1. Nan̈ano akory manafo lahy araiky izikoa fa naharen̈y kabaro nataony Rahalahy Rutherford taminy 1935?

AN̈ISANY Pianatra Baiboly fianakavian̈a araiky ty. Zen̈y nahaizan̈a Vavolombelon̈o Jehovah tamy zen̈y. Dimy zanakandro, telo lelahy avio aroe man̈angy. Nifen̈y iro roe fivadiany io nampianatra zanakandro hanompo Jehovah Zan̈ahary ndreky hangala tahaka Jesosy Kristy. Araiky tamy zanakandro lelahy io natao batisa taminy 1926. Izy tamy zen̈y 18 taon̈o. Isaka taon̈o iro zatra nankalaza Sakafo Harivany Tompo. Nihinan̈a môfo ndreky nigiaka divainy Fahatsiarovan̈a izy, karaha iro Pianatra Baiboly jiaby tamy zen̈y fo. Kanefa niova tanteraka fan̈antinan̈anany, izy koa fa baka naharen̈y kabaro miavaka nataony Rahalahy Rutherford, tamy fivoriambe araiky ta Washington, a Etazonỳ, taminy 1935. Titranizio: “Vahoaka Be.”

2. Ino fan̈azavan̈a vaovao nikoran̈iny Rahalahy Rutherford tamy kabaro nataony?

² Nazavainy Rahalahy Rutherford tamy kabaro nataony io azovy “vahoaka be” koran̈iny Apokalypsy 7:9 ao. Nieritreritry baka atsika talohanizen̈y fa vahoaka be io olo handeha andan̈itry fa iro fo tsy ten̈a nan̈araka Volan̈a Zan̈ahary, izikoa ampiran̈iny amy voahosotro. Ke nampiasa Soratra Masin̈y Rahalahy Rutherford han̈azavan̈a fa olo an̈isany vahoaka be io tsy handeha andan̈itry. Iro io an̈isany ondrikondriky hafany Kristy, * ho tafiboaka velon̈o amy “fahorian̈a be” ke hiain̈y mandrakizay ambony tany eto. (Apok. 7:14) Karaha ty ho Jesosy: “Mbala manan̈a ondrikondriky hafa ankoatrany araiky an̈atiny  vario ty zaho. Iro io koa tsy maintsy ampidiriko ao; iro hitandren̈y feonaka, ke hanjary andiany araiky fo iro jiaby io sady araiky fo koa piambin̈y iro.” (Jaona 10:16) Azovy ma iro ondrikondriky hafa aby io? Iro io Vavolombelon̈o Jehovah tsy mivadiky ke man̈anten̈a hiain̈y tsisy farany ambony tany eto, lera tany ty manjary paradisa. (Mat. 25:31-33, 46) Alô zahavantsika vokatrany fan̈azavan̈a vaovao zen̈y tamindro panompony Jehovah marobe, an̈isanizen̈y rahalahy tanora nikoran̈intsika in̈y.​—Sal. 97:11; Ohab. 4:18.

3-4. Ino vokatrany fivoriambe taminy 1935 io taminolo mandeha andrivony, baka io nan̈ino?

³ Nisy raha namparavoravo mare tamy fivoriambe io. Karaha ty ho Rahalahy Rutherford: “Mafadiana kony! Iangavian̈a lan̈iany olo man̈anten̈a hiain̈y tsisy farany ambony tany eto hitsangana.” Misy rahalahy araiky nan̈aton̈o izio tao nivolan̈a fa kadiriny 20 000 olo nan̈aton̈o fivoriambe io, kanefa mandilatra antsasakanolo aby io nitsangana aby. Karaha ty koa ho Rahalahy Rutherford baka tio: ‘Zahava! Iro io vahoaka be zen̈y!’ Ravoravo mare olo jiaby sady nandrômbo mare. Tontohitry iro olo nitsangana aby io fa iro tsy hengo andan̈itry, fotony haindro fa iro tsy voahosotrony fan̈ahy masin̈iny Zan̈ahary. Kiaka andra, nisy olo 840 natao batisa, ke an̈isany ondrikondriky hafa aby ankamarozandro.

