1. Ino torohevitry namezany apostoly Petera, baka io nan̈ino ma torohevitry zen̈y karaha sarotro arehan̈a?

NA MAN̈ANTEN̈A hiain̈y andan̈itry atsika na ambony tany, mahatsara atsika mandiniky torohevitry namezany apostoly Petera iro Kristianin̈y voahosotro tamy taonjato voanalohany ty: “Masin̈y araiky nikaiky anaro io, ke tokony ho masin̈y koa anaro amy fitondranten̈anaro jiaby, fotony karaha ty raha efa voasoratra: ‘Tsy maintsy masin̈y anaro, fotony zaho masin̈y.’ ” (1 Pet. 1:15, 16) Hitantsika baka amy volan̈a aby zen̈y fa tsisy masin̈y mandilatra Jehovah, kanefa afaka mangala tahaka izy fo atsika. Ny marin̈y aminany, tsy maintsy masin̈y atsika amy raha jiaby ataontsika. Zahan̈a karaha sarotro raha zen̈y, fotony atsika tsy lavorary. Ôtry ataony Petera, maro hadisovan̈a vitany. Kanefa, hita baka tamy raha nataony fa ho vitantsika fo han̈ano raha hahavy atsika “ho masin̈y.”

2. Ino aby fan̈ontanian̈a hidinihintsika ato?

² Handeha hamaly fan̈ontanian̈a aby ty atsika amy lahatsoratra ty ato: Ino ma dikany masin̈y zen̈y? Ino raha ampianariny Baiboly atsika momba fahamasin̈any Jehovah? Akory hahavy atsika ho masin̈y amy raha jiaby, avio ino vokatranizen̈y amy fifandraisantsika amy Jehovah?

3. Karakory ma fahaizanolo dikany masin̈y zen̈y, baka io aia ten̈a ahaizantsika dikanizio?

³ Maro olo mieritreritry fa olo araiky masin̈y zen̈y, mentitry mare baka io tsy mimoemoe foeky, sady misikin̈y lamba mampiavaka pitondra fivavahan̈a. Kanefa tsy marin̈y zen̈y, fotony Jehovah Zan̈ahary masin̈y io “Zan̈ahary ravoravo.” (1 Tim. 1:11) “Sambatra” lan̈iany olo manompo izy. (Sal. 144:15) Jesosy tsy nankasitraka olo nisikin̈y lamba miavaka ndreky man̈ano sary man̈ano ny marin̈y kanefa tsisy atà. (Mat. 6:1; Marka 12:38) Amy maha Kristianin̈y atsika, mila haintsika ino marin̈y dikany masin̈y zen̈y amy Baiboly ao. Haintsika koa fa tiany Jehovah atsika, ke izy tsy mety han̈iraka atsika han̈ano raha tsy  ho vitantsika. Ke matoa Jehovah nivolan̈a fa “tsy maintsy masin̈y anaro”, dikanizen̈y, vitantsika raha zen̈y. Fa mila mazava amintsika antsendriky ino dikany masin̈y zen̈y.

4. Ino ma dikany “masin̈y” zen̈y?

⁴ Ino ma dikany masin̈y zen̈y? Amy Baiboly ao, dikany “masin̈y” na “fahamasin̈ana” zen̈y madio, na amy fitondranten̈a zen̈y na amy fivavahan̈a. Izio koa mety ivolan̈ana olo na raha natokan̈a amy fanompoan̈a Zan̈ahary. Izikoa atao volan̈a hafa, mety koran̈iny masin̈y atsika: 1) Izikoa atsika madio fitondranten̈a, 2) izikoa ikeny Zan̈ahary fomba anompoantsika izy, avio 3) izikoa atsika manan̈a fifandraisan̈a marikitry aminany. Miniminia hely baka zen̈y! Jehovah farany masin̈y, kanefa izy mbala von̈ono hinaman̈a amintsika olombelon̈o tsy lavorary fo. Tsy hitanao mampahery raha zen̈y?

5. Ino raha haintsika momba Jehovah, baka amindro anjely tsy mivadiky aby io?

⁵ Jehovah madio amy lafiny jiaby. Karaha ty ho sasany tamy serafima, anjely ten̈a marikitry sezy fiandrianan̈any Jehovah: “Masin̈y, masin̈y, masin̈y Jehovah Tômpiny tafiky!” (Isaia 6:3) Matoa iro anjely aby io afaka mifandray amy Zan̈aharindro masin̈y io, dikanizen̈y iro koa mba masin̈y. Taloha tan̈y, anjely aby io nitondra hafatra handeha aminolombelon̈o. Ke zay tany nidiavindro, nanjary masin̈y koa. Zen̈y iziô raha nandalo, Mosesy koa fa nan̈aton̈o tany nisy raha maniry nirehitry kanefa tsy nety may in̈y.—Eks. 3:2-5; Jos. 5:15.

