LAHATSORATRA FIANARAN̈A 26
HIRA 123 Ekeo Foana ny Fahefan’i Jehovah
Manetre Ten̈a Lera Misy Raha Tsy Hainao
“Tsy takatran’ny jerintsika raha momba araiky Faran’ny Mahery io.”—JOBA 37:23.
HEVITRY HIDINIHIN̈Y
Nata atsika tsy mahay raha jiaby mbala handalo, hahavita hiaritry raha sarotro fo atsika izikoa mifantoko amy raha haintsika ndreky man̈apetraka fatokisan̈a amy Jehovah.
1. Ino fahaizan̈a namezan’i Jehovah atsika, aviô nan̈ino?
JEHOVAH koa fa niasa atsika, atsika nataony mahavita mieritreritry, mianatra raha vaovao ndreky mahay mampihatra raha ianarantsika. Nan̈ino ma atsika nataony karaha zen̈y? Fôtony tiany atsika “hahita fahaizan̈a Zan̈ahary” ndreky hampiasa fahaizantsika misain̈y, izikoa fa manompo izy.—Ohab. 2:1-5; Rom. 12:1.
2. a) Ino raha mila ikentsika? (Joba 37:23, 24) (Zahava koa sary.) b) Ino hatsaran̈a azontsika izikoa atsika man̈eky fa misy erany raha haintsika?
2 Atsika nata nataon’i Jehovah mahavita mianatra raha maro, misy erany raha haintsika. (Vakia Joba 37:23, 24.) Diniha baka Joba. Nisy raha maro nan̈ontanian’i Jehovah izy, ke raha zen̈y nan̈ampy izy hahay fa mbala misy raha maro tsy hainy. Raha zen̈y koa nan̈ampy izy hahay fa izy mila manetry ten̈a ndreky man̈ova toe-tsain̈inany. (Joba 42:3-6) Mahatsara atsika koa mahay fa tsy raha jiaby haintsika. Fanetren-ten̈a io han̈ampy atsika hatoky fa Jehovah han̈ambara amintsika ino raha ten̈a mila haintsika baka hahafahantsika man̈ano fanapahan-kevitry tsara.—Ohab. 2:6.
Mahatsara atsika man̈eky fa misy raha tsy haintsika, karaha nataon’i Joba (Zahava fehintsoratra 2)
3. Ino raha hidinihintsika amy lahatsoratra ty?
3 Amy lahatsoratra ty, atsika handiniky raha sasany tsy haintsika, ndreky raha sarotro mety ho tôjy atsika baka amy zen̈y. Hidinihintsika koa nan̈ino mahatsara atsika tsy mahay raha sasany. Fandinihan̈a raha aby zen̈y han̈ampy atsika hankafatatra fatokisantsika fa Jehovah, “Araiky fara tampony amy fahaizan̈a”, han̈ambara atsika raha ten̈a mila haintsika.—Joba 37:16.
TSY HAINTSIKA OMBIAN̈A FARANY IO HO AVY
4. Izikoa Matio 24:36 zahan̈a, ino raha tsy haintsika?
4 Vakia Matio 24:36. Tsy haintsika ombian̈a ho avy faran’ny donia ty. Nata Jesosy tamin’izy mbala tambony tany teto mbala tsy nahay “andra ndreky lera.” a Tsy elan’izin̈y izy nivolan̈a tamindrô apostoly aby io fa, Jehovah zaraiky fo tômpin’ny fanapahan-kevitry amy fotoan̈a havian’izen̈y. (Asa. 1:6, 7) Jehovah efa nanapa-kevitry ombian̈a marin̈y farany io ho avy, fa atsika tsy afaka mahay daty havian’izio.
