Fan̈ontanian̈an’ny Mpamaky
Azôvy ma “man̈angy” koran̈in’ny Isaia 60:1, aviô akôry ataony “mitsangana” ndreky “mandefa hazavan̈a”?
Karaha ty raha volan̈in’ny Isaia 60:1: “Mitsangàna, anao man̈angy, ke mandifasa hazavan̈a, fôtony hazavan̈anao efa navy. Voninahitrin’i Jehovah mikintakintan̈a aminao.” Volan̈a man̈odidin̈y man̈aboaka fa “man̈angy” koran̈iny io Ziona na Jerosalema, kapitalin’i Joda tamy fotoan̈a zen̈y. a (Isaia 60:14; 62:1, 2) Ke Jerosalema io hivolan̈ana firenenan’Israely. Fa misy fan̈ontanian̈a aroe miboaka amy raha volan̈in’Isaia io. Voanalohany, ombian̈a ndreky tamy karakôry Jerosalema ‘nitsangana’ baka iô nandefa hazavan̈a ara-pan̈ahy io? Faharoe, volan̈an’Isaia io ma mbala ho tanteraka amy fomba maventy amin’ny andrantsika ziôty?
Ombian̈a ndreky tamy karakôry Jerosalema ‘nitsangana’ baka iô nandefa hazavan̈a ara-pan̈ahy io? Robadrobaka Jerosalema ndreky tempolinany, izikoa irô Jiosy aby io fa lôso sesitany ta Babylony tan̈atin’ny 70 taon̈o. Fa Babylony koa fa resin’ny Medianin̈y ndreky Persianin̈y, irô Israelita baka tamy faritany nanjakan’i Babylony nahazo nimpody ndraiky tamy firenenandrô ndreky nan̈ampody ndraiky fivavahan̈a marin̈y. (Ezra 1:1-4) Nanomboko tamy 537 T.K., nisy olo tsy nivadiky baka tamy foko 12 nan̈ano zen̈y. (Isaia 60:4) Irô nanomboko nan̈ano sôron̈o namian̈a Jehovah, nankalaza fety, baka iô nan̈orin̈y ndraiky tempoly. (Ezra 3:1-4, 7-11; 6:16-22) Ke lôso nanomboko nikintankintan̈a ta Jerosalema ndraiky koa voninahitrin’i Jehovah, dikan’izen̈y nanomboko nikitankintan̈a tamy vahoakan’ny Zan̈ahary. Ke irô amizay baka tiô nanjary hazavan̈a nin’ny firenena hafa, fôtony irô firenena aby io tan̈atin’ny hiziky ara-pan̈ahy.
Kanefa tapany tamy faminanian̈a momba fan̈areman̈a nivolan̈in’Isaia io fo tanteraka tamy Jerosalema taloha tan̈y. Ankamarozandrô Israelita aby io baka tsy nan̈araka raha nivolan̈in’ny Zan̈ahary eky. (Neh. 13:27; Mal. 1:6-8; 2:13, 14; Mat. 15:7-9) Baka iô tafara tatỳ koa, firaka Jesosy Kristy na Mesia mbala tsy nikendrô fo. (Mat. 27:1, 2) Aviô tamy taon̈o 70, Jerosalema ndreky tempolinany ravan̈a fan̈indroeny.
Efa nambaran’i Jehovah rango efa ela raha zen̈y. (Dan. 9:24-27) Mazava baka amy zen̈y fa tsy fikasan̈anany hahavy raha jiaby koran̈in’ny faminanian̈a momba fan̈areman̈a amin’Isaia toko faha-60 io, ho tanteraka amy Jerosalema ambony tany eto.
Mbala ho tanteraka amy fomba maventy amin’ny andrantsika ziôty ma volan̈an’Isaia io? Ia, fa izio fo momba man̈angy araiky an̈ohatra, tsy azôvy zen̈y fa “Jerosalema an̈abo an̈y.” Apostoly Paoly nivolan̈a fa: “Izio renintsika.” (Gal. 4:26) Jerosalema an̈abo an̈y io fandaminan̈an’ny Zan̈ahary tapan’ny andan̈itry an̈y, misy irô anjely tsy mivadiky aby io. Azôvy fo “zanany”? Jesosy ndreky irô Kristianin̈y voahosotro 144 000. Karaha Paoly, man̈anten̈a hiain̈y an-dan̈itry an̈y Kristianin̈y voahosotro aby io. Kristianin̈y voahosotro aby io “firenena masin̈y” na “Israelin’ny Zan̈ahary.”—1 Pet. 2:9; Gal. 6:16.
Karakôry nataon’i Jerosalema an̈abo an̈y ‘nitsangana’ ndreky ‘nan̈amia hazavan̈a’? Nahavita nan̈ano zen̈y izy baka tamindrô zanany voahosotro mbala ambony tany eto. Diniha baka amy karakôry tantarandrô mitovy amy raha koran̈in’ny faminanian̈a amin’Isaia toko faha-60.
