1. Izikoa Matio 7:13, 14 zahan̈a, ino ivolan̈ana fa atsika io mira olo man̈ano dia lavitry?

ATSIKA jiaby io mety ampiran̈iny aminolo man̈ano dia lavitry. Tanjon̈ontsika ho tody amy donia vaovao. Haintsika fa Jehovah babantsika be fitiavan̈a izy manjaka amizio an̈y. Zen̈y mahavy atsika, isanandra, mifen̈y angovo jiaby man̈araka lalan̈a mengo amy fiain̈ana io. Jesosy ndraiky efa nivolan̈a fa maletry lalan̈a io, ke ho maro problemo havoa olo man̈araka izio. (Vakia Matio 7:13, 14.) Sady atsika koa tsy lavorary, ke farandraha mora miala lalan̈a eky.​—Gal. 6:1.

2. Ino aby raha handeha hidinihintsika ato? (Zahava koa “ Mila Manetry Ten̈a Atsika Izikoa Tihiova.”)

² Ino raha mila ataontsika izikoa atsika tsy tihiala amy lalan̈a mengo amy fiain̈ana io? Mila von̈ono atsika han̈itsy eritreritrintsika, toetsain̈intsika, ndreky raha ataontsika. Nampirisihiny Paoly “han̈itsy raha tokony hahitsy” iro Kristianin̈y aby ta Korinto tan̈y. (2 Kor. 13:11) Ilaintsika avahizo koa torohevitry io. Hikoran̈intsika amy lahatsoratra ty ato: Akory mety han̈ampiany Baiboly atsika hahavita han̈ano fan̈ovoan̈a? Akory han̈ampiandro Kristianin̈y matotro aby io atsika tsy hiala amy lalan̈a mengo amy fiain̈ana? Lera karakory mety ho sarotro amintsika han̈araka taridalan̈any fandaminan̈any Jehovah? Farany, nan̈ino atsika mila manetry ten̈a izikoa tihahavita han̈ano fan̈ovoan̈a ndrely ho ravoravo fo koa fa manompo Jehovah?

3. Mahavita man̈ampy atsika han̈ino ma Volan̈a Zan̈ahary?

³ Tsy mora amintsika mandiniky raha an̈atiny eritreritrintsika ao ndreky fihetsehampontsika. Nan̈ino? Fotony fontsika io mamitaka, ke izio tsy mety atokisan̈a foeky. (Jer. 17:9) Sady  mora mieritreritry raha diso koa atsika ke ain̈intsika tompiny fo fitahintsika. (Jak. 1:22) Mila mampiasa Volan̈a Zan̈ahary atsika izikoa fa mandiniky ain̈intsika, fotony izio han̈ampy atsika hahay ino marin̈y raha an̈atiny jerintsika ndreky fontsika. (Heb. 4:12, 13) Ho haintsika ino marin̈y raha an̈atiny fontsika lalin̈y an̈y ndreky ny maha atsika atsika, kanefa ndraikindraiky tsy takatra jerintsika foeky atsika karaha zen̈y. Fa akory ahitantsika hatsaran̈a baka amy torohevitriny Baiboly na baka aminolo namezany fahifan̈a? Atsika mila manetry ten̈a.

4. Akory ahaizan̈a fa nanjary nan̈ambony ten̈a Panjaka Saoly?

⁴ Mety ho ino ma vokany izikoa atsika tsy manetry ten̈a? Alô atsika handiniky Panjaka Saoly. Nanjary poerapoera ndreky nan̈ambony ten̈a izy, ke tsy nikeny foeky fa izy nila nan̈ova. (Sal. 36:1, 2; Hab. 2:4) Nanjary tsy nisitriky eky toetry ratsinazy zen̈y, taminizy namezany Jehovah toromariky mazava mikasiky raha mila ataony, izikoa fa resy iro Amalekita aby io. Tsy narehany Saoly foeky raha nivolan̈iny Jehovah. Izy koa fa nanariny paminan̈y Samoela, izy mbala tsy nan̈eky diso fo. Ino raha nataony? Nankamarinten̈a izy, ke nankamorainy hadisovan̈anany, avio olo hafa ndraiky namiany tsin̈y! (1 Sam. 15:13-24) Efa karaha zen̈y edy toetsain̈inany, taloha helinizio. (1 Sam. 13:10-14) Nampahinakinaka fa nambelany han̈ambony ten̈a fonany. Tsy nan̈ohatra nan̈itsy toetsain̈inany foeky izy, ke nisazìny Jehovah. Farany, nadosony Jehovah tsy ho panjaka foeky izy.

