1-2. Nan̈ino atsika mety hieritreritry fa Jehovah tsy mamaly vavaka ataontsika?

 “MIRAVORAVOA amy Jehovah, fa amiany anao edy raha iriny fonao.” (Sal. 37:4) Tsara mare fampan̈antinan̈a zen̈y! Kanefa atsika ma tôkony han̈anten̈a fa amezany Jehovah atsika iô ny iô zay raha angatahintsika? Nan̈ino ma atsika man̈ontany zen̈y? Iritrireta baka ohatra aby ty. Misy ranabavy araiky selibatera mivavaka baka ho voakaiky amy Sekolin’ny Pitory Ilay Fanjakana. Kanefa koa fa nandeha taon̈o, izy tsy nety voakaiky. Misy rahalahy tanora koa mivavaka baka ho janga aminy aretin̈y fatatra mahazo izy, amy zen̈y izy ho afaka han̈ampy fiangonan̈a tsarabe. Kanefa fahasalaman̈anany tsy mety nahainihatsara. Misy raimandreny ndraiky mivavaka baka zanakandro tsy hiala amy fahamarin̈ana. Fa ny raha nisy ndraiky, zanakandro niala Jehovah.

² Mety efa nisy raha koa nangatahinao tamy Jehovah kanefa tsy nety nivaly. Ke anao mety hieritreritry tsao mba vavakanolo sasany fo valiany Jehovah fa tsy ninao. Na koa anao mety hivolan̈a fa misy raha tsy mety donko nataonao. Karaha zen̈y iziô raha tsapany ranabavy araiky kahian̈a Janice. b Izy ndreky vadiny namango nivavaka baka ho voakaiky hanompo amy Betela. Ho izy: “Zaho natoky fa tsy ela zahay efa ho voakaiky amy Betela.” Kanefa nandeha fanjava nandeha taon̈o, iro mbala tsy nety navoakaiky. Volan̈iny Janice: “Zaho nalemy troko mare. Zaho nieritreritry tsao nisy raha nampalahelo Jehovah nataoko. Karaha efa nataoko voafaritry tsarabe raha nangatahiko tamy vavaka, fa nan̈ino ndraiky izio tsy nety nivaliany?”

3. Ino raha hidinihintsika ato?

 ³ Ndraikindraiky atsika mety loso diniky asa mba ren̈iny Jehovah edy vavakantsika? Ndray iro lelahy tsy nivadiky taloha tan̈y koa mba tafan̈ontany karaha zen̈y. (Joba 30:20; Sal. 22:2; Hab. 1:2) Ino raha han̈ampy anao hatoky fa Jehovah ten̈a hamaly vavakanao? (Sal. 65:2) Baka hamalian̈a fan̈ontanian̈a zen̈y, atsika mila mamaly iro ty antsendriky: 1) Ino raha antinaintsika fa hataony Jehovah? 2) Ino raha tiany Jehovah hataontsika? 3) Nan̈ino mety ilaintsika man̈ova raha sasany angatahintsika?

4. Eraka Jeremia 29:12, ino raha ampan̈antinainy Jehovah fa hataony?

⁴ Jehovah mampan̈anten̈a hitandren̈y vavakantsika. (Vakia Jeremia 29:12.) Atsika tiany Zan̈aharintsika fotony atsika tsy mivadiky aminany. Ke izy tsy maintsy hitandren̈y vavakantsika. (Sal. 10:17; 37:28) Fa zen̈y tsy midika fa tsy maintsy hamezany atsika aby zay raha angatahintsika. Mety amy donia vaovao vo ho azontsika sasany amy raha angatahintsika. Ke atsika tsy maintsy miambin̈y parapavianizen̈y.