5. Atsika tsy ten̈a mahay ombian̈a ho avy farany, ke ino mety ho vokan’izen̈y amintsika?
5 Izikoa raha nivolan̈in’i Jesosy zahan̈a, atsika tsy mahay zisk’ombian̈a ma atsika mila miambin̈y, mandra-pavian’ny farany. Ke vokany, atsika mety tsy hanam-paharetan̈a na kivy, intsaka eky izikoa atsika efa elaela niambin̈y andran’i Jehovah io. Na koa, mety hitantsika sarotro mare miaritry fankadalan̈a ataon’ny fianakavian̈antsika na olo hafa. (2 Pet. 3:3, 4) Ke atsika mety hieritreritry fa izikoa haintsika ombian̈a andra havian’ny farany io, ho moramora amintsika hiambin̈y ndreky hiaritry fankadalan̈a ataon’olo.
6. Nan̈ino mahatsara atsika tsy mahay ombian̈a ho avy farany?
6 Tsy nivolan̈in’i Jehovah amintsika daty havian’ny farany io, amy zen̈y atsika han̈aboaka fa fitiavan̈a ndreky fatokisantsika izy mahavy atsika manompo izy. Tiantsika hanompo Jehovah mandrakizay, ke atsika tsy tôkony hieritreritry be loatra ombian̈a andran’i Jehovah ho avy, fa hieritreritry irô raha maro tsara ho hisy afaran’izio. Atsika koa man̈ano zen̈y, atsika hifandray marikitry amy Jehovah ndreky hatoky izy tsarabe, ke han̈ano erakany vitantsika hamparavoravo izy.—2 Pet. 3:11, 12.
7. Ino raha haintsika?
7 Ten̈a tsara izikoa atsika mifantoko amy raha haintsika, an̈atin’izen̈y nanomboko tamin’ny 1914 andra farany. Amy Baiboly ao, Jehovah man̈amia atsika faminanian̈a maro man̈aporofo fa tamy taon̈o io nanomboko andra farany. Nambarany atsika koa tsipirian’ny raha maro mandalo amy donia ty, afaran’ny taon̈o io. Faminanian̈a aby io tanteraka mahavy atsika resy lahatra fa “efa marikitry andra maventin’i Jehovah io.” (Zef. 1:14) Haintsika koa ino asa tian’i Jehovah hataontsika. Tiany atsika hikoran̈a amin’olo erakany vitantsika momba “vaovao tsaran’ny Fanjakan̈an’ny Zan̈ahary” io. (Mat. 24:14) Ambara amy tany kadiriny 240, amy volan̈a mandilatra 1000 izio. Ke atsika tsy mila mahay “andra ndreky lera”, vo hazoto hitory.
TSY HAINTSIKA INO RAHA METY HATAON’I JEHOVAH
8. Ino ma “asan’ny araiky ten̈a Zan̈ahary” zen̈y? (Mpitoriteny 11:5)
8 Tsy voatery haintsika aby “asan’ny araiky ten̈a Zan̈ahary.” (Vakia Mpitoriteny 11:5.) Izio ivolan̈ana raha ataon’i Jehovah na raha ambelany handalo, baka han̈atantirahan̈a sitrapônany. Tsy ten̈a haintsika nan̈ino Jehovah man̈ambela raha sasany handalo, na ino raha handeha hataony baka hampatsara atsika. (Sal. 37:5) Tsy fahaizantsika raha zen̈y mira tsy fahaizantsika fitombosan’ny tsaiky an̈atin’ny kibo. Nata irô siantifiky aby io mbala tsy ten̈a mahay raha zen̈y.
9. Atsika tsy mahay tsarabe ino raha hataon’i Jehovah, ke mety hahavy atsika hieritreritry ino raha zen̈y?
9 Mety hahavy atsika tsy hangala fanapahan-kevitry, tsy fahaizantsika tsarabe fomba hataon’i Jehovah han̈ampian̈a atsika. Atsika mety hisalasala hahafoe ten̈a amy fanompoan̈a, karaha ataony man̈atsotra fiain̈ana na mifindra amy tany mbala mila mpitory maro. Atsika koa mety hisalasala tsao tsy hahazo sitraka amy Zan̈ahary, izikoa tsy takatrantsika tanjon̈ontsika amy fanompoan̈a na koa karaha tsisy vokany ezaka mare ataontsika amy fanompoan̈a, na lera atsika man̈ano tetikasan’ny fandaminan̈a ke tôjy raha sarotro.
