1-2. a) Nan̈ino ma apostoly Paoly nivolan̈a fa fitiavan̈a toetry ‘farany maventy’? b) Ino aby fan̈ontanian̈a hidinihintsika ato?

 KARAHA ty raha farany nivolan̈iny apostoly Paoly izikoa izy fa nikoran̈a momba finoan̈a, fan̈antinan̈a, baka io fitiavan̈a, ho izy: ‘Fitiavan̈a farany maventy amindro [toetry] io.’ (1 Kor. 13:13) Nan̈ino ma Paoly nivolan̈a zen̈y? Aminy hoavy, atsika efa tsy mila mino fampan̈antinan̈any Zan̈ahary momba donia vaovao na man̈anten̈a fampan̈antinan̈anany aby io ho tanteraka, fotony amy zen̈y raha aby io efa tanteraka. Fa atsika ndraiky mbala mila manan̈a fitiavan̈a fo. Atsika mbala mila tia Jehovah ndreky piarabelon̈o. Fitiavantsika iro hitombo fo mandrakizay.

² Hitantsika baka amy zen̈y fa mbala mila mifen̈y hanan̈a fitiavan̈a fo atsika mandrakizay. Ke alo atsika handiniky fan̈ontanian̈a telo aby ty: 1) Nan̈ino atsika mila mifankatia? 2) Akory an̈aboahantsika fa atsika mifankatia? 3) Akory ataontsika hankafatatra fifankatiavantsika?

3. Nan̈ino atsika tôkony hifankatia?

³ Nan̈ino ma ten̈a raha maventy amintsika mifankatia zen̈y? Ty antony araiky maventy, izikoa atsika tia iro piaramanompo amintsika aby io, zen̈y man̈aboaka fa atsika ten̈a Kristianin̈y. Karaha ty nivolan̈iny Jesosy taminy apostolinany: “Izikoa anaro mifankatia, zen̈y hahaizanolo jiaby fa anaro pianatranaka.” (Jaona 13:35) Hiray sain̈y fo koa atsika izikoa mifankatia. Paoly nivolan̈a fa fitiavan̈a io “mira tady mampifandray amy fomba feno.” (Kol. 3:14) Fa mbala misy antony araiky maventy koa mahavy atsika tôkony hifankatia. Karaha ty raha nisoratiny apostoly Jaona tamy piaramanompo taminany: ‘Lan̈iany tia Zan̈ahary tsy maintsy tia rahalahiny.’  (1 Jaona 4:21) Izikoa atsika mifankatia, aboakantsika amy zen̈y fa atsika tia Zan̈ahary.

4-5. Ino ifandraisany fifankatiavantsika ndreky fitiavantsika Zan̈ahary? Hazavà aminy ohatra.

⁴ Ino ma ifandraisany fitiavantsika Zan̈ahary ndreky fitiavantsika piaramanompo? Alo atsika hangala ohatra. Haintsika fa fontsika io mifandray amy rantsambatan̈antsika hafa. Akory, ohatra, ataony dokotera koa fa hizaha man̈ano akory fitempony fonao? Tsapainy vozontan̈ananao. Baka amizio ahaizany asa fonao mitempo mare loatra na miadan̈a loatra. Ino raha ianarantsika baka amy zen̈y?

⁵ Izikoa dokotera tihahay akory fitempony fontsika, tsapainy amy vozontan̈anantsika. Karaha zen̈y koa, izikoa tiantsika ho hay akory fitiavantsika Zan̈ahary, mila dinihintsika akory fitiavantsika olo. Izikoa hitantsika fa nahainihen̈y fitiavantsika piaramanompo, dikanizen̈y mety nahainihen̈y koa fitiavantsika Zan̈ahary. Fa izikoa ndraiky atsika tsy voly man̈aboaka fitiavan̈a amy piaramanompo amintsika, haintsika baka amy zen̈y fa fatatra tsarabe fitiavantsika Zan̈ahary.

6. Nan̈ino atsika tôkony hangala onondraha izikoa hitantsika fa mahaimihen̈y fitiavantsika piaramanompo? (1 Jaona 4:7-9, 11)

⁶ Tôkony hangala onondraha atsika izikoa hitantsika fa nahainihen̈y fitiavantsika iro rahalahy ndreky ranabavintsika aby io. Nan̈ino? Fotony zen̈y mivolan̈a fa nahainihen̈y koa fifandraisantsika amy Jehovah. Mazava tsarabe fomba nivolan̈any apostoly Jaona raha zen̈y taminizy nampatsiaro atsika ambaka ty: ‘Lan̈iany tsy tia rahalahiny hitany masony, tsy afaka ho tia Zan̈ahary tsy hitany masony.’ (1 Jaona 4:20) Ino raha ianarantsika baka amy zen̈y? Ho ravoravo amintsika Jehovah izikoa atsika “mifankatia.”​—Vakia 1 Jaona 4:7-9, 11.