6-7. a) Koa Eksodosy 15:1, 11 zahan̈a, akory nan̈aboahany Mosesy fa masin̈y Jehovah? b) Ino koa raha nampatsiaro iro Israelita aby io fa Jehovah masin̈y? (Zahava sary amy fon̈ony gazety ty.)

⁶ Tafarany Mosesy nitariky iro Israelita aby io namakivaky Ranomasin̈y Mena, namafisiny Mosesy tsarabe fa Jehovah Zan̈aharindro io masin̈y. (Vakia Eksodosy 15:1, 11.) Hita tamy fitondranten̈anolo nivavaka tamy zan̈aharindro Ezipsianin̈y aby io, fa iro tsy masin̈y. Karaha zen̈y koa iro nanompo zan̈ahariny Kananita. Iro nan̈ano sôron̈o zazamena avio nan̈araka fombafomba misy ifandraisany amy firaisan̈a. (Lev. 18:3, 4, 21-24; Deot. 18:9, 10) Jehovah tsy miran̈a iro zan̈ahary diso aby io. Izy tsiary nan̈iraka panomponany han̈ano raha tsy manjary karaha zen̈y. Jehovah ten̈a masin̈y. Nirahiny nasian̈a takelaka volamena tamy satrokony pisoron̈obe, amy zen̈y tsy adin̈andro Israelita aby io fa masin̈y Jehovah. Ty raha nisoratra tamy takelaka volamena io: ‘Jehovah tômpiny fahamasin̈ana.’—Eks. 28:36-38.

⁷ Nazava taminolo nahita soratra tamy takelaka volamena io tsarabe fa Jehovah ny ten̈a masin̈y. Akory fo basy izikoa Israelita araiky tsy nahita soratra io, fotony izy tsy afaka nan̈aton̈o pisoron̈obe? Mbala ho hainy fo ma fa Jehovah masin̈y? Ia. Afaka naharen̈y hafatra tamy takelaka io aby Israelita jiaby, fotony Lalàn̈any Zan̈ahary nivakian̈a taminolo jiaby, na lelahy zen̈y na viavy na tsaiky. (Deot. 31:9-12) Izikoa donko anao mba tan̈y tamy zen̈y, azo antoko fa ren̈inao koa koran̈a ty: ‘Zaho Jehovah Zan̈aharinaro, ke tsy maintsy masin̈y anaro, fotony zaho masin̈y.’ ‘Tsy maintsy masin̈y anaro, fotony zaho, Jehovah, masin̈y.’—Lev. 11:44, 45; 20:7, 26.

8. Ino raha ianarantsika baka amy Levitikosy 19:2 ndreky 1 Petera 1:14-16?

⁸ Atsika iziô handiniky Levitikosy 19:2. Izio nirahiny Jehovah nivakiany Mosesy tamindro Israelita aby io. Ho izy: “Volàn̈a amy vahoakany Israely jiaby: ‘Tsy maintsy masin̈y anaro, fotony zaho, Jehovah Zan̈aharinaro, masin̈y.’ ” Mety andininy io donko niton̈oniny Petera, taminizy nivolan̈a fa Kristianin̈y “tokony ho masin̈y.” (Vakia 1 Petera 1:14-16.)  Marin̈y ndraiky fa tsy fiheziny Lalàn̈any Mosesy eky atsika. Kanefa, hitantsika amy raha nisoratiny Petera io fa, mbala misy raha ianarantsika fo baka amy Levitikosy 19:2 io. Tsy ino zen̈y fa, Jehovah masin̈y ke tsy maintsy masin̈y koa lan̈iany olo tia izy, na man̈anten̈a hiain̈y andan̈itry izy na amy Paradisa ambony tany.—1 Pet. 1:4; 2 Pet. 3:13.

