1-2. a) Ino raha tsy itovizantsika amindrô anjely aby io? b) Ino raha itovizantsika amindrô anjely aby io?

 TAMY Jehovah nitaon̈o anao tamy fahamarin̈ana, izy nikaiky anao ho an̈isan’ny fianakavian̈a araiky be fitiavan̈a manompo izy. An̈isan’ny fianakavian̈a io irô rahalahy ndreky ranabavy eran-tany ndreky irô anjely an-tapitrisany tsy mivadiky aby io. (Dan. 7:9, 10) Izikoa atsika fa mikoran̈a anjely zen̈y, atsika mety hieritreritry fa tsisy raha itovizandrô amintsika. Ohatra, irô io efa ela niain̈ana mare. (Joba 38:4, 7) Irô matanjaka mare mandilatra atsika. Amy resaka fahamasin̈ana ndreky fan̈anaovan̈a ny marin̈y koa, atsika tsy miran̈a amindrô foeky, fôtony atsika tsy lavorary.​—Lioka 9:26.

² Fa ndray zen̈y, maro raha itovizantsika amindrô anjely aby io. Ohatra, atsika samy afaka mangala tahaka toetrin’i Jehovah. Atsika samy manan̈a safidy malalaka. Atsika koa samy amin’ny an̈arantsika ndreky toetrintsika, aviô samy amin’ny andraikitrinany amy fanompoan̈a Jehovah. Atsika koa samy mila manompo Mpamôron̈o atsika.​—1 Pet. 1:12.

3. Ino raha ianarantsika baka amindrô anjely tsy mivadiky aby io?

³ Ohatrandrô anjely aby io mankahery atsika ndreky mampianatra atsika raha maro maventy, fôtony maro raha itovizantsika amindrô. Ke amy lahatsoratra ty, atsika handiniky, akôry hangalantsika tahaka fanetren-ten̈andrô anjely tsy mivadiky aby io, fitiavandrô olo, fiaretan̈andrô, ndreky irô mifen̈y mare baka fiangonan̈a hadio fo.

IRÔ ANJELY ABY IO MANETRY TEN̈A

4. a) Akôry an̈aboahandrô anjely aby io fa irô manetry ten̈a? b) Nan̈ino ma irô anjely aby io manetry ten̈a? (Salamo 89:7)

⁴ Anjely tsy mivadiky aby io manetry ten̈a. Nata irô maro raha hay ndreky matanjaka mare, aviô be fahendrena, irô man̈araka volan̈an’i Jehovah fo. (Sal. 103:20) Irô koa fa man̈ano  andraikitrindrô, irô tsy poerapoera, aviô irô tsy misehoseho, ndray irô matanjaka. Ravoravo fo irô man̈ano sitrapôn’i Jehovah, nata tsy hain’olo foeky an̈arandrô. a (Gen. 32:24, 29; 2 Mpanj. 19:35) Aviô, irô tsy man̈eky hamian̈a voninahitry tôkony nin’i Jehovah. Nan̈ino anjely aby io manetry ten̈a be karaha zen̈y? Fôtony irô tia Jehovah ndreky man̈aja izy mare.​—Vakia Salamo 89:7.

5. Akôry nan̈aboahan’ny anjely araiky fa izy nanetry ten̈a tamin’izy nan̈itsy apostoly Jaona? (Zahava koa sary.)

⁵ Atsika handiniky tantara araiky ahitan̈a fa manetry ten̈a marin̈y anjely aby io. Kadiriny tamy taon̈o 96, nisy anjely araiky tsy hay an̈aran̈a, nan̈aboaka raha mahagaga tamin’ny apostoly Jaona. (Apok. 1:1) Karakôry nataon’i Jaona, izy koa fa nahita fahitan̈a io? Izy nankôhoko tamin’ny anjely io. Fa anjely tsy nivadiky io direkty nivolan̈a taminany: “Tandrema! Aza man̈ano karaha io! Zaho mpanompo karaha anao ndreky rahalahinao aby io fo ... Zan̈ahary zaraiky fo ivavaha!” (Apok. 19:10) Nanetry ten̈a mare anjely io! Izy tsy nitady hahazo voninahitry foeky. Izy direkty nan̈iraka Jaona hivavaka tamy Jehovah Zan̈ahary. Naboakan’ny anjely io tsarabe tamy zen̈y fa izy ndreky Jaona miran̈a fo. Nata anjely io efa ela nanompoan̈a Jehovah, ndreky manan̈a angôvo mahery mandilatra nin’i Jaona, izy nanetry ten̈a ke nivolan̈a tamy Jaona fa izy mba mpanompo karaha Jaona fo. Aviô nata anjely io tsy maintsy nan̈itsy Jaona tamy raha nataony, izy tsy nasiaka tamin’ny apostoly efa natoe io, fa tsara fan̈ahy fo izy nikoran̈a taminany. Mety hainy baka fa gaga mare Jaona tamy raha hitany io.

