LAHATSORATRA FIANARAN̈A 27
HIRA 79 Ampianaro Izy Ireo mba Handroso Hatrany
Ampia Mpianatra Baiboly ho Tapa-Kevitry Hanompo Jehovah
“Mioren̈a tsara amy finoan̈a, ... mifen̈a hatanjaka.”—1 KOR. 16:13, l.p.a.
HEVITRY HIDINIHIN̈Y
Fomba han̈ampian̈a mpianatra Baiboly aby io hanan̈a finoan̈a ndreky korazy han̈araka fahamarin̈ana.
1-2. a) Nan̈ino mpianatra Baiboly sasany misalasala han̈araka fahamarin̈ana? b) Ino raha hidinihintsika amy lahatsoratra ty?
INO mampisalasala anao hanjary Vavolombelon̈on’i Jehovah? Anao ma mavozo olo fiasan̈a araiky aminao, kamaradinao na fianakavian̈anao, tsao hanohitry anao? Sa anao mety mihevitry fa tsy hahavita han̈araka fitsipikin’ny Zan̈ahary? Izikoa zen̈y, tsapanao raha tsapan’ny mpianatra Baiboly sasany, mahita fa sarotro hanapa-kevitry han̈araka fahamarin̈ana.
2 Hain’i Jesosy fa tahotro karaha zen̈y mety hisakana olo tsy hanompo Jehovah. (Mat. 13:20-22) Fa Jesosy tsy rivan̈a nan̈ampy olo aby nisalasala han̈ara-dia izy. Nampiany mpianatranany aby io hahay akôry han̈ampian̈a olo karaha zen̈y, ke 1) handiniky ino raha misakana irô tsy handroso, 2) hampitombo fitiavandrô Jehovah, 3) han̈ova raha farany maventy amy fiain̈anandrô, aviô 4) handresy raha sarotro. Karakôry han̈arehantsika raha nivolan̈in’i Jesosy tamy mpianatranany aby io, lera atsika mampiasa boky Mankafiza Fiain̈ana Tsisy Farany!, han̈ampian̈a mpianatra Baiboly han̈araka fahamarin̈ana?
AMPIA MPIANATRANAO HAHAY INO RAHA MISAKANA IZY TSY HANDROSO
3. Ino ma raha nety nisakana Nikodemosy tsy hanjary mpianatran’i Jesosy?
3 Nikodemosy mpitondra tamy Jiosy aby io sady olo malaza. Fa nisy raha nisakana izy tsy han̈ara-dia Jesosy. Vo tsiota fanjava tafaran’i Jesosy nanomboko fanompoan̈anany, izy efa nahay fa Jesosy solonten̈an’ny Zan̈ahary. (Jaona 3:1, 2) Fa izy nisitrisitriky fo hifanôjy Jesosy, fôtony “navozo irô Jiosy aby io.” (Jaona 7:13; 12:42) Izy mety nihevitry fa ho maro loatra raha hafoeny izikoa izy manjary mpianatran’i Jesosy. a
4. Karakôry nataon’i Jesosy nan̈ampy Nikodemosy, baka izy hahay ino raha tian’ny Zan̈ahary ataony?
4 Nikodemosy nahay Lalàn̈an’i Mosesy, fa izy nila nampian̈a baka hahay ino raha tian’i Jehovah hataony. Karakôry nataon’i Jesosy nan̈ampy izy? Izy nahatindry fotoan̈anany tamy Nikodemosy. Ke izy vôn̈ono fo hifanôjy taminany nata andra alin̈y. Ke nivolan̈in’i Jesosy tsarabe taminany ino raha nila ataony baka izy hanjary mpianatra: Izy mila mibebaka amy fahotan̈anany, mila man̈ano batisa an̈aty rano, aviô man̈aboaka fa izy mino Zanaka Zan̈ahary.—Jaona 3:5, 14-21.
