1. Ino toetry araiky mampiavaka olo manompo Jehovah amin’olo miaboko Kristianin̈y?

 AN̈ISAN’NY raha araiky mampiavaka vahoakan’i Jehovah amindrô olo miaboko Kristianin̈y aby io, irô mazoto a mitory vaovao tsara. (Tit. 2:14) Ndraikindraiky mety ho hitanao sarotro mazoto mitory vaovao tsara zen̈y. Anao aby mety mahatsiaro karaha nataon’ny anti-pan̈ahy araiky niasa mare ty. Ho izy: “Misy fotoan̈a zaho tsy mazoto handeha hitory zen̈y foeky.”

2. Ino ndraikindraiky mety hahavy atsika tsy hazoto hitory?

² Mety hamparavoravo atsika man̈ano karazan̈a fanompoan̈a sasany, tozay man̈ano asa fitorian̈a. Nan̈ino? Izikoa baka atsika fa man̈ôrin̈y ndreky mikobaby Tran̈o Fivorian̈a in̈y, direkty efa hitantsika vokany, baka iô atsika mahatsapa fa nahavita raha. Karaha zen̈y koa, izikoa atsika fa man̈ampy olo tatran’ny antambo na mankahery irô rahalahintsika aby io, atsika miray sain̈y tsara ndreky mifankatia. Haintsika baka fa irô rahalahintsika aby io mankasitraka mare raha ataontsika amindrô. Fa tsy karaha zen̈y ndraiky izikoa atsika fa nitory tan̈atin’ny taon̈o maro tamy faritany araiky, kanefa tsy dia nahita vokatra. Na koa atsika mety ho tôjy olo tsy mitandren̈y hafatra indesintsika. Baka iô koa haintsika fa arakaraka an̈ataon̈an’ny farany, lôso mahaitsy tian’olo fo izio. (Mat. 10:22) Ino han̈ampy atsika hazoto fo hitory ndreky hahaihampitombo fo fahazotoan̈antsika io?

3. Ino raha ianarantsika momba Jesosy baka amy fan̈oharan̈a amy Lioka 13:6-9?

³ Hazoto han̈ano asa fitorian̈a atsika, izikoa mandiniky ohatran’i Jesosy. Tamin’izy nan̈ano fanompoan̈anany tambony tany teto, tsiary nambelany nihen̈y foeky fahazotoan̈anany. Ndray izy aby arakarakan’ny fandehan’ny fotoan̈a, nahainaro  fo raha nataony tamy fanompoan̈a. (Vakia Lioka 13:6-9.) Karaha mpikarakara tanin’ny rezain nikarakara rezain io tan̈atin’ny telo taon̈o, kanefa tsy namoa foeky, Jesosy koa tan̈atin’ny telo taon̈o nitory tamindrô Jiosy aby io. Kanefa ankamarozandrô io tsy nanjary mpianatranany. Fa ndray zen̈y, karaha nataon’ny mpikarakara tanin’ny rezain tsy nanapaka rezain tsy namoa in̈y, Jesosy koa tsy nan̈eky rivan̈a foeky tamin’olo nitoriany aby io. Izy koa tsy nampihen̈y fanompoan̈anany foeky. Ndray izy aby nahainifen̈y nitory fo, baka olo aby io han̈eky vaovao tsara.

4. Ino aby raha efatra nataon’i Jesosy ke handeha hidinihintsika?

⁴ Amy lahatsoratra ty, atsika handiniky karakôry nataon’i Jesosy nan̈aboaka fahazotoan̈anany, intsaka eky tan̈atin’ny tsiota fanjava farany tamy fanompoan̈anany. (Lioka 10:1) Hazoto fo atsika amy ziôty, izikoa mandiniky raha nampianariny ndreky mangala tahaka raha nataony. Ke atsika handiniky raha efatra ianarantsika baka amy Jesosy: 1) Izy nifantoko tamy sitrapôn’i Jehovah, 2) izy nangala onon̈o faminanian̈an’ny Baiboly, 3) izy nilampy tamy Jehovah han̈ampy izy, aviô 4) izy natoky fa hisy olo fo hitandren̈y izy.

