1. Ino ma raha itovizany Satana amy pangôron̈o?

ARAIKY fo tanjon̈onolo pangôron̈o: Hanambotro na hamono biby. Mety hampiasa fandriky isankarazany izy han̈anaovan̈a zen̈y, karaha lay nivolan̈iny araiky tamindro lelahy nan̈ano sary nampahery i Joba in̈y. (Joba 18:8-10) Akory hataony pangôron̈o mamandriky biby? Dinihiny tsarabe biby tiany fandrihin̈y io. Dinihiny tany fandihanany ndreky raha tianizio, avio fomba hamandrihany izio amy lera tsy ampoizin̈y. Karaha zen̈y koa ataony Satana. Dinihiny tsarabe atsika. Alainy onon̈o tany fandihanantsika ndreky raha tiantsika, baka io vilariny amy zay fandrikinany. Man̈anten̈a baka izy fa ho azony amy fandrikinany aby io atsika, amy lera tsy ampoizin̈y. Fa ny raha mampahery, Baiboly mivolan̈a fa ndray san̈atria atsika efa navoafandrikiny Satana, mbala posibla ho vôsotro fo. Koran̈iny Baiboly koa raha mety hataontsika baka atsika tsy ho voafandrikiny Satana.

2. Ino fandriky aroe ten̈a mahômby fampiasainy Satana?

² Karaha fataony pamandriky vôron̈o man̈ambela fandriky harato na dity na raha hafa in̈y ataony Satana mamandriky atsika. (Sal. 91:3) An̈isany fandriky aroe ten̈a mahômby fampiasainy Satana, tan̈atiny andrivony taon̈o zay: Fan̈ambonianten̈a ndreky fan̈irian̈a tsy mety afapô. * Nakiry izy, fandriky aby io mety hiarivan̈a. Nan̈ino? Fotony efa nambarany Jehovah atsika tsialohaloha ino aby tetiky ampiasainy Satana.​—2 Kor. 2:11.

3. Nan̈ino ma Jehovah nampanoratra tantara sasany amy Baiboly ao?

³ Mampitandrin̈y atsika i Jehovah baka atsika tsy han̈ambony ten̈a ndreky tsy hanan̈a fan̈irian̈a tsy mety afapô. Zen̈y mahavy izy mampirisiky atsika hangala fianaran̈a baka tamy raha navoa panomponany taloha tan̈y. Handiniky sasantsasany amy zen̈y atsika ato. Ho hitantsika ato fa mbala mety ho voafitakany Satana  fo olo araiky ndray fa nanompo Jehovah tan̈atiny taon̈otaon̈o. Zen̈y ma mivolan̈a fa tsisy raha mety hataontsika eky? Tsy zen̈y foeky! Nirahiny Jehovah nisoratin̈y amy Baiboly ao tantara aby zen̈y misy ‘hampitandreman̈a atsika.’ (1 Kor. 10:11) Hainy Jehovah baka fa izikoa atsika man̈araka fampitandreman̈a aby zen̈y, atsika tsy ho voafandrikiny Devoly. Ary ndray atsika efa navoafandriky, mbala ho afaka hiala fo.

4. Han̈ano akory hiafaranolo man̈ambony ten̈a?

⁴ Tiany Satana han̈ambony ten̈a atsika. Hainy baka fa ho miran̈a izy atsika izikoa man̈ano zen̈y, ke tsy hiain̈y mandrakizay foeky. (Ohab. 16:18) Zen̈y koa nahavy apostoly Paoly nampitandrin̈y fa olo araiky koa ‘man̈ambony ten̈a’, hahazo izy koa sazy miambin̈y Devoly. (1 Tim. 3:6, 7) Mety hahavoa atsika jiaby raha zen̈y, na vo tsy ela nanompoantsika Jehovah na efa ela.

5. Koa Mpitoriteny 7:16, 20 zahan̈a, akory mety ahitan̈a fa olo araiky man̈ambony ten̈a?

⁵ Tia ten̈a olo man̈ambony ten̈a zen̈y. Ataony Satana raha hahavy atsika ho tia ten̈a ke tsy hifantoko amy Jehovah eky fa hifantoko aminy ain̈intsika fo, intsaka eky lera misy problemo. Ohatra iziô, anao ma efa navy nan̈odianolo raha tsy nataonao? Sa anao efa navy navoa raha tsy rariny? Tiany Satana han̈amia tsin̈y Jehovah na han̈amia tsin̈y piaramanompo anao izikoa fa sendra raha karaha zen̈y. Tiany Satana koa anao hieritreritry fa hevitrinao fo mahavaha problemo io, fa tsy mila man̈araka taridalan̈any Jehovah amy Volan̈anany ao.​—Vakia Mpitoriteny 7:16, 20.