5. Karakôry han̈ampiantsika mpianatra Baiboly hahita ino raha mbala misakana izy tsy handroso?
5 Ndray mpianatra Baiboly araiky efa mahay tsarabe Soratra Masin̈y, mety mbala mila hampian̈a fo izy hahay ino raha misakana izy tsy handroso. Mety hahavy izy tsy handroso ara-pan̈ahy asanany na fanoheran̈an’ny fianakavian̈a. Ke karaha Jesosy, mitadiava fotoan̈a han̈ampian̈a mpianatranao. Ohatra, izy mety kahinao migiaka kafe miaraka aminao na koa mitsangatsangana. Amy fotoan̈a karaha zen̈y, izy mety tsy hihafahafa hikoran̈a aminao ino raha mahavy izy tsy mandroso. Ke ampirisiha mpianatranao han̈ano fan̈ovoan̈a mila ataony, tsy noho izy tihamparavoravo anao fa tihamparavoravo Jehovah.
6. Akôry mety han̈ampianao mpianatra Baiboly hisy korazy han̈araka fahamarin̈ana? (1 Korintianina 16:13)
6 Izikoa mpianatra Baiboly araiky matoky fa Jehovah han̈ampy izy hiain̈y mifan̈araka amy fitsipikin’ny Baiboly, zen̈y han̈amia angôvo izy han̈araka raha nianarany. (Vakia 1 Korintianina 16:13.) Ke andraikitrinao mira nin’ny mpampianatra a lekoly in̈y. Asa tsaroanao tamin’ny anao mbala nandeha lekoly, mpampianatra karakôry ten̈a tianao? Misaora araiky nahari-draha ndreky nan̈ampy anao hatoky ten̈a tsarabe. Mira zen̈y koa, mpampianatra Baiboly mahay zen̈y. Izy tsy vitan’ny mampianatra raha tian’ny Zan̈ahary ataontsika fo fa man̈amia toky mpianatranany koa fa, izy koa ampian’i Jehovah, ho vitany fo han̈ano fan̈ovoan̈a. Akôry hahavitanao zen̈y?
AMPIA MPIANATRANAO HAMPITOMBO FITIAVANY JEHOVAH
7. Karakôry nataon’i Jesosy nan̈ampy irô olo nitandren̈y izy aby io hahaiho tia Jehovah fo?
7 Hain’i Jesosy fa fitiavan̈a Zan̈ahary handrisiky mpianatranany aby io han̈araka raha nianarandrô. Matetiky izy nampianatra raha han̈ampy irô hampitombo fitiavandrô Babandrô an-dan̈itry an̈y. Ohatra, Jehovah nampiran̈iny tamy lelahy araiky man̈amia raha tsara zanany. (Mat. 7:9-11) Sasany tamin’olo nitandren̈y Jesosy io baka, nety tsy nanan̈a baba be hinakinaka karaha zen̈y foeky. Miniminia hely baka karakôry tsapandrô, Jesosy koa fa nan̈ano fan̈oharan̈a momba baba araiky be hinakinaka, nandray tsarabe zanany, nata izy baka nan̈ano hadalan̈a maro. Tian’i Jesosy han̈ampy olo nitandren̈y izy aby io hahita fa, Jehovah tia irô mare ndreky tihan̈ampy irô.—Lioka 15:20-24.
8. Akôry mety han̈ampianao mpianatra Baiboly araiky hampitombo fitiavany Jehovah?
8 Anao koa mety man̈ampy mpianatra Baiboly araiky hampitombo fitiavany Jehovah ke mankamafy toetrin’i Jehovah, lera anarô mianatra. Isaka anarô mianatra, ampia izy hahita nan̈ino raha ianarany io man̈aboaka fitiavan’i Jehovah atsika. Izikoa anarô fa mikoran̈a momba vidim-pan̈avotan̈a, ankamafisa aminany nan̈ino izio man̈aboaka fitiavan’i Jehovah izy. (Rom. 5:8; 1 Jaona 4:10) Izikoa mpianatra Baiboly araiky misaintsain̈y fitiavan’i Jehovah izy, raha zen̈y handrisiky izy hahaiho tia Jehovah fo.—Gal. 2:20.