⁴ Ino raha nisy tafarany kabaro io? Mandeha andrivony aby olo voly nihinan̈a môfo ndreky nigiaka divainy Sakafo Harivany Tompo, an̈isanizen̈y rahalahy tanora nikoran̈iny taloha in̈y. Nanetry ten̈a rahalahy araiky zay, ke nivolan̈a karaha ty: “Tamy Fahatsiarovan̈a taminy 1935 farany nihinanako môfo ndreky nigiahako divainy Fahatsiarovan̈a. Tontohitry zaho fa tsy andan̈itry an̈y fan̈antinan̈anaka, fotony Jehovah tsy nampiasa fan̈ahy masin̈inany han̈ambara zen̈y taminaka. Man̈anten̈a zaho fa hiain̈y ambony tany eto lera izity ivoan̈a paradisa an̈y.” (Rom. 8:16, 17; 2 Kor. 1:21, 22) Naro olo tontohitry karaha zen̈y, ke nahainaro fo isakany vahoaka be tafaranizen̈y. Miaraka miasa amy voahosotro mbala miain̈y ambony tany eto iro io.

5. Akory ma fahitany Jehovah olo voly mihinan̈a môfo ndreky migiaka divainy Fahatsiarovan̈a?

⁵ Hitantsika tio fa naro olo efa tsy nihinan̈a môfony Fahatsiarovan̈a ndreky tsy nigiaka divainy Fahatsiarovan̈a eky tafarany 1935. Akory fahitany Jehovah iro in̈y? Akory fo basy izikoa amy zioty misy Vavolombelon̈o Jehovah vita batisa, mihinan̈a môfo ndreky migiaka divain amy Sakafo Harivany Tompo, kanefa iro baka tio tontohitry fa iro tsy an̈isany voahosotro? Akory fahitany Jehovah iro? (1 Kor. 11:28) Misy amindro io, ohatra, diso hevitry fotony iro sambarandro an̈isanolo hengo andan̈itry. Ke izikoa ikendro fa iro diso hevitry, avio iro voly mihinan̈a môfo ndreky migiaka divainy Fahatsiarovan̈a, sady mifen̈y manompo Jehovah fo ndreky tsy mivadiky aminany, hay be fa hikonteny Jehovah an̈isany ondrikondriky hafa iro. Nata iro efa tsy mihinan̈a môfony Fahatsiarovan̈a ndreky tsy migiaka divainy Fahatsiarovan̈a eky, iro mbala man̈atriky izio fo fotony hankasitrahandro raha nataony Jehovah ndreky Jesosy tamindro.

6. Ino ma raha nan̈irahany Jesosy iro anjely aby io?

⁶ Efa marikitry mare fahorian̈a be! Ke tsara atsika izikoa mandiniky Apokalypsy toko faha-​7, fotony hampahery atsika mare raha zen̈y. Andininy io mikoran̈a momba Kristianin̈y voahosotro ndreky vahoaka be an̈isany ondrikondriky hafa. Amizio ao, Jesosy man̈iraka iro anjely aby io hitana tsiko efatrany  fandripahan̈a. Tsy avôsotrondro foeky tsiko aby io firaka iro Kristianin̈y voahosotro jiaby avoa tombonkase. Izikoa atao volan̈a hafa, firaka iro io ambarany Jehovah fa tsy mivadiky. (Apok. 7:1-4) Ino hatsaran̈a miambin̈y iro voahosotro aby io izikoa iro tsy mivadiky? Iro hanjary panjaka ndreky pisoron̈o miaraka amy Kristy andan̈itry an̈y. (Apok. 20:6) Ho ravoravo mare Jehovah ndreky Jesosy ndreky iro anjely aby io, lera iro voahosotro 144 000 aby io mahazo valisoandro.

7. Izikoa Apokalypsy 7:9, 10 zahan̈a, azovy ma olo hitany Jaona tamy fahitan̈a io? Man̈ino ma iro io? (Zahava sary amy fon̈ony gazety ty.)

⁷ Apostoly Jaona koa fa baka nikoran̈a momba iro panjaka ndreky pisoron̈o 144 000 aby io, nisy raha tsara mare hitany. Tsy ino izio fa “vahoaka be” tafiboaka velon̈o taminy Armagedona. Mbala maro mandilatra antokonolo voanalohany iro io, ary tsy voakonty isakandro io. (Vakia Apokalypsy 7:9, 10.) Iro io man̈ano “rôbo fotsy lava.” Dikanizen̈y iro io tsy ‘avoa tasy baka amy doniany Satana ty, sady tsy mivadiky amy Zan̈ahary ndreky Kristy. (Jak. 1:27) Mamango iro mandronton̈o fa avoavonjy iro baka amy raha nataony Jehovah ndreky Jesosy, Zanaka Ondrikondrikiny Zan̈ahary. Iro mitana sampan̈any palmie, sady ravoravo mare. Hita baka amy zen̈y fa man̈eky Jesosy Panjaka nifidiny Jehovah iro.​—Ampiràn̈a amy Jaona 12:12, 13.

