Aminolo anjatony tapitrisa mipetraka an Ameriky Latiny, antapitrisany amindro io manan̈a volan̈andro manokana ndreky fombandro. Maro amindro io rahalahy ndreky ranabavintsika, avio iro mbala tia man̈araka fomba nilovaindro fo. Akory han̈ampiandro olo amy tany misy iro hianatra ny marin̈y amy Baiboly ao? Iro mandika ndreky mirasa boky ndreky gazety aboakany Vavolombelon̈o Jehovah, amy volan̈a fampiasainolo tompitany mandilatra 130 an Ameriky Latiny. a Fa ndray izy man̈ano zen̈y, sasany amindro io toherinolo, fotony iro manompo Jehovah ndreky tsy man̈eky han̈ano fombanolo amy tany misy iro, kanefa fombafomba aby tsy mifan̈araka amy raha ampianariny Soratra Masin̈y. Akory nampiasan̈a fan̈amezan̈a ataonao han̈ampian̈a iro io an̈y?

 Ta Meksiky, nisy rahalahy ndreky ranabavy ta Huichol, amy bongony Fanjakan̈any Jalisco an̈y, tsy nan̈eky tampan̈ajan̈a han̈ano fombafomba tsy mety aminy eritreritrindro. b Ke neloko mare fokonolo tamindro tan̈y. Tamy 4 Desambra 2017, nisy olo nasiaka mare nanafiky Vavolombelon̈o Jehovah maromaro ndreky olo aby niaraka tamindro Vavolombelon̈o Jehovah aby io. Niroasindro niala tamy tanàna io iro, nirobatindro rahandro jiaby, avio nampitahorindro hivonen̈a lan̈iany nan̈ohatra nimpody tan̈y.

 Vavolombelon̈o Jehovah aby narikitry tanàna io nikarakara raha nilaindro rahalahy ndreky ranabavy aby io. Fa ino fo raha natao, baka iro tafimpody tamy tany misy iro? “Zahay tsisy vola nangalan̈a avôkà” ho rahalahy araiky, Agustín an̈arany, “avio tsy hainay foeky azovy mety hangalan̈a torohevitry amy raha momba lalàn̈a io.”

 Nisy vokany tamy fahafahan̈andro rahalahy aby io hanompo Jehovah raha zen̈y, ke direkty nandray antan̈ana raha io sampan̈any Amérique Centrale. Voanalohany iro nangataka tamindro manampahifan̈a aby tan̈y hampijanon̈o hakafirianan̈anolo aby in̈y. Avio, nikeny Komitiny Pandrindra amy Filankevipitantan̈anany Vavolombelon̈o Jehovah hiasany Sampandraharahany Lalàn̈a amy foibe an̈y ndreky hikarakaran̈a iro rahalahy ndreky ranabavintsika ta Huichol. Navy firaka tamy Fitsaran̈a Tampony ta Meksiky afera io.

 Ekipiny avôkà erantany nan̈oman̈a hevitry nan̈azavan̈a fa iro olo aby io koa mitaky han̈ajan̈a fombany tanindro, iro koa mba mila man̈aja ndreky miaro fahafahan̈anolo amy tany misy iro. Olombelon̈o jiaby manan̈a zò, na aia na aia tany misy izy.

 Tamy 8 Zie 2020, Fitsaran̈a Tampony nan̈ano raha tsy nampoizindro, hazahoany Vavolombelon̈o Jehovah ny marin̈y. Iro nan̈aboaka didy fa olo jiaby niroasin̈y niala tamy tanàna io, tsy maintsy nampody tan̈y. Karaha ty nivolan̈iny Agustín, rahalahy nikoran̈intsika taloha tio in̈y, momba raha tsapany ndreky tsapanolo hafa koa: “Zahay mankasitraka mare ndreky ravoravo tamy raha vitandro rahalahy aby io taminay. Iro koa tsy nan̈ampy zahay, tsisy raha foeky vitanay.”