9. Nan̈ino mahatsara atsika mandiniky raha koran̈iny Levitikosy toko 19?

⁹ Tihan̈ano raha mamparavoravo Zan̈aharintsika masin̈y io atsika, ke zen̈y mahavy atsika tihahay akory hahavy atsika ho masin̈y. Misy torohevitry tsara amy Levitikosy toko 19 ao. Ambarany Jehovah ao raha tokony hataontsika baka atsika ho masin̈y. Manampahaizan̈a momba teny hebreo i Marcus Kalisch. Karaha ty ho izy: “Izikoa dinihin̈y raha koran̈iny Levitikosy jiaby ndreky boky dimy voanalohany amy Baiboly, raha koran̈iny Levitikosy toko 19 ny ten̈a matomboko.” Fotony nan̈ino? Miaraka anao man̈okatra Levitikosy toko 19, ty raha hita ao: “Tsy maintsy masin̈y anaro.” Ke atsika iziô handiniky andininy sasany amy Levitikosy toko 19, fotony andininy aby zen̈y han̈ampy atsika ho masin̈y amy lafiny maro amy fiain̈anantsika.

10-11. a) Koa zahan̈a Levitikosy 19:3, ino raha mila ataontsika? b) Nan̈ino raha zen̈y ten̈a maventy?

¹⁰ Karaha ty ho Jehovah, izy koa fa baka nivolan̈a tamindro Israelita aby io fa iro mila ho masin̈y: “Olo tsiaraikiaraiky aminaro ao mila man̈aja reniny ndreky babany... Zaho Jehovah Zan̈aharinaro.”—Lev. 19:2, 3.

¹¹ Mazava taridalan̈any Zan̈ahary io: Mila man̈aja olobentsika atsika. Aleva onon̈o baka raha nivolan̈iny Jesosy, izikoa fa nisy lelahy araiky nan̈ontany izy karaha ty: ‘Ino ma raha tsara tsy maintsy ataoko baka zaho hahazo fiain̈ana mandrakizay?’ An̈isany raha nambarany Jesosy izy tamy zen̈y, izy mila man̈aja babany ndreky reniny. (Mat. 19:16-19) Ndray Jesosy aby nan̈amia tsin̈y iro Fariseo ndreky panoratra lalàn̈a aby io, fotony iro nitady fialantsin̈y tsy hikarakaran̈a olobendro. Nanjary ‘tsy nanankery volan̈a Zan̈ahary’ baka tamy raha nataondro zen̈y. (Mat. 15:3-6) An̈isany ‘volan̈a Zan̈ahary’ didy faha-5 amy Didy Folo,  ndreky raha koran̈iny Levitikosy 19:3. (Eks. 20:12) Tsara alaintsika onon̈o koa fa, tafarany Jehovah nivolan̈a fa “tsy maintsy masin̈y anaro, fotony zaho, Jehovah Zan̈aharinaro, masin̈y”, izy direkty nivolan̈a fa mila hajain̈a raimandreny, eraka raha koran̈iny Levitikosy 19:3 io.

12. Mifan̈araka amy raha koran̈iny Levitikosy 19:3, ino fan̈ontanian̈a mila apetrakantsika aminy ain̈intsika?

¹² Atsika koa fa mandiniky torohevitriny Jehovah momba fan̈ajan̈a raimandreny io, ty raha tsara iritriretintsika: ‘Asa zaho mba man̈aja iry olobeko?’ Izikoa tsapanao fa misy raha mbala tokony hankatsarainao, man̈ovoà direkty. Anao tsy afaka man̈aova raha fa lôso, kanefa anao afaka man̈ano zay vitanao han̈ampian̈a iro. Ohatra, mivanga raha hitanao fa ilaindro, na mampahery iro, na man̈ampy iro hihavan̈a tsara amy Jehovah ndreky hanompo izy. Manokàn̈a fotoan̈a koa hiarahan̈a amindro matetiky. Man̈araka raha koran̈iny Levitikosy 19:3 anao izikoa man̈ano zen̈y.

13. a) Ino koa raha hafa iaranantsika baka amy Levitikosy 19:3? b) Akory mety han̈arehantsika raha nataony Jesosy, koran̈iny Lioka 4:16-18?

¹³ Ankoatrany fan̈ampian̈a atsika ho masin̈y, misy raha hafa koa ianarantsika baka amy Levitikosy 19:3 io. Izio mikoran̈a momba fitandreman̈a Sabata. Tsy mitandrin̈y Sataba isaka herin̈iandra atsika, fotony atsika tsy fiheziny Lalàn̈any Mosesy. Fa ndray zen̈y, mbala misy raha hafa ianarantsika baka amy fomba nitandremandro Israelita aby io Sabata, ndreky fomba nazahoandro hatsaran̈a baka tamy fan̈anaovan̈a zen̈y. Koa fa Sabata, iro tsy nahazo niasa foeky fa nifantoko tamy fanompoan̈a Zan̈ahary fo. * Zen̈y nahavy Jesosy nandeha tamy Synagoga ta Nazareta namaky Volan̈a Zan̈ahary, isaka Sabata. (Eks. 31:12-15; vakia Lioka 4:16-18.) Amy Levitikosy 19:3, Jehovah nivolan̈a fa ‘mila tandreman̈a sabatanany.’ Izio tokony handrisiky atsika hitady fotoan̈a han̈anaovan̈a raha arapan̈ahy fo isanandra. Izikoa tsapanao fa mbala misy raha tokony hankatsarainao momba zen̈y, aza misalasala man̈aova. Hahaiharikitry Jehovah fo anao izikoa manokan̈a fotoan̈a han̈anaovan̈a raha arapan̈ahy isanandra. Ary raha zen̈y han̈ampy anao ho masin̈y.