10. Ino aby toetry ten̈a ilain̈a ke lôso anan̈antsika, noho ny atsika tsy ten̈a mahay raha hataon’i Jehovah?
10 Tsy ten̈a fahaizantsika raha handeha hataon’i Jehovah io man̈ampy atsika hanan̈a toetry tsara ten̈a ilain̈a, karaha ataon’ny fanetren-ten̈a ndreky fahaizan̈a fa misy erany raha mety ho vitantsika. Manjary haintsika fa hevitrin’i Jehovah ndreky fan̈anaovany raha ten̈a tsara tozay nintsika. (Isaia 55:8, 9) Manjary mianatra matoky Jehovah tsarabe koa atsika, ke milampy aminany baka hahômby raha ataontsika. Ke izikoa atsika mahita vokatra tsara amy fanompoan̈a na amy tetikasan’ny fandaminan̈a, Jehovah fo amezantsika voninahitry. (Sal. 127:1; 1 Kor. 3:7) Izikoa ndraiky tsy mandeha tsara arakany nantinaintsika raha ataontsika, tsy mila adin̈antsika fa Jehovah ten̈a mahay mandamin̈y izio. (Isaia 26:12) Atsika man̈ano ny anjarantsika fo fa apetrakantsika amy Jehovah ny lambiny. Matoky atsika fa izy han̈amia tari-dalan̈a ilaintsika, nata izy tsy han̈ano fahagagan̈a karaha taloha tan̈y.—Asa. 16:6-10.
11. Ino raha haintsika ke mety han̈ampy atsika?
11 Saintsain̈a raha maro haintsika momba Jehovah, an̈atin’izen̈y izy be fitiavan̈a fo, man̈ano ny rariny fo ndreky hendry fo. Haintsika fa ten̈a valera aminany raha ataontsika ninany ndreky nindrô rahalahy ndreky ranabavy aby io. Aviô haintsika koa fa Jehovah tsy maintsy mamaly hatsaran̈a lan̈iany olo tsy mivadiky aminany.—Heb. 11:6.
ATSIKA TSY MAHAY RAHA HANDALO AMIN’NY AMARAY
12. Izikoa Jakoba 4:13, 14 zahan̈a, ino raha tsy haintsika?
12 Vakia Jakoba 4:13, 14. Atsika tsy mahay han̈ano karakôry fiain̈anantsika amaray. Samy mety ho voa raha amy “fotoan̈a tsy ampoizin̈y” baka atsika amy donia ty. (Mpito. 9:11) Ke tsy haintsika na hahômby raha iritriretintsika hatao, aviô tsy haintsika asa mbala ho velon̈o atsika mandra-pivitan’izio.
13. Ino mety ho vokatran’ny tsy fahaizantsika raha hiboaka amin’ny amaray io amintsika?
13 Mety ho sarotro amintsika hiaritry, fôtony tsy haintsika tsarabe ino raha handalo amin’ny amaray. Ke izikoa atsika miasaloha mare amy raha tsy haintsika handalo zen̈y, mety tsy ho ravoravo atsika. Raha ratsy mahazo atsika tampoko, mety hahavy atsika halahelo mare ndreky ho meloko aby. Aviô koa, izikoa misy raha nantinaintsika tsy tanteraka, atsika mety hanjary diso fan̈antinan̈a ndreky ho kivy mare.—Ohab. 13:12.
