LAHATSORATRA FIANARAN̈A 1
Matokisa fa Fahamarin̈ana Volan̈a Zan̈ahary
ANDININTENY NINY TAON̈O 2023: “Fahamarin̈ana ten̈a ventiny koran̈a amy volan̈anao.”—SAL. 119:160.
HIRA 96 Harena Sarobidy Ilay Boky avy Amin’Andriamanitra
HO HITA ATO a
1. Nan̈ino maro olo amy zioty tsy matoky Baiboly?
EFA tsy hainolo maro amy zioty eky azovy olo mety atokisan̈a. Iro efa tsy ten̈a matoky pan̈ano politiky, pahay siansy, avio pan̈ano raharahambarotro, fotony tsy azondro antoko tsao olo aby io tsy mitady raha mahatsara iro aby.Tsy basinizen̈y koa fa iro efa tsy man̈aja pitariky fivavahan̈a aby mivolan̈a fa Kristianin̈y sady mivolan̈a fa man̈araka raha koran̈iny Baiboly. Ke tsy mahagaga izikoa maro olo efa tsy matoky Baiboly eky.
2. Koa Salamo 119:160 zahan̈a, resy lahatra aminino atsika?
2 Panompony Jehovah jiaby samy resy lahatra fa Jehovah ‘Zan̈ahariny fahamarin̈ana’ sady mitady raha ten̈a mahatsara atsika fo. (Sal. 31:5; Isaia 48:17) Haintsika fa atsika afaka matoky raha vakintsika amy Baiboly fotony ‘fahamarin̈ana ten̈a ventiny koran̈a amy volan̈a Zan̈ahary.’ b (Vakia Salamo 119:160.) Mitovy hevitry amy raha koran̈iny manampahaizan̈a araiky momba Baiboly ty atsika, hoizy: “Tsisy tsy marin̈y raha jiaby nivolan̈iny Zan̈ahary, avio tsy maintsy ho tanteraka. Vahoakanany afaka matoky raha volan̈iny, fotony iro matoky Zan̈ahary nivolan̈a izio.”
3. Ino raha hianarantsika amy lahatsoratra ty?
3 Akory an̈ampiantsika olo hatoky Volan̈a Zan̈ahary karaha atsika? Alô atsika handiniky antony telo mahavy atsika afaka matoky raha koran̈iny Baiboly. Ho hitantsika fa hafatra an̈atiny Baiboly mbala tsiary niova, tanteraka fo koa faminanian̈a an̈atinizio ao, avio izio mahavita man̈ova olo.
TSISY OLO AFAKA NAN̈OVA HAFATRA AN̈ATINY BAIBOLY
4. Nan̈ino olo sasany mieritreritry fa Baiboly efa niova?
4 Jehovah nampiasa lelahy tsy mivadiky kadiriny 40 hanoratra boky aby amy Baiboly. Fa amy zioty, efa tsisy eky ndray araiky soratan̈ana nataondro tamy voanalohany. Efa lay nadika baka tamindro vita dika soratra taloha tan̈y fo anan̈antsika. Zen̈y mahavy olo sasany amy zioty misalasala tsao efa tsy raha voasoratra tamy voanalohany in̈y eky an̈atiny Baiboly amy zioty io. Asa anao efa navy nieritreritry nan̈ino atsika afaka matoky fa mbala tsy niova raha an̈atiny Baiboly?
Nitandrin̈y mare iro pan̈ano dika soratra mahay koa fa nan̈ano Soratra Hebreo, baka ho azo antoko fa marin̈y tsarabe fomba nandikandro Volan̈a Zan̈ahary (Zahava fehintsoratra 5)
5. Akory fomba nan̈anaovan̈a dika soratra Soratra Hebreo? (Zahava sary amy fon̈ony gazety ty.)
5 Akory nataony Jehovah niaro hafatra an̈aty Baiboly ao? Izy nan̈iraka vahoakanany han̈ano dika soratra izio. Zen̈y iziô raha nirahiny nataony panjakany Israely baka iro hanan̈a Lalàn̈a vita dika soratra nindro manokan̈a. Avio Levita aby io nirahiny nampianatra Lalàn̈a io vahoaka. (Deot. 17:18; 31:24-26; Neh. 8:7) Tafarandro Jiosy aby io natao sesitany ta Babylony, nisy manampahaizan̈a maromaro amy fan̈anaovan̈a dika soratra nanomboko nandika Soratra Hebreo. Maro vitandro tamy zen̈y. (Ezra 7:6, l.p.a.) Nitandrin̈y lelahy aby io koa fa nan̈ano zen̈y. Nikontendro araiky araiky volan̈a ndreky litera tsiaraikiaraiky, baka azondro antoko fa marin̈y tsarabe raha jiaby nisoratindro. Fa ndray zen̈y, iro tsy lavorary, ke nisy diso hely sasany tamy raha nataondro. Na izy man̈ano zen̈y, maromaro dika soratra natao tamy lahatsoratra araiky, ke tafara tatỳ hita fo raha diso madinidiniky aby in̈y. Tamy fomba akory?