14. Ino fampianaratra fôtotro mimpodipody amy Levitikosy toko 19 ao?

¹⁴ Misy fampianaran̈a fôtotro araiky mimpodipody amy Levitikosy toko 19 ao. Izio man̈ampy atsika ho masin̈y fo. Karaha ty koran̈iny tapany farany aminy andininy faha-4: “Zaho Jehovah Zan̈aharinaro.” Volan̈a zen̈y mimpody in-16 amy toko io. Mampatsiaro atsika didy voanalohany amy Didy Folo ty raha zen̈y: ‘Zaho Jehovah Zan̈aharinao. Aza manan̈a Zan̈ahary hafa izikoa tsy zaho fo.’ (Eks. 20:2, 3) Ino raha mila ataontsika tsiaraikiaraiky izikoa atsika tiho masin̈y? Mila alaintsika antoko fa tsisy raha na olo hatakalontsika fihavanan̈antsika amy Zan̈ahary. Tapakevitry atsika tsy han̈ano raha mangala baraka an̈aran̈anany masin̈y, fotony Vavolombelon̈o Jehovah ikahian̈a atsika.—Lev. 19:12; Isaia 57:15.

15. Tokony handrisiky atsika han̈ino Levitikosy 19:5-8, 21, 22?

¹⁵ Izikoa Jehovah nataondro Israelita aby io Zan̈aharindro, iro nan̈araka lalàn̈anany. Levitikosy 18:4 mivolan̈a: “Mila hampiharinaro didipitsaran̈anaka, baka io mila tandremanaro ndreky harehanaro lalàn̈anaka. Zaho Jehovah Zan̈aharinaro.” Levitikosy toko 19 an̈isany “lalàn̈a” tsy maintsy nitandremany Israelita. Amy  Levitikosy 19:5-8, 21, 22 iziô mikoran̈a momba sôron̈o biby. Iro Israelita aby io koa fa nan̈ano soron̈o biby, tsy maintsy narehandro tsara toromarikiny Jehovah momba raha zen̈y, amy zen̈y iro tsy ‘handoto an̈aran̈a masin̈iny Jehovah.’ Tokony hisy vokany amintsika famakiantsika andininy aby io. Ohatra, tokony handrisiky atsika han̈iry han̈ano raha mamparavoravo Jehovah izio, avio han̈ano sôron̈o fideran̈a izy, karaha lay ampirisihin̈y ataontsika aminy Hebreo 13:15 ao.

16. Ino raha han̈ampy atsika hiavaka aminolo tsy manompo Jehovah?

¹⁶ Baka atsika ho masin̈y, mila aboakantsika fa atsika tsy mitovy aminolo tsy manompo Jehovah. Mety tsy ho mora raha zen̈y. Fotony ndraikindraiky, mety hisy olo lekaoly araiky amintsika na olo miaraka miasa amintsika na havan̈a tsy vavolombelon̈o, hiforse atsika han̈ano raha mifanohitry amy raha inoantsika. Izikoa iro fa man̈ano zen̈y, misy fanapahankevitry maventy mila ataontsika. Hahay hanapakevitry atsika izikoa mandiniky toro lalan̈a amy Levitikosy 19:19 ty: ‘Aza misikin̈y lamba vita tamy taretry aroe karazany.’ Lalàn̈a io nan̈ampy iro Israelita aby io hiavaka tamy firenena man̈odidin̈y. Amy zioty, atsika tsy fiheziny Lalàn̈any Mosesy, ke tsisy maharatsy atsika misikin̈y lamba namboarin̈y tamy raha samby isany, karaha ataony kôton ndreky nilon. Kanefa, atsika tsy han̈eky tahôminolo han̈ano raha mifanohitry amy raha ampianariny Baiboly, na olo lekaoly araiky amintsika zen̈y, na olo miaraka miasa amintsika, na havantsika. Marin̈y fa tiantsika iro havantsika ndreky jiranintsika aby io. Kanefa, mila aboakantsika amy fanapahankevitry ataontsika fa, von̈ono han̈araka volan̈any Jehovah fo atsika, ndray karaha hafahafa fahitanolo atsika. Aza adin̈a fa an̈isany dikany ‘masin̈y’ zen̈y, voatokan̈a hanompo Zan̈ahary. Ke mila von̈ono hiavaka aminolo fo atsika izikoa tiho masin̈y.—2 Kor. 6:14-16; 1 Pet. 4:3, 4.