IZY NIFANTOKO TAMY SITRAPÔN’I JEHOVAH

5. Karakôry nan̈aboahan’i Jesosy fa fan̈anaovan̈a sitrapôn’ny Zan̈ahary raha ten̈a maventy taminany?

⁵ Jesosy nazoto nitory “vaovao tsaran’ny Fanjakan̈an’ny Zan̈ahary”, fôtony hainy fa zen̈y raha tian’ny Zan̈ahary ataony. (Lioka 4:43) Ke fanompoan̈a nataon’i Jesosy io raha faran’ny maventy tamy fiain̈ananany. Ndray tamy fotoan̈a faramparany nan̈anaovany fanompoan̈a, izy “nitety tanambe ndreky ambanivolo”, nampianatra olo. (Lioka 13:22) Nampiofan̈a mpianatra maromaro koa izy, baka ho lôso mpitory vaovao tsara karaha izy koa.​—Lioka 10:1.

6. Nan̈ino tsy mahasolo asa fitorian̈a irô andraikitry hafa ataontsika? (Zahava koa sary.)

⁶ Iziôty koa, fitorian̈a vaovao tsara io asa faran’ny maventy tian’i Jehovah ndreky Jesosy ataontsika. (Mat. 24:14; 28:19, 20) Zay raha ataontsika amy fanompoan̈a Jehovah misy ifandraisany amin’ny asa fitorian̈a aby. Ohatra, atsika man̈ôrin̈y Tran̈o Fivorian̈a, baka irô olo  itoriantsika aby io avy manompo Jehovah amizio ao. Karaha zen̈y koa zay asa ataontsika amy Betela, hanohanan̈a asa fitorian̈a io fo. Baka iô atsika man̈ampy irô rahalahy ndreky ranabavy tatran’ny antambo aby io, tsy raha zisty fan̈ampian̈a irô fo fa, baka irô hahavita hivory ndreky hanohy hitory ndraiky koa. Izikoa haintsika fa ten̈a raha maventy asa fitorian̈a io, ndreky alaintsika onon̈o fa izio asa ten̈a tian’i Jehovah ataontsika, zen̈y handrisiky atsika tsy ho tapatapaka amy fanompoan̈a. Karaha ty nivolan̈in’i János, anti-pan̈ahy araiky baka a Hongrie: “Alaiko onon̈o fa irô asa jiaby atao amy fanompoan̈a Jehovah io tsisy mahasolo asa fitorian̈a. Izio andraikitrintsika voanalohany.”

7. Nan̈ino atsika tian’i Jehovah tsy vôly hitory? (1 Timoty 2:3, 4)

⁷ Hahaihitombo fo fahazotoantsika amy fanompoan̈a izikoa mira amy nin’i Jehovah fomba fahitantsika olo. Tiany ho maro tsarabe olo haharen̈y vaovao tsara ndreky han̈eky izio. (Vakia 1 Timoty 2:3, 4.) Ke baka hahavitan̈a zen̈y, izy mampiofan̈a atsika hahay hikoran̈a amin’olo tsarabe hafatra mamonjy fahin̈ana io. Ohatra, bokikely Tiava Olo ke Ampianara in̈y, man̈ampy atsika hahay hanomboko koran̈a amin’olo, baka irô hianatra Baiboly, ke hanjary mpianatran’i Jesosy. Aviô ndray mbala tsy manompo Jehovah irô amy ziôty, irô mbala mety ho afaka hanompo Jehovah fo, alohan’ny hifaran̈an’ny fahorian̈a be. Ke raha koran̈intsika amindrô iziôty io, mety handrisiky irô hanompo Jehovah amin’ny amaray. Fa izy fo, atsika mila tsy vôly mitory, baka raha zen̈y ho hisy.

IZY NANGALA ONON̈O FAMINANIAN̈AN’NY BAIBOLY

8. Nan̈ino fahaizan’i Jesosy faminanian̈a amy Baiboly, nisy vokany tamy fomba fampiasany fotoan̈anany?

⁸ Hain’i Jesosy tsarabe fomba hahatantirahan’ny faminanian̈an’ny Baiboly. Hainy fa fanompoan̈a ataony io hahadin̈y telo taon̈o sy tapany fo. (Dan. 9:26, 27) Hainy koa irô faminanian̈a momba fotoan̈a hifatesany ndreky karakôry hifatesany. (Lioka 18:31-34) Ke irô raha hainy aby io nambelan’i Jesosy hisy vokany tamy fomba nampiasany fotoan̈anany. Zen̈y nahavy izy nazoto nitory mare, baka ho vitany hankefa asa nan̈irahan̈a izy.

