Zaho teraka tamy 22 Desambra 1929, ta Noville, tanàna hely misy tany fambolian̈a sivy narikitry Bastogne, a Belziky. Ravoravo mare zaho tamy zaho mbala hely nipetraka tamy la ferma tao niaraka tamy babako ndreky mamako. Zahay roen’i Raymond faralahinay isaka maraindrain̈y manery aombinay ndreky mitahitahy ry olobenay mandidy vary. Tamy zen̈y, olo jiaby nifanahitahy izikoa fa misy asa.

An̈aran’ny babako Emile, fa Alice ndraiky an̈aran’ny mamako. Irô io Katolika nafana fô mare. Irô nandeha lamesy isaka dimansy. Kanefa tamin’ny 1939, nisy mpisava lalan̈a baka tan Angletera navy taminay tan̈y. Irô nivolan̈a tamy babako fa izy mety man̈ano famandrihan̈a gazety Consolation (na Mifohaza! amy ziôty). Nalaky hitan’ny babako fa raha volan̈in’ny gazety aby io marin̈y tsarabe, ke raha zen̈y nandrisiky izy namaky Baiboly. Fa izikoa izy fa vôly nandeha lamesy, irô jiraninay kamaradinay taloha aby in̈y nanohitry mare zahay. Irô niforise babako tsy hiala tamy Katolika, ke raha zen̈y navian’ny adihevitry nafana mare.

Nampalahelo zaho mare nahita raha nataondrô olo aby io babako, ke zen̈y nahavy zaho nan̈ano vavaka nikoran̈iko tamy voanalohany tarỳ in̈y. Zaho nangataka baka Zan̈ahary han̈ampy babako. Izikoa fa nahaivôly fanoheran̈a nataondrô jiraninay aby io, ravoravo mare zaho, ke nan̈eky marin̈y zaho fa Jehovah io ten̈a “Mpitandren̈y Vavaka” amin’ny ankitin̈y.

Tamy 10 May 1940, Allemagne Nazỳ nanafiky Belziky, ke maro olo nandeha nilefa. Fianakavian̈anay koa nandeha nilefa tatsimon’i France tan̈y. Natetiky zahay tseky naty tamy lalan̈a, fôtony tafikin’ny aliman niady tamy tafikin’ny fransay.

 Zahay koa fa nimpody tamy tany nisy zahay taloha tambanivolo tan̈y in̈y, zahanay rahanay jiaby kaiky nangalarin’olo. Ke amboanay zaraiky fo tavela tao, Bobbie an̈arany. Izy nitsena zahay. Safe raha jiaby zen̈y nahavy zaho lôso diniky: ‘Nan̈ino ma misy ady ndreky jaly?’

Tamy fotoan̈a zen̈y, ten̈a nankahery zahay famangian̈an’i Rahalahy Emile Schrantz. a Izy anti-pan̈ahy mpisava lalan̈a sady tsy nivadiky. Nazavainy tsarabe tamy Baiboly nan̈ino misy fijalian̈a. Aviô nivaliany koa fan̈ontanian̈anaka sasany momba fiain̈ana. Zaho nahainifandray marikitry tamy Jehovah fo, ndreky nan̈eky marin̈y fa izy Zan̈ahary be fitiavan̈a.

Ndray talohan’ny nivitan’ny lagera in̈y, fianakavian̈anay efa nifandray matetiky tamindrô rahalahy ndreky ranabavy aby io. Tamin’ny Aoty 1943, Rahalahy José-Nicolas Minet navy nizaha tany nisy zahay ndreky nan̈ano kabaro. Izy nan̈ontany karaha ty: “Azôvy aminarô tihan̈ano batisa?” Babako nanangan-tan̈ana, ke zaho mba nanangana koa. Ke zahay baka tiô natao batisa tamy ten̈arano hely narikitry zahay tiô.

Tamy Desambra 1944, tafikin’ny aliman nanafiky farany tamin’ny ilany andrefan’i Eropy. Lageran’i Ardennes fahaizan’olo an̈aran’ny ady zen̈y. Zahay nipetraka narikitry tany nisy ady io, ke tan̈atin’ny fanjava araiky zahay nidôko tambanin’ny lakalin’ny tran̈onay tao fo. Tandraraiky zaho niboaka nandeha nan̈amia hanin̈y raha nitariminay, feno tifitifitry tamy tany nisy zahay, ke napoaka tan̈y tafon’ny tran̈o fikajian̈a hanin̈indrô raha tariminay io. Nisy maramila amerikain araiky tamy tran̈ondrô biby aby io, narikitry zaho tiô, nandronton̈o karaha ty: “Mitandavoa!” Ke zaho nilomoay mare, baka iô nitandavo narikitry izy tiô. Napetrany tan̈abon’ny lohanaka satrokonany, niarovany zaho.