6. Ino raha ianaranao baka tamy raha nataony ranabavy araiky baka a Pays-Bas?

⁶ Iritrireta raha navoa ranabavy araiky mipetraka a Pays-Bas an̈y. Nampahinihiny izy mare raha nataony piaramanompo. Ke tsy tihifandray tamindro eky izy. Ho izy: “Nahatsiaro latsatokan̈a mare zaho, kanefa tsy vitako foeky nan̈ambela hadisovan̈andro. Ke ho zaho tamy vadiko: ‘Sitrany atsika mifindra fiangonan̈a ay!’ ” Ranabavy io amy zay nizaha Tele JW Marsy 2016. Fandaharan̈a io nikoran̈a fomba hiatrefan̈a tsy fahalavorarian̈any piaramanompo. Karaha ty koa ho ranabavy io: “Nanjary nazava taminaka fa zaho tsy tokony han̈izingizin̈y oe  mila miova iro piaramanompo aby io. Fa mila mandininten̈a ndreky manetry ten̈a antsendriky zaho, ke han̈eky fa zaho koa mba diso. Avio zaho tokony hifantoko amy Jehovah fo ndreky zònany hitondra.” Asa mazava aminao ino raha tiantsika havian̈a? Izikoa fa misy problemo, Jehovah fo tokony hatao an̈atiny jery. Iangavia izy han̈ampy anao, baka hitovy amy ninany fomba fizahavanao olo. Aleva onon̈o fa hitany Babanao andan̈itry an̈y hadisovan̈any piaramanompo aminao aby io, kanefa von̈ono izy han̈ambela hadisovan̈andro. Ke tiany han̈ano karaha zen̈y koa anao.​—1 Jaona 4:20.

7. Ino ma raha navoa Panjaka Ozia?

⁷ Nan̈ambony ten̈a i Ozia panjakany Joda, ke zen̈y nahavy izy tsy nan̈eky anatra ndreky nasaky nan̈ano raha tsy nazahoany lalan̈a. Maro raha tsara vitany. Ohatra iziô, vitany nandresy fahavalony vahoakany Jehovah. Niasa tanàna marobe koa izy, sady nanan̈a tany fambolian̈a maro. ‘Nataony Jehovah nahômby aby raha jiaby nataony.’ (2 Tan. 26:3-7, 10) ‘Kanefa Ozia koa fa nanjary natanjaka mare, nanjary nirehareha fônany ke raha zen̈y namandriky izy.’ Jehovah efa nan̈aboaka didy fa tsisy olo mahazo manolotro emboko man̈itry amy tempoly ao, izikoa tsy pisoron̈o fo. Kanefa Panjaka Ozia ninehaneha, ke raha tsy nan̈omboan̈a izy edy nataony. Neloko taminany mare i Jehovah, ke nataony boka i Ozia firaka izy naty.​—2 Tan. 26:16-21.

8. Izikoa 1 Korintianina 4:6, 7 zahan̈a, ino raha han̈ampy atsika tsy han̈ambony ten̈a?

⁸ Mety ho takatrany fandriky navoa i Ozia io koa ma atsika ke han̈ambony ten̈a? Ia. Diniha baka raha navoa antipan̈ahy araiky ty, José an̈arany. Nandeha mare varotrony rahalahy io, ke ten̈a nanandraha izy. Najain̈a koa izy tan̈ivony fiangonan̈a, sady an̈isany pan̈ano kabaro tamy fivoriambe. Nangataka torohevitry taminany aby firaka tamy piandraikitry faritry. Ino fo basy problemo? Karaha ty ho rahalahy io: “Nanjary tsy nitavandra Jehovah eky zaho, fa nitavandra fahaizan̈anaka ndreky traikefa nanan̈ako fo. Zaho nanjary natoky ten̈a loatra! Nihevitry zaho in̈y fa efa matanjaka arapan̈ahy mare, ke efa tsy nitandrin̈esako eky fampitandreman̈any Jehovah ndreky torohevitrinany.” Nan̈ano fahotan̈a maventy i José, ke voaroaka. Tafimpody an̈isany fiangonan̈a ndraiky izy taon̈o vitsivitsy tafara tatỳ. Karaha ty ho izy: “Nampianariny Jehovah zaho fa tsy tombontsoampanompoan̈a ny raha ten̈a maventy fa fan̈aovan̈a raha nan̈irahany atsika.” Tsy mila adin̈antsika fa baka amy Jehovah aby fahaizan̈antsika  ndreky andraikitry namezan̈a atsika an̈ivony fiangonan̈a. (Vakia 1 Korintianina 4:6, 7.) Ke tsy hampiasa atsika eky Jehovah izikoa atsika man̈ambony ten̈a.

