1-2. Ino an̈isan’ny raha ten̈a maventy amy Jehovah, aviô ino raha tiany hataontsika?

 AN̈ISAN’NY raha ten̈a maventy amy Jehovah fomba fitondrasantsika olo hafa. Jesosy nampianatra fa atsika mila tia namantsika, karaha ataontsika tia ain̈intsika in̈y. (Mat. 22:37-39) Tafiditry amy zen̈y atsika tsara fan̈ahy amin’olo tsy manompo Jehovah. Izikoa atsika tsara fan̈ahy karaha zen̈y, mangala tahaka Jehovah Zan̈ahary atsika, fôtony izy “mampipiriaka masoandra amy ratsy fan̈ahy ndreky tsara fan̈ahy, aviô izy mandatsaka mahalen̈y amin’olo marin̈y ndreky amin’olo tsy marin̈y.”​—Mat. 5:45.

² Jehovah ndray tia olo jiaby, olo man̈ano ny marin̈y ten̈a tiany. (Jaona 14:21) Tiany atsika han̈ano karaha izy. Izy mandrisiky atsika ho “tia mare” irô rahalahy ndreky ranabavintsika aby io ndreky “hifandray am-pô” amindrô. (1 Pet. 4:8; Rom. 12:10) Izikoa atsika mandiniky fitiavan̈a koran̈intsika zen̈y, mety olo mpihavan̈a maletry na olo kamarady mare raha avy an̈atin’ny jerintsika.

3. Ino raha tsy mila adin̈antsika momba fitiavan̈a?

³ Fitiavan̈a io mila karakarain̈y fo, karaha ataon’ny raha maniry amy zaridain̈y mila karakarain̈y in̈y, baka izio mitombo. Apostoly Paoly nan̈amia torohevitry Kristianin̈y karaha ty: “Tohiza fo fitiavanarô rahalahinarô.” (Heb. 13:1) Tian’i Jehovah izikoa tsy mihen̈y fitiavantsika olo. Amy lahatsoratra ty atsika handiniky, nan̈ino ma atsika tôkony hifandray marikitry amindrô rahalahintsika ndreky ranabavintsika aby io, aviô akôry han̈anaovantsika zen̈y mitohy fo.

 NAN̈INO MA ATSIKA TÔKONY HIFANDRAY MARIKITRY?

4. Eraka raha koran̈in’ny Salamo 133:1, akôry tôkony hataontsika baka atsika hankasitraka fo firaisan-tsain̈y misy amintsika io? (Zahava koa sary.)

⁴ Vakia Salamo 133:1. Atsika mira hevitry amy mpan̈ano salamo. Izy nanoratra fa ten̈a fikamaradianan̈a amin’olo tia Jehovah io “tsara” ndreky “pare eky.” Fa izio karaha olo araiky efa zatra mahita kakazo be araiky tsara amy lalan̈a fimboany isan’andra, ke efa tsy mahavarian̈a izy eky. Mety ho karaha zen̈y koa fahitantsika firaisan-tsain̈y misy amintsika io, fôtony mety matetiky atsika isaka herin̈iandra mifanôjy amy mpiara-manompo. Ke akôry hataontsika baka atsika ho tia irô io fo? Mila mangala fotoan̈a atsika hisaintsain̈ana, nan̈ino valera amintsika ndreky amy fiangonan̈a irô rahalahy ndreky ranabavy tsiaraikiaraiky, amy zen̈y hitombo fo fitiavantsika irô.

5. Ino vokatran’ny fifankatiavan̈a misy amintsika io amin’olo hafa?

⁵ Misy olo sasany vo sambany man̈aton̈o fivorian̈a, ten̈a lany fan̈ahy mahita fifankatiavan̈a misy amintsika. Zen̈y zaraiky fo mety efa mahavy irô mivolan̈a fa irô nahita fahamarin̈ana. Jesosy nivolan̈a: “Izikoa anarô mifankatia, zen̈y hahaizan’olo jiaby fa anarô mpianatranaka.” (Jaona 13:35) Diniha baka tantaran’i Chaithra. Izy mpianatran’ny iniversite fa nianatra Baiboly tamy Vavolombelon̈on’i Jehovah koa. Izy nikahian̈a han̈aton̈o fivoriamben’ny vondrom-paritry, ke izy navy. Mbala andra araiky tamy fivoriambe io fo vita, izy efa nivolan̈a tamy mpampianatra Baibolinany: “Iry raimandreniko tsiary ndraiky  nitolon̈o zaho. Fa tamy fivoriambenarô ty, efa 52 tolon̈o nazoko tan̈atin’ny andra araiky! Ten̈a hitako baka tamy raha nataondrô zen̈y fa Jehovah tia zaho. Ke zaho mba tiho an̈isan’ny fianakavian̈a ty koa.” Chaithra nandroso fo, ke natao batisa tamin’ny 2024 in̈y. Hitantsika baka amy zen̈y fa izikoa irô vaovao aby io mahita asa tsara ataontsika, an̈atin’izen̈y fifankatiavan̈a misy amintsika, matetiky irô lôso manompo Jehovah koa.​—Mat. 5:16.