6. Karakôry hangalantsika tahaka fanetren-ten̈an’ny anjely?

⁶ Akôry hangalantsika tahaka fanetren-ten̈an’ny anjely aby io? Atsika koa fa man̈ano asa anendrena atsika, tsy tôkony ho poerapoera, aviô tsy han̈ano raha hahavy olo hieritreritry fa atsika ten̈a mahay raha. (1 Kor. 4:7) Na efa ela atsika nanompo Jehovah na manan̈a tombontsoam-panompoan̈a,  atsika tsy tôkony hihevitry fa an̈abon̈abon’olo hafa. Fa arakarakan’ny hamarozan’ny andraikitrintsika, tôkony hahavy atsika hitondra ten̈a karaha faran’ny hely. (Lioka 9:48) Ambaka irô anjely aby io, tiantsika hikarakara olo. Ke atsika tsy tôkony han̈ano raha hahavy irô hieritreritry fa atsika an̈abon̈abondrô.

7. Izikoa atsika tsy maintsy man̈itsy na man̈amia torohevitry olo, akôry han̈aboahantsika fa atsika manetry ten̈a?

⁷ Aboakantsika koa fa atsika manetry ten̈a, lera atsika mila man̈itsy na man̈amia torohevitry olo, karaha ataon’ny mpiara-manompo na zanakantsika. Ndraikindraiky atsika mila mentitry. Fa ndray zen̈y, karaha anjely nan̈itsy Jaona in̈y, atsika mila tsara fan̈ahy fo ke tsy han̈akivy olo. Izikoa mira amintsika fo fahitantsika olo, feno fan̈ajan̈a ndreky fitiavan̈a atsika, izikoa fa man̈amia torohevitry baka amy Baiboly.​—Kol. 4:6.

IRÔ ANJELY ABY IO TIA OLO

8. a) Izikoa Lioka 15:10 zahan̈a, akôry han̈aboahandrô anjely aby io fa irô tia olo? b) Akôry han̈ampiandrô anjely aby io atsika amin’ny asa fitorian̈a? (Zahava koa sary .)

⁸ Irô anjely aby io tsy man̈ambany atsika olombelon̈o. Irô tia atsika. Ravoravo irô izikoa fa misy mpanota araiky mibebaka, na izio ôndrikôndriky araiky nimpody amy Jehovah, na izio olo nan̈ova fiain̈ananany ke man̈araka fahamarin̈ana. (Vakia Lioka 15:10.) Irô anjely aby io koa mitahitahy atsika amin’ny asa fitorian̈a. (Apok. 14:6) Nata irô tsy mitory mivantan̈a amin’olo, irô mitariky mpitory amin’olo vôn̈ono hianatra momba Jehovah. Marin̈y ndraiky fa atsika tsy afaka mivolan̈a fa anjely zaraiky fo ampiasain’i Jehovah han̈ampian̈a atsika. Jehovah baka mahavita mampiasa raha hafa. Jehovah koa mampiasa fan̈ahy masin̈inany hitariky irô mpanomponany aby io, amindrô olo aby tihahay raha momba izy. (Asa. 16:6, 7) Fa izy ndraiky mbala mampiasa anjely han̈ampy atsika amin’ny asa fitorian̈a. Ke atsika koa fa mikoran̈a vaovao tsara io, atsika afaka matoky fa irô anjely aby io man̈ampy atsika.​—Zahava efajoro “ Nivaly Vavakandrô.” b

9. Akôry hangalantsika tahaka fitiavandrô anjely aby io olo?

⁹ Akôry hangalantsika tahaka fitiavandrô anjely aby io olo? Izikoa atsika maharen̈y filazan̈a fa misy olo araiky voaray, atsika ravoravo karaha irô anjely aby io koa. Tsara atsika man̈amia toky izy fa atsika mbala tia izy ndreky ravoravo, fôtony izy nimpody hanompo Jehovah. (Lioka 15:4-7; 2 Kor. 2:6-8) Mangala tahaka irô anjely aby io koa atsika, izikoa man̈ano erakan’ny vitantsika amin’ny asa fitorian̈a. (Mpito. 11:6) Karaha ataondrô anjely aby io mitahitahy atsika izikoa fa mitory, atsika koa afaka manohan̈a irô rahalahy ndreky ranabavintsika aby io, baka irô mahavita manompo. Ohatra, asa atsika mba afaka miaraka amy mpitory vaovao? Atsika ma afaka man̈ampy irô olo matoe, na irô rahalahy ndreky ranabavy tsy salama, baka irô hahavita fanompoan̈a?