5. Ino raha ianarantsika baka amy tantarany Saoly?

⁵ Izikoa atsika tsy tihanjary karaha Panjaka Saoly in̈y, atsika mila man̈ontany ten̈a: ‘Zaho koa fa mahita torohevitry baka amy Volan̈a Zan̈ahary ao, mitady fialantsin̈y ma zaho tsy han̈arehan̈a izio? Ankamoraiko ma hadisovanaka? Sa olo hafa ndraiky hamiako tsin̈y?’ Izikoa misy araiky amindro fan̈ontanian̈a aby io fo nivaliantsika ‘ia’, dikanizen̈y mila miova ndreky man̈itsy toetsain̈intsika atsika. Izikoa tsy zen̈y, han̈ambony ten̈a edy atsika, ke ho tapaka fifandraisantsika amy Jehovah.​—Jak. 4:6.

6. Ino raha tsy nampiran̈a Saoly ndreky Davida?

⁶ Davida nanjary panjaka nandimby Saoly. Tsy miran̈a foeky iro io. Davida ten̈a ‘tia lalàn̈any Jehovah.’ (Sal. 1:1-3) Hainy fa Jehovah man̈avotro olo manetry ten̈a. Halany olo man̈ambony ten̈a. (2 Sam. 22:28) Nambelany Davida han̈itsy fomba fisain̈ananany lalàn̈any Zan̈ahary. Karaha ty nisoratiny: “Zaho hidera Jehovah; izy man̈amia torohevitry zaho. Ndray alin̈y andra, mbala man̈itsy zaho fo eritreritrinaka lalin̈y an̈y.”​—Sal. 16:7.

7. Ino raha tokony hataontsika izikoa atsika manetry ten̈a?

⁷ Izikoa atsika manetry ten̈a, ambelantsika Baiboly han̈itsy fomba fisain̈anantsika, diany atsika mbala tsy tafan̈ano raha ratsy. Lera atsika mamaky Volan̈a Zan̈ahary, miran̈a misy feo mibisibisiky amintsika karaha ty: ‘Ty lalan̈a ke mandihana.’ Mampitandrin̈y atsika izio izikoa atsika fa mitady hiala lalan̈a. (Isaia 30:21) Farandraha mahatsara atsika eky mitandren̈y raha volan̈iny Jehovah! (Isaia 48:17) Ohatra iziô, atsika koa tsy man̈ano raha ratsy, tsy ho men̈atra atsika fotony tsisy olo han̈itsy atsika. Ho tsara fihavanan̈a amy Jehovah fo koa atsika, fotony haintsika fa izy tia sady mikarakara atsika, karaha ataony baba araiky be fitiavan̈a in̈y.​—Heb. 12:7.