8. Ino ma raha koran̈iny Apokalypsy 7:11, 12 mikasiky fianakavian̈any Jehovah andan̈itry an̈y?

⁸ Vakia Apokalypsy 7:11, 12. Nan̈ano akory eky iro tandan̈itry tan̈y, iro koa fa nahita vahoaka be io? Hitany Jaona iro ravoravo mare salakady nidera Zan̈ahary. Fa mbala mandilatra zen̈y haravoan̈any fianakavian̈any Jehovah andan̈itry an̈y, lera fahitan̈a hitany Jaona io tanteraka. Amy leranizen̈y, ho tafiboaka velon̈o amy fahorian̈a be iro olo jiaby an̈isany vahoaka be.

9. Izikoa zahan̈a Apokalypsy 7:13-15, ino raha ataony vahoaka be amy zioty?

⁹ Vakia Apokalypsy 7:13-15. Jaona nivolan̈a fa iro olo an̈isany vahoaka be io ‘nanasa ndreky namotsy lambandro tamy liony Zanaka Ondrikondriky.’ Izikoa atao volan̈a hafa, manan̈a feony fieritreretan̈a madio iro, sady ankasitrahany Jehovah. (Isaia 1:18) Iro io Kristianin̈y vita fanokan̈anten̈a ndreky batisa. Iro tsy vitany mino soron̈o nataony Jesosy in̈y, fa tsara fihavanan̈a amy Jehovah koa iro. (Jaona 3:36; 1 Pet. 3:21) Zen̈y mahavy iro mahazo lalan̈a mitsangana man̈oloan̈a sezy fiandrianan̈any Jehovah andan̈itry an̈y, sady han̈ano ‘fanompoan̈a masin̈y matsan̈a alin̈y’ andakorony tempoly arapan̈ahy ao. Mazoto mitory ndreky mampianatra koa iro izikoa mbala miain̈y ambony tany eto, fotony Fanjakan̈any Zan̈ahary ny raha ten̈a maventy amindro. Iro lastio ny ten̈a man̈ano ankamarozany asa mifandray amizio.​—Mat. 6:33; 24:14; 28:19, 20.

10. Ino raha atokisany vahoaka be? Ino raha antin̈aindro ho tanteraka amy leranizen̈y?

¹⁰ Lera vahoaka be io tafiboaka velon̈o amy fahorian̈a be, iro mety matoky fa Jehovah mbala han̈amia raha ilaindro. Mivolan̈a Apokalypsy fa ‘hivilariny Zan̈ahary an̈abondro io tran̈olainany.’ Ke amy leranizen̈y, ho tanteraka eky raha jiaby nantin̈ainolo an̈isany ondrikondriky hafa aby io. Karaha ty koran̈iny Baiboly: ‘Hifafany Zan̈ahary ranomaso jiaby amy masondro, fahafatesan̈a tsy ho hisy eky, alahelo tsy ho hisy, tarain̈y tsy ho hisy, tehotehoko tsy ho hisy.’​—Apok. 21:3, 4.

11-12. a) Izikoa Apokalypsy 7:16, 17 zahan̈a, ino aby hatsaran̈a miambin̈y olo an̈isany vahoaka be? b) Ino raha mety hataonolo an̈isany ondrikondriky hafa lera Fahatsiarovan̈a, baka io nan̈ino?

¹¹ Vakia Apokalypsy 7:16, 17. Mijaly mare panompony Jehovah amy zioty, fotony sarotro mahita vola hivangan̈a hanin̈y. Sasany mipetraka amy tany mikorontan̈a mare na misy  lagera. Misy amindro io koa migadra fotony tsy man̈eky hivadiky amy Jehovah. Ndray izy man̈ano zen̈y, ravoravo fo olo jiaby an̈isany vahoaka be io, fotony haindro fa ho tafiboaka velon̈o iro izikoa fa ho ravan̈a donia ratsy ty. Amy leranizen̈y, iro tsy hijaly eky hitady hanin̈y hoanin̈y, avio hahazo raha jiaby ilaindro iro hanan̈ana fifandraisan̈a tsara amy Jehovah. Lera Jehovah handravan̈a doniany Satana ty koa, halainy antoko tsarabe fa tsy havoa olo aby an̈isany vahoaka be io helokonany mira ‘hafanan̈a man̈oro’ io. Izikoa fa vita fahorian̈a be, Jesosy hitariky vahoaka be io hengo amy ‘loharanony ranony fahin̈ana.’ Koa atao amy volan̈a hafa, hampiany iro io hahazo fiain̈ana mandrakizay. Diniha hely baka! Miavaka mare fan̈antinan̈any vahoaka be io! Aminolo jiaby niain̈y tambony tany teto letrizay, iro ny mety tsy handalo fahafatesan̈a foeky.​—Jaona 11:26.

