1. Nan̈ino mahatsara atsika mandiniky Salamo 15:1-5?

 NIANARANTSIKA tamy lahatsoratra araiky taloha tiô in̈y fa mpanompon’i Jehovah vita fanokan̈an-ten̈a aminany, aviô mifen̈y fo baka hifandray aminany tsarabe, mety man̈ano vahiny amy tran̈olainany ao. Fa ino raha mila ataontsika baka atsika hanjary vahinin’i Jehovah? Salamo faha-​15 ao mikoran̈a momba zen̈y. (Vakia Salamo 15:1-5.) Misy fianaran̈a maro tsara arehan̈a an̈atin’izio ao, han̈ampy atsika hifandray tsara amy Zan̈ahary.

2. Mety ino raha tan̈atin’ny jerin’i Davida, tamin’izy nikoran̈a momba tran̈olain’i Jehovah?

² Karaha ty volan̈in’ny Salamo 15:1: “A Jehovah, azôvy ma mety man̈ano vahiny amy tran̈olainao ao? Azôvy hikenao hipetraka amy bongonao masin̈y?” Davida mpan̈ano salamo koa fa nivolan̈a ‘tran̈olain’i Jehovah’, mety tran̈olay ta Gibeona tan̈y tamy fotoan̈an’izen̈y raha tan̈aty jerinany. Davida koa fa nikoran̈a momba “bongo masin̈y”, mety Ziona ta Jerosalema raha tiany koran̈iny tamy zen̈y. Aviô mety kilometara vitsivitsy tatsimon’i Gibeona tan̈y nisy izio. Nanangana tran̈olay tan̈y Davida han̈ambilan̈a vata misy fifan̈ikian̈a, mandra-pan̈amboaran̈a tempoly araiky nan̈apitrahan̈a izio.​—2 Sam. 6:17.

3. Nan̈ino ma tôkony ho tiantsika handiniky Salamo faha-​15? (Zahava koa sary.)

³ Mazava ho azy fa ankamarozandrô Israelita aby tsy nahazo nanompo tamy tran̈olay tao. Vitsivitsy tamindrô fo nahazo niditry tamy tany nan̈apitrahan̈a vata misy fifan̈ikian̈a tao. Kanefa, mpanompon’i Jehovah tsy nivadiky taminany jiaby nahazo nan̈ano vahiny tamy tran̈olainany an̈ohatra tao, ke nanjary kamaradin’i Jehovah, aviô ho kamaradinany mandrakizay. Atsika jiaby io koa mba tihan̈ano karaha zen̈y. Amy Salamo faha-​15 ao mikoran̈a irô toetry aby mila hanan̈antsika ndreky haboakantsika, baka atsika ho kamaradin’i Jehovah fo.

 MANDIHANA AMY FAHITSIAN̈A AVIÔ MAN̈ANAOVA NY MARIN̈Y

4. Nan̈ino atsika mivolan̈a fa tsy batisa zaraiky fo raha takin’i Jehovah amintsika? (Isaia 48:1)

⁴ Karaha ty nivolan̈an’ny Salamo 15:2 momba olo kamaradin’ny Zan̈ahary zen̈y: “Olo mandeha amy fahitsian̈a ndreky man̈ano ny marin̈y.” Dikan’ny “mandeha” ndreky “man̈ano” zen̈y eto, man̈ano raha tsy miovaova ndreky man̈ano raha mitohy fo. Ke ho vitantsika olombelon̈o ma “handeha amy fahitsian̈a” zen̈y? Ia. Nata tsisy olo lavorary, Jehovah mihevitry atsika “mandeha amy fahitsian̈a”, izikoa atsika man̈ano erakan’ny vitantsika amy fan̈arahan̈a volan̈anany. Tamin’ny atsika nanokan-ten̈a tamy Zan̈ahary ndreky natao batisa in̈y mbala vo fanombohan’ny fikamaradianantsika amy Zan̈ahary fo. Ohatra, tamin’ny andran’ny Baiboly, izikoa olo araiky an̈isan’ny firenenan’ny Israely zen̈y, zen̈y tsy mivolan̈a fa izy efa vahinin’i Jehovah. Nisy sasany tamindrô nikaiky an̈aran’i Jehovah, fa tsy tamy ‘fô madio sady irô tsy nan̈ano ny tsara’ koa. (Vakia Isaia 48:1.) Ke lan̈iany Israelita nan̈iry tihanjary vahinin’i Jehovah, nila nianatra ino raha irahin’i Jehovah ataondrô, aviô irô nila nan̈araka raha aby zen̈y. Karaha zen̈y koa atsika amin’ny andra iziôty. Baka Jehovah hankasitraka atsika, tsy ampy izikoa atao batisa ndreky mandeha mivory fo. Atsika tsy maintsy “man̈ano ny marin̈y” koa. Ino aby ma raha tafiditry amy zen̈y?