6. Nan̈ino miaro atsika fifandraisan̈a marikitry amindrô rahalahy ndreky ranabavy aby io?

⁶ Miaro atsika koa fifandraisan̈a amindrô rahalahy ndreky ranabavintsika aby io. Paoly nivolan̈a karaha ty tamindrô Kristianin̈y namany aby io: “Mifen̈a fo hifankahery isan’andra ... tsao ho hisy aminarô hanjary ho mafy fô, fôtony fahotan̈a io mahavita mamitaka anarô.” (Heb. 3:13) Izikoa atsika kivy, ke vitintsika efa mila hiala amy lalan̈an’ny fahamarin̈ana, Jehovah mety hampiasa mpiara-manompo araiky, han̈amia fan̈ampian̈a ilaintsika. (Sal. 73:2, 17, 23) Fankahirezan̈a karaha zen̈y ten̈a mahatsara atsika.

7. Ino ifandraisan’ny fitiavan̈a ndreky firaisan-tsain̈y? (Kolosianina 3:13, 14)

⁷ Atsika io an̈isan’olo maro mifen̈y mifankatia, ke maro hatsaran̈a azontsika. (1 Jaona 4:11) Ohatra, fitiavan̈a io mandrisiky atsika ‘hifandefitry fo’, ke raha zen̈y mampisy firaisan-tsain̈y. (Vakia Kolosianina 3:13, 14; Efes. 4:2-6) Ke amy fivorian̈a an̈y atsika ravoravo miaraka manompo Zan̈ahary. Raha zen̈y tsy hitantsika na aia na aia.

MIFAN̈AMEZA VONINAHITRY

8. Akôry ataon’i Jehovah man̈ampy atsika hiray sain̈y amindrô rahalahy ndreky ranabavintsika aby io?

⁸ Firaisan-tsain̈y misy amintsika eran-tany io, baka amy Jehovah. Izy man̈ano raha zen̈y ho hisy, nata atsika mbala tsy lavorary. (1 Kor. 12:25) Baiboly mivolan̈a fa atsika io “ampianarin’ny Zan̈ahary hifankatia.” (1 Tes. 4:9) Dikan’izen̈y, Jehovah mampiasa Soratra Masin̈y ivolan̈any amintsika raha voafaritry tsarabe tôkony hataontsika, baka atsika hifandray marikitry. Atsika man̈eky “ampianarin’ny Zan̈ahary”, izikoa mandiniky tsarabe fampianaran̈anany aby amy Baiboly ao ndreky man̈araka irô io. (Heb. 4:12; Jak. 1:25) Efa zen̈y edy raha ifen̈an’ny Vavolombelon̈on’i Jehovah mare.

9. Ino raha ianarantsika baka amy Romanina 12:9-13 mikasiky fifan̈amezan̈a voninahitry?

⁹ Akôry ataon’ny Volan̈a Zan̈ahary man̈ampy atsika hifandray marikitry amy namantsika? Diniha baka raha nivolan̈in’i Paoly momba zen̈y, amy Romanina 12:9-13. (Vakia.) Aleva onon̈o fa izy iô mivolan̈a fa “irarian̈a anarô ho voanalohany amy fifan̈amezan̈a voninahitry.” Ino ma dikan’izen̈y? Atsika tôkony han̈ano raha voanalohany, ke “hifandray am-pô” amin’olo. Man̈ano zen̈y atsika izikoa tia mamela heloko, tia mandray vahiny, aviô tia man̈amia raha olo, na amy fomba hafa koa. (Efes. 4:32) Aza miambin̈y rahalahy araiky na ranabavy araiky han̈aton̈o anao, fa anao mifen̈a ‘man̈ano raha voanalohany’ man̈aton̈o irô. Anao koa man̈ano zen̈y, ho tsapanao raha nivolan̈in’i Jesosy ty: “Man̈amia raha ny ten̈a mampasambatra tozay mahazo raha.”​—Asa. 20:35.