Koa fa vita lagera, zahay mbala nahavita nifandray tsy tapaka tamindrô rahalahy ndreky ranabavy tamy fiangonan̈a ta Liège fo. Izio kadiriny 90 kilometara tavaratran’ny tany nisy zahay. Izikoa fa nandeha fotoan̈a, nisy olo vitsivitsy niaraka nianatra Baiboly ta Bastogne. Zaho koa nanomboko niasa tamy tany fan̈ifan̈a latety ndreky nahavita nianatra momba lalàn̈a. Tafaran’izin̈y, zaho niasa tamy birôm-panjakan̈a tamy tany nisy zahay.  Tamin’ny 1951 zahay nandamin̈y fivoriamben’ny faritry. Nisy olo nandeha 100 nan̈aton̈o izio, an̈isan’izen̈y ranabavy araiky mpisava lalan̈a mazoto mare, Elly Reuter an̈arany. Izy nandeha bisikilety 50 kilometara. Tsy ela tafaran’izin̈y, zahay nifankatia, ke zahay nan̈ano fianse. Elly tamy zen̈y nahazo taratasy mikaiky izy han̈ano Sekolin’i Gileada a Etazonỳ. Ke nanoratra tamy foibe tan̈y izy nan̈azava antony tsy nahavitany izio. Tamy fotoan̈a zen̈y, Rahalahy Knorr nitariky tamy vahoakan’i Jehovah. Tsara fan̈ahy izy namaly taratasin’i Elly, ke nivolan̈a taminany fa andra araiky an̈y izy ndreky vadiny mbala mety man̈ano Sekolin’i Gileada fo. Ke nan̈ano mariazy zahay roen’i Elly, tamy Fevrie 1953.

Tamy taon̈o io fo koa, zahay fivadiany nan̈aton̈o Fivoriamben’ny Fitambaran’olon’ny Donia Vaovao, ta Yankee Stadium, ta New York. Tamy zaho tan̈y, zaho fanôjy rahalahy araiky nan̈amia asa tsara zaho ndreky nan̈iraka zaho hifindra ta Etazonỳ. Fa zaho koa fa baka nivavaka momba izio tamy Jehovah, zahay ndreky Elly tapa-kevitry fa himpody ta Belziky fo, han̈ampy antokom-pitory nisy olo folo ta Bastogne. Koa fa nafaka taon̈o araiky, zahay niteraka zanakanay lelahy hely, Serge an̈arany. Fa nampalahelo fo, fito fanjava tafaran’izin̈y, narary izy, ke naty. Nikoran̈inay tamy Jehovah tamy vavaka alahelonay, aviô nankahery zahay fan̈antinan̈a azo antoko momba familaoman̈a olo maty.

Tamin’ny Oktobra 1961, zaho nahita asa tapa-potoan̈a, ke raha zen̈y nahavitako nan̈ano mpisava lalan̈a. Aviô, tamin’ny andra io fo koa zaho nahazo kaiky baka tamy mpikarakara sampan̈a ta Belziky. Izy nan̈ontany tsao zaho mety man̈ano mpan̈ampy faritry (mpiandraikitry faritry). Ho zaho taminany: “Zahay ma tsy mety man̈ano mpisava lalan̈a antsendriky, zay vo man̈ano mpan̈ampy faritry zen̈y?” Nikendrô fangatahan̈anaka. Ke nan̈ano mpisava lalan̈a tan̈atin’ny valo fanjava antsendriky zahay, aviô nan̈ano asan’ny faritry nanomboko tamy Septambra 1962.

Taon̈o aroe tafaran’ny nan̈anaovanay asan’ny faritry, zahay voakaiky hanompo tamy Betela ta Bruxelles. Nanomboko nanompo tan̈y zahay, tamin’ny Oktobra 1964. Naro hatsaran̈a nazonay tamy zen̈y. Tsy ela tafaran’ny Rahalahy Knorr nitsidiky Betelanay tamin’ny 1965, tsy nampoiziko zaho navoatendry mpikarakara sampan̈a. Tafaran’izin̈y koa, zahay roen’i Elly navoakaiky nan̈ano Sekolin’i Gileada, kilasy faha-41. Tanteraka ankitin̈y raha nivolan̈in’i Rahalahy Knorr, 13 taon̈o talohan’izin̈y! Zahay koa fa nahazo diplaomy, zahay nampody ndraiky tamy Betelan’i Belziky.

