1-2. a) Ino ma raha niain̈andrô ta Jodia tan̈y, tamy Paoly nanoratra taratasy nalefa tamindrô Hebreo aby io? b) Ino ivolan̈ana fa navy tamy fotoan̈any tsarabe taratasy io?

 IZIKOA fa naty Jesosy, irô Kristianin̈y nipetraka ta Jerosalema ndreky ta Jodia niatriky fotoan̈a sarotro. Tsy elan’ny niforon̈an’ny fiangonan̈a kristianin̈y, ninjehin̈y mare irô Kristianin̈y aby io. (Asa. 8:1) Kadiriny rôpolo taon̈o tafaran’izin̈y, mpan̈ara-dia Jesosy niatriky problemo ara-bola, fôtony nisy mosary tamy tany io. (Asa. 11:27-30) Fa kadiriny tamy taon̈o 61 ndraiky, nilamin̈y tsarabe fiain̈anandrô Kristianin̈y aby io, mandra-pavian’ny fotoan̈a nan̈injehan̈a irô io. Tamy fotoan̈a zen̈y, irô nahazo taratasy baka tamin’ny apostoly Paoly. Ke taratasy io ten̈a navy tamy fotoan̈any tsarabe.

² Navy tamy fotoan̈any tsarabe taratasy handeha tamindrô Kristianin̈y aby io, fôtony efa tsy hilamin̈y eky fiain̈anandrô. Ke Paoly nan̈amia torohevitry han̈ampy irô Kristianin̈y aby io hahavita hiaritry fo, amy fahorian̈a handalo amindrô tsy ho ela io. Efa narikitry baka fandravan̈ana Jerosalema, efa nambaran’i Jesosy in̈y. (Lioka 21:20) Na i Paoly na irô Kristianin̈y ta Jodia, samy tsy nahay ombian̈a marin̈y ho avy fandravan̈ana io. Fa ndray zen̈y, irô Kristianin̈y aby io nanan̈a fotoan̈a tsarabe nioman̈ana, baka irô hanan̈a toetry ilain̈a, karaha ataon’ny finoan̈a ndreky fiaretan̈a.​—Heb. 10:25; 12:1, 2.

3. Nan̈ino ma tôkony hahalian̈a Kristianin̈y amy ziôty bokin’ny Hebreo io?

³ Atsika iziô efa hiatriky fahorian̈a be mandilatran’ny natrefindrô Kristianin̈y Hebreo aby in̈y. (Mat. 24:21; Apok. 16:14, 16) Ke atsika handiniky sasany amindrô torohevitry namezan’i Jehovah irô Kristianin̈y tamy zen̈y, ke mbala ilaintsika koa amin’ny andra iziôty.

 “MIFEN̈A HANDROSO MALAKY BAKA HO MATOTRO”

4. Ino aby raha sarotro tôjy irô Kristianin̈y Jiosy aby io? (Zahava koa sary.)

⁴ Irô Jiosy nanjary Kristianin̈y aby io tsy maintsy nan̈ano fan̈ovoan̈a maventy tamy fiain̈anandrô. Fa raha zen̈y tsy nora. Nisy fotoan̈a baka irô Jiosy aby io vahoaka natokan̈a nin’ny Zan̈ahary. Aviô, ta Jerosalema tao nisy mpanjaka nisoloten̈a Jehovah. Tao koa nisy tempoly, foiben’ny fivavahan̈a marin̈y tamy zen̈y. Jiosy aby io efa zatra nan̈araka Lalàn̈an’i Mosesy nazavaindrô mpitariky fivavahan̈andrô, karaha ataon’ny lalàn̈a momba hanin̈y, famosiran̈a, aviô fifandraisan̈a tamin’olo tsy Jiosy. Fa Jesosy koa fa naty, Jehovah tsy nan̈eky sôron̈o nataondrô Jiosy io eky. Ten̈a tsy nora tamindrô Jiosy aby io raha zen̈y, fôtony irô efa zatra nan̈araka Lalàn̈a. (Heb. 10:1, 4, 10) Nata Kristianin̈y matotro karaha ataon’ny apostoly Petera nahita fa ten̈a tsy nora nan̈araka sasany tamindrô fan̈ovoan̈a aby io. (Asa. 10:9-14; Gal. 2:11-14) Ninjehindrô Jiosy mpitariky fivavahan̈a aby io irô Kristianin̈y aby io, baka amy finoan̈a vaovao narehandrô io.

