Zaho tombo ta Puerto Limón. Izio tanàna misy paoro amy faritry atin̈ianany Costa Rica. Valo zahay kibo araiky fa zaho fo alohany farany. Tamy zaho valo taon̈o, naty papako, ke mamanay fo nitarimy zahay.

Rango mbala hely zaho efa tia baseball. Zaho koa fa nahaibe, zaho miditry taminy ekipy araiky tsy ten̈a malaza zay. Zaho koa fa 20 taon̈o manan̈amby, nisy lelahy araiky, pitady olo mahay baseball, nikaiky zaho hisoma taminy ekipy malaza araiky ta Nikaragoà. Zaho tsy tihipetraka tan̈y fotony mbala nikarakara mamako, fotony izy narary ke zaho tsy nan̈eky nandeha. Nisy olo hafa koa nikaiky zaho hisoma taminy ekipy nasionaliny Costa Rica, tafara tatỳ. Olo nalain̈a hisoma taminy ekipy io mbala tsiary ndraiky nisoma taminy ekipy malaza. Nan̈eky zaho ke loso an̈isany ekipy nasionaliny Costa Rica, nanomboko taminy 1949 firaka 1952. Zaho efa nisoma ta Cuba, Meksiky baka io Nikaragoà. Miaro faritry nan̈atsipazan̈a laboly zaho taminy ekipy io, sady azo koran̈iny nahay izio tsarabe. Ravoravo zaho koa fa nisy olo nandronton̈o an̈aranaka lera iro mizaha zahay misoma!

Tan̈atiny zen̈y zaho naditry koa. Zaho efa nisy olo niarahako kanefa mbala niaraka tamy man̈angy maro oe. Pigiaka toaka mare zaho. Nisy fotoan̈a zaho namo ke amarainizio vo nahazo jery. Tsy azoko onon̈o foeky fomba naviako tantran̈o. Nisoma loterie koa zaho baka io nisoma dômy loka.

Tamy zen̈y, nanjary Vavolombelon̈o Jehovah mamako. Nifen̈y mare izy nikoran̈a raha ninoany taminaka fa tsy nijireko. Zaho varian̈a tamy baseball fo. Koa fa lera zaho nan̈ano fan̈azaranten̈a, zaho tsy nahatsiaro tihina zen̈y foeky. Ke tsisy raha natakaloko izio foeky. Hisoma fo raha tan̈aty jerinaka!

Tamy zaho 29 taon̈o, zaho naratra mare, zaho taminio nifen̈y nanambotro laboly zay tamy soma araiky nataonay zay. Fa zaho koa fa janga, zaho niala tsy ho pisoma malaza eky. Ndray zen̈y, tsy ten̈a nambelako raha momba baseball io. Zaho nan̈ano pampiofan̈a ekipy araiky tantanàna tio.

Taminy 1957, zaho mba nan̈aton̈o fivoriambeny vondroparitriny Vavolombelon̈o Jehovah. Izio natao tamy stady araiky fan̈anaovanay baseball. Zaho nandiniky mare iro Vavolombelon̈o nipetraka narikitry zaho. Ny raha hitako, iro ten̈a man̈aja olo fa tsy karaha olo pizaha baseball, kafiry ndreky mitabataba. Zen̈y raha nahavy zaho nan̈eky hianatra Baiboly tamy Vavolombelon̈o Jehovah ndreky nan̈aton̈o fivorian̈andro.

Maro raha nampianariny Baiboly nahagaga zaho. Ohatra, nivolan̈a Jesosy fa tsy maintsy ambara olo jiaby antsendriky vaovao tsara momba Fanjakan̈any Zan̈ahary, zay vo avy farany. (Matio 24:14) Nianarako fa tsy karamain̈y foeky olo ten̈a Kristianin̈y koa fa man̈ano izio. Karaha ty baka raha nivolan̈iny Jesosy: “Man̈ameza maimaimpoan̈a, fotony anaro nahazo maimaimpoan̈a.”​—Matio 10:8.