8. Eraka raha koran̈iny Jakoba 1:22-25, nan̈ino Volan̈a Zan̈ahary io mety ampiran̈iny amy fitaratra?

⁸ Volan̈a Zan̈ahary io mety ampiran̈iny amy fitaratra. (Vakia Jakoba 1:22-25.) Maro amintsika zatra mitaratra alohany hiboaka tran̈o. Nan̈ino? Amy zen̈y hitantsika raha mila amboarin̈y amy sanjintsika, alohany olo hafa hahita atsika. Karaha zen̈y koa, izikoa atsika zatra mamaky Baiboly isanandra, ho hitantsika ino  amy toetsain̈intsika mila ivoantsika. Tsara koa man̈ano teny vakina isaka maraindrain̈y, alohany hiboahan̈a tran̈o. Maro olo mahita hatsaran̈a izikoa fa nan̈ano zen̈y. Ambelandro ho hisy vokany amy fomba fisain̈anandro raha nivakiandro. Mahita fomba han̈arehan̈a torohevitriny Baiboly fo iro, an̈atiny andra in̈y. Misy raha hafa koa mila atao? Mila zatra mianatra Baiboly ndreky misaintsain̈y izio koa atsika, isanandra. Karaha mora fivolan̈ana raha zen̈y, kanefa raha zen̈y ten̈a ilain̈a izikoa atsika tsy hiala amy lalan̈a mengo amy fiain̈ana.

9. Lera karakory kamaradinao mila man̈itsy anao?

⁹ Asa anao efa navy nan̈ano raha tseky nandrobaka fihavanan̈anao tamy Jehovah? (Sal. 73:2, 3) Izikoa nisy naman̈a matotro nasaky nan̈itsy anao, nitandrin̈esanao tsarabe ma izy ke narehanao raha nivolan̈iny? Pare izikoa anao nan̈ano zen̈y. Hay be fa ravoravo anao fotony nampitandreminy kamaradinao!​—Ohab. 1:5.

10. Akory ataonao izikoa misy kamaradinao man̈itsy anao?

¹⁰ Baiboly mampatsiaro atsika karaha ty: “Bay ataony kamaradinten̈a, ahitan̈a fa izy naman̈a tsy mivadiky.” (Ohab. 27:6) Ino ma dikanizen̈y? Diniha hely baka ohatra ty: Anao handeha hitsaka lalan̈a in̈y, nan̈ena telefaoninao. Rikian̈anizin̈y anao sady rôso fo, kanefa tomôbily mirihariha. Tampoko tio, nisy kamaradinao namihin̈y baontan̈ananao angovo jiaby, nan̈atsory anao niala tamy lalabe tio. Nakiry izy nan̈ano zen̈y! Fa izikoa tsy zen̈y, tseky nidiaviny tomôbily anao. Marin̈y ndraiky fa mety narary mare baontan̈ananao tan̈atiny andra maromaro. Kanefa, han̈ajima aminazy ma anao fotony naresaka loatra fomba namihin̈any izio? Tsisy karaha! Ndray anao aby tsy voly han̈ano mersy izy, fotony izy nan̈ampy anao ke! Karaha zen̈y koa, mety hivolan̈a na han̈ano raha mifanohitry amy fitsipikiny Jehovah anao ke mety hisy kamaradinao han̈itsy anao. Amy voanalohany, anao mety tsy ho ravoravo. Kanefa anao aza meloko aminany, fotony tsy fahendrena zen̈y. (Mpito. 7:9) Hankasitraha mare izy, fotony nasaky nivolan̈a anao.

11. Ino mety hahavy olo araiky tsy han̈eky torohevitry tsara baka amy kamaradiny?

¹¹ Ino mety hahavy olo araiky tsy han̈eky torohevitry tsara baka amy naman̈a tsara fan̈ahy? Fan̈ambonianten̈a. Olo karaha zen̈y baka ‘raha tiany sofin̈indro fo tandrin̈esandro.’ Iro ‘tsy mitandren̈y raha marin̈y.’ (2 Tim. 4:3, 4) Iro tsy tia mitandren̈y torohevitry, fotony iro mihevitry iro ho raha mare na misy jery mandilatra olo hafa. Kanefa Paoly nivolan̈a: “Izikoa misy olo mihevitry izy ho raha mare kanefa izy tsy atà, dikanizen̈y ain̈inany fo fitahiny.” (Gal. 6:3) Mety tsarabe fomba nivolan̈any Panjaka Solomona raha zen̈y. Ho izy: “Sitrany tsaiky masikiny kanefa misy jery tozay panjaka efa matoe kanefa tsisy jery, fotony tsy hainy foeky fa izy mila fampitandreman̈a.”​—Mpito. 4:13.