9. Nanjary nan̈ino i Satana ndreky Eva, iro koa fa nanjary tsy afapô tamy raha nanan̈andro?

⁹ Atsika koa fa mikoran̈a momba fan̈irian̈a tsy mety afapô zen̈y, mety efa i Satana Devoly edy donko ny raha avy an̈atiny jerintsika. Taminizy mbala nanompo Jehovah, hay be fa maro tombontsoa nanan̈any. Kanefa tsy nahampy izy raha zen̈y. Tiany izy foeky tompoen̈a, kanefa efa hainy tsarabe fa i Jehovah zaraiky fo vain̈y atao zen̈y. Tiany Satana han̈ano karaha izy koa atsika, ke zen̈y mahavy izy tsy vôly man̈ano raha hahavy atsika tsy mety ho afapô amy raha anan̈antsika. Taminizy nikoran̈a taminy Eva in̈y izy nikomansy nan̈ano raha zen̈y. Jehovah be fitiavan̈a, ke namezany hanin̈y maro tsara i Adama ndreky Eva. Nambelany iro hihinan̈a ‘voany kakazo jiaby’ tamy zaridain̈y Edena tao, fa voany kakazo araiky fo tsy nimboàny Jehovah nihoanindro. (Gen. 2:16) Voafitaka i Eva, ke nanjary nieritreritry izy fa ten̈a nila nihinan̈a voany kakazo tsy nimboàny Jehovah nihoanindro io izy. Nanjary tsy nahafapô izy eky raha jiaby efa nanan̈any ke nitady raha hafa koa izy. Efa haintsika niafarany Eva: Nanota izy, baka io naty izy tamy farany.​—Gen. 3:6, 19.

10. Nan̈ano akory Panjaka Davida koa fa nanjary nanan̈a fan̈irian̈a tsy mety afapô?

¹⁰ Mety mangala fianaran̈a baka amy tantarany Panjaka Davida koa atsika. Farandraha maro eky hatsaran̈a namezany Jehovah izy, an̈isanizen̈y: Fanan̈ana ndreky plasy an̈abo. Matetiky koa izy naharesy fahavalo maro. Nankasitraka Jehovah mare izy, fotony hainy fa ‘maro ankitin̈y’ hatsaran̈a namezany Jehovah izy ke “tsy avoakonty” foeky. (Sal. 40:5) Fa nisy fotoan̈a izy nanjary nanan̈a fan̈irian̈a tsy mety afapô, ke nadin̈any raha jiaby efa namezany Jehovah izy. Tsy nahafapô izy eky raha nanan̈any fa mbala nitady raha hafa koa izy. Nanan̈a vady maro i Davida, fa izy mbala nan̈iry vadinolo fo! Tsy azovy zen̈y fa Batseba vadiny Oria. Tia ten̈a i Davida ke izy nandry tamy Batseba. Navesatra i Batseba baka tio. Tsy zen̈y fo fa, mbala nan̈ano raha koa Davida hamonoan̈a i Oria. (2 Sam. 11:2-15) Ten̈a diso hevitry i Davida tamy fotoan̈a io. Tsy tan̈atiny jerinany foeky fa hitany Jehovah aby raha jiaby nataony. Marin̈y ndraiky fa tsy nivadiky tamy Jehovah izy tan̈atiny taon̈otaon̈o, kanefa nanjary nanan̈a fan̈irian̈a tsy mety afapô  izy. Nivangainy lafo raha zen̈y. Nakiry izy, Davida nibebaka tamy fahotan̈a vitany. Misaora ravoravo mare izy koa fa nambelany Jehovah hadisovan̈anany!​—2 Sam. 12:7-13.