6. Akory nahitan̈a raha diso tamy dika soratra Baiboly?
6 Maro manampahaizan̈a amy zioty nahita fomba tsara mety ahitan̈a raha diso nataondro pan̈ano dika soratra Baiboly. Iritrireta hely baka ty: Misy lelahy 100 nirahin̈y nan̈ano dika soratra lahatsoratra pazy araiky. Fa nisy araiky tamindro ndraiky tafihan̈ano diso hely tamy raha nisoratiny. Karakory fomba ahitan̈a raha diso io? Ampiran̈iny dika soratra jiaby vitandro. Karaha zen̈y koa, izikoa fa nampiran̈indro manampahizan̈a aby io dika soratra Baiboly maromaro, nanjary hitandro raha diso na raha tafadosonolo nan̈ano dika soratra izio.
7. Akory ahaizan̈a fa nitandrin̈y mare iro pan̈ano dika soratra Baiboly?
7 Nitandrin̈y mare iro pan̈ano dika soratra Baiboly baka izio ho marin̈y tsarabe, nata tsy mora nan̈ano zen̈y. Ty ohatra araiky man̈aporofo zen̈y: Vita tamy taon̈o 1 008 na taminy 1 009 dika soratra farany ela misy boky jiaby amy Soratra Hebreo. Kôdeksy Leningrad ikahian̈a izio. Fa vo tsy ela, maromaro dika soratra Baiboly na tapany amizio hita. Iro io mbala kaikainy Kôdeksy Leningrad, fotony vita kadiriny 1 000 taon̈o talohanany. Mety misy olo hieritreritry fa efa tsy mitovy raha an̈atiny dika soratra taloha aby io foeky raha an̈atiny Kôdeksy Leningrad io, fotony dika soratra aby io efa nampodimpody nadika tan̈atiny 1 000 taon̈o mandilatra. Kanefa tsy marin̈y zen̈y. Nampiran̈indro manampahaizan̈a aby io iro dika soratra aby io ndreky Kôdeksy Leningrad. Ino raha hitandro? Nisy tsy nitovy hely fo soratra aby tao, fa hevitry ndraiky tsy niova foeky.
8. Ino raha tsy mampiran̈a dika soratra Soratra Griky Kristianin̈y ndreky dika soratra boky hafa nisy tamy zen̈y?
8 Nan̈ano dika soratra Baiboly koa iro Kristianin̈y voanalohany. Nitandrin̈y mare iro nandika boky 27 amy Soratra Griky. Iro dika soratra nataondro aby io baka tio nampiasaindro lera nivory ndreky nitory. Nisy manampahaizan̈a araiky nampiran̈a iro Soratra Griky vita dika soratra aby io ndreky boky hafa nisoratin̈y tamy fotoan̈a nan̈anaovan̈a iro dika soratra aby io. Hoizy: “Aminy ankapobeny, [iro Soratra Griky vita dika soratra] misy amy zioty mbala maromaro sady feno tsara ... izikoa ampiran̈iny amy boky sasany aby io.” Mivolan̈a karaha ty koa boky Famakafakan̈a Testamenta Vaovao (angiley): “Afaka matoky atsika fa mitovy tamy raha nisoratindro panoratra tamy voanalohany tan̈y fo hafatra an̈atiny [Soratra Griky] fandikanteny tsara sady moderny misy amy zioty.”
9. Izikoa Isaia 40:8 zahan̈a, karakory hafatra an̈atiny Baiboly?
9 Tan̈atiny anjatony taon̈o, maro pan̈ano dika soratra nitandrin̈y mare koa fa nandika Baiboly. Zen̈y mahavy Baiboly vakintsika ndreky ianarantsika amy zioty io marin̈y tsara. c Hay be fa tsy maintsy Jehovah fo nan̈ano raha nahavy Volan̈anany io tsy vitany mbala misy firaka zioty fo fa marin̈y tsara koa. (Vakia Isaia 40:8.) Kanefa mety mbala misy olo hivolan̈a fa ndray tsy niova hafatra an̈atiny Baiboly, zen̈y tsy man̈aporofo fa izio baka amy Zan̈ahary. Ke alô atsika zioty handiniky porofo hafa ahaizan̈a fa Baiboly io baka amy Zan̈ahary.
