1. Nan̈ino atsika mety mavozo ndraikindraiky?

 SAMY mavozo aby atsika jiaby ndraindraiky. Marin̈y ndraiky fa atsika efa mahay raha ampianarin’ny Baiboly, ke zen̈y mahavy atsika tsy mavozo olo maty, tsy mavozo demony, aviô tsy mavozo raha mety hiboaka amin’ny amaray. Fa ndray zen̈y, sarotro mare fotoan̈a misy atsika ziôty, ke atsika mety mavozo tsao hisy ady, raha ratsy hataonolo, aviô aretin̈y. (Lioka 21:11) Atsika koa mety mavozo olo, an̈isan’izen̈y manam-pahifan̈a mampijaly atsika na koa havantsika manohitry fivavahan̈a marin̈y. Sasany amintsika koa mety mavozo tsao tsy hahavita hiatriky fitsapan̈a mavoa irô iziôty na mbala ho avy.

2. Ino raha nampavozo i Davida, tamin’izy ta Gata?

² Efa navy nisy fotoan̈a Davida navozo. Ohatra, nandeha nilefa ta Gata, tanànandrô Filistiny aby io izy, tamy Mpanjaka Saoly nitady tany nisy izy. Tihamono izy baka Saoly. Izikoa izy efa navy tan̈y, ren̈in’i Akisy mpanjakan’i Gata fa Davida io lelahy mahery miady sady efa nahafaty Filistiny mandilatra ‘folo arivo.’ Ke Davida ‘navozo mare.’ (1 Sam. 21:10-12) Izy niasaloha ino raha handeha hataon’i Akisy taminany. Akôry nataon’i Davida nandresy tahotronany zen̈y?

3. Eraka Salamo 56:1-3, 11, karakôry nataon’i Davida nandresy tahotronany?

³ Amy Salamo faha-56 ao Davida nikoran̈a raha tsapany ta Gata tan̈y. Nazavainy ao nan̈ino izy navozo, aviô ino raha nan̈ampy izy tsy havozo eky. Davida koa fa navozo, izy natoky Jehovah. (Vakia Salamo 56:1-3, 11.) Mety tsara raha nataony zen̈y. Nampian’i Jehovah izy hahita hevitry hafahafa, kanefa ten̈a nahomby raha. Izy nan̈ano sary adala! Ke tsy fahavalo eky fahitan’i Akisy izy fa olo adala mampangaroharo, ke Davida najary nahavita nilefa.​—1 Sam. 21: 13–22:1.

4. Ino han̈ampy atsika hatoky Jehovah tsarabe? Hazavà amin’ny ohatra.

 ⁴ Atsika koa afaka mandresy tahotro, izikoa matoky Jehovah. Kanefa ino raha han̈ampy atsika hatoky Jehovah tsarabe, intsaka eky lera atsika mavozo? Ty misy ohatra. Mety mavozo mare anao amy voanalohany, izikoa fa hainao fa anao marary, kanefa ho kirikiry asalohanao izikoa anao matoky dôkoteranao. Mety efa nampajanga olo maro tatran’ny aretin̈y karaha ninao io izy. Mitandren̈y tsara koa izy izikoa anao mikoran̈a aminany, ke anao manjary matoky fa izy ten̈a mahay raha mahazo anao. Baka iô mety misy karazan̈a fitahan̈a efa nahajanga olo hafa hataony aminao. Karaha zen̈y koa, ho fatatra fatokisantsika Jehovah, izikoa alaintsika onon̈o ino raha efa nataony, raha ataony iziôty, aviô ino raha mbala hataony. Karaha zen̈y nataon’i Davida. Hidinihintsika sasany amy raha nisoratany, amy Salamo faha-56, ke aleva onon̈o koa ino raha mety hataonao baka ho fatatra fo fatokisanao Jehovah, aviô ino raha han̈ampy anao handresy tahotronao.

INO RAHA EFA NATAON’I JEHOVAH?