9. Ino raha nan̈ampy Michael han̈ova fiain̈ananany?
9 Diniha i Michael baka a Indonésie. Izy tombo tamy fahamarin̈ana fa tsy nandroso firaka tamy batisa. Tamin’izy 18 taon̈o, izy nandeha niasa tamy firenena hafa, nan̈ano sôferan’ny kamion. Tafara, izy nody nanambady. Fa baka tiô, niala fianakavian̈anany izy ke lôso ndraiky koa. Fa tamy fotoan̈an’izy tsy tiô in̈y, vadiny ndreky zanany man̈angy nianatra Baiboly, baka iô nandroso. Fa maman’i Michael koa fa naty, izy tapa-kevitry nody nikarakara babany, aviô izy nan̈eky nianatra Baiboly. Ke irô koa fa nandiniky “Aleva Onon̈o” amy leson 27 amy boky Mankafiza Fiain̈ana Tsisy Farany! in̈y, nanohin̈y fônany mare raha nianarany. Izy nisaintsain̈y karakôry raha tsapan’i Jehovah, izy koa fa nahita Zanany nijaly. Ke latsaka ranomason’i Michael. Izy lôso nankasitraka mare vidim-pan̈avotan̈a, aviô raha zen̈y nandrisiky izy han̈ova fiain̈ananany ndreky natao batisa.
AMPIA MPIANATRANAO HAN̈OVA RAHA MAVENTY AMY FIAIN̈ANANANY
10. Akôry nataon’i Jesosy nan̈ampy irô mpianatranany voanivoanalohany aby io han̈ova raha maventy tamy fiain̈anandrô? (Lioka 5:5-11) (Zahava koa sary.)
10 Irô mpianatran’i Jesosy voanalohany aby io direkty efa nahay fa Jesosy Mesia nampan̈antinain̈y. Fa irô mbala nila nampian̈a, baka han̈ano fanompoan̈a ho raha ten̈a maventy tamindrô. Efa refindrefin̈y Petera ndreky Andrea mpianatran’i Jesosy, tamy Jesosy nikaiky irô handeha han̈ara-dia izy man̈ariva andra. (Mat. 4:18, 19) Irô mpan̈arato, baka iô nandroso mare asandrô io. Irô nety niaraka niasa tamy Jakoba ndreky Jaona. (Mar. 1:16-20) Petera ndreky Jaona koa fa “nan̈ambela haratondrô”, irô mety nan̈ano raha fo namilaomandrô fianakavian̈andrô, irô koa fa nan̈ara-dia Jesosy. Ino ma raha nandrisiky irô han̈ova raha ten̈a maventy tamy fiain̈anandrô? Tantara amy Lioka man̈ambara fa Jesosy nan̈ano fahagagan̈a hahavy irô hatoky fa Jehovah mahavita man̈amia raha ilaindrô.—Vakia Lioka 5:5-11.
Ino raha ianarantsika baka tamy fomba nan̈ampian’i Jesosy mpianatranany, han̈ova raha ten̈a maventy tamy fiain̈anandrô? (Zahava fehintsoratra 10) b