Irô Kristianin̈y voahosotro aby io tsy maintsy ‘nitsangana’ fôtony irô apostoly aby io koa fa naty, niparitaka fivadiham-pinoan̈a ke irô nanjary tototron’ny hiziky ara-pan̈ahy. (Mat. 13:37-43) Tafaran’izen̈y amy zay, irô babo tamy Babylony Be, na fivavahan̈a diso jiaby eran-tany. Ke babo tao fo irô firaka tamy “faran’ny donia ty.” Fotoan̈a io nanomboko tamy taon̈o 1914. (Mat. 13:39, 40) Tsy ela baka tiô amy zay, tamin’ny 1919, irô nafaka. Irô baka tiô direkty nanomboko nan̈amia hazavan̈a ara-pan̈ahy, ke nifen̈y mare nitory vaovao tsara momba Fanjakan̈an’ny Zan̈ahary. b Koa fa nandeha taon̈o, olo baka amy firenena jiaby nahita hazavan̈a. An̈atin’izen̈y irô olo mbala an̈isan’ny Israelin’ny Zan̈ahary, na irô “mpanjaka” koran̈in’ny Isaia 60:3.—Apok. 5:9, 10.
Amin’ny hoavy, irô Kristianin̈y voahosotro aby io handefa hazavan̈a baka amy Jehovah lombolombon’ny taloha. Amy fomba akôry? Lera irô mahavita fanompoan̈andrô ambony tany eto, irô hanjary ho an̈isan’i “Jerosalema Vaovao” na ho an̈isan’ny 144 000 handeha hampakarin’i Kristy hiaraka hanjaka aminany ndreky ho mpisôron̈o.—Apok. 14:1; 21:1, 2, 24; 22:3-5.
Jerosalema Vaovao io ten̈a han̈ano raha han̈atantirahan̈a raha volan̈in’ny Isaia 60:1. (Ampiràn̈a Isaia 60:1, 3, 5, 11, 19, 20 ndreky Apokalypsy 21:2, 9-11, 22-26.) Jerosalema tambony tany teto, foiben’ny fanjakan̈an’Israely taloha tan̈y. Jerosalema Vaovao ndreky Kristy koa hanjary fanjakan̈a hitondra donia vaovao. Akôry ataon’i Jerosalema Vaovao io ‘hijotso baka amy Zan̈ahary an-dan̈itry an̈y’? Izio han̈ano raha ho hisy vokany ambony tany eto. ‘Hazavan̈an’ny tanàna io han̈azava lalan̈a himboandrô’ olo mavozo Zan̈ahary, baka amy firenena jiaby. Tsy hanota ndreky tsy hofoaty eky koa irô. (Apok. 21:3, 4, 24) Tanteraka eky amy zen̈y “fan̈areman̈a raha jiaby”, eraka raha efa nivolan̈in’Isaia ndreky irô mpaminan̈y hafa aby io. (Asa. 3:21) Ke fan̈areman̈a raha jiaby io nanomboko tamy Kristy nanjary Mpanjaka, aviô izio ho tapitry amy faran’ny Fanjakan̈a Arivo Taon̈onany.
a Amin’ny Isaia 60:1, “man̈angy” volan̈a ampiasain’ny Fandikan-tenin’ny Tontolo Vaovao fa tsy “Ziona”, na “Jerosalema” fôtony amy fomba ivolan̈ana man̈angy matoanteny Hebreo “mitsangana” ndreky “mandefa hazavan̈a” io aviô volan̈a “aminao” io. Ke volan̈a “man̈angy” io man̈ampy olo mamaky izio hahay fa man̈angy an̈ohatra olo koran̈iny io.
b Amin’ny Ezekiela 37:1-14 aviô Apokalypsy 11:7-12 koa mikoran̈a fan̈areman̈a ara-pan̈ahy nisy tamin’ny 1919. Ezekiela efa nan̈ambara tsialohaloha fa haremin̈y ndraiky ara-pan̈ahindrô Kristianin̈y voahosotro jiaby, izikoa irô fa baka babo tan̈atin’ny fotoan̈a lava be. Faminanian̈a amin’ny Apokalypsy mivolan̈a fa ho velon̈o ndraiky koa irô rahalahy vitsivitsy voahosotro, irô koa fa tsy nafaka niasa tan̈atin’ny fotoan̈a fohiky nohon’irô nigadrain̈a tsy amy rariny. Tamin’ny 1919, irô voatendry “mpanompo atokisan̈a ndreky mahadiniky raha.”—Mat. 24:45; zahava Fivavahan̈a Madio Nampodin’i Jehovah amy Plasiny!, p. 118.