METY ATOKISAN̈A FAMINANIAN̈A AMY BAIBOLY
Ankavia: C. Sappa/DeAgostini/Getty Images; ankavanan̈a: Image © Homo Cosmicos/Shutterstock
Tanteraka fo faminanian̈any Baiboly na taloha tan̈y na amy zioty (Zahava fehintsoratra 10-11) e
10. Man̈ameza ohatrany faminanian̈a araiky efa tanteraka ahitan̈a fa marin̈y raha koran̈iny 2 Petera 1:21. (Zahava sary.)
10 Maro faminanian̈a amy Baiboly ao efa tanteraka. Sasany amindro io nisoratin̈y anjatony taon̈o talohany nahatantirahindro. Izikoa tantara zahavan̈a, tanteraka ankitin̈y faminanian̈a aby io. Tsy mahagaga atsika zen̈y fotony haintsika fa faminanian̈a jiaby an̈aty Baiboly ao baka amy Jehovah. (Vakia 2 Petera 1:21.) Diniha, ohatra, faminanian̈a aby mivolan̈a fa ho resy tanànany Babylony. Kadiriny tan̈elan̈elany 778 ndreky 732 T.K., paminan̈y Isaia naminan̈y fa ho resy tanànany Babylony matanjaka be io. Firaka aminy an̈aranolo handresy izio mbala nambarany, tsy azovy fa i Kyrosy. Nambarany Isaia koa akory hataony handresy izio. (Isaia 44:27–45:2) Naminan̈y koa Isaia fa Babylony ho rava sady efa tsy hipitrahanolo eky. (Isaia 13:19, 20) Zen̈y ankitin̈y raha niboaka. Tamy 539 T.K., Babylony resiny Medianin̈y ndreky Persianin̈y. Amy zioty efa lemby foeky tany nisy tanàna maventy be io.—Zahava video Baiboly Efa Nan̈ambara Tsialohaloha fa ho Resy Babylony amy boky Mankafiza Fiain̈ana Tsisy Farany! leson faha-3 hevitry faha-5, amy forma elektroniky.
11. Akory nahatantirahany faminanian̈a amy Daniela 2:41-43, aminy andra zioty?
11 Tsy taloha tan̈y fo nisy faminanian̈any Baiboly tanteraka, fa ndray amy zioty koa. Iritrireta, ohatra, fomba nahatantirahany faminanian̈a miavaka nikoran̈iny Daniela momba Firenena Matanjaka Angiley-Amerikain. (Vakia Daniela 2:41-43.) Faminanian̈a io nivolan̈a mazava tsara fa tapany amy firenena matanjaka io ‘hatanjaka’ karaha vy, fa tapany ndraiky ‘halemy’ karaha tanimanga. Tanteraka ankitin̈y raha zen̈y. Natanjaka karaha vy Grande-Bretagne ndreky Ameriky. Iro nandresy tamindro Ady Lehibe aroe, salakady mbala manan̈a tafiky matanjaka koa. Fa ndray zen̈y, angovondro loso malemy azony raha ataony vahoaka indesindro. Vahoaka aby io baka migrevo matetiky fotony iro mitaky zony piasa, na mitaky fahaleovanten̈a ndreky man̈ano grevo amy raha isankarazany. Nisy manampahaizan̈a araiky momba politiky nivolan̈a karaha ty vo tsy ela: “Amy zioty, tsisy firenena mandroso sady demokratiky misaratsaraka amy lafiny arapolitiky mandilatra Etazonỳ, erantany.” Baka io taon̈o maromaro tafara tato, Grande-Bretagne, tapany araiky amy firenena matanjaka io loso nisaratsaraka koa. Nan̈ino? Fotony tsy ikeny vahoaka sasany fifandraisan̈a misy amy firenenandro ndreky firenena aby amy Vondron̈o Eropeain. Baka amy fisaratsarahan̈a aby zen̈y mahavy Firenena Matanjaka Angiley-Amerikain tsy ten̈a mahavita man̈ano raha.