11. Izikoa Efesianina 5:3, 4 zahan̈a, ino raha han̈ampy atsika tsy ho resiny fan̈irian̈a tsy mety afapô?

¹¹ Ino raha ianarantsika baka tamy Davida? Izikoa atsika tsy tihanan̈a fan̈irian̈a tsy mety afapô, mila mankasitraka raha jiaby amezany Jehovah fo atsika. (Vakia Efesianina 5:3, 4.) Mila mifen̈y mare atsika ho afapô amy raha efa anan̈antsika. Atsika koa fa mampianatra Baiboly, ndraikindraiky atsika mety hampirisiky pianatrantsika hieritreritry raha tsara araiky nataony Jehovah taminazy, tan̈atiny andra araiky. Ke izikoa izy man̈ano zen̈y, isanandra, an̈atiny herin̈iandra, hahita antony fito han̈anaovan̈a mersy Jehovah edy izy. (1 Tes. 5:18) Karaha zen̈y koa, izikoa anao mieritreritry raha tsara jiaby nataony Jehovah taminao, manjary tihankasitraka izy edy anao sady ho afapô amy raha efa anan̈anao. Ke tsy ho voafandrikiny fan̈irian̈a tsy mety afapô foeky anao.

12. Nan̈ano akory Jodasy koa fa nanan̈a fan̈irian̈a tsy mety afapô?

¹² Baka amy fan̈irian̈a tsy mety afapô nahavy Jodasy tsy nen̈atra nivadiky tamy Jesosy. Kanefa, izy tamy voanalohany tsy karaha zen̈y foeky. (Lioka 6:13, 16) Jesosy nifidy izy hanjary apostoly. Matoa izy nirahin̈y niandraikitry boatimbola, dikanizen̈y izy nahay sady natokisan̈a. Vola tamy boaty io nampiasainy Jesosy ndreky iro apostolinany aby io hivangan̈a raha nilaindro tamy fanompoan̈a. Raha zen̈y miramiran̈a amy fan̈amezan̈a atao hanohanan̈a asa fitorian̈a erantany amy zioty. Fa izikoa fa nandeha fotoan̈a, komansy nangalangalatra i Jodasy. Matetiky Jesosy nampahatsiaro iro fa fan̈irian̈a tsy mety afapô io fandriky. (Mar. 7:22, 23; Lioka 11:39; 12:15) Tsy nahoany Jodasy foeky fampitandreman̈a aby zen̈y.

13. Ombian̈a ten̈a nahitan̈a fa nanan̈a fan̈irian̈a tsy mety afapô i Jodasy?

¹³ Taloha heliny namonoan̈a Jesosy, nahainibaribary fo fa nanan̈a fan̈irian̈a tsy mety afapô i Jodasy. Jesosy ndreky pianatranany taminio niainviteny Simona boka. Tao koa i Maria ndreky rahavaviny, Marta an̈arany. Iro mbala tampihinanan̈a fo, nitsangana i Maria nan̈idin̈y menaka man̈itry tamy lohany Jesosy. Lafo vangany menaka io! Ke neloko mare i Jodasy ndreky pianatra hafa koa fa nahita zen̈y. Tan̈atiny jerindro pianatra hafa aby io, menaka io tokony nalafo han̈ampian̈a olo masikiny. Kanefa tsy honohono ho zen̈y foeky raha tan̈atiny jeriny Jodasy. Izy baka ‘pangalatra’, ke hangalatra vola tan̈atiny boaty io fo raha nahasetry izy. Tafara tatỳ, mbala tsy afapô fo izy ke namadiky Jesosy tamy farantsa volafotsy 30, vola nivangan̈a andevo araiky.​—Jaona 12:2-6; Mat. 26:6-16; Lioka 22:3-6.