10. Akôry tôkony hataontsika baka atsika hazoto “hifan̈amia voninahitry”? (Zahava koa sary.)

¹⁰ Zahava tsarabe koa fa tafaran’ny apostoly Paoly nivolan̈a fa atsika tôkony ho voanalohany amy fifan̈amezan̈a voninahitry in̈y, izy nandrisiky atsika koa “hazoto miasa fa tsy ho kamokamo.” Olo araiky mazoto miasa koa amian̈a raha araiky ataony, marisiky izy man̈ano izio. Ohabolana 3:27, 28 mandrisiky  atsika: “Aza misalasala man̈ano ny tsara amin’olo tokony han̈anaovan̈a zen̈y, izikoa anao mbala afaka man̈ampy.” Ke izikoa atsika mahita olo araiky mila ampian̈a, atsika direkty man̈ano raha mety ho vitantsika, han̈ampian̈a izy. Aza mirekireky man̈ampy, aviô aza mivolan̈a fa tsy maintsy misy olo hafa fo an̈y han̈ampy olo io.​—1 Jaona 3:17, 18.

11. Ino han̈ampy atsika hifandray marikitry amy namantsika?

¹¹ Fomba araiky han̈amezantsika voninahitry olo koa, atsika vôn̈ono halaky hamela helokondrô, izikoa irô man̈ano raha mampameloko atsika. Karaha ty volan̈in’ny Efesianina 4:26: “Aza atao tatran’ny masoandra milentiky helokonarô.” Nan̈ino? Andininy faha-27 mivolan̈a fa atsika koa tsy malaky mamela heloko, manjary ‘man̈amia toeran̈a Devoly’ edy. Amy Volan̈anany ao Jehovah impirimpiry mandrisiky atsika hamela heloko. Amy Kolosianina 3:13 mandrisiky atsika ‘hifan̈ambela hadisovan̈a amy fô jiaby fo.’ Fomba araiky mahômby baka hifandraisan̈a tsarabe fo amin’olo, atao sary tsy hita hadisovan̈a madinidiniky ataondrô. Atsika koa man̈ano zen̈y, hifen̈y mare ‘hiray sain̈y fo sady hihavan̈a, fôtony atsika efa natambatran’ny fan̈ahy masin̈y.’ (Efes. 4:3) Dikan’izen̈y, izikoa atsika mamela heloko, hiray sain̈y sady hihavan̈a tsarabe fo atsika.

12. Akôry ataon’i Jehovah man̈ampy atsika ho tia mamela heloko?

¹² Ndraikindraiky mety ho sarotro amintsika han̈ambela hadisovan̈an’olo nan̈ano raha nampalahelo atsika mare. Fa hahavita han̈ambela izy fo atsika, izikoa ampian’ny fan̈ahy masin̈in’ny Zan̈ahary. Baiboly koa fa baka nandrisiky atsika mila ‘mifankatia mare’ ndreky mila ‘mazoto miasa’ in̈y, izio mandrisiky atsika karaha ty koa: “Irarian̈a fan̈ahy masin̈y hirehitry an̈atinarô ao.” Dikan’izen̈y, fan̈ahy masin̈in’ny Zan̈ahary io mahavita man̈ampy atsika hazoto mare han̈ano raha araiky. (Rom. 12:11) Ke fan̈ahy masin̈in’ny Zan̈ahary io han̈ampy atsika ho tia namantsika ndreky hamela heloko amy fô jiaby. Zen̈y mahavy atsika mila miangavy Jehovah han̈ampy atsika.​—Lioka 11:13.

 ‘TSY TÔKONY HISARASARAKA FOEKY ANARÔ’

13. Ino raha mety hampisarasaraka atsika?

¹³ “Olo isan-karazany” mahafôron̈o fiangonan̈a araiky. (1 Tim. 2:3, 4) Ke izikoa atsika tsy mitandrin̈y, tsy fitovisan̈a misy amintsika io mety hampisarasaraka atsika, amy raha momba safidintsika manokana, karaha ataon’ny lamba ndreky fan̈eva, fikarakaran̈a fahasalaman̈a na fangalan̈a diandian̈a. (Rom. 14:4; 1 Kor. 1:10) Atsika io “ampianarin’ny Zan̈ahary hifankatia,” ke mila mitandrin̈y mare atsika tsy hampanjaka safidintsika manokana, ke hihevitry fa nintsika ten̈a tsara.​—Fil. 2:3.