12. Petera koa fa baka nahitsiny Paoly, koran̈iny Galatianina 2:11-14, ino modely tsara nambelany amintsika?

¹² Miniminia hely baka karakory nataony apostoly Petera taminizy nivolan̈iny Paoly tamasonolo jiaby in̈y. (Vakia Galatianina 2:11-14.) Azony natao tsarabe neloko tamy Paoly, fotony naresaka fomba nan̈itsiany Paoly izy sady amy zen̈y tamasonolo jiaby. Kanefa Petera nisy jery. Nikeny tsarabe torohevitry io, baka io izy tsy nan̈ohatra neloko na nitana kisasy tamy Paoly foeky. Ndray izy aby tafara tatỳ nanoratra fa Paoly io rahalahy tsy foeny.​—2 Pet. 3:15.

13. Ino raha mila alaintsika onon̈o alohany atsika han̈amia torohevitry?

¹³ Izikoa hitanao fa misy namanao mila amezanao torohevitry, ino antsendriky ma raha mila alainao onon̈o? Alohany anao hikoran̈a aminany, diniha ty: ‘Tsao zaho ty mba “marin̈y  loatra”?’ (Mpito. 7:16) Olo marin̈y loatra zen̈y farandraha mora mitsara olo eky! Kanefa tsy mifan̈araka amy fomba fizahavany Jehovah aby raha zen̈y. Tsisy hatsarampan̈ahy foeky koa izy man̈itsy olo. Izikoa anao efa baka nandiniky raha aby zen̈y, kanefa hitanao fa mbala mila mikoran̈a amy namanao io anao, koràn̈a aminany mazava tsara ino problemo, baka io mampiasà fan̈ontanian̈a mety tsarabe baka izy ho tontohitry fa tsy mety raha nataony. Ataova miorin̈y amy Soratra Masin̈y raha volan̈inao, fotony an̈atinizio ao misy fahendrena. (Ohab. 3:5) Tsaraova fa tsy anjaranao mitsara izy fa anjarany Jehovah. (Rom. 14:10) Alaiva tahaka Jesosy, ke mahaiza mahinakinaka olo. (Mat. 12:20) Nan̈ino? Fotony karaha fomba itondrasantsika olo fo koa fomba itondrasany Jehovah atsika.​—Jak. 2:13.

14. Ino aby raha amezany fandaminan̈any Jehovah atsika?

¹⁴ Jehovah mitariky atsika amy lalan̈a mengo amy fiain̈ana, ke izy mampiasa ampahany ambony tany amy fandaminan̈anany han̈amezan̈a atsika video, boky, gazety, lahatsoratra isankarazany, ndreky fivorian̈a, han̈ampian̈a atsika han̈araka torohevitry amy Volan̈a Zan̈ahary ao. Miorin̈y amy Soratra Masin̈y aby fitaovan̈a aby io. Iro rahalahy amy Filankevipitantan̈ana an̈y koa fa mandiniky fomba tsara mety han̈anaovan̈a asa fitorian̈a, iro mangataka fan̈ahy masin̈y amy Zan̈ahary. Ndray zen̈y, matetiky iro mimpody mandiniky fanapahankevitry niraesindro, misy ahitandro tsao misy raha mila ivoan̈a amizio. Nan̈ino? Fotony ‘miovaova raha amy donia ty’, ke fandaminan̈any Jehovah mila von̈ono han̈ano fan̈ovoan̈a mifan̈araka amy zen̈y koa.​—1 Kor. 7:31.