7-8. Akory aby fomba mety han̈aboahantsika fa atsika mifankatia?

⁷ Hitantsika mimpodimpody matetiky amy Volan̈a Zan̈ahary ao didy mila “mifankatia” io. (Jaona 15:12, 17; Rom. 13:8; 1 Tes. 4:9; 1 Pet. 1:22; 1 Jaona 4:11) Kanefa, fitiavan̈a io fihetsehampo an̈aty fontsika an̈y. Tsisy olombelon̈o afaka mahita izio. Ke akory basy ataontsika han̈aboaka fa atsika tia piaramanompo amintsika? Baka amy raha volan̈intsika ndreky raha ataontsika.

⁸ Maro fomba afaka han̈aboahantsika amindro rahalahy ndreky ranabavintsika aby io fa atsika tia iro. Ty sasany amy zen̈y: ‘Samia mivolan̈a ny marin̈y amy namany.’ (Zak. 8:16) ‘Anaro mifen̈a fo mihavan̈a tsara.’ (Mar. 9:50) “Irarian̈a anaro ho voanalohany amy fifan̈amezan̈a voninahitry.” (Rom. 12:10) ‘Raisa tsara koa olo hafa.’ (Rom. 15:7) ‘Mahaiza fo mifan̈ambela hadisovan̈a.’ (Kol. 3:13) “Mahaiza mifan̈ampy fo izikoa fa misy raha sarotro mavoa anaro.” (Gal. 6:2) ‘Mifen̈a fo mifankahery.’ (1 Tes. 4:18) ‘Mifen̈a fo mifan̈ampy.’ (1 Tes. 5:11) “Mifampivavaha.”​—Jak. 5:16.

9. Nan̈ino fankahirezan̈a olo io an̈isany fomba araiky maventy an̈aboahantsika amindro fa atsika tia iro? (Zahava koa sary.)

⁹ Alo atsika handiniky fomba araiky afaka han̈aboahantsika fa atsika tia olo. Paoly nivolan̈a: ‘Mifen̈a fo mifankahery.’ Nan̈ino ma zen̈y an̈isany fomba maventy afaka han̈aboahantsika aminolo fa atsika tia iro? Misy boky araiky momba Baiboly mivolan̈a fa dikany volan̈a “mankahery” nampiasainy Paoly io, “mitsangana ankilanolo araiky ke man̈amia korazy izy lera izy miatriky raha sarotro mare.” Dikanizen̈y, lera atsika mankahery piaramanompo tojy problemo in̈y, atsika miran̈a man̈ampy izy hiarin̈y  ndreky hanohy handeha amy lalan̈any fiain̈ana. Ke isaka atsika mankahery piaramanompo araiky, aboakantsika aminany fa atsika tia izy.​—2 Kor. 7:6, 7, 13.

10. Ino ifandraisany hinakinaka ndreky fankahirezan̈a?

¹⁰ Ten̈a mifandray marikitry raha aroe ty: Mahinakinaka olo ndreky mankahery olo. Amy fomba akory? Olo araiky mahinakinaka olo zen̈y man̈ano raha hankahirezan̈a ny hafa baka io mitady fomba hampakirikiry jalindro. Hinakinaka dikanizen̈y mandrisiky atsika hankahery olo. Paoly nivolan̈a fa Jehovah mahinakinaka olo, ke zen̈y mahavy Izy mankahery iro. Paoly nivolan̈a fa Jehovah “Babany hinakinaka ndreky Zan̈ahariny fankahirezan̈a jiaby.” (2 Kor. 1:3) Volan̈a ‘hinakinaka’ ampiasainy Paoly io ivolan̈ana fihetsehampo tsapanolo araiky mahinakinaka olo. Ke Zan̈ahary kahian̈a Baba na Loharanony hinakinaka fotony izy farandraha mahinakinaka olo eky. Ke baka aminy hinakinaka zen̈y mahavy izy mankahery “atsika amy fitsapan̈a jiaby mahazo atsika.” (2 Kor. 1:4) Karaha ataony rano madio mijororoko baka amy lohatany araiky ke mamelombelon̈o olo sakara in̈y, Jehovah koa mamelombelon̈o ndreky mankahery lan̈ianolo miatriky raha sarotro. Akory ataontsika hangala tahaka Jehovah ke hahinakinaka ndreky hankahery olo? Fomba araiky zioty, atsika mila mifen̈y hanan̈a iro toetry han̈ampy atsika hahavita hahinakinaka ndreky hankahery olo. Ino aby sasany amy toetry aby zen̈y?