5. Nila nitandrin̈y tamin’ino irô Kristianin̈y aby io?

⁵ Nisy karazany aroe irô mpanohitry irô Kristianin̈y ta Jodia tan̈y. Voanalohany, irô mpitariky fivavahan̈a Jiosy nitondra irô Kristianin̈y aby io karaha olo mpivadi-pinoan̈a. Nisy olo sasany niaboko Kristianin̈y koa nivolan̈a fa mbala ilain̈a fo man̈araka Lalàn̈an’i Mosesy. Mety baka amy favozoan̈a fan̈injehan̈a nahavy irô nan̈ano zen̈y. (Gal. 6:12) Ke ino raha nan̈ampy irô Kristianin̈y aby io tsy hivadiky tamy Jehovah?

6. Nandrisiky irô mpiara-manompo taminany han̈ino ma Paoly? (Hebreo 5:14–6:1)

⁶ Tamy taratasinany handeha tamin’ny Hebreo aby io, Paoly nandrisiky irô handalin̈y tsarabe Volan̈an’ny Zan̈ahary. (Vakia Hebreo 5:14–6:1.) Izy nangala volan̈a baka tamy Soratra Hebreo han̈azavan̈a tamindrô fa fomba nanompoandrô Kristianin̈y aby io Jehovah ten̈a tsara tozay fomba nanompoandrô  Jiosy aby io izy. a Paoly nandrisiky irô Kristianin̈y aby io hahay ndreky hahatakatra fahamarin̈ana baka amy Soratra Masin̈y, fôtony raha zen̈y han̈ampy irô hahay han̈avaka fampianaran̈a diso ndreky tsy han̈araka zen̈y.

7. Ino raha sarotro tôjy atsika amin’ny andra iziôty?

⁷ Karaha raha niain̈andrô Kristianin̈y Hebreo aby io koa raha iain̈antsika amin’ny andra iziôty. Maro olo man̈aparitaka fan̈azavan̈a ndreky hevitry tsy marin̈y, tsy mifan̈araka amy raha volan̈in’i Jehovah fa marin̈y ndreky mety. Irô mpanohitry aby io matetiky manohitry raha inoantsika baka amy Baiboly ao momba fitondran-ten̈a. Ke irô mivolan̈a fa atsika olo tsy mety ifan̈arahan̈a, aviô ratsy fan̈ahy. Aviô mahaimifanohitry amy fomba fisain̈an’i Jehovah fo fomba fisain̈an’olo amy donia ty. (Ohab. 17:15) Ke ten̈a raha maventy hahaizantsika fomba fisain̈ana diso ndreky tsy han̈araka zen̈y. Tsisy mpanohitry tôkony hambelantsika tsy hampisy korazy atsika ndreky hampavôly atsika hanompo Jehovah.​—Heb. 13:9.

8. Ino han̈ampy atsika hahaiho matotro ara-pan̈ahy fo?

⁸ Atsika mila mangala onon̈o tsarabe torohevitry namezan’i Paoly irô Kristianin̈y Hebreo aby in̈y, ke hifen̈y ho matotro ara-pan̈ahy. Dikan’izen̈y, atsika mila mazoto mianatra Baiboly, baka atsika hahay tsarabe Jehovah ndreky fomba fihevitrinany. Mbala mila man̈ano zen̈y fo atsika, nata efa vita batisa. Na firy taon̈o na firy taon̈o atsika nahita fahamarin̈ana, atsika mila mamaky ndreky mianatra Volan̈an’ny Zan̈ahary tsy tapaka fo. (Sal. 1:2) Fahazarantsika mianatra Baiboly io han̈ampy atsika ho fatatra finoan̈a. Izio toetry nampirisihin’ny apostoly Paoly hanan̈andrô Kristianin̈y Hebreo aby io.​—Heb. 11:1, 6.