14. Ino raha tôkony hifen̈antsika fo, aviô nan̈ino?

¹⁴ Tsy hampisarasaraka fiangonan̈a koa atsika, izikoa mifen̈y hamelombelon̈o ndreky hankahery olo amy fotoan̈a jiaby. (1 Tes. 5:11) Vo tsy ela zay, naro olo tsy mivory ndreky tsy mitory, aviô olo nadoso tsy an̈isan’ny fiangonan̈a nimpody. Ravoravo atsika mandray irô jiaby! (2 Kor. 2:8) Diniha baka ranabavy araiky ty. Izy tsy nivory tan̈atin’ny folo taon̈o, fa izy iziôty efa nivory. Ho izy: “Olo jiaby ravoravo nan̈ano mbalatsara zaho ndreky nandray tan̈ananaka.” (Asa. 3:19) Ino ma vokatran’ny raha zen̈y taminany? Ho izy: “Hitako tamy zen̈y fa Jehovah nan̈ampy zaho ho ravoravo ndraiky koa.” Ke izikoa atsika mifen̈y hankahery olo, atsika mety hampiasain’i Kristy hamelombelon̈o irô olo “lonja mare ndreky mitondra entan̈a mavesatra aby io.”​—Mat. 11:28, 29.

15. Ino koa raha hafa mety hataontsika, baka hampisy firaisan-tsain̈y? (Zahava koa sary.)

 ¹⁵ Fomba araiky hafa mampisy firaisan-tsain̈y koa, baka amy volan̈a aboakantsika. Karaha ty volan̈in’ny Joba 12:11: “Tsy baka amy sofin̈y ma hahaizan̈a volan̈an’olo, karaha ataon’ny lela hahaizan̈a siron-kanin̈y?” Izio tsisy ny hafa amin’ny olo araiky mahay mandoky fo. Izy man̈andran̈a raha alokiny io, alohan’ny izy han̈amia izio olo, misy ahaizany izio masiro. Karaha zen̈y koa atsika mila mandiniky tsarabe, alohan’ny hivolan̈a raha. (Sal. 141:3) Tanjon̈ontsika tôkony hangala antoko tsarabe fa raha hivolan̈intsika io hankahery, hamelombelon̈o ndreky “hahatsara zay olo mitandren̈y.”​—Efes. 4:29.

16. Azôvy aby ten̈a tôkony ho tia man̈ano volan̈a mankahery?

¹⁶ Lelahy manambady ndreky raimandreny koa ten̈a tôkony hitandrin̈y amy raha volan̈indrô, ke han̈ano volan̈a mankahery. (Kol. 3:19, 21; Tit. 2:4) Irô anti-pan̈ahy aby io koa tôkony hamelombelon̈o ndreky hankahery, koa fa miambin̈y andian’ny ôndrikôndrikin’i Jehovah. (Isaia 32:1, 2; Gal. 6:1) Misy ohabolan̈a amy Baiboly zay mampatsiaro atsika karaha ty: “Tsara ankitin̈y volan̈a aboaka amy fotoan̈a mety!”​—Ohab. 15:23.

TIA ‘AMY RAHA ATAO NDREKY AMY FÔ’

17. Akôry hazahoantsika antoko fa ten̈a baka amy fô fitiavantsika irô rahalahy ndreky ranabavintsika aby io?

¹⁷ Apostoly Jaona mandrisiky atsika ho ‘tia, tsy amy volan̈a na amy lela fo fa amy raha atao ndreky amy fô koa.’ (1 Jaona 3:18) Tiantsika izikoa baka amy fôntsika fitiavantsika irô rahalahintsika ndreky ranabavintsika aby io. Akôry hahavitantsika zen̈y? Arakarakan’ny handaniantsika fotoan̈a miaraka amindrô, hahavy atsika hahaiharikitry irô fo ndreky hankafatatra fifankatiavantsika. Ke mitadiava fotoan̈a hiarahan̈a amindrô amy fivorian̈a an̈y ndreky lera manompo. Vangia koa irô. Izikoa atsika man̈ano ambaka zen̈y, aboakantsika amy zen̈y fa atsika “ampianarin’ny Zan̈ahary hifankatia.” (1 Tes. 4:9) Irarian̈a atsika tsy ho vôly hahatsapa fa “tsara ndreky pare eky izikoa olo mpirahalahy mahay miaraka miain̈y sady miray sain̈y!”​—Sal. 133:1.