Jakoba mpianatra mampiran̈a Baiboly amy fitaratra han̈ampy atsika hahita tsarabe toetrintsika. (Jak. 1:22-25) Ke akôry ataontsika hampiasa tsarabe Baiboly io karaha mampiasa fitaratra in̈y?

Vakia tsara izio. Izikoa atsika zisty mizaha fitaratra fo, mety tsy ho hitantsika raha tsy pare amin’ny ain̈intsika. Karaha zen̈y koa izikoa atsika mamaky malaky lera mamaky Baiboly. Tsy ho hitantsika koa ino toetry mila hivoantsika. Ke ten̈a mila vakintsika tsarabe Baiboly io.

Aza mizaha olo fa ain̈inao zahava. Olo koa fa mitaratra, raha tsy paripare amin’ny ain̈inany tômpiny zahavany fa tsy nin’olo hafa. Karaha zen̈y koa, atsika tsy hampiasa Baiboly hizahavan̈a raha tsy paripare amin’olo. Atsika koa man̈ano ambaka zen̈y, tsy ho hitantsika nintsika.

Mahaiza mandanjalanja. Izikoa raha tsy paripare amintsika fo ten̈a zahavantsika amy fitaratra, atsika mety ho kivy. Ke mila mahay mandanjalanja fo atsika izikoa mamaky Baiboly, fa tsy hitaky raha mandilatran’ny tadiavin’i Jehovah amintsika.​—Jak. 3:17.