Nampitovisiko tamy raha nianarako tamy Baiboly raha nataondro Vavolombelon̈o Jehovah aby io. Iro nan̈ano erakany vitandro tamy fitorian̈a vaovao tsara momba Fanjakan̈any Zan̈ahary io erantany. Iro koa tsy matity erakany didiny Jesosy amy Kristianin̈y. Nanjary tiholoso Vavolombelon̈o Jehovah zaho koa fa nandiniky kaikiny Jesosy amy Marka 10:21 ao. Ho izy: ‘Man̈araha zaho.’

Elaela zaho vo ten̈a nahavita niova. Efa taon̈o maro nan̈anaovako lôtô. Ke zaho koa fa nan̈ano loka, efa nisy isa fazahoako oe. Ke io fo nifidiko isaka herin̈iandra lera zaho miloka. Kanefa, nianarako tamy Baiboly fa tsy tiany Zan̈ahary olo matoky ‘zan̈ahariny vintan̈a’ ndreky olo tsy mety afapo amy raha anan̈any. (Isaia 65:11; 1 Korintianina 6:10) Nanapakevitry zaho tsy han̈ano loka eky. Nahagaga fa isa fazahoako in̈y nahazo dimansy tafaranio. Nankadalainolo zaho fotony tsy nan̈ano loka taminy herin̈iandra io. Nitirendro han̈ano loka ndraiky zaho fa zaho tsy nan̈eky. Zaho efa tsy nipody niloka eky.

Efa nifen̈y zaho nisikin̈y ‘toetry vaovao’, baka io natao batisa tamy fivoriambeny Vavolombelon̈o Jehovah. (Efesianina 4:24) Nisy raha nitsapa finoan̈anaka mare zaho taminy andrany batisanaka. Harivanio, zaho nody tamy lotely nipitrahako in̈y, tio fo nitsangana tamy varavaran̈a sambranaka tio olo tiako taloha in̈y. Volan̈iny: “Alo atsika mba hisomasoma hely!” Zaho tsy nan̈eky. Nivolan̈iko taminany fa zaho efa mifen̈y man̈araka raha koran̈iny Baiboly. (1 Korintianina 6:18) Volan̈iny: “Ino?” Tio izy nankaratsiratsy raha koran̈iny Baiboly momba firaisan̈a baka io izy mila hiforse zaho hiaraka taminany ndraiky. Ke direkty zaho niditry tamy sambranaka tao baka io nigadraiko lakile varavaran̈a. Ravoravo mare zaho fa mbala madio fitondranten̈a fo zaho, nanomboko tamy zaho nanjary Vavolombelon̈o Jehovah, taminy 1958.

Izikoa soratin̈y edy hatsaran̈a jiaby nazoko, ten̈a maro ankitin̈y ke mety hahafeno boky araiky. Loso manan̈a naman̈a tsara maro oe zaho, ke nanjary ten̈a misy dikany fiain̈ananaka, baka io zaho ten̈a mahatsiaro sambatra.

Mbala tia baseball fo zaho firaka iziô, kanefa efa tsy zen̈y eky ny raha ten̈a maventy aminaka. Marin̈y ndraiky fa loso nalaza ndreky nanambola be zaho koa fa nisoma baseball, kanefa raha mandalo fo zen̈y. Fa fifandraisako amy Zan̈ahary ndreky iro rahalahiko kristianin̈y aby io ndraiky haharitry mandrakizay. Karaha ty volan̈iny Baiboly: “Donia ty ndreky fan̈irian̈anany ty mandalo fo, fa lan̈iany olo man̈ano sitrapony Zan̈ahary, ho velon̈o mandrakizay.” (1 Jaona 2:17) Ten̈a tiako Jehovah ndreky vahoakanany ke tsisy raha atakaloko zen̈y eky!