Jesosy nampianatra olo ho tia fihavanan̈a. Kanefa tandraraiky, izy nivolan̈a taminy apostolinany aby io karaha ty: “Aza mieritreritry fa zaho navy hitondra fihavanan̈a. Hitondra sabatra naviako fa tsy hitondra fihavanan̈a. Fotony zaho navy hampisaraka zanakalahy amy babany, zanaka man̈angy amy reniny, avio vinantovaviny amy rafozambaviny.” (Mat. 10:34, 35) Ino ma raha tiany Jesosy havian̈a?

Jesosy tsy tihampisaratsaraka fianakavian̈a. Kanefa hainy fa mety hampizarazara fianakavian̈a sasany raha nampianariny. Ke izikoa olo araiky tapakevitry han̈aradia Kristy sady atao batisa, izy efa tokony hieritreritry momba raha zen̈y sandra. Izikoa vadiny na lafamìnany hafa manohitry na man̈enjiky izy, mety tsy ho mora aminany han̈araka raha nampianariny Kristy.

Baiboly mampirisiky atsika ‘hihavan̈a aminolo jiaby.’ (Rom. 12:18) Fa fampianaran̈any Jesosy mety hanjary miran̈a “sabatra”, amy fianakavian̈a sasany. Zen̈y tsarabe raha misy izikoa olo araiky an̈atiny fianakavian̈a man̈eky fampianaran̈any Jesosy, kanefa sasany tsy man̈eky na manohitry izio. Izikoa zen̈y raha mandalo, manjary ‘fahavalony’ araiky mianatra fahamarin̈ana io iry havany, na olo tran̈o araiky aminany.​—Mat. 10:36.

Izikoa pianatrany Kristy miaraka mipetraka aminy havany, kanefa havany aby io tsy mitovy fivavahan̈a aminany, mety ho sarotro aminany ndraikindraiky han̈ano raha mamparavoravo Jehovah ndreky Jesosy. Nan̈ino? Fotony iro havany aby io mety hiforse izy hankalaza fety misy ifandraisany amy fivavahan̈a diso. Ke izy tsy maintsy mifidy na izy han̈ano raha mamparavoravo Jehovah ndreky Jesosy, na izy han̈ano raha mamparavoravo iry havany. Karaha ty nambarany Jesosy: “Zay olo tia babany na reniny mandilatra fitiavany zaho, tsy vain̈y zaho.” (Mat. 10:37) Raha tiany Jesosy havian̈a ma tokony hahen̈iny pianatranany aby io fitiavandro iry olobendro, zay iro vo vain̈y han̈aradia izy? Tsy zen̈y foeky. Tiany hazava amindro ino ny raha ten̈a maventy. Mbala tiantsika fo fianakavian̈antsika ndray halandro atsika manompo Jehovah. Ndray izy man̈ano zen̈y, Jehovah ny ten̈a tokony ho tiantsika voanalohany.

Marin̈y ndraiky fa tsy mora miaritry fan̈injehan̈a baka amy lafamỳ zen̈y. Kanefa, mila alaintsika onon̈o fo raha nambarany Jesosy amy Matio 10:38 ao, fotony atsika pianatranany. Ho izy ao: “Lan̈iany olo tsy man̈eky hitondra hazofijalian̈anany ndreky tsy man̈araka zaho, tsy vain̈y zaho.” Dikanizen̈y, fanoheran̈a baka amy fianakavian̈a io an̈isany raha tsy maintsy iaretany Kristianin̈y, ke mila vôn̈ono amy zen̈y atsika. Ndray izy man̈ano zen̈y, mila miezaka fo atsika ho tsara fitondranten̈a. Izikoa atsika man̈ano zen̈y, mety mbala hiova fo iro havantsika aby io ke han̈iry hianatra Baiboly.​—1 Pet. 3:1, 2.