¹² Iro ondrikondriky hafa aby io ten̈a mankasitraka Jehovah ndreky Jesosy, nohony fan̈antinan̈a miavaka anan̈andro. Marin̈y ndraiky fa iro tsy avoafidy hengo andan̈itry, kanefa iro farandraha tiany Jehovah eky sady ten̈a valera aminany. Samby afaka midera Zan̈ahary ndreky Kristy aby, na iro voahosotro na iro an̈isany ondrikondriky hafa. An̈isany fomba araiky an̈anaovandro zen̈y, lera iro man̈aton̈o Sakafo Harivany Tompo.

13-14. Nan̈ino ma voahosotro ndreky ondrikondriky hafa tokony han̈aton̈o Fahatsiarovan̈a?

¹³ Tan̈atiny taon̈o vitsivitsy loso zay, aminolo 1 000, karidiny olo araiky nihinan̈a môfo ndreky nigiaka divainy Fahatsiarovan̈a. Dikanizen̈y, aminy ankamarozany fiangonan̈a erantany, tsisy olo mihinan̈a môfo ndreky migiaka divainy Fahatsiarovan̈a foeky. Ke nan̈ino fo basy iro mbala man̈aton̈o Sakafo Harivany Tompo fo, ndray fa tsy man̈ano zen̈y? Izio mety hampitovisin̈y aminolo araiky man̈aton̈o mariaziny kamaradiny. Man̈aton̈o mariazy io izy fotony tiany haboaka amy kamaradiny io fa tiany iro sady tohan̈any. Karaha zen̈y koa iro an̈isany ondrikondriky hafa lera iro man̈aton̈o Fahatsiarovan̈a. Man̈aton̈o izio iro fotony tiandro i Jesosy avio tiandro koa iro voahosotro aby io, sady iro man̈iry hanohan̈a iro. Man̈aton̈o Fahatsiarovan̈a koa iro, fotony tiandro haboaka fa nankasitrahindro soron̈o nataony Jesosy in̈y. Izikoa tsy tio baka soron̈o io, tsy  ho afaka hiain̈y mandrakizay ambony tany eto foeky iro.

¹⁴ Misy antony maventy hafa koa mahavy iro an̈isany ondrikondriky hafa aby io han̈aton̈o Fahatsiarovan̈a io. Iro tihan̈araka bekony Jesosy. Tamy Jesosy nan̈ano Sakafo Harivany Tompo voanalohany niaraka tamindro apostolinany tsy mivadiky aby io, ty raha nambarany: ‘Ataova fo ty hahatsiarovanaro zaho.’ (1 Kor. 11:23-26) Ke izikoa mbala misy voahosotro ambony tany eto, han̈ano fankalazan̈a Sakafo Harivany Tompo io fo iro ondrikondriky hafa aby io. Tsy vitanizen̈y fo fa, iro koa mikaiky olo jiaby han̈aton̈o izio miaraka amindro.

15. Akory an̈aboahantsika fa midera Jehovah ndreky Jesosy atsika lera Fahatsiarovan̈a?

¹⁵ Lera Fahatsiarovan̈a, midera Jehovah ndreky Jesosy atsika, koa fa mihira ndreky mivavaka. Karaha ty titrany kabarony Fahatsiarovan̈a amy taon̈o ty: “Ankasitraha Raha Nataony Zan̈ahary Ndreky Kristy Taminao!” Kabaro io han̈ampy atsika hampitombo fankasitrahantsika Jehovah ndreky Kristy. Lera môfo ndreky divain ampandalôvin̈y, ho tsaroantsika fa môfo ndreky divain io mifan̈itsy amy vatan̈any Jesosy ndreky lionany. Ho tsaroantsika koa fa nambelany Jehovah hofoaty Zanany io han̈avotan̈a atsika, ndreky hazahoantsika fiain̈ana mandrakizay. (Mat. 20:28) Ke tokony han̈aton̈o Fahatsiarovan̈a io aby lan̈iany olo tia Jehovah, Babantsika andan̈itry an̈y io, ndreky Jesosy Kristy Zanany.