11. Karakôry mety hampiasantsika raha niain̈antsika hankafataran̈a finoan̈an’ny mpianatra Baiboly?
11 Atsika tsy mahavita man̈ano fahagagan̈a karaha nataon’i Jesosy. Fa atsika ndraiky mety mitantara tantaran’olo nan̈ano fanompoan̈a ho raha ten̈a maventy tamy fiain̈ananany, ke nahita Jehovah ten̈a nitahy irô. Ohatra, asa azonao onon̈o karakôry nataon’i Jehovah nan̈ampy anao, tamin’ny anao vo sambany nivory, ke anao tsy maintsy nikoran̈a tamy sefonao, nan̈azava taminany ino mahavy anao tsy man̈eky hiasa mandilatra lera fiasan̈a, izikoa izio mifanindry amy lera fivorian̈a? Ke anao koa fa mitantara amy mpianatranao raha niain̈anao zen̈y, hazavà aminany nan̈ino finoan̈anao nahaifatatra fo izikoa anao fa nahita fomba nitahian’i Jehovah fanapahan-kevitrinao, han̈ano fanompoan̈a izy raha ten̈a maventy aminao.
12. a) Nan̈ino atsika tôkony han̈ovan̈ova olo miaraka amintsika mampianatra? b) Akôry mety hampiasanao video aby io lera mampianatra? Man̈ameza ohatra.
12 Hahazo hatsaran̈a koa mpianatranao izikoa maharen̈y fomba nataon’ny Kristianin̈y hafa nan̈ova raha ten̈a maventy tamy fiain̈anandrô. Ke ivoavoà olo indesinao mampianatra izy. Iraha irô man̈azava akôry nahitandrô fahamarin̈ana, aviô ino raha nan̈ampy irô han̈ano fanompoan̈a Jehovah ho raha ten̈a maventy amy fiain̈anandrô. Aviô mandania fotoan̈a hizahavan̈a video amin’ny “Aleva Onon̈o” na amy “Zahava”, amy boky Mankafiza Fiain̈ana Tsisy Farany! Ohatra izikoa fa avy amy leson 37, mety koran̈inao aminany tsarabe irô torolalan̈a hita amy video Jehovah Han̈amia Raha Ilaintsika.
AMPIA MPIANATRA BAIBOLINAO HANDRESY RAHA SAROTRO
13. Akôry nataon’i Jesosy nampioman̈a mpianatranany aby io hiatriky fanoheran̈a?
13 Natetiky Jesosy nivolan̈a tamindrô mpan̈ara-dia izy aby io fa hisy olo hanohitry irô, ary mety havandrô foeky han̈ano zen̈y. (Mat. 5:11; 10:22, 36) Tsy ela talohan’ny nifatesany, Jesosy nampitandrin̈y irô mpianatranany aby io fa irô mety hivonen’olo foeky. (Mat. 24:9; Jaona 15:20; 16:2) Izy nandrisiky irô hitandritandrin̈y fo izikoa fa manompo. Ohatra, izy nan̈amia torohevitry irô tsy himalo amin’olo manohitry irô, ndreky ho mahimahin̈y fo, amy zen̈y irô hahavita hanohy hitory fo.
14. Akôry ataontsika hampioman̈a mpianatra Baiboly hiatriky fanoheran̈a? (2 Timoty 3:12)
14 Atsika afaka man̈ampy mpianatrantsika hioman̈a amy fanoheran̈a, ke man̈azava ino raha mety ho ren̈iny koran̈in’olo fiasan̈a araiky, naman̈a ndreky havan̈a. (Vakia 2 Timoty 3:12.) Sasany amin’olo fiasan̈a araiky aminany mety han̈adroadro izy amy fomba fiain̈ana vaovao arahiny io. Nin’ny sasany ndraiky, mety havany maletry foeky hankaratsy raha inoany. Ke mpianatrantsika koa hampioman̈intsika tsialohaloha hiatriky fanoheran̈a, irô ho vôn̈ono tsarabe, izikoa raha zen̈y miboaka.
15. Ino mety han̈ampy mpianatra Baiboly hiatriky fanoheran̈an’ny fianakavian̈a?
15 Izikoa manohitry mpianatranao fianakavian̈anany, ampia izy hieritreritry ino raha mety nahavy irô ho meloko io. Sambarandrô voafitaka baka izy, aviô irô mety hihevitry fa Vavolombelon̈on’i Jehovah tsy ten̈a olo manjary. Ndray havan’i Jesosy foeky koa mba nankaratsy izy. (Marka 3:21; Jaona 7:5) Ke ampia mpianatranao baka hahari-draha, ndreky hahay handanjalanja fo izikoa fa mikoran̈a amin’olo, an̈atin’izen̈y havany.