5. Ino raha dinihiny Jehovah izikoa izy fa mitandren̈y vavakantsika? Hazavà.

⁵ Jehovah mieritreritry fikasan̈anany lera mitandren̈y vavakantsika. (Isaia 55:8, 9) An̈isany fikasan̈anany iziô, tany ty tiany ho feno olo ravoravo man̈araka volan̈anany sady man̈eky fitondrasan̈anany. Fa Satana ndraiky mivolan̈a fa ho sambatra mare olombelon̈o izikoa iro samby iro fo mifampitondra. (Gen. 3:1-5) Baka han̈aboahan̈a fa vandy raha nivolan̈iny Devoly io, nambelany Jehovah olombelon̈o hifampitondra. Ke baka amy fitondrasan̈anolombelon̈o fo mahavy ankamarozany problemo mahazo atsika amy zioty. (Mpito. 8:9) Haintsika fa mbala tsendriky amy zioty Jehovah han̈adoso problemo aby io. Sady izikoa iro io nadosony, mety hisy olo hieritreritry fa mahomby fo fitondrasan̈anolombelon̈o fotony efa mavoavaha problemo.

6. Nan̈ino atsika mila matoky fa ampitiavan̈a ndreky amy rariny fo zay raha ataony Jehovah?

⁶ Na vavaka mitovy mety ho samy hafa fomba hamaliany Jehovah izy. Ohatra, Panjaka Hezekia koa fa narary mare, izy niangavy Jehovah hampajanga izy. Ke izy nataony Jehovah janga. (2 Mpanj. 20:1-6) Kanefa, apostoly Paoly koa fa niangavy Jehovah han̈adoso ‘fatsiky aminy nofotronany’, izio mety aretin̈y, tsy nadosony Jehovah raha zen̈y. (2 Kor. 12:7-9) Diniha koa baka raha nandalo taminy apostoly Jakoba ndreky Petera. Iro roe samby tiany Panjaka Heroda hivonen̈a. Olo tamy fiangonan̈a nivavaka baka Petera ho avotro. Mety karaha zen̈y koa nataondro tamy Jakoba. Kanefa Jakoba naty fo, fa Petera ndraiky navotany anjely. (Asa. 12:1-11) Anao mety hieritreritry: ‘Nan̈ino ma Jehovah nan̈avotro Petera fo fa tsy nan̈avotro Jakoba koa?’ Baiboly tsy mivolan̈a ino antony. c Fa ny raha haintsika fo, tsy mety Jehovah “han̈ano raha tsy rariny.” (Deot. 32:4) Haintsika koa fa samy tiany Jehovah aby na Jakoba na Petera. (Apok. 21:14) Ndraikindraiky koa mety tsy arakaraka raha antinaintsika foeky fomba hamaliany Jehovah vavakantsika. Fa atsika matoky fa Jehovah tsy maintsy man̈ano raha ampitiavan̈a ndreky amy rariny. Ke atsika tsy min̈on̈on̈o foeky na karakory na karakory fomba hamaliany vavakantsika.​—Joba 33:13.

7. Ino raha mila ifen̈antsika tandreman̈a, avio nan̈ino?

⁷ Atsika tsy tôkony hampiran̈a raha iain̈antsika amy ninolo. Atsika, ohatra, mety mangataka Jehovah han̈ampy atsika amy raha araiky, fa izio fo tsy nivaliany. Fa tafara tatỳ,  ren̈intsika fa nisy olo nangataka raha mitovy amy raha nangatahintsika in̈y, fa ninazy ndraiky karaha nivaliany Jehovah. Karaha zen̈y iziô raha tojy ranabavy araiky kahian̈a Anna. Voany kansera vadiny, Matthew an̈arany, ke Anna nivavaka baka izy ho janga. Tamy zen̈y koa nisy ranabavy aroe efa matoe voany kansera. Anna nivavaka mare niny Matthew ndreky nindro ranabavy aroe io. Fa ny raha nisy fo, iro ranabavy aroe io janga fa Matthew ndraiky naty. Tamy voanalohany, Anna nieritreritry fa mety Jehovah nan̈ampy iro ranabavy aroe io matoa iro janga. Fa izikoa zen̈y edy, nan̈ino fo vadiny tsy nataony Jehovah janga koa? Marin̈y ndraiky fa tsy ten̈a haintsika ino nahavy ranabavy aroe io janga. Fa ny raha haintsika fo, Jehovah mbala han̈afoan̈a raha jiaby mampijaly atsika, avio izy man̈iry mare hamelon̈o ndraiky kamaradinany efa naty.​—Joba 14:15.