5. Karakôry ma man̈araka volan̈an’i Jehovah amy raha jiaby zen̈y?

⁵ Amy Jehovah, dikan’ny “mandeha amy fahitsian̈a” ndreky “man̈ano ny marin̈y” zen̈y, tsy vitan’ny mandeha mivory tsy tapaka amy tran̈o fivorian̈a an̈y fo. (1 Sam. 15:22) Atsika tsy maintsy mifen̈y man̈araka raha volan̈in’i Jehovah amy fiain̈anantsika jiaby, nata tsisy olo mahita atsika. (Ohab. 3:6; Mpito. 12:13, 14) Ten̈a raha maventy mifen̈y man̈araka  volan̈an’i Jehovah, na amy raha farany madiniky. Atsika koa man̈ano zen̈y, aboakantsika fa atsika ten̈a tia izy, ary raha zen̈y koa mahavy izy ho tiantsika mare.​—Jaona 14:23; 1 Jaona 5:3.

6. Izikoa Hebreo 6:10-12 zahan̈a, ino ma raha mbala beben’ny tsy fivadihan̈antsika taloha tan̈y?

⁶ Jehovah ten̈a mankasitraka raha nataontsika tamy fanompoan̈a izy taloha tan̈y. Kanefa zen̈y tsy mivolan̈a fa baka tamy raha tsara nataontsika taloha tan̈y hahavy atsika ho vahiny an̈atin’ny tran̈olainany ao fo. Man̈azava raha zen̈y tsara amin’ny Hebreo 6:10-12. (Vakia.) Jehovah tsy man̈adin̈a raha tsara vitantsika taloha tan̈y. Fa kanefa, tiany izikoa atsika manompo izy amy fô jiaby “firaka amy farany.” Jehovah hitahy atsika ke atsika hanjary kamaradinany mandrakizay, “izikoa atsika tsy kajo.”​—Gal. 6:9.

MIVOLÀN̈A NY MARIN̈Y AN̈ATIN’NY FÔNAO AO

7. Karakôry ma mivolan̈a ny marin̈y an̈atin’ny fô zen̈y?

⁷ Lan̈iany olo tihataon’i Jehovah vahiny an̈atin’ny tran̈olainany ao, tsy maintsy “mivolan̈a ny marin̈y an̈atin’ny fônany.” (Sal. 15:2) Dikan’izen̈y, izikoa tsy mavandy fo mbala tsy mahampy. Tian’i Jehovah atsika mivolan̈a ny marin̈y ndreky man̈ano ny marin̈y fo. (Heb. 13:18) Ten̈a raha maventy raha zen̈y fôtony “mampangaroharo Jehovah olo fetsifetsy, fa olo man̈ano raha mahitsy fo ho tsara fihavan̈ana aminany.”​—Ohab. 3:32.