15. Ino aby raha sarotro tamy pitory sasany?

¹⁵ Farandraha mavitriky eky atsika man̈araka fan̈azavan̈a vaovao na taridalan̈a vaovao amezany fandaminan̈any Jehovah. Ohatra, momba raha inoantsika na fitondranten̈a. Kanefa akory ndraiky ataontsika lera misy fan̈ovoan̈a ataony fandaminan̈a io misy fiantraikany mivantan̈a amy fiain̈anantsika? Ohatra iziô, tatoatony tato, maro mare vola lany amy fiasan̈a ndreky fikobabian̈a tran̈o ampiasain̈a amy fanompoan̈a Jehovah. Ke nanapakevitry Filankevipitantan̈ana fa tokony ho farany maro fiangonan̈a mampiasa Tran̈o Fivorian̈a araiky. Ino vokatranizen̈y? Maro fiangonan̈a nanjary nitambatra Tran̈o Fivorian̈a, baka io nalafo koa Tran̈o Fivorian̈a sasany. Vola azo in̈y amy  zay baka io niasan̈a Tran̈o Fivorian̈a vaovao amy tany ten̈a mila izy mare. Izikoa fiangonan̈a misy anao an̈isany voakasiky amy zen̈y, mety tsy ho mora aminao han̈eky fan̈ovoan̈a zen̈y. Misy pitory sasany ohatra nanjary tsy maintsy man̈ano dia lavitry koa fa handeha hivory. Lan̈iany niasa mare tamy fiasan̈a Tran̈o Fivorian̈a aby io ndraiky mety ho lany fan̈ahy nan̈ino izio nalafo. Mety hieritreritry foeky iro fa very bôriny fotoan̈a ndreky angovo niasandro izio in̈y. Ndray zen̈y, ikendro ndreky hajaindro fo lamin̈y vaovao nataony fandaminan̈a io, ke man̈eva derain̈a mare iro.

16. Ino vokany izikoa atsika man̈araka raha koran̈iny Kolosianina 3:23, 24 ao? Ino antony?

¹⁶ Ho ravoravo fo atsika izikoa mangala onon̈o fa niny Jehovah asa ataontsika io, ary izy mitariky fandaminan̈anany. (Vakia Kolosianina 3:23, 24.) Ten̈a tsara alain̈a tahaka Panjaka Davida. Taminizy nan̈amia vola hiasan̈a tempoly in̈y, ho izy: “Azovy ma zaho avio azovy ma vahoakanaka, ke hahavita han̈amia fan̈amezan̈a antsitrapo karaha ty? Baka aminao aby raha jiaby, ke raha baka amy tan̈ananao fo izy nan̈amezanay anao io.” (1 Tan. 29:14) Karaha zen̈y koa, raha baka amy tan̈anany Jehovah fo koa izy amezantsika izy io. Ndray zen̈y, ravoravo mare Jehovah izikoa atsika fa mampiasa fotoan̈a ndreky angovo, baka io fanan̈ana hampandihanan̈a asanany.​—2 Kor. 9:7.

17. Nan̈ino ma anao tsy tokony ho rivan̈a izikoa hitanao fa misy raha mila ahitsinao?

¹⁷ Mila man̈araka diany Jesosy atsika, izikoa tsy tihiala amy lalan̈a maletry mengo amy fiain̈ana. (1 Pet. 2:21) Fa ndray zen̈y, aza rivan̈a izikoa hitanao fa misy raha mila ivoànao. Matoa anao mahatsapa zen̈y, dikanizen̈y, tihan̈araka taridalan̈any Jehovah ankitin̈y anao. Aza adin̈a fa atsika tsy lavorary! Raha zen̈y hainy Jehovah, ke izy tsy han̈anten̈a atsika hahavita raha tsisy ny hafa amy raha vitany Jesosy.

18. Ino raha mila ataontsika baka atsika ho tody amy donia vaovao?

¹⁸ Irarian̈a atsika jiaby hifantoko aminy amaray, ke ho von̈ono fo han̈itsy fomba fisain̈anantsika ndreky raha ataontsika. (Ohab. 4:25; Lioka 9:62) Irarian̈a koa atsika tsy ho voly hanetry ten̈a, ke ‘hifen̈y fo ho ravoravo, ndreky han̈itsy raha tokony hahitsy.’ (2 Kor. 13:11) Izikoa atsika man̈ano zen̈y, Jehovah Zan̈ahary be fitiavan̈a han̈ampy atsika. Hampiany hahita haravoan̈a fo atsika rango zioty, sady hamezany donia vaovao koa aminy amaray an̈y.