8. a) Eraka Isaia 43:2, akory an̈ampiany Jehovah atsika? b) Nan̈ino vavaka man̈ampy atsika hiatriky raha sarotro? (Zahava video Vavaka Nan̈ampy Zaho Mare.)

⁸ Jehovah tsy maintsy han̈ampy atsika. Jehovah Babantsika io be fitiavan̈a, ke tsy tiany mahita atsika mijaly. (Isaia 63:9) Fa ndray zen̈y, tsy zay problemo mahazo atsika sakanany aby. Problemo aby io karaha ten̈arano ndreky motro. (Vakia Isaia 43:2.) Fa Jehovah mampan̈anten̈a ‘han̈ampy atsika hitsaka’ iro io. Ndray ino ndray ino problemo mahazo atsika, izy tsy maintsy han̈ampy atsika baka atsika hahavita hanompo izy. Jehovah koa von̈ono han̈amia fan̈ahy masin̈inany han̈ampian̈a atsika hiaritry. (Lioka 11:13; Fil. 4:13) Dikanizen̈y atsika afaka matoky fa Jehovah tsy maintsy han̈amia raha ilaintsika baka ho vitantsika hiaritry ndreky tsy hivadiky aminany. d

9. Eraka Jakoba 1:6, 7, nan̈ino atsika mila matoky fa Jehovah han̈ampy atsika?

⁹ Atsika tiany Jehovah hatoky izy. (Heb. 11:6) Ndraikindraiky atsika mieritreritry fa karaha tsy ho vitantsika foeky hiatriky problemontsika. Atsika koa mety hisalasala asa raha mba han̈ampy atsika edy Jehovah. Fa Baiboly man̈amia toky atsika fa angovony Zan̈ahary mahavita man̈ampy atsika ‘han̈aniky lakoro vato fatatra.’ (Sal. 18:29) Ke izikoa atsika fa mivavaka, atsika tsy tôkony hisalasala, fa tôkony hatoky ndreky hino tanteraka fa Jehovah hamaly vavakantsika.​—Vakia Jakoba 1:6, 7.

10. Akory, ohatra, an̈aboahantsika fa atsika man̈ano raha mifan̈araka amy vavakantsika?

¹⁰ Tiany Jehovah atsika han̈ano raha mifan̈araka amy vavakantsika. Ohatra iziô, misy rahalahy araiky mangataka amy Jehovah hahazo andra tsy hiasan̈a baka han̈aton̈ana fivoriambeny vondroparitry. Akory mety hamaliany Jehovah vavakanany? Mety ampiany, ohatra, rahalahy io baka hasaky hikoran̈a zen̈y amy sefonany. Fa ndray zen̈y, rahalahy io tsy maintsy man̈ano raha mifan̈araka amy vavakanany ke mandeha man̈aton̈o sefonany an̈y. Mety tsy indraiky tsy indroe izy mila man̈ano zen̈y. Mety azony atao koa mifan̈araka amy piaramiasa aminany tsao fo iro afaka mifanakalo andra. Avio izikoa ilain̈y, mety azony atao mivolan̈a amy sefonany fa tapahan̈a amy karamanany andra tsy hiasany io.