10. Ino raha ianarantsika baka amy tantaran’i Sara?

¹⁰ Akôry izikoa atsika tsy mahavita raha tiantsika? Atsika mbala afaka mizaha hevitry fo iarahantsika miasa amindrô anjely aby io, lera manompo. Diniha baka ranabavy Sara, an Inde an̈y. c Efa 20 taon̈o izy mpisava lalan̈a, fa izy baka tiô narary, ke tsy afaka niala tamy fandrian̈a. Misaora kivy mare izy. Fa baka tiô, nanjary ravoravo ndraiky Sara. Nan̈ino? Fôtony ten̈a nan̈ampy izy irô rahalahy ndreky ranabavy fiangonan̈a araiky taminany, baka iô izy zatra namaky Baiboly tsy tapaka. Izy tsy maintsy nitady fomba hafa nan̈anaovany fanompoan̈a.  Izy tsy mahavita mipetraka, ke tsy afaka man̈ano fitorian̈a amy taratasy. Efa fitorian̈a amy telefony edy raha vitany. Izy nikaiky fiveren̈ana mitsidikinany. Aviô olo aby io koa nikoran̈a taminany olo tihianatra Baiboly. Ke ino vokany? Tsy ampy firy fanjava, Sara nanan̈a mpianatra Baiboly 70. Tsy vitany nampianatra olo jiaby io, ke sasany nafindrany tamin’olo. Maro amindrô mpianatra aby io amy ziôty efa mivory. Misaora ravoravo mare anjely aby io, miaraka miasa amy rahalahy ndreky ranabavy karaha ataon’i Sara, fôtony man̈ano erakan’ny vitandrô amin’ny asa fitorian̈a!

IRÔ ANJELY ABY IO MIARITRY

11. Akôry han̈aboahandrô anjely tsy mivadiky aby io fa irô ten̈a miaritry ankitin̈y?

¹¹ Ten̈a ohatra tsara amy fiaretan̈a irô anjely tsy mivadiky aby io. Efa andrivony taon̈o zay irô miaritry raha tsy rariny ndreky raha ratsy maro. (Gen. 3:1; 6:1, 2; Joda 6) Hitandrô Satana ndreky anjely ratsy maro lôso nanohitry Jehovah, kanefa irô taloha niaraka  nanompo tamindrô. (Dan. 10:13) Koran̈in’ny Baiboly koa fa nisy anjely araiky tsy nivadiky niady tamin’ny anjely ratsy araiky, tan̈atin’ny andra maro. Aviô, rango tamin’ny faha Adama ndreky Eva, hitandrô anjely tsy mivadiky aby io fa vitsy fo olo nifidy hanompo Jehovah. Ndray tiô raha jiaby zen̈y, anjely tsy mivadiky aby io mbala mazoto ndreky ravoravo fo manompo Jehovah. Haindrô fa amy fotoan̈a mety, Zan̈ahary han̈adoso raha tsy rariny jiaby.

12. Ino raha han̈ampy atsika hiaritry?

¹² Akôry hangalantsika tahaka fiaretan̈andrô anjely aby io? Karaha irô anjely aby io, atsika koa mety hahita raha tsy rariny, na hitoherin’olo foeky. Fa karaha irô koa, atsika matoky fa amy fotoan̈a mety, Zan̈ahary han̈adoso raha ratsy jiaby io. Ke karaha irô anjely tsy mivadiky aby io, atsika “tsy rivan̈a man̈ano ny tsara.” (Gal. 6:9) Sady Zan̈ahary koa mampan̈anten̈a fa izy han̈ampy atsika hiaritry. (1 Kor. 10:13) Atsika koa afaka mivavaka amy Jehovah, baka izy han̈amia fan̈ahy masin̈inany, fôtony izio hahavy atsika hanan̈a faharetan̈a ndreky ho ravoravo. (Gal. 5:22; Kol. 1:11) Akôry fo basy izikoa anao miatriky fanoheran̈a? Aza mavozo, fa matokisa Jehovah fo. Izy iô fo hanohan̈a ndreky han̈amia angôvo anao.​—Heb. 13:6.