 Fandrendrekinizen̈y koa niatriky fanoheran̈a mira araiky nikoran̈intsika tio in̈y koa iro rahalahy aby ta San Juan de Ilumán, tanàna an Ekoatera, tany faviandro olo ta Otavalo tan̈y. Taminy 2014, iro koa fa nahazo lalan̈a han̈amboatra Tran̈o Fivorian̈a, iro nan̈ano. Fa baka tio, nisy pitariky fivavahan̈a araiky nitondra olo 100, hiforse iro hampijanon̈o asa io. Fokonolo amy zay nan̈amia beko fa tsy mahazo man̈ano fivorian̈a eky iro Vavolombelon̈o Jehovah aby io.

 Sampandraharahany lalàn̈a tamy sampan̈any Ekoatera tan̈y ndreky iro tamy foibe tan̈y niaraka niasa, baka ho voaro zondro rahalahy aby io han̈ano fanompoan̈andro. Nampakarindro rahalahy aby io tamy fitsaran̈a afera io. Raha zen̈y nahavy iro fokonolo aby io voly nanohitry iro rahalahy aby io, ke iro nimpody nivory ndreky nankefa fan̈amboaran̈a Tran̈o Fivorian̈a in̈y. Fa baka hiarovan̈a zondro rahalahy aby io aminy afara an̈y, iro solonten̈antsika aby io nan̈ano fangatahan̈a tamy fitsaran̈a an̈abon̈abo hangala fanapahankevitry momba fan̈ontanian̈a maventy ty: Iro fokonolo aby io ma tsy maintsy man̈aja zonolombelon̈o erantany?

 Tamy le 16 Zie 2020 in̈y, Fitsaran̈a Momba Lalàmpan̈oren̈anany Ekoatera, fitsaran̈a tampony amy tany io nandiniky afera io. Iro rahalahy avôkà ta Ekoatera nisoloten̈a fiangonan̈a in̈y. Mbala nisy rahalahintsika efatra avôkà iraisampirenena sady efa zadraharaha koa mba tiô tamy fitsaran̈a io. Fa nohony fisiany COVID-19 fo iro nan̈ano vidéoconférence fo taminio. Sambany taminio mba nikeny tribinaly ekipiny pitsara misoloten̈a Vavolombelon̈o Jehovah erantany han̈azava hevitrindro. c Fa baka hiarovan̈a zondro rahalahy aby io aminy amaray an̈y, iro solonten̈antsika aby io nangataka tamy fitsaran̈a ambony han̈amia lalan̈a iro hikoran̈a hevitriny fitsaran̈a iraisampirenena fa manan̈a zo olo tsiaraikiaraiky han̈araka fivavahan̈a tiany.

 Iro rahalahy ndreky ranabavy ta Vallée d’Otavalo tan̈y efa niambin̈y mare didimpitsaran̈a io. Ten̈a nanohin̈y fondro fan̈ampian̈a nazondro baka tamindro rahalahy aby io. Misy antipan̈ahy araiky, César an̈arany baka amy fiangonan̈a mivolan̈a quechua, a Ilumán nivolan̈a: “Efa Jehovah zaraiky edy mampiasa fandaminan̈anany han̈anaovan̈a raha maventy be karaha io han̈ampian̈a olo vitsy.”

 Vavolombelon̈o Jehovah aby, iro avôkà jiaby nikarakara afera io, ke ravoravo iro mba nan̈amia fahaizan̈andro maimaimpoan̈a. Kanefa, man̈oman̈a ndreky man̈ano fikarohan̈a amy raha momba fitsaran̈a indesin̈y amy Fitsaran̈a zen̈y mitaky fotoan̈a ndreky vola. Tamy fitsaran̈a araiky ta Meksiky tan̈y, iro avôkàntsika ndreky iro rahalahy aby io nandany mandilatra 380 lera nan̈oman̈ana lahatsoratra, baka io kadiriny 240 lera nandikan̈a iro io. Avôkà efa tsy ela 40 baka amy firenena isankarazany nandany anjatony lera hikarakaran̈a raha momba fitsaran̈a ta Ekoatera io. Akory nahavitan̈a niantoko depansy jiaby lanindro rahalahy aby io tamy raha aby zen̈y? Baka tamy fan̈amezan̈a antsitrapo nataonaro tamy fomba isankarazany tamy donate.jw.org. Ten̈a man̈ano mersy anaro zahay, fotony anaro mazoto man̈amia.