5. Ino raha nisaintsain̈in’i Davida, izy koa fa navozo? (Salamo 56:12, 13)

⁵ Davida ndray niatriky raha sarotro mety hamono izy, izy tsy vôly nieritreritry raha tsara efa nataon’i Jehovah. (Vakia Salamo 56:12, 13.) Efa fahazaran̈an’i Davida foeky nan̈ano zen̈y. Ohatra, natetiky izy nisaintsain̈y raha niasain’i Jehovah. Izio nampatsiaro izy fa Jehovah ten̈a matanjaka ankitin̈y sady ten̈a tia olombelon̈o. (Sal. 65:6-9) Davida koa nisaintsain̈y raha efa nataon’i Jehovah taminolo. (Sal. 31:19; 37:25, 26) Nalainy onon̈o koa raha efa nataon’i Jehovah taminany. Jehovah baka efa nikarakara izy fo rango izy mbala hely. (Sal. 22:9, 10) Azo antoko tsarabe fa Davida koa fa nieritreritry raha karaha zen̈y, nahaifatatra fo fatokisany Jehovah.

6. Lera anao mavozo, ino raha han̈ampy anao hatoky Jehovah?

⁶ Lera anao mavozo, man̈ontania ten̈a karaha ty: ‘Ino ma raha efa nataon’i Jehovah?’ Diniha raha aby niasainy. Zahava tsarabe, ohatra, karakôry ataon’i Jehovah mikarakara vôron̈o ndreky folera. Irô io tsy nataony  mira sora aminany sady tsy nataony hanompo izy, kanefa karakarainy tsara fo. Ke izikoa atsika misaintsain̈y raha niasainy aby io, zen̈y han̈ampy atsika hatoky fa izy hikarakara atsika koa. (Mat. 6:25-32) Aleva onon̈o koa raha efa nataon’i Jehovah tamy mpanomponany. Anao mety mianatra mikasiky irô olo nanampinoan̈a an̈aty Baiboly ao, na koa mamaky tantaran’ny mpanompon’i Jehovah amin’ny andra ziôty. a Fan̈ampin’izen̈y, aleva onon̈o karakôry nataon’ i Jehovah nikarakara anao taloha, ndreky nitaon̈o anao tamy fahamarin̈ana. (Jaona 6:44) Karakôry nataony namaly vavakanao? (1 Jaona 5:14) Ino hatsaran̈a azonao isanandra baka amy sôron̈o nataon’ny Zanany?​—Efes. 1:7; Heb. 4:14-16.

7. Tamy fomba karakôry tantaran’ny mpaminan̈y Daniela nan̈ampy Vanessa tsy havozo eky?

⁷ Tojy raha nampavozo mare i Vanessa b, ranabavy araiky a Haïti an̈y. Nisy lelahy tanàna araiky taminany tihiforse izy hiaraka aminany, ke tsy vôly nikaiky izy ndreky nandefa mesazy taminany isan’andra. Fa Vanessa tsy nan̈eky foeky. Ke lelahy io nanjary neloko mare aviô nandrahon̈o izy foeky. Nivolan̈in’i Vanessa: “Zaho nangôrohôro.” Ke akôry nataony nandresy tahotronany? Izy nan̈ano raha hiarovan̈a ain̈inany. Nisy anti-pan̈ahy nan̈iraka izy hikaiky pôlisy. Fa izy koa nieritreritry karakôry nataon’i Jehovah niaro mpanomponany taloha tan̈y. Karaha ty ho Vanessa: “Tantaran’ny mpaminan̈y Daniela raha voanalohany navy tamy jeriko. Izy natsipy tan̈atin’ny lavakan’ny lion efa mosary mare, kanefa tsisy raha ratsy nataony. Jehovah niaro izy. Ke zaho nivavaka tamy Jehovah koa, nangataka taminany baka lelahy io ho vôly mieritreritry momba zaho ndreky hamaha prôblemo io, fotony zaho fa tsisy raha mety ho vitako eky. Ke tafaran’izin̈y, nanjary efa tsy navozo eky zaho.”​—Dan. 6:12-22.

INO RAHA ATAON’I JEHOVAH IZIÔTY?