IRÔ ANJELY ABY IO MAN̈AMPY BAKA FIANGONAN̈A HADIO FO

13. Ino andraikitry miavaka namian̈a irô anjely aby io amin’ny andra farany ty? (Matio 13:47-49)

¹³ An̈atin’ny andra farany ty, irô anjely aby io namezan’i Jehovah fanendrena miavaka. (Vakia Matio 13:47-49.) Olo an-tapitrisany eran-tany lian̈a amy vavao tsara. Sasany man̈ano fan̈ovoan̈a, ke lôso an̈isan’ny ten̈a Kristianin̈y, fa sasany ndraiky tsy karaha zen̈y. Irô anjely aby io nirahin̈y “han̈avaka olo ratsy fan̈ahy amin’olo marin̈y.” Dikan’izen̈y irô irahin̈y hiaro fiangonan̈a baka hadio. Zen̈y tsy mivolan̈a fa izikoa fa misy olo tsy miaraka amintsika eky na ino na ino antony, efa tsy afaka mimpody. Zen̈y koa tsy midika fa tsy ho hisy problemo foeky an̈atin’ny fiangonan̈a. Ndray zen̈y, matokisa fa anjely aby io mifen̈y mare man̈ampy fiangonan̈a baka hadio fo.

14-15. Akôry hangalantsika tahaka anjely aby io ke han̈aboaka fa atsika ten̈a man̈iry han̈ano raha hampadio fiangonan̈a fo? (Zahava koa sary.)

¹⁴ Akôry hangalantsika tahaka fitiavandrô anjely aby io han̈ano raha hampadio fiangonan̈a fo? Mangala tahaka irô atsika, izikoa man̈ano erakany vitantsika, baka fiangonan̈a hadio fo, amy lafiny fitondran-ten̈a ndreky ara-pan̈ahy. Ino han̈ampy atsika hahavita zen̈y? Mifen̈y atsika hiaro fôntsika, ke mifidy tsara olo ataontsika naman̈a, ndreky mitandrin̈y  amy raha mety handrobaka fifandraisantsika aminany. (Sal. 101:3) Atsika koa mety man̈ampy irô mpiara-manompo amintsika aby io, baka irô hifen̈y fo tsy hivadiky amy Jehovah. Ohatra, izikoa misy mpiara-manompo amintsika nan̈ano fahotan̈a maventy, ino raha tôkony hataontsika? Noho ny fitiavantsika izy, atsika mandrisiky izy hikoran̈a amin’ny anti-pan̈ahy. Akôry ndraiky izikoa izy tsy mety? Atsika foeky hikoran̈a raha io amindrô anti-pan̈ahy aby io. Tiantsika hahazo fan̈ampian̈a malaky baka rahalahintsika marary ara-pan̈ahy io!​—Jak. 5:14, 15.

¹⁵ Misy olo sasany nan̈ano fahotan̈a maventy, tsy maintsy adoso tsy an̈isan’ny fiangonan̈a. Ke akôry izikoa zen̈y ny raha misy? Atsika “tsy mifanerasera” amindrô eky. d (1 Kor. 5:9-13) Fandaharan̈a zen̈y man̈ampy fiangonan̈a hadio fo. Aviô koa, izikoa atsika tsy mifandray amin’olo nadoso tsy an̈isan’ny fiangonan̈a, zen̈y han̈aboahantsika fa atsika tsara fan̈ahy amindrô. Atsika tapa-kevitry han̈araka volan̈an’i Jehovah io mety han̈ampy irô ho tontohitry, ke himpody amy Jehovah. Ke izikoa irô mimpody aminany, atsika ravoravo karaha Jehovah ndreky irô anjelinany aby io.​—Lioka 15:7.

16. Ino aby raha tianao hifen̈ana hangalan̈a tahaka irô anjely aby io?

¹⁶ Ten̈a voninahitry amintsika ambelan’i Jehovah hianatra momba anjelinany aby io ndreky miaraka miasa amindrô! Ke irarian̈a atsika hangala tahaka toetry tsarandrô aby ty: Manetry ten̈a, tia olo, miaritry, ndreky mifen̈y han̈ano raha hahavy fiangonan̈a hadio fitondran-ten̈a ndreky ara-pan̈ahy fo. Izikoa atsika mangala tahaka anjely tsy mivadiky aby io, atsika koa ho an̈isan’ny fianakavian̈a manompo Jehovah mandrakizay.