9. Nan̈ino faminanian̈an’ny Baiboly mandrisiky atsika hazoto hitory?

⁹ Handrisiky atsika hazoto hitory fahaizantsika faminanian̈a amy Baiboly. Haintsika fa efa hely fotoan̈a tavela nin’ny donia ty. Mazava amintsika koa fa irô raha aby mandalo amin’ny andra iziôty ndreky toe-tsain̈in’olo, mira tsarabe amy raha efa nivolan̈in’ny Baiboly fa hiboaka amin’ny andra farany. Haintsika fa tsy fifankazahoan̈a misy amy Firenena Matanjaka Angiley-Amerikain ndreky Russie miaraka amy firenena namandrô aby io, man̈atanteraka faminanian̈an’ny Baiboly momba mpanjakan’ny atsimo ndreky mpanjakan’ny avaratra, “amy fotoan̈an’ny farany.” (Dan. 11:40) Haintsika koa fa Firenena Matanjaka Angiley-Amerikain io, mifan̈itsy amy vitin’ny sarivongana amy Daniela 2:43-45. Ke atsika resy lahatra eraka raha nivolan̈in’ny faminanian̈a fa, efa hely tavela, Fanjakan̈an’ny Zan̈ahary handravan̈a Fanjakan̈an’olombelon̈o. Irô faminanian̈a jiaby zen̈y man̈ambara amintsika, efa aia fotoan̈a misy atsika iziôty. Irô io koa mandrisiky atsika han̈ano mare amin’ny asa fitorian̈a, fôtony izio ten̈a asa meky ankitin̈y.

10. Amy fomba karakôry koa mety han̈ampian’ny faminanian̈an’ny Baiboly atsika hazoto hitory fo?

¹⁰ Misy hafatra tiantsika hikoran̈iny amin’olo mare koa amy faminanian̈a aby amy Baiboly ao. Karaha ty ho Carrie, ranabavy araiky manompo amy Repobliky Dominikanin̈y an̈y: “Fampan̈antinan̈an’i Jehovah han̈ano raha maro  tsara amin’ny amaray, mandrisiky zaho hikoran̈a fahamarin̈ana amin’olo.” Ho izy koa: “Zaho koa fa mahita raha maro mahazo olo amy ziôty, haiko tsarabe fa irô fampan̈antinan̈a aby io tsy raha natao ninaka zaraiky fo fa natao nindrô koa.” Irô faminanian̈a aby amy Baiboly io mandrisiky atsika tsy ho vôly hitory, fôtony haintsika fa Jehovah man̈ampy atsika. Leila, mipetraka a Hongrie an̈y nivolan̈a: “Isaia 11:6-9 mandrisiky zaho hitory vaovao tsara fo, nata amin’olo aby karaha tsy hitandren̈y izio. Haiko fa olo jiaby mety miova, izikoa ampian’i Jehovah.” Aviô Christopher, rahalahy araiky baka a Zambia, nivolan̈a: “Marka 13:10 mikoran̈a tsialohaloha fa vaovao tsara io hambara eran-tany. Ke tsapako fa voninahitry maventy man̈ampy amy fan̈atantirahan̈a faminanian̈a io.” Ke anao ke? Ino aby faminanian̈a amy Baiboly mandrisiky anao tsy vôly hitory?

IZY NATOKY FA JEHOVAH HAN̈AMPY IZY

11. Nan̈ino ma Jesosy nila natoky fa Jehovah han̈ampy izy, baka izy nazoto nitory fo? (Lioka 12:49, 53)

¹¹ Jesosy natoky tsarabe fa Jehovah han̈ampy izy hazoto hitory fo. Jesosy ndray nahay nandanjalanja, hainy fa vaovao tsara momba Fanjakan̈an’ny Zan̈ahary io hahavy izy ho halan’olo ndreky hitoherin’olo mare. (Vakia Lioka 12:49, 53.) Irô mpitariky fivavahan̈a aby io impirimpiry nila hamono Jesosy, fôtony izy nitory. (Jaona 8:59; 10:31, 39) Fa Jesosy mbala nitory fo, fôtony hainy fa Jehovah tsy niala izy. Ho Jesosy: ‘Zaho tsy mandeha manokan̈a, fa Baba nan̈iraka zaho miaraka aminaka. ... Izy tsy niala zaho, fôtony zaho man̈ano raha mamparavoravo izy fo.’​—Jaona 8:16, 29.