8. Resy lahatra tamin’ino ma Davida? (Salamo 56:8)

⁸ Nata Davida efa saiky naty ta Gata tan̈y, izy tsy nialamboetry. Izy nanapakevitry hangala onon̈o raha aby efa nataon’i Jehovah nan̈ampian̈a izy tamy zen̈y. Tsapan’i Davida fa Jehovah nitariky izy, niaro izy, aviô nahay tsarabe raha tan̈aty fônany. (Vakia Salamo 56:8.) Nan̈ampy izy ndreky nankahery izy koa irô namany aby io, karaha nataon’i Jonatana ndreky Ahimeleka mpisôron̈obe. (1 Sam. 20:41, 42; 21:6, 8, 9) Baka iô, nata Mpanjaka Saoly nitady hamono izy, Davida nahavita nilefa fo. Davida resy lahatra fa hain’i Jehovah tsarabe raha nandalo tamy fiainan̈anany ndreky raha tsapany.

9. Ino raha hain’i Jehovah momba atsika tsiaraikiaraiky?

⁹ Anao koa fa mandalo fitsapan̈a araiky mampavozo anao, tsarova fa hain’i Jehovah raha mahazo anao, aviô hainy raha tsapanao. Karaha zen̈y tamy faha irô Israelita aby io. Tsy raha tsy rariny nataon’ny Ezipsianin̈y aby io tamindrô fo hitan’i Jehovah, fa firaka ‘jalindrô’ koa. (Eks. 3:7) Tamin’ny hira nataon’i Davida koa izy nivolan̈a fa hitan’i Jehovah ‘jalinany’ ndreky ‘hirifirin’ny fahorian̈a’ nahazo izy. (Sal. 31:7) ‘Nalahelo mare’ koa Zan̈ahary izikoa fa nijaly vahoakanany, nata baka tamin’ny hadalan̈andrô fo nahavy irô karaha zen̈y. (Isaia 63:9) Anao koa fa mavozo, hain’i Jehovah raha tsapanao, aviô izy vôn̈ono han̈ampy anao tsy havozo eky.

10. Nan̈ino anao matoky fa Jehovah mijery anao sady han̈ampy anao hiatriky fitsapan̈a jiaby mety havoa anao?

 ¹⁰ Lera anao miatriky fitsapan̈a araiky mampavozo mare, mety tsy azonao onon̈o aby fa Jehovah efa man̈ampy anao. Ke ino raha mety hataonao? Angataha izy han̈ampy anao hahita akôry ataony man̈ampy anao. (2 Mpanj. 6:15-17) Baka iô aleva onon̈o ty: Nisy kabaro na valin-teny araiky tamy fivorian̈a tan̈y ma nankahery anao? Nisy lahatsoratra, video na hira araiky ma nan̈amia korazy anao? Nisy olo ma nikoran̈a taminao andinin-teny na raha nankahery? Mety tsy azontsika onon̈o aby fa kaiky ten̈a nan̈ampy atsika fitiavan̈andrô mpiara-manompo aby io ndreky hanin̈y ara-pan̈ahy nazontsika. Kanefa raha zen̈y ten̈a kadô tsara baka amy Jehovah. (Isaia 65:13; Mar. 10:29, 30) Irô io man̈aboaka fa izy ten̈a mikarakara anao. (Isaia 49:14-16) Sady irô io koa man̈aporofo fa izy vain̈y hatokisanao.

11. Akôry nataon’i Aida nandresy tahotronany?

¹¹ Aida, ranabavy araiky mipetraka a Sénégal an̈y, nangala onon̈o akôry nataon’i Jehovah nan̈ampy izy tamy fitsapan̈a araiky. Izy baka talan̈olo amindrô kibo araiky. Ke iry olobeny nan̈anten̈a fa izy hiasa baka hahazo vola hahazahoany raha ilainy ndreky hikarakarany irô. Fa izy koa fa nan̈ano mpisava lalan̈a, izy tsy maintsy nan̈atsotra fiainan̈a ke hely fo volanany. Nanjary neloko taminany ry havany aby io, ke nivolambolan̈a izy. Karaha ty ho Aida: “Zaho navozo tsao tsy ho vitako han̈ampy ry olobeko, ke zaho manjary nahilikilikindrô. Nata zaho aby nan̈amia tsin̈y Jehovah, nan̈ino zaho nambelany niatriky raha karaha zen̈y.” Fa nisy kabaro araiky zay ren̈iny tamy fivorian̈a tan̈y. Ke araha ty nivolan̈in’i Aida: “Mpan̈ano kabaro io nampatsiaro fa hitan’i Jehovah raha aby mampavozo na mampiasaloha atsika tsiaraikiaraiky. Ke zaho koa fa nahazo sôso-kevitry baka tamin’ny anti-pan̈ahy ndreky naman̈a hafa, nanjary nimpody tsihelihely fatokisako fa Jehovah tia zaho. Zaho koa fa nivavaka tamy Jehovah, zaho nanjary nahainatoky tsarabe fa izy han̈ampy zaho. Baka iô, izikoa fa hitako fa nivaliany vavakanaka, zaho nanjary nilamin-tsain̈y tsarabe.” Koa fa elaela, Aida nahita asa nazahoany vola ampy tsara han̈anaovan̈a mpisava lalan̈a ndreky nahavitany man̈ampy iry  olobeny ndreky olo hafa koa. Karaha ty ho izy: “Zaho nianatra natoky Jehovah tsarabe. Ke iziôty, matetiky zaho koa fa baka mivavaka, zaho tsy mavozo eky.”

