ASALOHA io miran̈a raha araiky mavesatra an̈atiny fôntsika. (Ohab. 12:25) Asa efa nisy raha nampiasaloha anao mare? Mety efa kalikaly tsy din̈inao donko niaritry raha zen̈y. Kanefa, matokisa fa tsy anao zaraiky karaha zen̈y. Maro amintsika iziô tsy maintsy mikarakara havan̈a marary, maty havan̈a na mijaly fotony nandalaovany antambo tany misy atsika. Izikoa zen̈y raha handalaovanao, ino raha han̈ampy anao tsy hiasaloha dila loatra? a

Alô atsika handiniky modely nambelany Panjaka Davida, misy ahitantsika raha tokony hatao beky atsika tsy hiasaloha dila loatra. Maro problemo tsy maintsy nandalaovany Davida, avio nisy fotoan̈a izy efa tseky naty. (1 Sam. 17:34, 35; 18:10, 11) Akory nataony beky izy tsy hiasaloha dila loatra amy raha nahazo izy? Akory mety hangalantsika tahaka izy?

Isankarazany problemo niaretany Davida, ary raha aby zen̈y navy taminany indraiky mipàka. Diniha baka ohatra, raha nandalo taminizy nilefa Panjaka Saoly in̈y. Efa tihamono izy fo Saoly taminio. Kanefa mbala nisy raha hafa koa nandalo. Davida ndreky olo niaraka taminany koa fa nody baka lagera, taitry mare iro fotony lôso fanan̈anandro, may tran̈ondro, baka io fianakavian̈andro jiaby nindesiny fahavalo natao babo. Nan̈ano akory Davida? ‘Niafatrafatra nitomoan̈y izy ndreky iro olonany aby io, firaka iro lany angovo ke efa tsy nahavita nitomoan̈y eky.’ Sôsoko zen̈y, iro olo natokisany aby io koa mbala ‘nifampikoran̈a fa hitorabato izy.’ (1 Sam. 30:1-6) Problemo telo maro maventy navoa i Davida tiô: 1) Tsy hainy akory naniny fianakavian̈anany, 2) navozo izy tsao iro olonany aby io hamono izy, baka io 3) Panjaka Saoly koa mbala tsy vôly man̈enjiky izy mare. Diniha hely baka asalohany Davida tamy zen̈y!

Ke ino raha nataony Davida? Direkty ‘nitavandra Jehovah Zan̈aharinany izy ke nahazo angovo.’ Akory nan̈anaovany zen̈y? Davida koa fa azony problemo karaha io, direkty izy mivavaka beky Jehovah han̈ampy izy, baka io minimineny fomba efa nan̈ampiany Jehovah izy taloha. (1 Sam. 17:37; Sal. 18:2, 6) Hainy fa izy nila nangataka taridalan̈a tamy Jehovah misy ahaizany ino raha tokony hataony. Niaraka izy nahazo taridalan̈a baka tamy Jehovah, izy efa nan̈ano raha edy. Jehovah ma nitahy Davida ndreky olo niaraka taminany aby io? Zen̈y ke, fotony vitandro nan̈avotro fianakavian̈andro tamy fahavalo, baka io nazondro koa fanan̈anandro. (1 Sam. 30:7-9, 18, 19) Asa hitanao ino raha telo nataony Davida? Nivavaka izy beky Jehovah han̈ampy izy, avio nidinihiny koa fomba nan̈ampiany Jehovah izy taloha. Baka io izy koa fa nahazo taridalan̈a baka tamy Jehovah, direkty izy nan̈ano raha nifan̈araka tamy zen̈y. Akory mety hangalanao tahaka Davida? Ty misy fomba telo.