14. Miankin̈y amin’ino hampasambatra atsika mandrakizay? (Zahava koa sary.)
14 Izikoa atsika miaritry raha sarotro, atsika mahavita man̈aboaka fa tsy fitiavan-ten̈a mahavy atsika manompo Babantsika an-dan̈itry an̈y, fa fitiavantsika izy. Tantara amy Baiboly ao ahitan̈a fa atsika tsy tôkony han̈anten̈a Jehovah hiaro atsika amy raha sarotro jiaby mahazo atsika, aviô tsy lahatranany raha mandalo amy fiain̈anantsika. Hainy fa mety ho sambatra fo atsika, nata tsy mahay raha jiaby mbala handalo amintsika. Izio baka miankin̈y amy fitadiavan̈a tari-dalan̈anany ndreky fan̈arahan̈a volan̈anany. (Jer. 10:23) Ke izikoa atsika milampy aminany lera mangala fanapahan-kevitry, ho mira nin’i Jakoba ty koa toe-tsain̈intsika: “Izikoa sitrapôn’i Jehovah, ke zahay mbala velon̈o, ty ndreky ty raha handeha hataonay.”—Jak. 4:15.
Ho voaro tsarabe atsika izikoa mitady tari-dalan̈an’i Jehovah ndreky man̈araka volan̈anany (Zahava fehintsoratra 14-15) b
15. Ino raha haintsika momba ny amaray?
15 Atsika ndray tsy mahay raha handalo isan’andra, haintsika fa Jehovah nampan̈anten̈a fa han̈amia atsika fiain̈ana tsisy farany, na an-dan̈itry an̈y na ambony tany eto. Haintsika fa Jehovah tsy mavandy, aviô tsisy raha hahasakana izy tsy han̈atanteraka fampan̈antinan̈anany jiaby. (Tit. 1:2) Izy zaraiky fo mahavita “man̈ambara raha hiboaka amy farany an̈y, ndreky man̈ambara rango efa ela, raha mbala tsiary natao.” Tanteraka raha jiaby nivolan̈iny taloha tan̈y. Ke tsy maintsy mbala ho tanteraka koa raha jiaby nivolan̈iny fa hataony amin’ny amaray. (Isaia 46:10) Haintsika tsarabe fa tsisy raha hahasakana Jehovah tsy ho tia atsika. (Rom. 8:35-39) Izy han̈amia atsika fahendrena, hankahery atsika, aviô han̈amia angôvo ilaintsika, baka hahavitantsika hiaritry zay raha mety hahazo atsika. Afaka matoky atsika fa Jehovah han̈ampy atsika ndreky hitahy atsika.—Jer. 17:7, 8.
TSY HAINTSIKA TSARABE KARAKÔRY FAHAIZAN’I JEHOVAH ATSIKA
16. Izikoa Salamo 139:1-6 zahan̈a, ino raha hain’i Jehovah kanefa tsy ten̈a mazava amintsika?
16 Vakia Salamo 139:1-6. Mpamôron̈o atsika io mahay raha jiaby momba atsika. Hainy nan̈ino anao mieritreritry ndreky man̈ano raha karaha io. Hainy raha volan̈intsika, aviô hainy koa raha an̈atin’ny fôntsika an̈y. Hainy koa raha jiaby ataontsika ndreky antony mahavy atsika man̈ano izio. Mpanjaka Davida nivolan̈a fa Jehovah vôn̈ono fo sady mahavita man̈ampy atsika. Akôry raha tsapanao, noho ny anao mahay fa Zan̈ahary faran’ny mahery ndreky Faran’ny An̈abo aviô niasa raha jiaby io, mikarakara anao mare? Davida nivolan̈a: “Tsy takatra sain̈inaka fahaizan̈anao zen̈y. An̈abo loatra izio ke tsy takako.”—Sal. 139:6, l.p.a.
17. Nan̈ino mety ho sarotro amintsika han̈eky fa Jehovah ten̈a mahay atsika?
17 Fa mety ho sarotro amintsika han̈eky fa Jehovah io Baba ten̈a tia atsika ndreky mikarakara atsika mare. Antony mahavy zen̈y mety baka amy fomba nitarimin̈a atsika, kolontsain̈intsika, na raha ninoantsika taloha. Na koa mety nisy hadisovan̈a ten̈a ratsy nataontsika taloha tan̈y. Ke atsika mety hieritreritry fa Jehovah efa tsy tihahalala atsika eky, aviô efa tsy marikitry atsika foeky. Ndray Davida mba efa nahatsapa karaha zen̈y. (Sal. 38:18, 21) Na koa, misy olo araiky tihiala amy raha ratsy mahazatra izy, ke han̈araka fitsipiky marin̈in’i Jehovah, mety hivolan̈a karaha ty: ‘Izikoa Zan̈ahary ten̈a mahay zaho, nan̈ino ma zaho irahiny miala amy fomba fiain̈ana efa mahazatra zaho ty?’