17-18. Ino leson maventy azontsika baka amy Levitikosy 19:23-25?

¹⁷ Karaha ty ho Jehovah tamindro Israelita aby io: “Zaho Jehovah Zan̈aharinaro.” Volan̈a io nampatsiaro iro fa tokony fihavanan̈andro amy Jehovah ny raha farany maventy amy fiain̈anandro. Man̈azava fomba araiky mety han̈anaovandro zen̈y Levitikosy 19:23-25. (Vakia.) Miniminia hely baka! Israelita aby io koa fa tafiditry tamy Tany Nampan̈antinain̈y, nisy raha nila nitandremandro. Ohatra iziô Israelita araiky koa fa nambôly kakazo misy voany, an̈atiny telo taon̈o izy tsy mahazo mangala ndreky mihinan̈a voany kakazo io. Amy taon̈o fahefatra ndraiky, voany kakazo io  alain̈a, fa atokan̈a ampiasain̈a tamy tran̈olay masin̈y. Efa amy taon̈o fahadimy olo io vo mahazo mihina voany kakazo natsabony io. Nianarandro Israelita aby io baka tamy lalàn̈a io fa fanompoan̈a Zan̈ahary ny raha tokony hataondro voalohantoeran̈a fa tsy sitrapôndro tômpiny. Iro nila natoky fa Jehovah han̈amia raha ilaindro, an̈isanizen̈y hanin̈y ampy tsara. Ary Zan̈ahary nampirisiky iro hazoto han̈ano fan̈amezan̈a amy tran̈olay masin̈y, foibeny fanompoampivavahan̈a tamy Jehovah.

¹⁸ Lalàn̈a amy Levitikosy 19:23-25 ao mampatsiaro atsika volan̈any Jesosy tamy Toriteny tan̈abony Bongo in̈y. Ho izy: ‘Aza miasaloha amy raha hoaninaro ndreky raha higiahanaro.’ Karaha ty koa ho izy: “Efa hainy Babanaro andan̈itry an̈y fa ilainaro raha jiaby zen̈y.” Ndray vôron̈o fo karakarainy Zan̈ahary ke intsaka eky atsika! (Mat. 6:25, 26, 32) Matoky atsika fa han̈amia raha ilaintsika Jehovah. Miezaka koa atsika ‘man̈amia raha’ han̈ampian̈a olo sahiran̈a. Ary tsy voatery ataontsika hainy aby fa izio baka amintsika. Ravoravo koa atsika man̈ano fan̈amezan̈a arabola hikarakara raha ilainy fiangonan̈a. Azony Jehovah onon̈o aby raha jiaby ataontsika zen̈y, ke izy tsy maintsy han̈amia hatsaran̈a atsika. (Mat. 6:2-4) Izikoa atsika tsy matity, ho hita fa mazava amintsika raha nianarantsika baka tamy Levitikosy 19:23-25.

19. Nan̈ino nahatsara anao nandiniky andininy vitsivitsy tamy Levitikosy toko 19 in̈y?

¹⁹ Mbala andininy vitsivitsy tamy Levitikosy toko 19 fo izy nianarantsika in̈y. Fa andininy aby io nan̈ampy atsika hahay tsarabe fomba hahavy atsika ho masin̈y, karaha Jehovah Zan̈aharintsika masin̈y. Mangala tahaka izy atsika, izikoa atsika mifen̈y ‘ho masin̈y amy fitondranten̈antsika jiaby.’ (1 Pet. 1:15) Maro olo tsy manompo Jehovah mahita fa ten̈a tsara fitondranten̈a atsika. Ke raha zen̈y mahavy olo han̈amia voninahitry Jehovah. (1 Pet. 2:12) Mbala maro raha mety hianarantsika baka Levitikosy toko 19 io. Ke mbala handiniky andininy hafa amizio atsika amy lahatsoratra man̈araka. Han̈ampy atsika “ho masin̈y” amy lafiny hafa amy fiain̈anantsika raha zen̈y, eraka fampirisihan̈a nataony apostoly Petera in̈y.