8. Mila mitandrin̈y amy fitondran-ten̈a karakôry ma atsika?

⁸ Lan̈iany olo ‘mivolan̈a ny marin̈y an̈atin’ny fôndrô’ tsy man̈ano sary man̈araka volan̈an’i Jehovah fo izikoa fa ankilan’olo maro, fa tsy man̈araka lalàn̈an’ny Zan̈ahary ndraiky izikoa fa ambadimbadiky an̈y. (Isaia 29:13) Irô tsy fetsifetsy koa fa man̈ano raha. Olo araiky fetsifetsy zen̈y baka mety hieritreritry fa tsy ten̈a mahatsara izy man̈araka fitsipikin’i Jehovah sasany. (Jak. 1:5-8) Izy mety tsy han̈araka volan̈an’i Jehovah amy raha hitany fa karaha madiniky. Aviô amy zay, izikoa fa tsisy raha ratsy mavoa izy lera izy tsy man̈araka volan̈an’i Jehovah in̈y, izy mety hahaitsy han̈araka volan̈an’ny Zan̈ahary fo, ke hanjary hihatsaravelatsihy fo izy amy fanompoan̈a ataony. (Mpito.  8:11) Atsika tsy karaha zen̈y. Tiantsika han̈ano ny marin̈y amy raha jiaby.

9. Ino raha ianarantsika baka tamy somilan’i Jesosy fanôjy Natanaela? (Zahava koa sary.)

⁹ Ten̈a raha maventy tsy mihatsaravelatsihy. Hitantsika raha zen̈y tamy Jesosy voanalohany fanôjy tamy Natanaela. Fôtony Filipo koa fa nitondra namany io nandeha tamy Jesosy, nisy raha niavaka mare. Ndray sambany Jesosy nahita i Natanaela, izy nivolan̈a karaha ty: ‘Zay olo ten̈a israelita sady tsisy fitaka.’ (Jaona 1:47) Marin̈y ndraiky fa samy nan̈ano ndreky nivolan̈a ny marin̈y aby fahitan’i Jesosy mpianatranany aby io, fa nin’i Natanaela ten̈a niavaka. Natanaela io olo tsy lavorary karaha ataontsika fo, fa izy tsy nihatsaravelatsihy foeky ndray hely. Nahavarian̈a Jesosy raha zen̈y, ke nidirainy izy. Tiantsika izikoa karaha zen̈y koa raha volan̈in’i Jesosy momba atsika!

10. Nan̈ino atsika mila mitandrin̈y amy raha volan̈intsika? (Jakoba 1:26)

¹⁰ Ankamarozan’ny raha takin’ny Zan̈ahary amintsika amy Salamo faha-​15 ao, mikoran̈a momba fitondrasantsika olo hafa fo. Karaha ty ho Salamo 15:3 momba lan̈iany olo mivahiny amy tran̈olain’i Jehovah: “Tsy mampiasa lelanany han̈odihodian̈a raha tsy ataon’olo izy, tsy man̈isy ratsy olo, aviô tsy mangala baraka namany.” Izikoa atsika man̈odihody raha tsy ataon’olo, mety halahelo mare irô, aviô koa tsy hiken’i Jehovah hanjary vahiny amy tran̈olainany eky atsika.​—Vakia Jakoba 1:26.

11. Ino ma dikan’ny man̈odihody raha tsy ataon’olo zen̈y, aviô ino raha hahazo olo araiky mpan̈ano zen̈y kanefa tsy mibebaka?

¹¹ Mikoran̈a momba fan̈odihodian̈a raha tsy ataon’olo mpan̈ano salamo iô. Ino ma dikan’izen̈y? Dikan’izio, mivolan̈a raha tsy marin̈y baka hahavoa raha olo araiky ndreky baka handrobaka lazanany. Izikoa misy olo araiky mpan̈odihody raha tsy ataon’olo kanefa tsy mibebaka, izy adoso tsy ho an̈isan’ny fiangonan̈a.​—Jer. 17:10.

12-13. Ino aby raha mety ho hisy, ke hahavy atsika hanjary ho tafangala baraka namantsika? (Zahava koa sary.)

 ¹² Salamo 15:3 koa mivolan̈a fa olo vahinin’i Jehovah tsy man̈isy ratsy olo, aviô tsy mangala baraka namany. Ino ma raha tiany koran̈iny amy zen̈y?