12. Ino raha atokisantsika koa fa mandiniky faminanian̈a amy Baiboly?
12 Maro faminanian̈a amy Baiboly efa tanteraka. Iro io mankafatatra fatokisantsika fa tsy maintsy ho tanteraka fo koa raha aby nampan̈antinainy Zan̈ahary aminy amaray. Ke atsika mahatsapa karaha pan̈ano salamo taminizy nivavaka karaha ty tamy Jehovah: ‘Fa tsy din̈iko han̈avotanao zaho, fotony zaho man̈anten̈a volan̈anao.’ (Sal. 119:81) Amy Baiboly ao, Jehovah man̈amia atsika “hoavy tsara ndreky fan̈antinan̈a.” (Jer. 29:11) Fiain̈ana antinaintsika aminy amaray zen̈y tsy miankin̈y amy raha ataonolombelon̈o fa amy fampan̈antinan̈any Jehovah. Ke irarian̈a atsika hatoky Volan̈a Zan̈ahary fo, ke hazoto hianatra faminanian̈a amy Baiboly.
TOROHEVITRY BAIBOLY MAN̈AMPY OLO ANTAPITRISANY
13. Izikoa Salamo 119:66, 138 zahan̈a, ino porofo hafa man̈aboaka fa Baiboly mety atokisan̈a?
13 Ty koa misy porofo hafa man̈aboaka fa Baiboly mety atokisan̈a: Izio man̈ampy lan̈iany olo man̈araka torohevitry an̈aty ao. (Vakia Salamo 119:66, 138.) Misy, ohatra, olo fivadiany efa nieritreritry hisaraka, fa amy zioty nanjary sambatra mare fotony iro nan̈araka torohevitry amy Baiboly. Zanakandro koa ravoravo fotony raimandrenindro kristianin̈y mikarakara tsara iro ndreky mankatia iro.—Efes. 5:22-29.
14. Afaka man̈ova olo ho tsara toetry fan̈arehan̈a torohevitry Baiboly. Man̈ameza ohatra.
14 Firaka aminolo nahavita raha farany ratsy mbala mahavita miova fo izikoa man̈araka torohevitry feno fahendrena baka amy Baiboly. Diniha baka akory nan̈ampiany Baiboly gadra araiky. Jack an̈arany. d Izy pamono olo sady ten̈a kafiry, ke nalaza ho an̈isany gadra farany mahery andra tamy gadra jiaby voaheloko hofoaty. Fa tandraraiky, Jack mba navy koa lera nisy olo nianatra Baiboly. Rikian̈a izy nahita hatsarampan̈ahiny rahalahy aby nitariky fianaran̈a io, ke izy nanomboko nianatra Baiboly koa. Izikoa fa narehany tamy fiain̈ananany fahamarin̈ana tamy Baiboly tao, niova mare fitondranten̈anany ndreky toetrinany. Koa fa nandeha fotoan̈a, izy loso pitory avio vita batisa. Jack nazoto nitory momba Fanjakan̈any Zan̈ahary tamy gadra hafa. Efatra, farany hely, gadra nampianariny Baiboly. Efa nanjary olo hafa foeky Jack koa fa avy andra hamonoan̈a izy. Nivolan̈a karaha ty araiky taminy avokànany: “Tsy karaha io foeky fahaizako Jack, 20 taon̈o loso zay. Ten̈a nan̈ova izy raha nampianarindro Vavolombelon̈o Jehovah aby io.” Marin̈y fa nivonen̈a fo Jack, fa ndray zen̈y, hita baka aminy ohatranany fa Volan̈a Zan̈ahary mety atokisan̈a sady mahavita man̈ova olo ho tsara toetry.—Isaia 11:6-9.
Torohevitry Baiboly efa nan̈ova fiain̈ananolo maro baka amy firenena isankarazany (Zahava fehintsoratra 15) f