INO RAHA MBALA HATAON’I JEHOVAH?

12. Izikoa zahan̈a Salamo 56:9, natoky ino Davida?

¹² Vakia Salamo 56:9. Andinin-teny io mikoran̈a raha hafa nan̈ampy Davida tamin’izy navozo. Nata mbala nisy olo nitady hamono izy, nalainy onon̈o ino raha mbala hataon’i Jehovah aminany. Hain’i Davida fa Jehovah han̈avotro izy amy fotoan̈a mety. Sady Jehovah lastiô efa nivolan̈a fa Davida hanjary mpanjakan’ny Israely. (1 Sam. 16:1, 13) Hain’i Davida fa raha jiaby nampan̈antinain’i Jehovah tsy maintsy tanteraka.

13. Ino raha atokisantsika fa hataon’i Jehovah?

¹³ Ino raha efa nampan̈antinain’i Jehovah anao? Atsika tsy man̈anten̈a fa izy hisakana atsika tsy ho voa prôblemo. c Fa ndray ino ndray ino fitsapan̈a mahavoa atsika amy donia ratsy ty, irô io mbala hadoson’i Jehovah fo, koa fa avy donia vaovao. (Isaia 25:7-9) Mpamôron̈o atsika io manan̈a angôvo mahavita mamelon̈o olo maty, mampahivan̈a olo marary, aviô man̈adoso olo mpanohitry jiaby.​—1 Jaona 4:4.

14. Ino raha mety hisaintsain̈intsika?

¹⁴ Lera anao mavozo, diniha raha handeha hataon’i Jehovah amin’ny amaray. Aleva onon̈o haravoan̈anao lera fa tsy iô eky Satana ndreky olo ratsy fan̈ahy jiaby, fa olo marin̈y fo tavela. Aviô, iritrireta ino ho tsapanao, lera anao mahailavorary tsihelihely isan’andra. Tamy fivoriamben’ny vondrom-paritry tamin’ny 2014 in̈y, nisy fampisehoan̈a araiky nan̈aboaka karakôry atao mangala onon̈o fan̈antinan̈antsika zen̈y. Nisy baba araiky niaraka nikoran̈a tamy fianakavian̈anany momba 2 Timoty 3:1-5. Izy nivolan̈a fa mety havadiky karaha ty fomba famakian̈a irô andininy aby io, izikoa fa mikoran̈a fiainan̈a amy Paradisa: “Amy donia vaovao io ho tsara mare fiainan̈a. Olo amy zen̈y ho tia jiraninany, ho tia manompo Jehovah, tsy han̈ambony ten̈a, hidera Zan̈ahary, han̈aja raimandreny, hahay han̈ano mersy, hitana volan̈a nataony, ho tia havany, tsy ho sarotiny, hikoran̈a raha tsara momba namany, hahafehy ten̈a, ho tsara fan̈ahy, ho tia raha tsara, ho mafatoky, handefitry amy namany, tia Zan̈ahary fa tsy ho tia misoma donia, hita amy raha ataony fa izy mpivavaka ankitin̈y. Olo karaha zen̈y fo ataova naman̈a.” Misy fotoan̈a koa ma anao mba miaraka mikoran̈a amin’ny havanao na amy piaramanompo, momba fiain̈ana amy donia vaovao?

