Tamy zaho teraka, ry olobeko nanan̈a tany nitsaboan̈a helihely zay, tambanivolony Galice, avaratra andrefany Espagne. Zaho fahefatra taminay valo mianadahy. Tsara mare fiain̈ananay jiaby tamy zen̈y. Tamy fotoan̈a zen̈y, tianolo nandefa zanakandro mandeha man̈ano seminera na miofan̈a han̈ano mompera na masera. Tsy maintsy misy araiky amy zanakandro fo alefandro. Fa taminay tran̈o araiky ndraiky, telo aby zahay nan̈ano zen̈y.

Tamy zaho 13 taon̈o, zaho nan̈araka zokiko viavy niofan̈a han̈ano masera ta Madrid. Hafahafa be zay fiain̈ana tan̈y. Tsy mahazo mikamarady aminolo, mare koa fitsipiky tan̈y. Vavaka fo raha atao, avio mila mampijaly ten̈a. Maraindrain̈y be, zahay fa mandeha misaintsain̈y a leglizy an̈y, fa jerinaka taminio foan̈a be. Avio zahay man̈ano hirampivavahan̈a ndreky Lamesy, fa amy volan̈a Latin. Tsisy raha haiko dikany raha volan̈indro, ke tsapako karaha lavitry zaho mare Zan̈ahary. Nangin̈y fo zaho isanandra. Nata tamy zahay roeny rahavaviko fanojy, ty fo raha nety nivolan̈inay: “Derain̈y Maria virjiny.” Izikoa fa baka nihina, antsasaka lera fo zahay nahazo nikoran̈a. Tsy karaha zen̈y foeky fiain̈ananay taminay tan̈y! Nahatsapa latsatokana mare zaho, ke matetiky zaho nitomoan̈y fo.

Zaho ndray tsiary nahatsapa marikitry Zan̈ahary, nataoko fo voadinaka, ke tamy zaho 17 taon̈o, zaho nanjary masera. Raha nirahin̈y nataoko fo nataoko. Fa tsy ela, zaho nanomboko nisalasala tsao tsy io raha tokony nataoko. Masera aby io matetiky nivolan̈a fa izikoa olo misalasala karaha zen̈y, halefa amy môtrobe zen̈y. Fa zaho mbala nisalasala fo. Haiko baka fa Jesosy Kristy tsiary ke nitokatokana zen̈y, fa izy nazoto nampianatra ndreky nan̈ampy olo. (Matio 4:23-25) Tamy zaho 20 taon̈o, zaho efa tsy tiho masera eky. Mahagaga fa araiky farany be tamindro masera aby io nivolan̈a taminaka fa izikoa zaho misalasala, sitrany zaho miala malaky. Mety navozo baka izy tsao han̈araka zaho koa olo sasany. Ke loso zaho.

Izikoa zaho fa nody, ry olobeko tsy nan̈ino zaho, fotony nazava tamindro raha navoa zaho tan̈y. Tamy tany nisy zahay io fo tsisy asa, ke zaho nandeha nifindra tan Allemagne. Nisy anadahiko araiky zay nipetraka tan̈y. Izy niditry mambrany antoko Koministy Espagnioly mitady vola andafy. Tiako niaraka tamindro fotony iro nitaky zony piasa ndreky zony man̈angy. Ke zaho koa fa nanjary Koministy, zaho nan̈ano mariazy taminy araiky tamindro. Zaho nandeha nizara bokiny Koministy avio nandeha nan̈ano lagrevy. Zaho nieritreritry fa ten̈a ilain̈y raha nataoko io.

Fa tafara tatỳ, nimpody kivy ndraiky zaho. Hitako baka fa matetiky Koministy aby io tsy man̈ano raha volan̈indro aby. Nahainisalasala fo zaho taminy 1971. Nisy tanora sasany mambrany antoko nisy zahay io baka nandeha nan̈ôro Konsilàny Espagne ta Francfort. Neloko baka iro fotony tsy rariny zen̈y raha nataony fitondrasan̈a tsy refesimandidy tan Espagne. Fa hitako fa ten̈a tsy mety raha nataondro io.

Tamy zanako voanalohany teraka, zaho nivolan̈a tamy vadiko fa zaho efa tsy handeha amy fivorian̈any Koministy eky. Nahatsiaro latsatokana mare zaho. Tsisy tamindro namako aby io baka mba navy namangy zaho tamy zaho teraka. Loso diniky zaho momba antony nisiany fiain̈ana. Raha mbala ho hisy vokany edy ezaka atao han̈atsaran̈a fiain̈ana va?

Taminy 1976, nisy Vavolombelon̈o Jehovah Espagnioly fivadiany zay navy tambaravaran̈anaka. Avio zaho namezandro boky. Izikoa iro fa nimpody namangy zaho, zaho nan̈ontany raha maro momba jaly ndreky raha tsy rariny. Gaga zaho fotony nampiasa Baiboly fo iro hamalian̈a fan̈ontanian̈anaka jiaby! Ke zaho direkty nan̈eky hianatra Baiboly.

Tamy voanalohany, fitiavan̈a hahay raha fo ny ten̈a antony nianarako. Fa niova raha zen̈y izikoa zahay roeny vadiko fa nanomboko nandeha nivory tamy Tran̈o Fivorian̈any Vavolombelon̈o Jehovah. Efa aroe zanakanay tamy zen̈y. Ten̈a tsara fan̈ahy iro Vavolombelon̈o aby io, ke zahay nalaindro tantran̈onay, avio nitatahiandro nitana tsaiky zahay koa fa tampivorian̈a tan̈y. Ke nanjary tiako mare niaraka tamindro.

Fa ndray zen̈y, mbala nisy raha nampisalasala zaho fo momba fivavahan̈a. Loso zaho namangy ry havako tan Espagne tan̈y. Nisy zamako zay mompera, ke nitady fomba izy hampavoly zaho mianatra Baiboly. Fa iro Vavolombelon̈o Jehovah tan̈y ten̈a nan̈ampy zaho. Nivaliandro baka tamy Baiboly tao fan̈ontanian̈anaka, karaha iro Vavolombelon̈o tan Allemagne in̈y fo. Ke tapakevitry zaho fa lera zaho mimpody an Allemagne, tohiziko fo fianaran̈anaka. Nianatra fo zaho nata vadiko voly. Natao batisa zaho taminy 1978.

Loso nahay ny marin̈y amy Baiboly zaho, ke nanjary nanan̈a tanjon̈o tsara amy fiain̈ana. Mandrisiky man̈angy, ohatra, 1 Petera 3:1-4 mba “han̈eky” vadiny, “han̈aja izy mare” avio hifen̈y hanan̈a ‘toetry milamin̈y ndreky mora, fotony raha aby zen̈y ten̈a valera amy Zan̈ahary.’ Toro lalan̈a karaha zen̈y nan̈ampy zaho hanjary vady ndreky reny tsara.

Efa kadiriny 35 taon̈o zay zaho Vavolombelon̈o Jehovah. Ravoravo mare zaho fotony afaka manompo Zan̈ahary miaraka amy piaramanompo erantany. Be koa haravoan̈anaka fotony efatra amindro zanakanay dimy aby io mba man̈ano karaha zen̈y koa.