11. Nan̈ino atsika mila tsy voly mivavaka momba raha tadiavintsika?

¹¹ Tiany Jehovah atsika tsy voly hivavaka momba raha tadiavintsika. (1 Tes. 5:17) Jesosy nivolan̈a fa mety tsy hivaly iô ny iô raha sasany angatahintsika. (Lioka 11:9) Ke aza kivy! Mivavaha mare ndreky matetitetiky. (Lioka 18:1-7) Izikoa atsika tsy voly mivavaka amy Jehovah  momba raha tadiavintsika io, aboakantsika aminany fa ten̈a misy kontiny amintsika izio. Aboakantsika amy zen̈y koa fa atsika matoky fa izy mahavita man̈ampy atsika.

12. a) Ino, ohatra, fan̈ontanian̈a tôkony hiritriretintsika momba vavakantsika, avio nan̈ino? b) Akory azahoantsika antoko fa man̈aja Jehovah vavakantsika? (Zahava efajoro “ Man̈aja Jehovah ma Raha Angatahiko?”)

¹² Izikoa tsy mety azontsika raha angatahintsika amy vavaka, misy fan̈ontanian̈a telo mila dinihintsika. Voanalohany, ‘ten̈a mety edy ma raha angatahiko ty?’ Matetiky atsika mihevitry fa atsika mahay raha ten̈a mahatsara atsika. Kanefa mety tsy ten̈a mahatsara atsika aby raha angatahintsika io. Ohatra, atsika mety efa nieritreritry fomba araiky hamahan̈a problemo araiky ke atsika mivavaka momba raha zen̈y. Kanefa mety hisy fomba hafa tsaratsarany lay hitantsika io. Misy raha sasany angatahintsika koa mety tsy hifan̈araka amy sitrapony Jehovah. (1 Jaona 5:14) Diniha baka, ohatra, vavaka nataony raimandreny nikoran̈intsika taloha in̈y. Iro nangataka tamy Jehovah baka izy han̈ampy zanakandro tsy hiala amy fahamarin̈ana. Karaha tsisy maharatsy fangatahan̈andro zen̈y. Kanefa Jehovah tsy miforse olo hanompo izy. Tiany izikoa atsika jiaby, an̈isanizen̈y zanakantsika, hifidy hanompo izy. (Deot. 10:12, 13; 30:19, 20) Ke ino raha afaka angatahiny raimandreny io amy vavaka? Iro afaka mangataka amy Jehovah baka izy han̈ampy iro hanohin̈y fony zanakandro, amy zen̈y tsaiky io ho tia Jehovah ndreky hanjary kamaradinany.​—Ohab. 22:6; Efes. 6:4.

13. Eraka Hebreo 4:16, ombian̈a ma Jehovah han̈ampy atsika? Hazavà.

¹³ Fan̈ontanian̈a faharoe: ‘Iziô ma fotoan̈a mety amy Jehovah hamalian̈a vavaka nataoko io?’ Mety efa tiantsika hahazo valimbavaka iô  ny iô. Fa Jehovah ndraiky mahay fotoan̈a ten̈a tsara an̈ampian̈a atsika. (Vakia Hebreo 4:16.) Izikoa vavakantsika tsy direkty mivaly, atsika mety hieritreritry fa tsy nikeny Jehovah raha nangatahintsika io. Kanefa mety tsy ‘ehe’ valiny baka amy Jehovah fa ‘mbala tsendriky.’ Ohatra, diniha baka vavaka nataony rahalahy tanora nangataka mba ho janga in̈y. Izikoa Jehovah nan̈ano fahagagan̈a nampajanga izy, Satana mety nivolan̈a fa baka amy zen̈y fo mahavy rahalahy io mbala manohy manompo Jehovah. (Joba 1:9-11; 2:4) Sosoko zen̈y, efa nisy fotoan̈a nitondroeny Jehovah handeha han̈adosoan̈a aretin̈y jiaby. (Isaia 33:24; Apok. 21:3, 4) Mandrapaviany zen̈y, atsika tsy afaka man̈anten̈a Jehovah han̈ano fahagagan̈a hampajanga atsika. Ke ino raha mety angatahiny rahalahy in̈y? Izy afaka mangataka Jehovah han̈amia angovo izy ndreky han̈ampy izy hilamintsain̈y, amy zen̈y izy hahavita hiaritry aretin̈inany io ndreky tsy hivadiky amy Zan̈ahary.​—Sal. 29:11.

