Zaho teraka taminy 1983. Tamy zaho vo teraka, salama tsara. Fa zaho koa fa folo taon̈o, nanomboko nanetehoko ain̈inaka jiaby. Taon̈o aroe tafaranizen̈y, zaho nifoha maraindrain̈y, tsy vitako foeky nan̈etsiky ain̈inaka. Namango zaho nan̈etsiky vitinaka, fa tsy vitako foeky. Nanjary tsy nitombo eky zaho nohony aretin̈inaka io, ke vatan̈anaka miran̈a vatan̈any tsaiky.

Tsy nahavita niboaka tran̈o foeky zaho. Fanjava vitsivitsy tafara tatỳ, nisy viavy aroe Vavolombelon̈o Jehovah namangy zahay. Florence an̈arany araiky tamindro. Nisitriky fo zaho isaka iro navy. Fa taminandra io, zaho nan̈eky nikoran̈a tamindro. Iro nikoran̈a momba Paradisa. Azoko onon̈o raha ren̈iko tamy zaho dimy taon̈o. Tamy zen̈y, Jethro, misionera nipetraka ta Suriname zay nitory tamy tanàna nisy zahay io, indraiky isaka fanjava sady nampianatra babako. Jethro ten̈a tsara fan̈ahy taminaka, ke tiako mare nikoran̈a taminany. Ndraikindraiky, iry dadilahiko ndreky dadiko nitondra zaho nandeha nivory tamy fivorian̈a nalamin̈iny Vavolombelon̈o Jehovah. Ke Florence koa fa nan̈ontany zaho tsao zaho mba tihahay tsarabe raha momba Paradisa, zaho direkty nan̈eky.

Florence koa fa nimpody namangy zaho, nindesiny niaraka taminany vadiny, i Justus. Iro nampianatra zaho Baiboly sady nampianatra zaho namaky teny. Tandraraiky, iro fivadiany nivolan̈a fa voatendry a Suriname zen̈y iro. Nalahelo mare zaho fotony tsisy olo afaka nampianatra zaho eky ta Orealla teto. Nakiry izy fo, Jehovah tsy nan̈adin̈a zaho foeky!

Tsy ela tafaranizen̈y, nisy pisava lalan̈a zay navy ta Orealla teto. Floyd an̈aranany. Nitraotro taminaka izy koa fa nitory isaka tran̈o. Tafimoe hely zaho koa fa nitahôminy hianatra Baiboly. Ke ho izy taminaka: “Anao karaha mimoe?” Nikoran̈iko taminany fa zaho taloha efa nianatra Baiboly. Tamy zen̈y bokikely Ino ma Raha Takiny Zan̈ahary Amintsika? in̈y nianarako, avio zahay efa nanomboko hely tamy boky Ny Fahalalana Izay Mitarika ho Amin’ny Fiainana Mandrakizay. * Nitantaraiko taminany ino nahavy fianaran̈anaka tsy nitohy eky. Ke Floyd nampianatra zaho tamy boky Fahalalana. Izikoa fa vita fianaran̈anay tamy boky io, izy navoatendry tantany hafa, ke tsisy papianatra Baiboly koa zaho in̈y.

 Nisy pisava lalan̈a manokan̈a ndraiky koa navoatendry tatỳ taminy 2004, tsy azovy zen̈y fa i Granville ndreky Joshua. Nitraotro taminaka iro koa fa nitory isaka tran̈o. Nimoezako hely iro koa fa nitaon̈o zaho hianatra Baiboly. Zaho nan̈eky, fa zaho fo nangataka hianatra tamy boky Fahalalana in̈y ndraiky, fa ampody rango amy voanalohany. Tiako ho hay asa mitovy amy raha nampianarinolo nampianatra zaho taloha aby in̈y raha ampianarindro. Granville nivolan̈a fa misy fivorian̈a alamin̈y antanàna iô. Efa kadiriny folo taon̈o zaho tsy niala tran̈o, fa taminio zaho von̈ono handeha. Ke Granville nitondra zaho nandeha nivory. Nindesiny tamy sezy misy larò zaho, baka io naposiny firaka tamy Tran̈o Fivorian̈a.