Tan̈atin’ny taon̈o maro zaho nahavita nampiasa fahaizako raha momba lalàn̈a, hiarovan̈a zon’ny vahoakan’i Jehovah ta Eropy ndreky tan-tany hafa koa. (Fil. 1:7) Ke raha zen̈y nahavy zaho nahavita nifandray tamy manam-pahifan̈a tamy tany mandilatra 55 nisakasakana asantsika, na koa fanjakan̈a tan̈y nandrova asantsika. Zaho tsy nitôron̈o fahaizako raha momba lalàn̈a tamindrô manam-pahifan̈a aby io, fa naboakako irô fa zaho ‘olon’ny Zan̈ahary.’ Zaho nitady tari-dalan̈an’i Jehovah  tamy vavaka fo, fôtony haiko fa “fôn’ny mpanjaka io [na niny mpitsara], mira ten̈arano am-pelantan̈an’i Jehovah, ke izy mahay tany tiany hamilian̈a izio.”​—Ohab. 21:1.

Mbala tsaroako fo koran̈a nataoko tamin’olo araiky an̈isan’ny Parleman Eropeanin̈y zay. Efa impirimpiry zaho nangataka hikoran̈a taminany. Tamy farany, izy nan̈eky hifanôjy taminaka. Ho izy: “Dimy minity fo amiako anao fa tsy mandilatran’izen̈y.” Niôndriky zaho nivavaka. Lelahy io baka tiô nahinihiny nan̈ontany ino raha nataoko io. Zaho niangana, aviô nivolan̈a taminany: “Zaho nan̈ano mersy Zan̈ahary, fôtony anao an̈isan’ny mpanomponany.” Izy nan̈ontany: “Ino ma raha tianao volan̈iny?” Naboakako izy Romanina 13:4. Izy baka Protestan, ke matetiky maharikian̈a irô raha momba Baiboly. Nan̈ano karakôry amy zay baka tiô? Zaho nambelany nikoran̈a taminany tan̈atin’ny antsasaka lera, ke ten̈a nisy vokany tsara koran̈anay io. Ndray izy aby nivolan̈a fa izy ten̈a man̈aja asa ataontsika.

Tan̈atin’ny taon̈o maro Vavolombelon̈on’i Jehovah nan̈ano ady maro ara-pitsaran̈a ta Eropy. Izio momba tsy fan̈anaovan̈a maramila, zo hikarakara zanaka, fan̈ifan̈a latety ndreky raha hafa koa. Ten̈a tombontsoa maventy taminaka mba nahita fomba nan̈ampian’i Jehovah atsika hahômby ndreky handresy tamy zen̈y! Efa mandilatra 140 fandrisian̈a nazontsika Vavolombelon̈on’i Jehovah, tamy Fitsaran̈a Eropeanin̈y Momba Zon’olombelon̈o.

Tan̈atin’ny taon̈o 1990, zaho niaraka niasa tamy rahalahy Philip Brumley, baka amy foibe ndreky Rahalahy Valter Farneti, baka a Italy. Zahay nan̈ano raha han̈ampian̈a irô rahalahintsika ndreky ranabavintsika ta Cuba tan̈y, baka hahavita hanompo Jehovah tsarabe. Navoasakasakana baka asantsika tan̈y. Zaho nanoratra tamin’ny ambasadin’i Cuba ta Belziky, baka iô fanôjy tamy manam-pahifan̈a araiky nitindrendrô hikarakara fangatahan̈antsika. Tamy koran̈anay voanalohany, zahay tsy ten̈a nahavita namaha fahadisoan-kevitry nahavy manam-pahifan̈a tan̈y nisakasakana asantsika io.

Zahay koa fa baka nangataka tari-dalan̈an’i Jehovah tamy vavaka, zahay nangataka lalan̈a, handefa Baiboly 5 000 ta Cuba. Ke zahay nahazo lalan̈a. Navy tsarabe tan̈y irô Baiboly aby io, aviô nirasain̈y tamindrô rahalahy aby io. Ke hitanay tsarabe tamy zen̈y fa Jehovah nitahy ezaka nataonay. Zahay baka tiô koa nangataka lalan̈a handefa Baiboly mandeha 27 500 koa. Mbala niken’ny fanjakan̈a fo koa zahay nandefa zen̈y. Ten̈a ravoravo mare zaho mba nahavita nan̈ampy irô rahalahy ndreky ranabavy ta Cuba tan̈y, nahazo Baiboly nindrô manokan̈a.