14. Ino raha ianaranao baka amy Janice?

¹⁴ Azonao onon̈o Janice, araiky nivavaka baka ho voakaiky hanompo amy Betela in̈y? Efa afaka dimy taon̈o tafara tatỳ vo hainy karakory fomba namaliany Jehovah vavakanany. Ho izy: “Tan̈atiny fotoan̈a jiaby zen̈y Jehovah nampianatra zaho raha maro ndreky nan̈ampy zaho hahaiho tsara toetry fo. Zaho nila nampitombo fatokisako izy. Mbala nila nankatsaraiko koa fomba fan̈anaovako fianaran̈a manokan̈a. Zaho koa nila nianatra nahatsapa fa afaka ho ravoravo fo zaho na aia na aia tany hanompoako Jehovah.” Tafara tatỳ, Janice ndreky vadiny voakaiky han̈ano asany faritry. Janice koa fa nimpody nandiniky raha niain̈any io, ho izy: “Tsy araka raha nantinaiko foeky fomba namaliany Jehovah vavaka nataoko. Nila fotoan̈a zaho vo nahita fa ten̈a tsara fomba namaliany izio, ary ten̈a man̈ano mersy  izy zaho fotony izy ten̈a tia zaho ndreky tsara fan̈ahy taminaka.”

15. Nan̈ino ndraikindraiky tsara izikoa tsy ataontsika voafaritry loatra vavakantsika? (Zahava koa sary.)

¹⁵ Fan̈ontanian̈a fahatelo: ‘Tsao misy raha hafa tôkony hangatahiko amy vavaka?’ Marin̈y ndraiky fa tsara man̈ano vavaka voafaritry tsarabe. Kanefa, atsika mety hahita sitrapony Jehovah momba atsika, izikoa somary tsy ataontsika voafaritry loatra raha angatahintsika. Aleva onon̈o, ohatra, ranabavy selibatera nivavaka mba ho voakaiky han̈ano Sekolin’ny Mpitory Ilay Fanjakana in̈y. Izy tihan̈ano sekoly io baka ho afaka han̈ampy amy tany mbala mila pitory maro. Ke ino raha mety angatahiny? Izy mety mivavaka fo baka ho voakaiky han̈ano sekoly io, fa izy koa afaka mivavaka baka Jehovah han̈ampy izy hahita fomba hafa mety hampitombosany fanompoan̈anany. (Asa. 16:9, 10) Izy baka io amy zay afaka man̈ano raha mifan̈araka amy vavaka ataony zen̈y, ke man̈ontany piandraikitry faritry tsao misy fiangonan̈a marikidrikitry iô mbala mila pisava lalan̈a. Na koa izy afaka manoratra amy birony sampan̈a ke man̈ontany aia faritany mbala mila pitory maro. e

16. Afaka matoky ino atsika?

¹⁶ Hitantsika tio fa atsika afaka matoky fa ampitiavan̈a ndreky amy rariny fo fomba amaliany Jehovah vavakantsika. (Sal. 4:3; Isaia 30:18) Ndraikindraiky mety tsy arakarakany raha nantinaintsika valiny vavaka azontsika. Fa san̈atria Jehovah ndraiky tsy hitandren̈y vavakantsika. Atsika tiany mare, avio izy tsy han̈ary atsika foeky. (Sal. 9:10) Ke ‘matokisa izy fo’, avio koràn̈a aminany amy vavaka raha jiaby an̈aty fonao.​—Sal. 62:8.