12. Akôry nataon’i Jesosy nampioman̈a irô mpianatranany aby io, baka irô hazoto hitory fo nata irô hitoherin’olo?

¹² Jesosy nampatsiaro irô mpianatranany aby io fa irô nila natoky Jehovah han̈ampy irô. Natetiky izy nan̈amia toky irô fa Jehovah han̈ampy irô, nata irô hinjehin’olo. (Mat. 10:18-20; Lioka 12:11, 12) Hain’i Jesosy fa maro olo hanohitry vaovao tsara io, ke izy nandrisiky irô hitandrin̈y fo. (Mat. 10:16; Lioka 10:3) Irô nampianariny fa irô tsy tôkony hiforse olo tsy nahefa hitandren̈y raha koran̈indrô. (Lioka 10:10, 11) Aviô izy nivolan̈a tamindrô koa fa irô mila milefa, izikoa irô hinjehin’olo. (Mat. 10:23) Fa Jesosy na nazoto ndreky natoky Jehovah, izy tsy nanalisaly fahin̈ana tamy raha tsisy dikany.​—Jaona 11:53, 54.

13. Nan̈ino anao mety matoky fa Jehovah han̈ampy anao?

 ¹³ Mila fan̈ampian’i Jehovah koa atsika baka hazoto hitory fo, ndray misy olo manohitry. (Apok. 12:17) Nan̈ino ma anao mety matoky fa Jehovah han̈ampy anao? Diniha baka vavakan’i Jesosy, koran̈in’ny Jaona toko faha-​17 ao. Jesosy nangataka Jehovah hiaro irô apostolinany aby io, ke nivalin’i Jehovah fangatahan̈anany zen̈y. Amy bokin’ny Asan’ny Apostoly ao mikoran̈a akôry nataony nan̈ampy irô apostolinany aby io hazoto hitory fo, nata irô ninjehin’olo. Tamy vavaka nataony io, Jesosy koa nangataka Jehovah hiaro lan̈iany olo mino raha koran̈indrô apostoly aby io, an̈atin’izen̈y koa anao. Jehovah mbala tsy vôly mamaly vavakan’i Jesosy in̈y. Izy han̈ampy anao, karaha nataony nan̈ampy irô apostoly aby io.​—Jaona 17:11, 15, 20.

14. Akôry hahaizantsika fa atsika hahavita hazoto hitory fo? (Zahava koa sary.)

¹⁴ Arakarakan’ny an̈ataon̈an’ny faran’ny donia ty, mety mbala hahaisarotro fo fitorian̈a vaovao tsara io. Fa kanefa Jesosy nan̈amia toky fa atsika hahazo fan̈ampian̈a ilaintsika fo, baka atsika hazoto fo han̈ano asa io. (Lioka 21:12-15) Karaha nataon’i Jesosy ndreky irô mpianatranany aby io, ambelantsika olo hifidy hitandren̈y na tsy hitandren̈y, fa atsika tsy mimalo amindrô. Ndray amy tany aby misakana asa fitorian̈a ataontsika io, irô rahalahintsika aby io mbala mahavita mitory vaovao tsara io fo, fôtony irô matoky Jehovah, fa tsy mitôron̈o angôvondrô. Karaha nataon’i Jehovah tamindrô Kristianin̈y tamy taonjato voanalohany, izy koa man̈amia angôvo mpanomponany amy ziôty, baka ‘ho vita tsara asa fitorian̈a io’, eraka amin’ny itiavany izy. (2 Tim. 4:17) Matokisa fa anao koa matoky Jehovah, anao hazoto hitory fo.