“MANÀN̈A FINOAN̈A BAKA HO AVOTRO”

9. Nan̈ino ma irô Kristianin̈y Hebreo aby io ten̈a nila fatatra finoan̈a?

⁹ Irô Kristianin̈y Hebreo aby io nila nanan̈a finoan̈a matanjaka baka ho tafitsaka velon̈o tamy fahorian̈a ho avy tsy ho ela ta Jodia. (Heb. 10:37-39) Jesosy baka efa nampitandrin̈y irô Kristianin̈y ta Jodia fa Jerosalema koa fa hitandrô kodidin̈in’ny maramila, irô tôkony hilefa amy bongo an̈y. Torohevitry io nilain’ny Kristianin̈y jiaby, na irô nipetraka ta Jerosalema, na irô nipetraka ta Jodia. (Lioka 21:20-24) Matetiky baka izikoa fa misy raha karaha zen̈y mandalo, olo tsy milefa an̈atiala fa amy tanàna misy riba be miaro in̈y, karaha ataon’ny tanànan’i Jerosalema. Fa filifasan̈a amy bongo zen̈y karaha tsy hahavita hiaro irô. Ke ten̈a nila fatatra finoan̈a irô vo nahavita nan̈ano zen̈y.

10. Nahavita ino ma irô Kristianin̈y aby io nohon’irô fatatra finoan̈a? (Hebreo 13:17)

¹⁰ Irô Kristianin̈y Hebreo aby io koa nila natoky olo nampiasain’i Jesosy hitariky fiangonan̈a. Irô io nan̈amia toromariky voafaritry tsara fiangonan̈a, ombian̈a ndreky karakôry hilifasandrô. (Vakia Hebreo 13:17.) Volan̈a griky ‘mila man̈araka volan̈a’ nampiasain̈a amin’ny Hebreo 13:17 io, ivolan̈ana olo vôn̈ono han̈araka volan̈a, tsy nohon’ny adidy fo fa nohon’ny fatokisan̈a irô mpitariky aby io koa. Ke ten̈a nilaindrô Kristianin̈y Hebreo aby io natoky tsarabe irô mpitariky aby io talohan’ny fahorian̈a io ho avy. Izikoa irô efa zatra nan̈araka volan̈andrô anti-pan̈ahy aby io tamy fotoan̈a mbala milamindamin̈y in̈y, tsy ho sarotro amindrô koa han̈ano zen̈y izikoa fa avy fotoan̈a sarotro.

11. Nan̈ino ma Kristianin̈y amin’ny andra iziôty ten̈a mila fatatra finoan̈a?

 ¹¹ Amin’ny andra iziôty koa, atsika mila manan̈a finoan̈a karaha nindrô Kristianin̈y Hebreo aby in̈y. Ankamarozan’olo baka tsy mino fa ho hisy faran’ny donia ty. Nata irô aby mankadala atsika mino zen̈y ke. (2 Pet. 3:3, 4) Aviô ndray Baiboly efa man̈ambara raha maro momba fahorian̈a be io, mbala maro raha tsy haintsika momba izio. Atsika mila matoky mare fa ho avy amy fotoan̈any tsarabe faran’ny donia ty, aviô Jehovah hikarakara atsika fo amy fotoan̈a zen̈y.​—Hab. 2:3.

12. Ino han̈ampy atsika ho tafitsaka velon̈o amy fahorian̈a be?

¹² Atsika koa mila mankafatatra finoan̈antsika, ke hatoky irô mitariky amy fandaminan̈an’i Jehovah, tsy azôvy zen̈y fa “mpanompo atokisan̈a ndreky mahadiniky raha.” (Mat. 24:45) Izikoa fa manomboko fahorian̈a be, atsika mety hahazo toromariky voafaritry tsara, baka atsika ho tafitsaka velon̈o karaha irô Kristianin̈y Hebreo aby in̈y, tamy fotoan̈an’ny Romanin̈y nikodidin̈y Jerosalema in̈y. Iziôty fotoan̈a tôkony hatokisantsika irô toromariky azontsika baka amindrô mitariky amy fandaminan̈an’i Jehovah. Izikoa atsika tsy matoky ndreky tsy man̈araka toromariky azontsika amindrô io iziôty, ho sarotro amintsika han̈araka volan̈andrô ndreky toromariky hamezandrô, lera efa an̈atin’ny fahorian̈a be an̈y.