¹³ Mety tsy ho kiniantsika fa atsika mety tafivolan̈a raha ratsy momba namantsika, izikoa atsika mikoran̈a raha tsy mankahery momba irô. Ohatra iziô, 1) misy ranabavy araiky najanon̈o mpisava lalan̈a, 2) misy olo fivadiany efa tsy manompo amy Betela eky, na 3) misy rahalahy araiky efa tsy anti-pan̈ahy eky na efa tsy mpikarakara fiangonan̈a eky. Mety ma izikoa atsika mivolan̈a amin’olo fa tsy maintsy misy raha tsy pare fo nataondrô rahalahy ndreky ranabavy aby io, matoa irô nadoso tamy tombontsoam-panompoan̈andrô? Mety misy antony maro iziô nahavy fan̈ovoan̈a natao io, fa tsy haintsika fo. Fan̈ampin’izen̈y koa, olo vahiny an-tran̈olain’i Jehovah zen̈y “tsy man̈isy ratsy olo, aviô tsy mangala baraka namany.”

HAJÀ LAN̈IANY OLO MAVOZO JEHOVAH

14. Hazavà nan̈ino ma vahinin’i Jehovah tsy man̈ano dia araiky “amin’olo tsisy raha ilan̈a izy.”

¹⁴ Koran̈in’ny Salamo 15:4 fa kamaradin’i Jehovah ‘tsy man̈ano dia araiky amin’olo tsisy raha ilan̈a izy.’ Akôry ma hahaizantsika fa tsisy raha ilan̈a izy olo araiky? Atsika tsy lavorary, ke atsika tsy afaka mivolan̈a fa olo araiky tsisy raha ilan̈a izy. Fôtony nan̈ino? Fôtony mety misy toetrin’olo tiatiantsika, fa misy ndraiky olo tsy tiantsika baka amy toetrinany. Ke dikan’izen̈y, olo volan̈in’i Jehovah fa “tsisy raha ilan̈a izy” fo tsy ataontsika naman̈a. (1 Kor. 5:11) An̈isan’izen̈y lan̈iany olo nan̈ano raha ratsy kanefa tsy mety mibebaka, olo tsy man̈aja raha inoantsika, na olo mety handrobaka fifandraisantsika amy Jehovah.​—Ohab. 13:20.

15. Ino fomba araiky han̈ajantsika “lan̈iany olo matahotro Jehovah”?

¹⁵ Amy Salamo 15:4 io mivolan̈a fa atsika mila man̈aja “olo matahotro Jehovah.” Man̈ano zen̈y atsika izikoa mitady fomba fo han̈aboahan̈a hatsaram-pan̈ahy ndreky fan̈ajan̈a amin’olo kamaradin’i Jehovah aby io. (Rom. 12:10) Akôry han̈anaovantsika zen̈y? Amy Salamo 15:4 mikoran̈a fomba araiky. Volan̈iny ao fa olo araiky vahiny an-tran̈on’i Jehovah zen̈y “tsy mivadiky amy vava efa nataony, ndray zen̈y havoazany raha.” Ten̈a malahelo olo, izikoa atsika mivadiky amy vava efa nataontsika. (Mat. 5:37) Ohatra iziô, tian’i Jehovah vahininany man̈ano raha mifan̈araka amy voady nataondrô tamin’irô nan̈ano mariazy. Ravoravo koa Jehovah izikoa raimandreny man̈atanteraka fampan̈antinan̈andrô tamy zanakandrô. Izikoa atsika tia Jehovah ndreky namantsika, atsika man̈ano erakan’ny vitantsika han̈atantirahan̈a volan̈a nataontsika.

16. Ino koa fomba hafa han̈ajantsika kamaradin’i Jehovah aby io?

¹⁶ Fomba hafa han̈ajantsika olo kamaradin’ny Zan̈ahary koa, atsika tia mandray vahiny ndreky tia man̈amia raha olo. (Rom. 12:13) Atsika koa mangala diandian̈a miaraka amindrô rahalahintsika ndreky ranabavintsika aby io, hahaihihavan̈a amindrô fo atsika, baka iô koa hihavan̈a tsarabe amy Jehovah. Fan̈ampin’izen̈y, atsika koa tia mandray vahiny, atsika mangala tahaka Jehovah.