16. Akôry han̈ampiantsika mpianatra Baiboly hahay handanjalanja, izy koa fa mikoran̈a raha inoany?
16 Nata havany io lian̈a amy raha koran̈in’ny Baiboly, tsara izikoa tsy raha jiaby azavainy indraiky mipaka. Izikoa tsy zen̈y, ho maro loatra raha ho ren̈in’iry havany, ke irô tsy hitandren̈y izy eky amin’ny afara. Ke ampia mpianatra io hikoran̈a tsihelihely raha inoany, amy zen̈y amy man̈araka izy ho afaka hikoran̈a raha hafa koa amindrô. (Kol. 4:6) Ohatra, izy mety han̈iraka irô hizaha jw.org, ke raha zen̈y hahaizandrô raha maro momba Vavolombelon̈on’i Jehovah, amy lera mety amindrô.
17. Akôry hampiofan̈anao mpianatra, hahay hamaly fan̈ontanian̈an’olo momba Vavolombelon̈on’i Jehovah? (Zahava koa sary.)
17 Ohatra, anao mety hampiasa andian-dahatsoratra, “Raha Matetiky An̈ontanian’olo” amy jw.org ao, han̈ampian̈a mpianatranao han̈oman̈a valiny tsotra amy fan̈ontanian̈a mety hapetrakan’ny havany na olo fiasan̈a araiky aminany. (2 Tim. 2:24, 25) Isaka avy amy faran’ny fianaran̈a amy boky Mankafiza Fiain̈ana Tsisy Farany!, aza adin̈a mampiasa “Misy Olo Mivolan̈a.” Ampirisiha mpianatranao han̈ano fan̈azaran-ten̈a momba fomba han̈azavany amin’olo raha inoany. Aza misalasala man̈amia sôso-kevitry izy, amy raha mila hatsarainy. Fan̈azaran-ten̈a io hahavy izy hanjary hatoky ten̈a, izikoa fa man̈azava raha inoany.
Ampirisiha mpianatra Baibolinao han̈azava amin’olo raha inoany ke man̈anaova fan̈azaran-ten̈a miaraka aminany lera anarô mianatra (Zahava fehintsoratra 17) c
18. Akôry hataontsika handrisiky mpianatra hanjary mpitory tsy vita batisa? (Matio 10:27)
18 Jesosy nandrisiky mpianatranany hitory vaovao tsara amin’olo jiaby. (Vakia Matio 10:27.) Arakarakan’ny mampa bônera mpianatra lôso mpitory, hahavy izy halakilaky hilampy amy Jehovah. Akôry han̈ampianao mpianatranao hanakatra tanjon̈o zen̈y? Izikoa fa misy filazan̈a momba ezaka manokan̈a ataon’ny fiangonan̈a, ampirisiha mpianatranao hieritreritry akôry ataony hahafeno fepetra takin̈a amin’olo tihitory. Hazavà aminany nan̈ino tsara izikoa amin’ny ezaka manokan̈a io izy manomboko mitory. Mety han̈ampy izy koa fampiofan̈ana han̈ano kabaro amy fivorian̈a andavanandra. Ke izy koa mifen̈y manakatra tanjon̈o zen̈y, ho hainy tsarabe hikoran̈a raha inoany.