13. Nan̈ino ma tamy fotoan̈any tsarabe torohevitry voakoran̈a amin’ny Hebreo 13:5?

¹³ Tamy fotoan̈an’irô Kristianin̈y aby io niambin̈y beko hilifasan̈a, irô nila nifen̈y mare koa nan̈atsotra fiain̈anandrô fa tsy ho “tia vola.” (Vakia Hebreo 13:5.) Sasany tamindrô aby, niain̈y tamy fotoan̈a nisian’ny mosary, aviô nasikiny. (Heb. 10:32-34) Fa ndray zen̈y, irô mbala nifen̈y fo niaritry, ke nahafoe ten̈a tamy fitorian̈a vaovao tsara. Fa sasany ndraiky nanjary setry nitady vola, fôtony irô nieritreritry fa fanan̈ana io hahavita hiaro irô. Ny marin̈y aminany, vola io tsy nahavita niaro irô foeky, izikoa fa niravan̈iny Jerosalema. (Jak. 5:3) Lôso sarotro tamin’olo aby tia vola io nilefa ndreky niala tran̈ondrô, aviô fanan̈anandrô.

14. Ino vokatran’ny fanan̈ana finoan̈a matanjaka io amy fanapahan-kevitrintsika momba vola ndreky fanan̈ana?

¹⁴ Izikoa atsika matoky fa tsy ho ela Jehovah handravan̈a donia ratsy ty, atsika tsy hieritreritry fa vola ndreky fanan̈ana ny raha ten̈a maventy amy fiain̈ana. Amy fahorian̈a be io baka, tsy ho hisy dikany foeky vola io. Baiboly mivolan̈a fa “ndray volafotsy ndray volamena samy tsy hahavita han̈avotro irô, amin’ny andra mampameloko Jehovah io.” (Ezek. 7:19) Ke atsika tsy tôkony ho tapa-kevitry hitady volabe eky fa tôkony ho tapa-kevitry han̈atsotra fiain̈ana, sady hahay handanjalanja fo izikoa fa man̈ano zen̈y. Efa tsy fahendrena eky iziôty mandanindany vola ndreky miditry trosa tsy amin’ny antony, baka hazahoan̈a fanan̈ana. Mila mitandrin̈y koa atsika baka tsy ho fitiavan̈a fanan̈ana ho ny raha ten̈a maventy amintsika. (Mat. 6:19, 24) Arakaraka han̈aton̈an’ny faran’ny donia ty, atsika mila mifidy hatoky Jehovah sa hatoky fanan̈ana.

“MILA MIARITRY ANARÔ”

15. Nan̈ino ma irô Kristianin̈y Hebreo aby io ten̈a nila niaritry?

¹⁵ Nila niaritry mare irô Kristianin̈y ta Jodia tao tamy fanompoandrô Jehovah, fôtony hahaiho sarotro fo fiain̈anandrô tsy ho ela. (Heb. 10:36) Fa kanefa, izikoa fa ten̈a navy raha io, nisy sasany tamindrô Kristianin̈y aby io nilamindamin̈y fo, fa sasany ndraiky ten̈a ninjehin̈y mare. Paoly nivolan̈a fa irô  nila nioman̈a fo amy fan̈injehan̈a, aviô nila vôn̈ono fo tsy hivadiky, na firak’amy fahafatesan̈a, karaha nataon’i Jesosy. (Heb. 12:4) Naro Jiosy neloko mare sady namopoko irô, fôtony irô nanjary Kristianin̈y. Taon̈o vitsivitsy talohan’io koa, nisy vahoaka nanafiky Paoly, tamin’izy nitory ta Jerosalema. Nisy Jiosy mandilatran’ny 40 lahy ‘nifanta fa tsy higiaka ndreky tsy hihina izikoa tsy matindrô Paoly.’ (Asa. 22:22; 23:12-14) Fa nata irô tsy tian̈a ndreky ninjehin̈y, irô Kristianin̈y aby io mbala nila nivory fo ndreky nitory vaovao tsara, aviô nifen̈y fo hanan̈a finoan̈a matanjaka.

16. Nan̈ino ma taratasy nalefan’i Paoly tamin’ny Hebreo aby io han̈ampy atsika hizaha lafy tsaran’ny fan̈injehan̈a? (Hebreo 12:7)

¹⁶ Ino raha nan̈ampy irô Kristianin̈y aby io nahavita niaritry fanoheran̈a io? Paoly tihan̈ampy irô hahita hatsaran̈a ho azondrô baka amy fiaretan̈a fitsapan̈a. Nazavainy fa mety hambelan’ny Zan̈ahary fo Kristianin̈y araiky hiatriky raha mitsapa finoan̈anany, baka hampiofan̈ana izy. (Vakia Hebreo 12:7.) Ke fampiofan̈ana io amy zay hahavy izy hanan̈a toetry tsara ndreky hamparavoravo Jehovah fo. Ke irô Kristianin̈y Hebreo aby io koa fa mifantoko amy vokatra tsaran’ny fitsapan̈a, lôso moramora amindrô miaritry.​—Heb. 12:11.