1. Mivavaka. Miaraka anao miasaloha, direkty mivavaha beky Jehovah han̈ampy anao ndreky han̈amia anao fahendrena. Koràn̈a aminany raha jiaby mampavesatra anao ndreky raha jiaby an̈atiny fônao lalin̈y an̈y. Izikoa anao tsy afaka mivavaka elaela, man̈anaova vavaka fôhiky an̈atiny fônao ao. Nivolan̈a i Davida fa ‘Jehovah lampimbato miaro izy, ke efa amy Jehovah edy azahoany fialaofan̈a azo antoko.’ (Sal. 18:2) Izio ma ten̈a mahômby ankitin̈y vavaka io? Karaha ty nambarany Kahlia, ranabavy pisava lalan̈a araiky zay:  “Zaho koa fa baka mivavaka, ren̈iko milamin̈y jerinaka ndreky fônaka. Vavaka ny raha ten̈a man̈ampy zaho hitovy fomba fisain̈ana amy Jehovah. Mahaimitombo fo koa fatokisako izy.” Hitantsika baka amy zen̈y fa vavaka io mahery ankitin̈y. Izio koa an̈isany fomba ampiasainy Jehovah han̈ampian̈a atsika, sirtò lera atsika miasaloha mare.

2. Misaintsain̈y. Asa efa nisy fotoan̈a anao niaritry raha sarotro, ke hitanao tsarabe fa tsy vitanao foeky niaritry izikoa tsy tiô Jehovah? Izikoa anao mandiniky fomba nan̈ampiany Jehovah anao ndreky panomponany taloha tan̈y, hanjary hanan̈a korazy anao, avio hitombo fatokisanao Jehovah. (Sal. 18:17-19) Karaha ty nambarany antipan̈ahy araiky, Joshua an̈arany: “Ataoko listy lan̈iany vavaka nataoko ke nazahoako valimbavaka tamy Jehovah. Fan̈anaovako zen̈y mampatsiaro zaho fa namezany Jehovah zaho fo zay raha nilaiko, zaho koa fa nan̈ano vavaka avoafaritry tsarabe.” Atsika koa fa mandiniky fomba nan̈ampiany Jehovah atsika, hahazo angovo hindesin̈y miaritry edy atsika lera misy raha mampiasaloha atsika mare.

3. Man̈ano raha. Alohany anao hanapakevitry, zahava antsendriky taridalan̈any Zan̈ahary, amy Volan̈anany ao. Ao zaraiky fo tany ahitan̈a taridalan̈a azo antoko. (Sal. 19:7, 11) Maro olo mahita fa iro koa fa man̈ano fikarohan̈a mikasiky andininteny araiky, mahaimazava amindro fo fomba mety han̈arehandro andininy io amy fiainan̈andro. Karaha ty koran̈iny antipan̈ahy araiky zay, Jarrod an̈arany: “Nahaimaro fo raha haiko momba andininteny araiky, zaho koa fa man̈ano fikarohan̈a momba izio. Nanjary haiko ino raha ten̈a tiany Jehovah volan̈iny aminaka. Tafiditry lalin̈y an̈atiny fônaka izio, ke manjary tihan̈araka volan̈anany fo zaho.” Atsika koa mitady taridalan̈any Jehovah amy Soratra Masin̈y ao salakady mifen̈y man̈araka zen̈y, ho moramora amintsika han̈amboatra jerintsika, ke ho ravoravo fo atsika ndray maro asalohantsika.

Resy lahatra i Davida fa izikoa Jehovah tsy nan̈ampy izy, tsy vitany foeky niatriky raha maro nampiasaloha izy. Zen̈y nahavy izy nankasitraka Jehovah mare, ke ho izy karaha ty: ‘Baka aminy angovony Zan̈ahary ahavitako man̈aniky lakoro vato fatatra. Jehovah, Zan̈ahary marin̈y, mampisikin̈y angôvo zaho.’ (Sal. 18:29, 32) Miran̈a lakoro vato fatatra mare ma fahitanao fitsapan̈a mahazo anao? Tsaraova fa ho vitanao fo han̈aniky izio, fotony Jehovah han̈ampy anao. Ke mivavaha aminany, iangavia izy han̈ampy anao. Saintsain̈a fomba efa nan̈ampiany anao, baka io man̈anaova raha mifan̈araka amy taridalan̈a amezany. Matokisa fa hamezany angôvo ndreky fahendrena ilainao anao, amy zen̈y ho vitanao fo hiaritry, ndray maro raha mety hampiasaloha anao.