18. Ino mahatsara atsika man̈eky fa Jehovah ten̈a mahay atsika mandilatra atsika tômpiny? (Zahava koa sary.)
18 Mila mianatra man̈eky atsika fa Jehovah ten̈a mahay atsika mandilatra atsika tômpiny. Izy koa mahita raha tsara an̈atintsika ao, kanefa izio mety tsy hitantsika aby. Jehovah ndray mahita raha ratsy amintsika ao, na mahay nan̈ino atsika mahatsapa ndreky man̈ano karaha io, atsika tiany. (Rom. 7:15) Ke izikoa haintsika fa Jehovah mahita fa atsika io mbala afaka mankatsara, raha zen̈y han̈amia atsika angôvo ilaintsika baka atsika hahavita hanompo izy sady tsy hivadiky aminany, baka iô ho ravoravo fo.
Jehovah man̈ampy atsika hiatriky problemo tsy ampoizin̈y amy fiain̈ana ke man̈ano raha hahavy atsika hatoky tsarabe fiain̈ana tsara miambin̈y atsika amy donia vaovao (Zahava fehintsoratra 18-19) c
19. Ino raha haintsika sady atokisantsika momba Jehovah?
19 Haintsika fa Jehovah io fitiavan̈a. Tsisy raha iadian-kevitry momba zen̈y. (1 Jaona 4:8) Haintsika fa fitsipikinany marin̈y io ahitan̈a fitiavany atsika, aviô izy tihan̈ano raha mahatsara atsika fo. Haintsika fa tian’i Jehovah atsika hahazo fiain̈ana tsisy farany. Nan̈amia vidim-pan̈avotan̈a izy baka hampety raha zen̈y. Izio kadô namezany atsika ke man̈amia toky atsika fa atsika nata tsy lavorary, mety hahômby fo atsika. (Rom. 7:24, 25) Aviô haintsika fa “Zan̈ahary mbala beben’ny fôntsika ndreky mahay raha jiaby.” (1 Jaona 3:19, 20) Hitan’i Jehovah raha jiaby momba atsika. Aviô izy matoky fa atsika hahavita han̈ano sitrapônany fo.
20. Ino han̈ampy atsika tsy hiasaloha dila loatra amy raha tsy haintsika?
20 Jehovah tsy man̈asitriky amintsika raha ten̈a mila haintsika. Izikoa atsika manetry ten̈a ke man̈eky raha zen̈y, atsika tsy hiasaloha amy raha tsy haintsika. Raha ten̈a maventy fo raha ten̈a mampiasaloha atsika. Izikoa atsika man̈ano ambaka zen̈y, haboakantsika fa atsika matoky tsarabe Jehovah, “Araiky fara tampony amy fahaizan̈a io.” (Joba 36:4) Ke ndray misy raha sasany mbala tsy haintsika iziôty, haintsika fa Jehovah tsy vôly hampianatra atsika raha vaovao, mandrakizay. Aviô ravoravo koa atsika, fôtony atsika tsy ho vôly hianatra raha vaovao momba Zan̈aharintsika tsara be io.—Mpito. 3:11.
HIRA 104 Fanomezan’Andriamanitra ny Fanahy Masina
a Jesosy hitariky amin’ny ady hataony amy donian’i Satana ty, ke zen̈y mahavy atsika man̈atsoaka hevitry fa amy ziôty izy efa mahay datin’ny Aramagedona ndreky ombian̈a izy “hankefa fandrisian̈anany.”—Apok. 6:2; 19:11-16.