17. Ino raha hain’i Paoly momba fiaretan̈a fan̈injehan̈a?

¹⁷ Paoly nandrisiky irô hisy korazy fo fa tsy ho rivan̈a izikoa fa miatriky fan̈injehan̈a. Izy baka ten̈a tsara toeran̈a nanoratra tamindrô momba raha zen̈y. Talohan’izy lôso Kristianin̈y, izy mpan̈enjiky irô Kristianin̈y aby io ndreky nampijaly mare irô. Paoly koa nahay tsarabe karakôry miaritry fan̈injehan̈a zen̈y. Efa naro fan̈injehan̈a tôjy izy, izy koa fa lôso Kristianin̈y. (2 Kor. 11:23-25) Ke hain’i Paoly tsarabe ino raha ten̈a ilain̈a, baka hahavitan̈a miaritry. Ke nampatsiarôvin’i Paoly irô Kristianin̈y aby io fa izikoa irô fa miaritry raha  sarotro, irô tsy mila mitôron̈o angôvondrô tômpiny fa mila milampy amy Jehovah. Ke zen̈y nahavy Paoly nisy korazy nivolan̈a: “Jehovah mpan̈ampy zaho, ke tsy havozo foeky zaho.”​—Heb. 13:6.

18. Nan̈ino fahaizan̈a raha mbala ho avy han̈ampy atsika hahavita hiaritry fan̈injehan̈a?

¹⁸ Amy ziôty, sasany amindrô rahalahintsika aby io miaritry fan̈injehan̈a mare. Ke atsika afaka man̈ampy irô, karaha ataony mivavaka nindrô, aviô man̈amia raha ilaindrô. (Heb. 10:33) Kanefa Baiboly mivolan̈a mazava fa “hampijalin̈y koa lan̈iany olo man̈iry hahafoe ten̈a amy Zan̈ahary ndreky hihavan̈a amy Kristy Jesosy.” (2 Tim. 3:12) Zen̈y antony mahavy atsika jiaby, mila mioman̈a fo hiatriky fotoan̈a sarotro mbala ho avy. Amy ziôty atsika mila matoky Jehovah tsarabe ndreky tsy hisalasala fa izy han̈ampy atsika fo, baka atsika hahavita hiatriky raha sarotro mety ho tôjy atsika. Amy fotoan̈a mety, izy hitondra hatsaran̈a amin’olo jiaby tsy mivadiky aminany.​—2 Tes. 1:7, 8.

19. Ino raha tôkony hataontsika hiomanan̈a amy fahorian̈a be? (Zahava koa sary.)

¹⁹ Tsy isalasalan̈a fa taratasin’i Paoly handeha tamindrô Hebreo aby io ten̈a nan̈ampy irô Kristianin̈y tamy taonjato voanalohany aby io hioman̈a tamy fahorian̈a hatrefindrô. Paoly nandrisiky irô rahalahiny aby io handalin̈y tsarabe ndreky hahay tsarabe Soratra Masin̈y. Fan̈anaovan̈a zen̈y nan̈ampy irô han̈avaka ndreky tsy han̈eky fampianaran̈a mety hampihen̈y finoan̈andrô. Izy koa nandrisiky irô tsy hijijy tamban̈a han̈araka toromarikin’i Jesosy ndreky nindrô mitariky amy fiangonan̈a. Izy koa nan̈ampy irô Kristianin̈y aby io hiaritry, ke hizaha lafy tsaran-draha fo momba raha sarotro. Nampiany koa irô Kristianin̈y aby io baka hahavita hiaritry fo, ke hihevitry fitsapan̈a aby io an̈isan’ny fomba araiky ampiofan̈an’ny Babandrô ten̈a tia irô io. Irarian̈a koa atsika han̈araka torohevitry baka amy Soratra Masin̈y io, amy zen̈y atsika hahavita hiaritry fo ke tsy hivadiky foeky firak’amy farany.​—Heb. 3:14.