14. Akory nan̈arehanolo fivadiany raha koran̈iny Lioka 16:13?

¹⁴ Jesosy nampatsiaro pan̈aradia izy karaha ty: ‘Anaro tsy mahay manompo Zan̈ahary sady manompo Harian̈a.’ (Vakia Lioka 16:13.) Mbala marin̈y fo volan̈a zen̈y firaka iziô. Nisy olo fivadiany baka a Roumanie zay nan̈araka torohevitry io. Nahita asa tsy mahadin̈y ela kanefa be karama iro, tamy firenena manambola. Karaha ty ho iro: “Nisy volabe nila nifainay tamy banky, ke nieritreritry zahay tamy voanalohany fa fitahian̈a baka tamy Jehovah asa io.” Fa problemo fo, mety han̈elingelin̈y fanompoan̈andro izio. Nisy lahatsoratra tamy Ny Tilikambo Fiambenana 15 Aoty 2008 zay ten̈a nan̈ampy iro. Titrany lahatsoratra io: “Aza Mivadika fa Manompoa Amin’ny Fo Manontolo.” Iro koa fa baka namaky izio, nanapakevitry iro fa tsy han̈ano asa io. Karaha ty nambarandro: “Mety nahazo volabe marin̈y ndraiky zahay izikoa nandeha nitady vola tantany hafa, kanefa hihen̈y fanompoan̈anay. Tsapanay fa handrobaka fihavan̈anay amy Jehovah raha zen̈y.” Ino raha nandalo tafaranizen̈y? Nahita asa tamy tany nisy izy fo rahalahy  io, avio karamanany nahavita depansindro jiaby. Karaha ty koa ho ranabavy io: “Tsy fôhiky foeky tan̈anany Jehovah!” Ravoravo iro roe fivadiany fotony Jehovah fo nitompoendro fa tsy vola ndreky fanan̈ana.

15. Nan̈ino atsika matoky fa olo araiky ndray latsaka tamy fandrikiny Satana, izy mbala posibla ho tafiala fo?

¹⁵ Nanan̈a fan̈irian̈a tsy mety afapô i Davida, kanefa vitany fo niala fandrikiny Devoly io. Akory nataony? Natana koa fa nan̈anatra izy, nitandrin̈esany tsarabe, baka io izy nibebaka. Nan̈ano raha izy hihavanan̈a ndraiky tamy Jehovah. Karaha zen̈y koa atsika. Ndraikindraiky mety tsapanao fa anao efa man̈ambony ten̈a na efa manan̈a fan̈irian̈a tsy mety afapô. Izikoa zen̈y, tsaraova fa anao mbala afaka miova. Nivolan̈a Paoly fa mbala afaka miala fo olo araiky ndray fa latsaka tamy fandrikiny Devoly. (2 Tim. 2:26) Tsaraova fo fa Satana tsy mety hahadin̈y angovony Jehovah. Ke izikoa atsika man̈eky ampiany Jehovah, ho vitantsika fo koa hiala fandriky jiaby ataony Satana.

16. Ino raha han̈ampy atsika hahavita hiary fandrikiny Satana?

¹⁶ Olo araiky ndray avoafandrikiny Satana, mbala mety ho tafiala fo. Kanefa tsisy tsaratsarany miary! Ho vitantsika tsarabe han̈ano zen̈y, izikoa atsika mitavandra fan̈ampiany Zan̈ahary. Tsy tokony hatoky ten̈a loatra koa atsika, fotony ndray olo araiky efa ela nanompoan̈a Jehovah, mbala mety han̈ambony ten̈a na hanan̈a fan̈irian̈a tsy mety afapô fo. Akory ahaizanao fa efa misy toetry ratsy aby io anao? Iangavia fo Jehovah, isanandra, han̈ampy anao handiniky eritreritrinao ndreky raha ataonao. (Sal. 139:23, 24) Mifen̈a angovo jiaby tsy han̈ambony ten̈a na hanan̈a fan̈irian̈a tsy mety afapô!

17. Tsy ho ela, han̈ano akory hiafarany Devoly fahavalontsika io?

¹⁷ Efa andrivony taon̈o zay namandrihany Satana olo. Kanefa, tsy ho ela izy hivahaoran̈a ndreky higadrain̈a, avio haripaka. (Apok. 20:1-3, 10) Efa tsy din̈intsika aviany fotoan̈a zen̈y! Fa parpavianizen̈y, atsika mila mahimahin̈y fo amy zay tsy ho voafitakany Satana. Mifen̈a angovo jiaby tsy han̈ano raha hahavy anao han̈ambony ten̈a na hanan̈a fan̈irian̈a tsy mety afapô. Irarian̈a koa anao ho tapakevitry ‘hanohitry Devoly, amy zen̈y izy hilefa anao.’​—Jak. 4:7.