11. Izikoa zahan̈a Kolosianina 3:12 ndreky 1 Petera 3:8, ino aby toetry han̈ampy atsika ho tia olo ndreky hahavita hankahery iro?

¹¹ Ino han̈ampy atsika hahavita hifankatia ndreky ‘hifankahery fo’ isanandra? Atsika mila manan̈a iro toetry aby ty: Mahinakinaka olo, mifankatia miran̈a olo kibo araiky, baka io tsara fan̈ahy. (Vakia Kolosianina 3:12; 1 Petera 3:8.) Amy karakory toetry aby io afaka man̈ampy atsika? Izikoa atsika mahinakinaka piaramanompo amintsika ke miasaloha mare amy raha mavoa iro, atsika manjary man̈iry mare tihankahery iro lera iro sahiran̈a. Jesosy nivolan̈a fa ‘zay raha mameno fonolo fo volan̈iny vavany. Olo tsara man̈aboaka raha tsara akajiny an̈aty fonany ao.’ (Mat. 12:34, 35) Ke izikoa atsika mankahery iro rahalahy ndreky ranabavintsika mila fan̈ampian̈a aby io, zen̈y fomba araiky maventy han̈aboahantsika amindro fa atsika tia iro.

12. a) Nan̈ino ma atsika mila mitandrin̈y fo? b) Ino fan̈ontanian̈a hidinihintsika?

¹² Atsika jiaby samby man̈iry “hifankatia fo.” (1 Jaona 4:7) Kanefa misy raha nivolan̈iny Jesosy zay koa tsara alaintsika onon̈o. Izy nampitandrin̈y fa “fitiavan̈anolo maro hahaihanintsy.” (Mat. 24:12) Marin̈y ndraiky fa Jesosy tsy nivolan̈a fa ankamarozany pianatranany ho voly hifankatia. Fa ndray zen̈y, atsika mila mitandrin̈y tsao toetsain̈inolo tsisy fitiavan̈a amy donia ty mifindra amintsika. Tsara alaintsika onon̈o raha zen̈y, ke alo atsika handiniky fan̈ontanian̈a maventy ty: Ino raha han̈ampy atsika hahay asa mbala fatatra tsarabe fitiavantsika piaramanompo?

13. Akory ahaizantsika asa mbala fatatra tsarabe fitiavantsika piaramanompo?

¹³ Akory ahaizan̈a asa fatatra sa nihen̈y fitiavan̈antsika? Fomba araiky ahaizan̈a zen̈y lera atsika mandiniky raha ataontsika koa fa tojy raha sasany. (2 Kor. 8:8) An̈isanizen̈y zioty raha nivolan̈iny apostoly Petera ty: “An̈abony raha jiaby, mifankatiava mare, fotony fitiavan̈a io mandrakotro fahotan̈a maro.” (1 Pet. 4:8) Baka amy fihetsikintsika lera misy piaramanompo man̈ano raha tsy  mety na man̈ano raha mampalahelo atsika ahaizantsika asa atsika tia iro ankitin̈y.

14. Eraka 1 Petera 4:8, ino karazan̈a fitiavan̈a tôkony hanan̈antsika? Hazavà aminy ohatra.

¹⁴ Alo hidinihintsika tsarabe raha nivolan̈iny apostoly Petera in̈y. Tapany voanalohany aminy andininy faha-8 mivolan̈a karazan̈a fitiavan̈a karakory tôkony hanan̈antsika io; “mifankatiava mare” ho izy. Volan̈a “mare” nampiasainy Petera io mety adika arabakiteny “mivelatra.” Tapany faharoe aminy andininy io ndraiky mikoran̈a ino vokany izikoa atsika tia olo mare. Fitiavantsika iro mare io han̈ampy atsika handrakotro fahotan̈andro. Ty baka misy ohatra: Misy latabatra araiky feno tany mariadriatra, ke anao mangala lomboko latabatra hivilarinao an̈abonany iô. Tsy tany mariadriatra araiky na aroe fo rakotro ao fa maro oe. Karaha zen̈y koa, izikoa atsika tia mare iro rahalahy ndreky ranabavintsika aby io ho vitantsika handrakotro na han̈ambela hadisovan̈andro, tsy araiky na aroe fo fa “fahotan̈a maro.”