15. Nan̈ino fan̈arehan̈a fahamarin̈ana amy Baiboly mampiavaka vahoakany Jehovah amy zioty? (Zahava sary.)
15 Miray sain̈y vahoakany Jehovah fotony iro man̈araka fahamarin̈ana amy Baiboly. (Jaona 13:35; 1 Kor. 1:10) Mora hita fihavan̈ana ndreky firaisantsain̈y misy amintsika fotony ankamarozanolo amy zioty misaratsaraka nohony politiky, karazan̈a, na faripiain̈ana. Lany fan̈ahy tsaiky lelahy araiky, izikoa fa nahita fa miray sain̈y marin̈y vahoakany Jehovah. Jean an̈arany, izy tombo tan Afriky. Nan̈ano maramila izy koa fa vaky ady antran̈o tamy tany nisy izy. Avio tafara, izy nilefa tamy tany hafa tsy lavitry tio. Tan̈y izy fanojy tamy Vavolombelon̈o Jehovah. Karaha ty ho Jean: “Nianarako fa olo man̈araka fivavahan̈a marin̈y zen̈y tsy man̈ano politiky salakady tsy misaratsaraka, fa mifankatia.” Nivolan̈a karaha ty koa izy: “Taloha, fiain̈ananaka nampiasaiko hiarovan̈a firenena araiky. Fa zaho koa fa nianatra fahamarin̈ana amy Baiboly, zaho tapakevitry hampiasa izio hanompoan̈a Jehovah.” Niova tanteraka i Jean. Amy zioty, izy efa tsy miady aminolo tsy mitovy karazan̈a aminany eky, fa mikoran̈a hafatra momba fiadan̈ana an̈aty Baiboly aminolo jiaby fanojy izy. Torohevitry Baiboly io efa nan̈ampy olo maro, baka amy firenena isankarazany. Zen̈y porofo maventy ahitan̈a fa mety atokisan̈a ankitin̈y Volan̈a Zan̈ahary.
ATOKISA FO FAHAMARIN̈ANA AMY VOLAN̈A ZAN̈AHARY
16. Nan̈ino atsika ten̈a mila matoky Volan̈a Zan̈ahary?
16 Mahairatsy fo donia ty, ke hahaiho sarotro fo hatoky Volan̈a Zan̈ahary. Olo baka mety han̈ano raha hahavy atsika hisalasala asa marin̈y ankitin̈y Baiboly io, na asa Jehovah nanendry ankitin̈y panompo atokisan̈a ndreky mahadiniky raha hitariky panomponany amy zioty. Fa izikoa atsika matoky fa marin̈y Volan̈a Zan̈ahary, ho vitantsika handresy raha mety hitsapa finoan̈antsika karaha zen̈y. Atsika koa ho ‘tapakevitry han̈araka fitsipiky Jehovah fo firaka amy farany.’ (Sal. 119:112) Tsy vitany zen̈y, ‘tsy ho men̈atra’ koa atsika han̈ambara aminolo fahamarin̈ana ndreky handrisiky iro han̈araka izio amy fiain̈anandro. (Sal. 119:46) Avio ‘ho ravoravo ndreky haharidraha’ fo atsika lera miaritry raha farany sarotro, an̈isanizen̈y fan̈injehan̈a.—Kol. 1:11; Sal. 119:143, 157.
17. Hampahatsiaro atsika ino andininteny niny taon̈o ty?
17 Ten̈a man̈ano mersy Jehovah atsika fotony atsika nambelany hahay ny marin̈y. Fahamarin̈ana io man̈ampy atsika ho kalma fo ndreky tsy havozovozo. Baka amizio koa ahaizantsika tsara akory atao miain̈y amy donia mikorontan̈a ndreky feno problemo ty. Baka amizio koa mahavy atsika man̈anten̈a fiain̈ana tsara lera Fanjakan̈any Zan̈ahary mitondra, aminy amaray. Ke irarian̈a andininteny niny taon̈o 2023 ty han̈ampy atsika hatoky tsarabe fa kila Volan̈a Zan̈ahary fahamarin̈ana aby!—Sal. 119:160.
HIRA 94 Jehovah ô, Misaotra Noho ny Teninao!
a Ten̈a mankafatatra finoan̈a andininteny nifidin̈y niny taon̈o 2023 ty: “Fahamarin̈ana ten̈a ventiny koran̈a amy volan̈anao.” (Sal. 119:160) Azo antoko fa anao man̈eky zen̈y. Kanefa maro olo tsy mino fa Baiboly io marin̈y salakady afaka man̈amia atsika torohevitry tsara. Hidinihintsika amy lahatsoratra ty porofo telo mety ampiasaintsika han̈ampian̈a olo tsara fô ho resy lahatra fa iro afaka matoky Baiboly ndreky torohevitry an̈atinizio ao.
b FAN̈AZAVAN̈A: Dikany volan̈a hebreo nadika “ventiny” aminy andininy io: Fitambarany na raha jiaby momba raha araiky.
c Izikoa tianao hahazo fan̈ampiny fan̈azavan̈a mikasiky fomba niarovan̈a Baiboly, sorata amy tany fan̈anaovan̈a fikarohan̈a amy jw.org/xmv ao “Tantara Ndreky Baiboly.”
d Nivoan̈a an̈aran̈a sasany.