16. Ino aby raha mampiran̈a voahosotro ndreky ondrikondriky hafa?

¹⁶ Ino aby raha mampiran̈a voahosotro ndreky ondrikondriky hafa? Iro samby valera amy Zan̈ahary, avio miran̈a fo vangany raha nifainy Jehovah han̈avotan̈a iro. Nambelany Jehovah hofoaty Jesosy, Zanany ten̈a tiany, han̈avotan̈a voahosotro ndreky ondrikondriky hafa. Iro koa samby tsy maintsy mifen̈y mare baka tsy hivadiky amy Zan̈ahary ndreky amy Kristy. (Sal. 31:23) Ankoatranizen̈y koa, samby iasàny fan̈ahy masin̈iny Zan̈ahary aby iro jiaby, na voahosotro zen̈y na ondrikondriky hafa. Dikanizen̈y, amezany Jehovah fan̈ahy masin̈y aby olonany jiaby, arakaraka raha ilaindro. Ndray izy man̈ano zen̈y, ty misy raha tsy mampiran̈a voahosotro ndreky ondrikondriky hafa: Fan̈antinan̈andro!

17. Ino raha efa tsy din̈iny voahosotro mbala miain̈y ambony tany eto?

¹⁷ Tsy miaraka Kristianin̈y voahosotro araiky teraka, efa man̈anten̈a hiain̈y andan̈itry edy. Tsy man̈anten̈a hengo andan̈itry izy, izikoa tsy efa ataony Zan̈ahary an̈aty fonany ao fan̈irian̈a handeha an̈y. Manjary mieritreritry fan̈antinan̈anany io izy, ndreky mivavaka momba izio, ke mahaitsy din̈iny fo andra  hazahoany hatsaran̈a hengo andan̈itry io. Tsy azony dinikinany foeky karakory vatan̈a arapan̈ahy handeha hamezany Jehovah izy. (Fil. 3:20, 21; 1 Jaona 3:2) Ndray izy man̈ano zen̈y, efa tsy din̈indro voahosotro aby io hitraotro amy Jehovah ndreky Jesosy ndreky amindro anjely aby an̈y. Efa tsy din̈indro koa hahita voahosotro aby efa an̈y, ndreky hiaraka hanjaka amindro andan̈itry an̈y.

18. Ino aby raha efa tsy din̈inolo an̈isany ondrikondriky hafa?

¹⁸ Akory fo ondrikondriky hafa? Efa tsy din̈indro hiain̈y mandrakizay ambony tany eto. Fan̈irian̈a nataony Zan̈ahary tan̈aty fontsika olombelon̈o raha zen̈y. (Mpito. 3:11) Efa tsy din̈indro aby lera an̈ovoan̈a tany ty ho paradisa! Iro amy zen̈y hiasa tran̈o ndreky hikarakara zaridain̈y. Ho salama tsara koa iro ndreky fianakavian̈andro jiaby. (Isaia 65:21-23) Efa tsy din̈indro koa handeha hitety tany ty, ke hitsangatsangana an̈abony bongo ndreky an̈aty ala, baka io hisaoma ranomasin̈y. Fa ny raha ten̈a hamparavoravo iro mare amy zen̈y, hahaiho kamarady fo iro ndreky Jehovah, sady hahaitsara fo koa fifandraisan̈andro aminany!

19. Afaka man̈ino ma olo tsiarakiaraiky koa fa avy Fahatsiarovan̈a io? Ombian̈a han̈anaovan̈a izio amy taon̈o ty?

¹⁹ Tsara mare fan̈antinan̈a namezany Jehovah panomponany vita fanokan̈anten̈a! (Jer. 29:11) An̈isany fotoan̈a miavaka Fahatsiarovan̈a nifatesany Kristy io, fotony amy leranio atsika afaka midera Zan̈ahary ndreky Kristy. Tsy haintsika tsy hidera iro, fotony baka amy raha nataondro mahavy atsika afaka hiain̈y mandrakizay. Fahatsiarovan̈a io fivorian̈a farany maventy tokony hatôn̈intsika Kristianin̈y. Amy Sabotsy 27 Martsa 2021 afarany masoandra tsôfotro, han̈anaovan̈a izio amy taon̈o ty. Maro olo ho afaka han̈aton̈o fotoan̈a maventy io amy tany maro. Sasany ndraiky injehin̈y na migadra, kanefa iro mbala mifen̈y fo han̈aton̈o izio. Ke na atsika zaraiky man̈ano izio na miaraka amy fiangonan̈a na miaraka amy pitory maromaro, alaiva onon̈o fa mizaha atsika i Jehovah ndreky Jesosy avio iro anjely aby io ndreky iro voahosotro efa nivilomin̈y andan̈itry an̈y. Irarian̈a ho vita tsara Fahatsiarovan̈a io!