15. Ino raha ho vitantsika izikoa atsika tia mare iro piaramanompo amintsika aby io? (Kolosianina 3:13)

¹⁵ Mila fatatra tsarabe fitiavantsika iro piaramanompo aby io. Zen̈y han̈ampy atsika hahavita han̈ambela hadisovan̈andro nata  tsy mora amintsika man̈ano zen̈y. (Vakia Kolosianina 3:13.) Lera atsika man̈ambela hadisovan̈anolo, aboakantsika baka amy zen̈y fa atsika tia iro mare ndreky tihamparavoravo Jehovah. Ino koa han̈ampy atsika hahavita han̈ambela hadisovan̈anolo ndreky tsy ho mora meloko amy raha ataondro?

16-17. Ino koa raha hafa han̈ampy atsika tsy hifantoko aminy hadisovan̈a madinidiniky ataonolo? Hazavà aminy ohatra. (Zahava koa sary.)

¹⁶ Mifantoha amy toetry tsarandro rahalahy ndreky ranabavy aby io fa tsy amy toetry ratsindro. Aleva onon̈o baka ohatra ty. Miniminia anao miaraka man̈ano fiarahan̈a amy rahalahy ndreky ranabavy vitsivitsy. Ravoravo anaro niaraka tio ke alohany hody anaro niaraka nangala sary. Telo aby sary nitifirinao tsao fo tsy pare araiky voanalohany nazonao. Kanefa hitanao fa tamy sary araiky, nisy rahalahy araiky tsy nitokiky. Ke ataonao karakory sary io? Fafanao izio fotony aminao mbala misy sary aroe hafa misy olo jiaby mitokiky, an̈isanizen̈y rahalahy io.

¹⁷ Iro sary tsy nifafantsika aby io mety ampitovisin̈y amy raha tsaroantsika momba piaramanompo amintsika. Matetiky atsika mahatsiaro fotoan̈a maro tsara niarasantsika tamindro rahalahy ndreky ranabavintsika aby io. Fa karakory izikoa nisy rahalahy na ranabavy araiky nivolan̈a na nan̈ano raha nampaneloko atsika, taminy araiky tamindro fotoan̈a aby io? Ino raha tôkony hataontsika? Karaha nataontsika namafa araiky tamindro  sary aby in̈y, izio koa tôkony hadosontsika an̈aty jerintsika. (Ohab. 19:11; Efes. 4:32) Ho vitantsika han̈adin̈a hadisovan̈a hely nataony rahalahy na ranabavintsika io fotony mbala maro fotoan̈a maro tsara niarasantsika taminany afaka tsaroantsika. Karaha zen̈y sovenira tiantsika tavela an̈aty jerintsika ao.

18. Ino aby hevitry maventy nidinihintsika tato momba fitiavan̈a?

¹⁸ Nan̈ino ma tiantsika ho fatatra fo fifankatiavantsika? Hitantsika tio fa izikoa aboakantsika fa atsika tia iro rahalahy ndreky ranabavintsika aby io, aboakantsika koa fa atsika tia Jehovah. Ke akory ataontsika man̈aboaka fa atsika tia piaramanompo amintsika? Fomba araiky zioty, atsika mandeha mankahery iro. Hahavita ‘hifankahery fo’ atsika izikoa mahay mahinakinaka. Ino koa han̈ampy atsika hifankatia mare fo? Atsika mila mifen̈y man̈ambela hadisovan̈anolo.

19. Nan̈ino ma atsika amy zioty mila mifen̈y mare man̈aboaka fa atsika mifankatia?

¹⁹ Nan̈ino ma atsika amy zioty mila mifen̈y mare man̈aboaka fa atsika mifankatia? Aleva onon̈o baka raha nivolan̈iny Petera ty: “Efa marikitry farany raha jiaby. Ke ... mifankatiava mare.” (1 Pet. 4:7, 8) Arakaraka han̈aton̈any farany donia ratsy ty, ino raha efa ampoizintsika hiboaka? Karaha ty raha efa nivolan̈iny Jesosy tsialohaloha momba pan̈aradia izy: “Anaro ho halany firenena jiaby, baka aminy an̈aranaka.” (Mat. 24:9) Ho vitantsika hiatriky raha zen̈y izikoa atsika mifen̈y miray sain̈y fo. Izikoa atsika tia iro rahalahy ndreky ranabavintsika aby io, tsisy andra Satana hahavita hampisaratsaraka atsika fotony fitiavan̈a io “mira tady mampifandray amy fomba feno.”​—Kol. 3:14; Fil. 2:1, 2.