15. Ino raha nan̈ampy Tanja nahavita tsy nivadiky, nata izy navozo?

¹⁵ Diniha hely tantaran’i Tanja, ranabavy mipetraka a Macédoine Avaratra an̈y. Nanohitry izy mare iry olobeny, izy koa fa nanomboko nianatra Baiboly. Ndray izy navozo irô, vitany fo tsy nivadiky tamy Jehovah. Akôry nataony? Izy nimenimeny hatsaran̈a hamezan’i Jehovah izy amin’ny hoavy. Karaha ty ho Tanja: “Efa raha natahorako hiboaka in̈y edy raha niboaka. Isaka zaho baka nivory, zaho nipopopohin’ny mamako. Aviô irô roen’ny papako nivolan̈a fa hivonendrô zen̈y zaho izikoa zaho manjary Vavolombelon̈on’i Jehovah.” Tamy farany, Tanja nirôasindry olobeny niala tan-tran̈ondrô tao. Akôry nataony? Karaha ty nivolan̈iny: “Zaho nieritreritry haravoan̈anaka hiain̈y tsisy farany amin’ny amaray an̈y, baka tamy zaho tapakevitry tsy hivadiky. Zaho koa nimenimeny hatsaran̈a maro handeha hamezan’i Jehovah zaho amy donia vaovao, solon’ny raha aby  nafoeko tamy donia ty. Amy fotoan̈a zen̈y, efa tsy tsaroan̈a eky raha ratsy jiaby.” Tanja tsy nivadiky foeky. Nampian’i Jehovah izy ke nahita tany nipitrahan̈a. Amy ziôty, Tanja efa manambady. Aviô, olo ten̈a tia Jehovah vadiny. Ravoravo irô roe miaraka man̈ano fanompoan̈a manontolo andra.

ANKAFATARA FATOKISANAO JEHOVAH RANGO IZIÔTY

16. Ino raha han̈ampy atsika ho hisy korazy fo, lera tanteraka faminanian̈a amy Lioka 21:26-28?

¹⁶ Amy fahorian̈a be, ankamarozanolo ho “toran̈a tahotro.” Fa vahoakan’ny Zan̈ahary ndraiky tsy havozo sady ho hisy korazy. (Vakia Lioka 21:26-28.) Nan̈ino atsika ho hisy korazy? Fotony atsika efa nianatra natoky Jehovah. Karaha zen̈y ranabavy Tanja nikoran̈intsika tiô in̈y. Izy nivolan̈a fa raha niain̈any taloha aby in̈y man̈ampy izy hahavita hiatriky raha sarotro hafa. Karaha ty ho izy: “Hitako fa Jehovah mahavita man̈ampy atsika hiatriky raha sarotro jiaby, aviô izy hitahy atsika. Ndraikindraiky efa tsy hainao foeky raha hatao fôtony mare loatra raha ataonolo, kanefa Jehovah mbala mahery lavitry tozay irô olo aby io. Baka iô ndray sarotro mare fitsapan̈a araiky, izio mbala ho hisy farany fo.”

17. Nan̈ino han̈ampy atsika andinin-teny nin’ny taon̈o 2024? (Zahava sary amy fon̈on’ny gazety ty.)

¹⁷ Tsy diso atsika izikoa mavozo. Fa karaha Davida, atsika tsy tôkony han̈eky ho resin’ny tahotro. Andinin-teny nin’ny taon̈o 2024 io vavakan’i Davida tamy Jehovah. Ho izy: “Zaho koa fa mavozo, aminao an̈ambilako fatokisan̈anaka.” (Sal. 56:3) Karaha ty nivolan̈in’ny manam-pahaizan̈a araiky momba Baiboly, mikasiky andininy io: “Davida tsy nieritreritry be momba raha mampavozo izy na prôblemonany aby io, fa izy nilampy tamin’ny Araiky mahavita man̈avotro izy.” Diniha andinin-teny nin’ny taon̈o io, amy fanjava ho avy aby io, intsaka eky lera anao fa miatriky raha mampavozo. Mangalà fotoan̈a mandiniky raha efa nataon’i Jehovah taloha tan̈y, iziôty, ndreky amin’ny hoavy. Anao koa man̈ano zen̈y, anao hivolan̈a karaha nataon’i Davida ty: “Amy Zan̈ahary han̈ambilako fatokisan̈anaka, ke zaho tsy mavozo.”​—Sal. 56:4.