Matetiky zaho nandeha nitsidiky ta Cuba, nan̈ampy tamy raharaha ara-pitsaran̈a hampandeha asantsika. Tamy fikarakaran̈a raha aby zen̈y, naro manam-pahifan̈a nanjary nifankahazo tsarabe taminaka.

Tamin’ny 1994, mandilatran’ny 1 000 000 olo naty tamy fandripahan̈a foko tutsi ta Rwanda. Mampalahelo fa nisy rahalahintsika ndreky ranabavintsika sasany koa naty tamizio. Tsy ela tafaran’izio, nisy rahalahy vitsivitsy nirahan̈a nikarakara ndreky nan̈amia fan̈ampian̈a irô rahalahy ndreky ranabavintsika tan̈y.

Zahay koa fa navy ta Kigali, kapitalin’i Rwanda, hitanay riban’ny birôn’ny fandikan-tenintsika ndreky tany fan̈ambilan̈a boky aby io loadoakan’ny bala. Maro koa tantara ren̈inay momba irô rahalahy ndreky ranabavintsika nivonen’olo tamy mesobe. Aviô zahay koa naharen̈y tantara maro nahitan̈a fa irô rahalahy ndreky ranabavintsika aby io ten̈a nifankatia. Ohatra, zahay fanôjy rahalahy araiky tutsi nasitrikin’ny Vavolombelon̈on’i Jehovah hutu tamy lavaka tambanin’ny tran̈ondrô, tan̈atin’ny 28 andra. Tamy fivorian̈a nataonay ta Kigali, zahay nifen̈y mare nankahery rahalahy ndreky ranabavy mandilatran’ny 900.

Zahay baka tiô nitsaka sisin-tany nandeha ta Zaire (Repobliky Demokratikin’i Congo amy ziôty) nitady irô rahalahy ndreky ranabavintsika baka a Rwanda, nilefa tamy tobin’ny mpitsoa-ponenan̈a marikitry tanànana’i Goma. Tsy hitanay foeky irô, ke zahay nivavaka tamy Jehovah, nangataka izy hitariky zahay handeha amy tany misy irô. Zahay baka tiô nahita lelahy zay nan̈aton̈o zahay, ke nan̈ontanianay izy tsao mahay Vavolombelon̈on’i Jehovah. Ho izy: “Ia, zaho Vavolombelon̈on’i Jehovah, ke zaho pare han̈atriky anarô amy komitin’ny vonjy rano vaky an̈y.” Tafaran’ny fivorian̈a mankahery nataonay niaraka tamy komitin’ny vonjy rano vaky, zahay nahita olo mpitsoa-ponenan̈a mandeha 1 600. Ke zahay nikoran̈a tamindrô raha baka tamy Baiboly, nankahery irô. Nisy taratasy baka tamy Filan-kevi-pitantan̈ana koa nivakinay tamindrô. Ten̈a ravoravo irô rahalahy ndreky ranabavy aby io naharen̈y fan̈amezan̈a toky irô ty: “Zahay tsy vôly mivavaka ninarô. Hainay fa Jehovah tsy han̈ary anarô foeky.” Tanteraka ankitin̈y raha nivolan̈in’ny Filan-kevi-pitantan̈ana zen̈y. Amy ziôty, misy Vavolombelon̈on’i Jehovah mandilatran’ny 30 000 a Rwanda an̈y, ravoravo manompo Jehovah!

Naty Elly vadiko, tamin’ny 2011. Efa tsy ela 58 taon̈o vadian̈anay tamy zen̈y. Nankahery zaho Jehovah, izikoa fa nikoran̈iko taminany tamy vavaka alahelonaka. Nankahery zaho koa nikoran̈a vaovao tsaran’ny Fanjakan̈an’ny Zan̈ahary tamy jiraninaka aby io.

Ndray zaho efa mandilatran’ny 90 taon̈o, zaho mbala mandeha mitory fo isaka herin̈iandra. Mbala mamparavoravo zaho fo koa man̈ampy Sampan-draharahan’ny Lalàn̈a, amy Betelan’i Belziky eto ndreky mikoran̈a amin’olo raha efa nandalovako, aviô man̈ampy amy fankahirezan̈a irô rahalahy tanora amy fianakavian̈an’ny Betela.

Efa 84 taon̈o lôso zay nan̈anaovako vavakanaka voanalohany tamy Jehovah in̈y. Rango tamizin̈y, zaho nahainifandray marikitry tamy Jehovah fo. Ke zaho ten̈a mankasitraka Jehovah, fôtony izy nitandren̈y vavakanaka fo, tamy fiain̈ananaka jiaby.​—Sal. 66:19. b