Nampirisihiny Granville han̈ano Sekolin’ny Fanompoana zaho, tafara tatỳ. Ho izy taminaka: “Marin̈y ndraiky fa anao tsy mahavita mandeha, fa anao mahavita mivolan̈a. Ke andra araiky an̈y, anao han̈ano kabaro natao ninolo jiaby. Tsy maintsy ho avy raha zen̈y!” Nampahery zaho mare raha nivolan̈iny io.

Nanomboko nitory niaraka tamy Granville zaho. Fa problemo hely tamy zen̈y, feno lavadavaka lalan̈a tantanàna tio ke nijaly izy nan̈aposy zaho. ‘Handesa amy borvety foeky zaho’, ho zaho taminany. Nahômby raha zen̈y. Taminy Avrily 2005 zaho natao batisa. Tsy ela tafaranizen̈y, zaho nampiofan̈indro hikarakara bokiny fiangonan̈a ndreky hikarakara sônô.

Nampahinakinaka fa naty papako taminy 2007, fotony dobo sambo nimboany. Kivy mare fianakavian̈anay. Nakiry izy fo, Granville nivavaka niaraka taminay avio namaky andininteny nankahirezan̈a zahay. Taon̈o aroe tafara, nisy fahavoazan̈a koa nandalo taminay. Dobo koa sambo nimboany Granville, ke naty izy.

Nalahelo mare fiangonan̈a hely nisy zahay in̈y, fotony zahay tsisy antipan̈ahy. Pan̈ampy amy fanompoan̈a araiky fo tao. Nalahelo mare zaho tamy nifatesany Granville, fotony kamarady mare zahay roe. Nan̈ampy zaho hinaman̈a tamy Jehovah izy sady nan̈amia raha sasany ten̈a nilaiko. Tamy fivorian̈a nan̈araka, tafarany nifatesany Granville io, anjarako namaky fehintsoratra tamy fianaran̈a Tilikambo Fiambesan̈a. Zaho koa fa navy tamy fehintsoratra faharoe, zaho tafitomoan̈y mare. Ndraiky najotso baka tamy pipìtra foeky zaho.

Nanjary kirikiry alahelonaka izikoa fa nisy rahalahy baka amy fiangonan̈a hafa nan̈ampy zahay tatỳ. Iro tamy birôny sampan̈a koa nan̈iraka Kojo, pisava lalan̈a manokan̈a. Ravoravo zaho, fotony mamako ndreky zandriko nanomboko nianatra Baiboly avio natao batisa. Tamy Marsy 2015 zaho navoatendry ho pan̈ampy amy fanompoan̈a. Tsy ela, zaho nan̈ano kabaro natao ninolo jiaby. Ravoravo zaho taminio, kanefa niran̈aran̈a ranomasonaka fotony tsaroako raha nivolan̈iny Granville ty: “Andra araiky an̈y, anao han̈ano kabaro natao ninolo jiaby. Tsy maintsy ho avy raha zen̈y!”

Rango nisiany Tele JW, nanjary haiko fa maro koa piaramanompo misy antsa. Fa ndray zen̈y, maro raha vitandro amy fanompoan̈a sady ravoravo fo. Zaho koa mba misy raha vitako! Tiako hamian̈a Jehovah angovonaka jiaby, ke zaho nan̈ano pisava lalan̈a maharitry. Tsy nampoiziko foeky vaovao nazoko tamy Septambra 2019! Navoatendry ho antipan̈ahy zaho. Kadiriny 40 pitory amy fiangonan̈anay.

Zaho ten̈a mankasitraka iro rahalahy ndreky ranabavy nampianatra zaho ndreky nan̈ampy zaho hanompo Jehovah. Fa an̈abony raha jiaby zen̈y, mankasitraka Jehovah zaho fotony izy tsy nan̈adin̈a zaho foeky.