Zaho teraka ta Paddington. Tanàna ten̈a maro olo tamy faritry Londres izio. Niaraka nipetraka tamy mamako ndreky rahavaviko telo zaho. Mamolava papako ke matetiky izy tsy nody tantran̈o.

Tamy zaho mbala hely, zaho nampianariny mamako nivavaka isaka ariva. Nisy Baiboly hely zay zaho, ke bokiny Salamo fo tao. Zaho namoron̈o hira baka tamy bokiny Salamo io. Nisy fotoan̈a koa zaho namaky boky tsy momba fivavahan̈a kanefa hevitry ty hitako tao: ‘Ho avy fotoan̈a tsy hahitanao ny amaray.’ Ho zaho: ‘Tsy inoako fa efa karaha ty fo fiain̈ana. Ino fo dikany nampanisy zaho?’ Zaho tsy tihofoaty!

Nanjary nahalian̈a zaho oe fifandraisan̈a tamy fan̈ahy ratsy. Nan̈ohatra nikoran̈a taminolo maty zaho, ke nandeha tampasan̈a niaraka tamy tsaiky lekoly araiky taminay. Niaraka nizaha filma mampavozo koa zahay. Nampangorohoro raha io kanefa ten̈a tianay.

Efa naditry zaho rango zaho folo taon̈o. Tamy zen̈y zaho voanalohany nifima sigarety, baka io koa fa ela ny ela, efa tsy nafaka tamizio eky. Nanjary nifima jamala koa zaho. Tamy zaho 11 taon̈o voanalohany nahaizako nigiaka toaka. Tsy tiako foeky sironizio fa mba tiako fo zaho koa mba mamo. Zaho ten̈a tia lamoziky ndreky tia nitsinjaka. Nangalatra lalan̈a nandeha fety ndreky nandeha diskô zaho koa fa nalalaka hely. Aminy alin̈y in̈y zaho mandeha fa mahizikiziky zaho mipody. Lera zaho nandeha lekoly, miaraka vita koro araiky, zaho efa migiaka toaka edy.

Ratsy mare naotinaka tamy faramparany zaho nianatra. Neloko sady nalemy troko mare mamako koa fa nahay fa baka tamy ditrinaka fo nahavy zen̈y. Nankany zahay baka io zaho niala tantran̈o foeky. Niaraka tamy lelahy rasta zay zaho, Tony an̈arany. Izio olo tia bagara sady nandafo jamala, ke nalaza olo farany kafiry. Tsy ela zaho fa navesatra taminany edy, kanefa zaho taminio mbala 16 taon̈o fo. Teraka lelahy zaho.

Nisy fotoan̈a zaho napetraka tamy tran̈o pitarimy tsaiky tsisy babany niaraka tamy zanako. Namiandro efitry araiky zaho nipitrahako. Tan̈y nifanojiako voanalohany tamy Vavolombelon̈o Jehovah aroe vavy zay. Mba niaraka nianatra tamindro zaho andra araiky zay. Zaho taminio tihan̈aporofo tamindro fa diso fampianaran̈any Vavolombelon̈o Jehovah. Nivaliandro tamy Baiboly aby fan̈ontanian̈anaka jiaby. Tsara fan̈ahy ndreky kalma fo iro ke nan̈eky hianatra Baiboly tamindro zaho.

Tsy elany nianarako, hitako fa nan̈ova fiain̈ananaka raha nianarako. Efa navozo maty zaho rango zaho mbala hely. Nanjary haiko fa mbala hivilomin̈y olo maty, arakany fampianaran̈any Jesosy. (Jaona 5:28, 29) Nanjary haiko koa fa mikarakara atsika Zan̈ahary. (1 Petera 5:7) Ten̈a tafiditry amponaka tsarabe raha koran̈iny Jeremia 29:11 ty: “‘Ke haiko tsarabe raha efa niritriretiko hatao anaro’, volan̈iny Jehovah. ‘Zaho mieritreritry han̈amia anaro fiadan̈ana fa tsy antambo, baka anaro hanan̈a hoavy tsara ndreky fan̈antinan̈a.’” Zaho nanjary nino fa afaka miain̈y tsisy farany ambony tany eto zaho.​—Salamo 37:29.

Vavolombelon̈o Jehovah aby io ten̈a tia zaho mare. Tamy zaho voanalohany nivory, niraisindro tsara zaho, iro nitokiky taminaka. (Jaona 13:34, 35) Zaho mbala tsiary nataonolo karaha zen̈y tamy fivavahan̈a hafa tan̈y. Zaho ndray ratsy fitondranten̈a, iro nandray zaho tsarabe. Nanokana fotoan̈andro iro nikarakara ndreky nan̈ampy zaho. Nahatsiaro karaha tan̈atiny fianakavian̈a be fitiavan̈a mare in̈y zaho.

Koa fa nandeha fianarako Baiboly, tsapako fa zaho nila niova izikoa tihan̈araka fitsipiky Zan̈ahary momba fitondranten̈a. Niala tamy sigarety raha hitako ten̈a sarotro taminaka. Tihifima jamala mare fo zaho koa fa nitandren̈y hira sasany, ke nivoako hira fitandrin̈esako. Zaho tsy nan̈aton̈o fety tamy tany fan̈anaovan̈a fety aby in̈y eky, fotony manjary tihigiaka toaka fo zaho koa mandeha an̈y. Nialako koa iro namako taloha aby in̈y ke nifen̈y zaho nitady naman̈a afaka man̈ampy zaho hiova.​—Ohabolana 13:20.

Tony koa nianatra Baiboly tamy Vavolombelon̈o Jehovah. Fan̈ontanian̈anany jiaby voavaly tamy Baiboly ke resy lahatra izy fa marin̈y raha nampianarin̈y izy. Nanjary niova be izy. Nialany koa iro namany kafiry aby in̈y, tsy nangalatra eky izy, baka io tsy nifima jamala eky. Zahay roeny Tony samy tihamparavoravo Zan̈ahary. Nila nivoanay fitondranten̈anay. Tsapanay fa ten̈a mila zahay zanakanay aroe ke nan̈ano mariazy zahay taminy 1982.

Nitadiaviko tamy Tilikambo Fiambesan̈a ndreky Mifohaza! * tantaranolo karaha zaho, ke nahavita niala tamy fitondranten̈a ratsy. Nampisy korazy zaho mare modely namiandro! Nan̈ampy zaho hifen̈y mare ndreky tsy ho kivy raha zen̈y. Nivavaka tamy Jehovah fo zaho baka izy tsy han̈adin̈a zaho. Taminy 1982 zahay fivadiany natao batisa, ke nanjary Vavolombelon̈o Jehovah.

Zaho otrizay efa naty izikoa tsy nikamarady tamy Jehovah. Zahay fivadiany koa ten̈a mahatsapa fa nanohan̈a zahay fo Jehovah tan̈atiny sarotro. Nianatra natoky Jehovah koa zahay, ke nampiany fo fianakavian̈anay.​—Salamo 55:22.

Nan̈ampy zanakanay aroe hahay Jehovah koa ten̈a namparavoravo zaho. Ravoravo koa zaho izioty mahita iro zafiko aby io mianatra momba Jehovah.

Efa tsy miasaloha be momba ny amaray eky zaho sady efa tsy mavozo maty eky lera zaho mandry. Zahay fivadiany mitsidiky fiangonan̈any Vavolombelon̈o Jehovah isaka herin̈iandra mba hankahery iro. Zahay miaraka amindro mampianatra olo hafa fa hiain̈y tsisy farany lan̈iany olo mino Jesosy.