ady jiaby ndreky hampisy filaminan̈a eran-tany. (Salamo 46:8, 9) Fanjakan̈a jiaby ambony tany eto hisoloany fanjakan̈a araiky: Fanjakan̈an’ny Zan̈ahary. Izio Fanjakan̈a lavorary an-dan̈itry an̈y, hanjaka amy tany jiaby. Ke amy zen̈y efa tsisy eky ady, aviô efa tsy ilain̈a eky fikambanan̈a mpampandry tany.
Raha sarotro: Tsy ampy tohan̈andrô aviô voafetra raha azondrô atao. Matetiky fikambanan̈a mpampandry tany aby io tsy ampy olo, fan̈ampian̈a ara-bola, na fan̈ampian̈a hafa, ke lôso voafetra raha azondrô atao. Sarotro amindrô koa miara-miasa amy tany sarotro andihanan̈a ndreky hatahoran̈a.
Vahaolan̈a koran̈in’ny Baiboly: “Zan̈aharin’i Jesosy Kristy Tômpontsika ... nametraka [Jesosy] tankavanan̈anany amy faritrin’ny lan̈itry an̈y, an̈abo lavitry mandilatra fanjakan̈a ndreky fahifan̈a ndreky angôvo jiaby.”—Efesianina 1:17, 20, 21.
Jehovah b Zan̈ahary faran’ny mahery, nifidy Jesosy nataony Mpanjakan’ny Fanjakan̈an’ny Zan̈ahary, ke namezany i Jesosy raha jiaby ilainy baka hampahômby fitondrasan̈anany. (Daniela 7:13, 14 c) Zan̈ahary efa nan̈amia Jesosy angôvo mahery, fahaizan̈a, fahendrena ndreky fahaizan̈a mandiniky mandilatra nin’ny fitondrasan̈a na fikambanan̈a niforôn̈in’olombelon̈o. (Isaia 11:2) Jesosy koa manan̈a tafiky. Irô io anjely maro matanjaka mety ampiasainy. (Apokalypsy 19:14) Ke tsisy raha sarotro aminany man̈ano izy.
Tsy han̈afoan̈ana ady zaraiky fo raha handeha hampiasan’i Jesosy irô raha aby namezan’ny Zan̈ahary izy ndreky fahaizan̈a io. Izy koa hampisy fiadan̈ana ndreky filaminan̈a amy vahoakan’ny Fanjakan̈an’ny Zan̈ahary indesiny.—Isaia 32:17, 18.
Raha sarotro: Sakantsakan̈a baka amy lalàn̈a. Ndraikindraiky tsy ten̈a mazava amy solonten̈an’ny fikambanan̈a aby io raha azondrô atao ndreky raha irahin̈y ataondrô noho ny sakantsakan̈a baka amy lalàn̈a. Ke irô tsy ten̈a afaka miaro vahoaka ndreky tsy ten̈a afaka man̈atanteraka tanjon̈ondrô.
Vahaolan̈a koran̈in’ny Baiboly: “Fahifan̈a jiaby an-dan̈itry an̈y ndreky ambony tany eto efa namian̈a [Jesosy].”—Matio 28:18.
Zan̈ahary efa nan̈amia Jesosy toromariky mazava tsara momba fomba entiny hampisy fiadan̈ana, aviô izy manan̈a fahifan̈a han̈atantirahan̈a zen̈y. (Jaona 5:22) Jesosy tsy han̈ano raha tsy rariny ndreky tsy ho tia risoriso. (Isaia 11:3-5) Mety tsarabe izikoa Baiboly mikaiky Jesosy “Andrianan’ny fiadan̈ana”, aviô Fanjakan̈anany hanjakan’ny “rariny ndreky hitsiny”.—Isaia 9:6, 7.
Fanjakan̈an’ny Zan̈ahary hampisy ten̈a fiadan̈ana
Ndraikindraiky fikambanan̈a niforôn̈in’olombelon̈o mahavita mampijanon̈o ady na korontan̈a amy faritry araiky. Fa irô tsy afaka man̈afoan̈a fahalain̈ana olo, fôtotro mahavy ady io, fôtony izio milevin̈y an̈atin’ny fôn’olo maro.
“Problemo ten̈a maventy aminany io baka tsisy fikambanan̈a mahavita hampisy fiadan̈ana.”—Dennis Jett, ambasaderan’i Etazonỳ taloha.
Fa Fanjakan̈an’ny Zan̈ahary mahavita mampisy fiadan̈ana, fôtony izio man̈ampy olo han̈adoso fahalain̈ana olo an̈atin’ny fôndrô an̈y. Ohatra, tamy Jesosy tambony tany teto, nampianariny irô olo mpan̈ara-dia izy, tamy raha nivolan̈iny ndreky raha nataony, karakôry atao baka hihavan̈a ndreky hifankatia. Zahava baka ty:
Jesosy koa nivolan̈a fa lan̈iany olo tihanjary vahoakan’ny Fanjakan̈an’ny Zan̈ahary io mila man̈aboaka fa irô tia olo. Ambaran’ny Baiboly mazava tsara fa tsy handova Fanjakan̈an’ny Zan̈ahary lan̈iany olo malain̈y olo. Zahava baka ty:
Jehovah Zan̈ahary niasa atsika olombelon̈o fo ten̈a mahay fomba hampisy fiadan̈ana eran-tany. Fanjakan̈anany hahavita han̈ano raha tsy vitan’olombelon̈o, an̈isan’izen̈y raha tsy vitan’ny fikambanan̈a mpampandry tany aby io.
a Firenena Mikamban̈a ndreky fikambanan̈a hafa koa mampiasa fivolan̈ana karaha ataon’ny “fiadan̈ana”, ”fampihavan̈ana” ndreky “filaminan̈a.”
b Jehovah io an̈aran̈an’ny Zan̈ahary. (Salamo 83:18) Zahava lahatsoratra “Azovy ma Jehovah?”
c “Zanak’olo”, amy Daniela 7:13, 14 io manôndro Jesosy Kristy.—Matio 25:31; 26:63, 64.
Mety ho Tianao Koa
FAMPIANARAN̈A FOTOTRO AMY BAIBOLY
Karakory ma Fanjakan̈any Zan̈ahary Zen̈y?
Tamy Jesosy tambony tany teto, raha momba Fanjakan̈any Zan̈ahary io raha ten̈a nampianariny. Rango efa ela, pianatranany mivavaka haviany Fanjakan̈a io.
RAHA MOMBA ZAHAY
Mangataka Vangian̈a
Miaraha mandiniky fan̈ontanian̈a amy Baiboly aminay, na mianara raha maromaro momba Vavolombelon̈o Jehovah.