MIFEN̈A FO BAKA TSY HO TIA VOLA

17. Nan̈ino ma Salamo faha-​15 io mikoran̈a momba vola?

¹⁷ Amy Salamo 15:5 ao mivolan̈a fa olo vahinin’i Jehovah “koa fa mampitrosa, izy tsy mitaky zana-bola, baka iô izy tsy man̈ano risoriso hamangoan̈a olo tsy manan-tsin̈y.” Nan̈ino ma mpan̈ano salamo io mikoran̈a momba  vola? Fôtony izikoa atsika tsy mitandrin̈y, lôso fitiavan̈a vola io raha ten̈a maventy amintsika fa tsy fitiavan̈a olo ndreky fifandraisantsika amy Zan̈ahary. (1 Tim. 6:10) Tamin’ny andran’ny Baiboly, nisy olo nan̈araraotro rahalahindrô masikiny ke nitaky zanabola be tamy vola nitrosaindrô. Aviô koa mpitsara sasany tia nan̈ano risoriso, aviô nan̈ano ny tsy rariny izikoa fa nitsara olo. Jehovah tsy tia raha karaha zen̈y.​—Ezek. 22:12.

18. Ino aby fan̈ontanian̈a han̈ampy atsika handiniky toe-tsain̈intsika momba vola? (Hebreo 13:5)

¹⁸ Ke ten̈a tsara izikoa atsika mandiniky toe-tsain̈intsika momba vola. Man̈ontania ten̈a karaha ty: ‘Zaho ma mieritreritry raha momba vola fo ndreky raha hivangaiko aminany io? Izikoa zaho mindran̈a vola amin’olo, zaho ma malain̈y man̈ampody, ke mihevitry fa olo nampindran̈a izio mbala tsy mila vola io? Baka amy vola ma mahavy zaho mihevitry fa zaho olo misy valera? Makikitry ma zaho fôtony tia vola? Zaho ma mihevitry fa matoa rahalahy na ranabavy araiky manam-bola, dikan’izen̈y izy tia vola? Zaho ma tsy tia mikamarady amin’olo masikiny fa amin’olo manan-draha fo?’ Ten̈a raha maventy handinihantsika valin’ny fan̈ontanian̈a aby zen̈y, fôtony atsika niken’i Jehovah hanjary vahininany. Ke ho vahinin’i Jehovah fo atsika izikoa atsika mifen̈y tsy ho tia vola. Izikoa atsika man̈ano zen̈y, Jehovah tsy han̈ary atsika foeky!​—Vakia Hebreo 13:5.

TIAN’I JEHOVAH IRÔ KAMARADINANY ABY IO

19. Ino mahavy Jehovah man̈iraka atsika han̈ano raha jiaby koran̈in’ny Salamo faha-​15 io?

¹⁹ Mifaran̈a amy fampan̈antinan̈a ty Salamo faha-​15 io: “Tsy mety hangozohozo zay olo man̈ano raha jiaby zen̈y.” (Sal. 15:5) Mpan̈ano salamo eto man̈azava antony mahavy Jehovah man̈iraka atsika han̈ano raha jiaby takiny. Tian’i Jehovah atsika ho ravoravo. Ke atsika koa man̈ano zay raha han̈irahan’i Jehovah atsika, hahaiho tsara fo fiain̈anantsika, aviô Jehovah koa hiaro atsika.​—Isaia 48:17.

20. Ino raha efa tsy din̈in’ny vahinin’i Jehovah mare ho hita amin’ny amaray an̈y?

²⁰ Lan̈iany olo iken’i Jehovah han̈ano vahininany, hahazo hatsaran̈a maro amin’ny amaray an̈y. Hiditry amy “tany ipitrahan̈a maro” efa namboarin’i Jesosy nindrô an-dan̈itry an̈y, irô voahosotro tsy mivadiky. (Jaona 14:2) Fa lan̈iany man̈anten̈a hiain̈y ambony tany eto ndraiky, efa miambin̈y mare fahatantirahan’ny Apokalypsy 21:3. Ke ten̈a voninahitry maventy amintsika kahin’i Jehovah hanjary kamaradinany, ke hivahiny mandrakizay amy tran̈olainany!