ABOAHA FA ANAO MATOKY MPIANATRANAO
19. Karakôry nan̈aboahan’i Jesosy fa izy natoky mpianatranany, aviô karakôry hangalantsika tahaka izy?
19 Talohan’i Jesosy nanonga tan-dan̈itry, izy nivolan̈a tamy mpianatranany aby io fa andra araiky an̈y irô mbala hiaraka aminany ndraiky. Tsy takandrô foeky tamin’io fa Jesosy nivolan̈a fa irô handeha an-dan̈itry an̈y. Fa Jesosy mbala natoky fo fa irô tsy hivadiky, ndray nisy raha tsy nazava tamindrô. (Jaona 14:1-5, 8) Hainy fa nila fotoan̈a irô vo mahay raha sasany, karaha ataony fan̈antinan̈a hiain̈y an-dan̈itry an̈y. (Jaona 16:12) Atsika koa afaka matoky fa mpianatrantsika han̈iry han̈ano raha hamparavoravo Jehovah.
Arakarakan’ny mampa bônera mpianatra lôso mpitory, hahavy izy halakilaky hilampy amy Jehovah
20. Karakôry nan̈aboahan’ny ranabavy araiky a Malawi fa izy natoky mpianatranany?
20 Matokisa fa mpianatranao tihan̈ano ny tsara. Ohatra, diniha baka Chifundo, ranabavy a Malawi. Izy nanomboko nampianatra Baiboly i Alinafe, man̈angy katolika, tamy boky Mankafiza Fiain̈ana Tsisy Farany! Irô koa fa baka nandiniky leson 14, Chifundo nan̈ontany izy momba fampiasan̈a sary izikoa fa manompo Zan̈ahary. Neloko nare Alinafe, ke nivolan̈a: “Safidinaka manokan̈a raha zen̈y!” Chifundo niasaloha tsao tsy hitohy eky fianaran̈andrô. Fa izy nanan̈a faharetan̈a, ke mbala nitohy fo fianaran̈andrô, aviô izy nan̈anten̈a fa mbala hazava amin’i Alinafe fo fa tsy mety mampiasa sary. Izikoa fa nandeha fanjava, Chifundo nan̈ontany izy fan̈ontanian̈a amy leson 34 ty: “Ino hatsaran̈a efa nazonao rango nianaranao Baiboly ndreky nianaranao Jehovah Zan̈ahary marin̈y?” Karaha ty ho Chifundo, izy koa fa nitantara raha nivolan̈in’i Alinafe: “Izy nikoran̈a hevitry maro tsara, araiky amy zen̈y, Vavolombelon̈on’i Jehovah tsy man̈eky han̈ano raha halan’ny Baiboly.” Tsy ela tafaran’izin̈y, Alinafe tsy nampiasa sary masin̈y eky, aviô izy natao batisa.
21. Akôry hataontsika han̈ampy mpianatra hanan̈a korazy hanompo Jehovah?
21 Ndray Jehovah “mampitombo”, atsika koa manan̈a andraikitrintsika, han̈ampian̈a mpianatra Baiboly handroso. (1 Kor. 3:7) Tsy mampianatra izy hahay raha tian’ny Zan̈ahary fo raha ataontsika, fa atsika koa man̈ampy izy ho tia mare Jehovah. Atsika koa mandrisiky izy han̈aboaka fitiavany Jehovah, ke han̈ova raha ataony ten̈a maventy amy fiain̈ananany. Ampianarintsika izy koa karakôry atao milampy amy Jehovah, lera izy fa tôjy raha sarotro. Aboakantsika koa fa atsika matoky izy, ke zen̈y hahavy izy hahaihatoky fo fa izy koa mba mahavita man̈araka fitsipikin’i Jehovah, ndreky hanan̈a korazy hanompo izy.
HIRA 55 Aza Matahotra Azy Ireo!
a Taon̈o aroe sy sasany tafaran’ny nifanojiany tamy Jesosy, i Nikodemosy mbala an̈isan’ny fitsaran̈a avo Jiosy fo. (Jaona 7:45-52) Misy boky araiky mivolan̈a fa eraka lovantsofin̈y, Nikodemosy nanjary mpianatran’i Jesosy, efa tafaran’i Jesosy naty.—Jaona 19:38-40.