IZY NATOKY FO FA HISY OLO HITANDREN̈Y

15. Ino ahitan̈a fa Jesosy natoky fa tsy maintsy hisy vokany tsara fo fitorian̈a ataony?

¹⁵ Jesosy natoky fa hisy olo sasany hitandren̈y vaovao tsara io. Zen̈y nan̈ampy izy hazoto ndreky hafana fô fo, izy koa fa nitory. Ohatra, kadiriny taon̈o araiky tafaran’ny nanombohany nitory vaovao tsara in̈y, hitany fa naro olo vôn̈ono hitandren̈y izio. Nampiran̈iny tamy vilo araiky misy vokatra efa masaka, ke efa mila alain̈y izio. (Jaona 4:35) Kadiriny  taon̈o araiky tafaran’izin̈y koa, izy nivolan̈a tamy mpianatranany aby io: “Be ankitin̈y vokatra.” (Mat. 9:37, 38) Aviô tafaran’izin̈y koa, izy mbala nivolan̈a fo koa: “Be ankitin̈y vokatra ... Ke iangavia Tômpin’ny vokatra han̈iraka mpiasa hangala vokatra.” (Lioka 10:2) Jesosy natoky fo fa tsy maintsy mbala hisy olo hitandren̈y vaovao tsara io. Ke ravoravo izy koa fa tôjy olo naro nitandren̈y izio.​—Lioka 10:21.

16. Nan̈ino ma man̈ampy atsika hazoto hitory, fan̈oharan̈a aby nataon’i Jesosy io? (Lioka 13:18-21) (Zahava koa sary.)

¹⁶ Jesosy nan̈ampy irô mpianatranany aby io baka irô hazoto hitory fo. Ke nampianariny irô fa hisy vokany maventy asa fitorian̈a ataondrô io. Ohatra, diniha baka irô fan̈oharan̈a aroe nataony ty. (Vakia Lioka 13:18-21.) Tamy fan̈oharan̈a araiky, Jesosy nampiran̈a hafatra momba Fanjakan̈an’ny Zan̈ahary io tamy voan’ny motardy araiky madiniky, naniry ke nanjary vodin’ny kakazo araiky maventy be. Dikan’izen̈y, maro olo han̈eky vaovao tsara io, ke tsisy raha hahasakana zen̈y tsy ho hisy. Tamy fan̈oharan̈a araiky ndraiky, Jesosy nampiran̈a Fanjakan̈a io tamy levira, fôtony hafatra momba Fanjakan̈a io hitorin̈a amy tany maro ambony tany eto ndreky hahavy olo maro hiova, nata tsy direkty hitan’olo fiovoan̈a ataondrô zen̈y. Ke Jesosy nan̈amia toky mpianatranany aby io fa hahavita han̈ampy olo maro, hafatra torindrô amin’olo io.

17. Ino aby antony hatokisantsika fa mbala hisy olo hitandren̈y fo, izikoa atsika fa mitory?

¹⁷ Izikoa atsika mieritreritry fa asa fitorian̈a io man̈ampy olo maro eran-tany, hahaihisy korazy fo atsika ke tsy vôly hitory. Isaka taon̈o, an-tapitrisany olo lian̈a man̈aton̈o Fahatsiarovan̈a, mianatra Baiboly, ndreky miaraka amintsika man̈ano asa fitorian̈a io. Tsy haintsika firy olo mbala han̈eky asa fitorian̈a ataontsika io. Fa raha haintsika fo, Jehovah mamory vahoaka be ho tafitsaka velon̈o amy fahorian̈a be ho avy io. (Apok. 7:9, 14) Jehovah Tômpin’ny vokatra io, ke matoky izy fa mbala ho maro olo han̈eky vaovao tsara io. Zen̈y an̈isan’ny antony mahavy atsika mbala tsy vôly mitory.

18. Ino raha tiantsika ho tsapan’olo, irô koa fa mahita atsika mitory?

¹⁸ Mpianatran’i Jesosy aby io nazoto nitory vaovao tsara fo letrizay. Irô tsy navozovozo foeky nitory. ‘Tontohitry olo fa irô io dia araiky tamy Jesosy.’ (Asa. 4:13) Irarian̈a olo mahita atsika amy fanompoan̈a hahita fa atsika mazoto mare, ke hahatsapa fa atsika mangala tahaka Jesosy.