1. Akory an̈aboahany Jehovah fa izy be fitiavan̈a?

JEHOVAH ten̈a be fitiavan̈a ke ambelany hanjary an̈isany fiangonan̈a aby panomponany tsy mivadiky. Tsy mitovy raha mety ho vitantsika, fa atsika jiaby samby valera. Tsisy amintsika io koa mahavita ten̈a fa mbala mila olo hafa fo. Hazava amintsika raha zen̈y izikoa atsika fa mandiniky raha nisoratiny apostoly Paoly. Amy karakory?

2. Izikoa Efesianina 4:16 zahan̈a, nan̈ino ma atsika tokony han̈aja iro piaramanompo amintsika aby io ndreky hiaraka hiasa amindro?

² Tsisy amintsika iziô afaka mivolan̈a amy piaramanompo amintsika: “Zaho tsy mila anao.” (1 Kor. 12:21) Namafisiny Paoly raha zen̈y aminy andininteny fototrony lahatsoratra ty. Izikoa atsika man̈aja piaramanompo amintsika ndreky miaraka miasa amindro, hilamin̈y ndreky hiray sain̈y fiangonan̈a. (Vakia Efesianina 4:16.) Izikoa atsika an̈ivony fiangonan̈a mahay miaraka miasa ke miray sain̈y, hahatsiaro ho tian̈a aby olo jiaby sady ho fatatra finoan̈a.

3. Ino aby raha hidinihintsika ato?

³ Maro fomba mety han̈aboahantsika fa man̈aja iro piaramanompo aby io atsika. Fa telo amy zen̈y hidinihintsika ato: Akory fomba mety han̈aboahandro antipan̈ahy aby io fa iro mifan̈aja? Akory han̈aboahantsika amindro piaramanompo tsy manambady aby io fa iro ten̈a misy valerany amintsika? Farany, akory han̈aboahantsika amindro piaramanompo tsy mahay tsara volan̈antsika aby io fa iro ten̈a tiantsika?

4. Ino torohevitry namezany Paoly amy Romanina 12:10 ao ke tokony harehany antipan̈ahy?

⁴ Ndray tsy miran̈a raha haindro antipan̈ahy aby io, iro jiaby io samby nitindreny fan̈ahy masin̈iny Jehovah aby. (1 Kor. 12:17, 18) Misy amindro io mbala tsendriky ela nampa antipan̈ahy iro, ke mbala tsy maro raha haindro izikoa ampiran̈iny aminy antipan̈ahy hafa. Sasany ndraiky mety tsy mahavita man̈ano raha maro loatra fotony iro efa matoe na tsy salama tsarabe. Kanefa tsisy amindro io tokony hieritreritry na hivolan̈a aminy antipan̈ahy namandro: “Zaho tsy mila anao.” Antipan̈ahy tsiaraikiaraiky samby tokony han̈araka torohevitriny Paoly amy Romanina 12:10 ao.​—Vakia.

5. Akory mety han̈aboahany antipan̈ahy fa iro mifan̈aja, baka io nan̈ino raha zen̈y ten̈a ilain̈a?

⁵ Akory mety han̈aboahany antipan̈ahy fa iro mifan̈aja? Lera misy raha dinihin̈y, iro mitandren̈y tsara raha ambarany namandro. Nan̈ino raha zen̈y ten̈a ilain̈a, intsaka eky lera iro mivory? Karaha ty nambarany Tilikambo Fiambesan̈a 1 Oktobra 1988 amy teny angiley: “Mila ikeny antipan̈ahy jiaby fa vitany Jesosy mampiasa fan̈ahy masin̈y aminy antipan̈ahy araiky, na azovy izy na azovy. Izio han̈ampy iro hahatakatra tsarabe toro lalan̈any Baiboly mifandray amy raha dinihindro, na han̈ampy iro amy fanapahankevitry tsy maintsy hataondro. (Asa. 15:6-15) Fan̈ahy masin̈y io tsy miasa aminy antipan̈ahy araiky fo, fa amindro jiaby.”

6. Ino raha mety hataondro antipan̈ahy aby io izikoa iro tihiray sain̈y tsarabe? Ino vokatranizen̈y amy fiangonan̈a?

⁶ Izikoa antipan̈ahy araiky man̈aja antipan̈ahy hafa, tsy hisaraombaka hivolan̈a voanalohany fo izy isaka iro mivory. Tsy izy fo koa ivolan̈a. Baka io izy tsy hieritreritry fa hevitrinany fo ny ten̈a tsara. Fa izy mifen̈y hanetry ten̈a izikoa fa mivolan̈a hevitrinany salakady mitandren̈y hevitriny sasany koa. Ny raha ten̈a maventy, izy von̈ono han̈aboaka toro lalan̈a baka amy Baiboly sady mazoto man̈araka taridalan̈a baka amy “panompo atokisan̈a ndreky mahadiniky raha.”  (Mat. 24:45-47) Lera fivorian̈any antipan̈ahy, iro antipan̈ahy aby io koa man̈ano raha isiany fifankatiavan̈a ndreky fifan̈ajan̈a fo, hiasa amindro edy fan̈ahy masin̈y ke ten̈a hahatsara fiangonan̈a fanapahankevitry hataondro.—Jak. 3:17, 18.

7. Akory ma fahitany Jesosy iro olo tsy manambady aby io?

⁷ Amy fiangonan̈a ao ahitan̈a olo fivadiany ndreky fianakavian̈a maromaro. Fa tsy zen̈y fo, ao koa misy rahalahy ndreky ranabavy maro tsy manambady. Akory ma tokony fahitantsika iro io? Atsika tokony hangala tahaka fomba fahitany Jesosy iro. Taminizy tambony tany teto, izy tsy nanambady. Andraikitrinany fo ny raha ten̈a nifantohany jerinany ndreky nandaniany fotoan̈a. Jesosy tsiary nampianatra fa Kristianin̈y zen̈y tsy maintsy manambady. Izy koa tsiary nivolan̈a taminolo fa fady manambady. Misy olo sasany, ho izy, mety hifidy tsy hanambady. (Mat. 19:11, 12) Kanefa Jesosy tsy nan̈ambany iro, izikoa iro nifidy tsy hanambady. Izy tsy nieritreritry fa iro io ambanimbany tozay olo manambady na koa misy raha manky amy fiain̈anandro.

8. Eraka raha koran̈iny 1 Korintianina 7:32-35, 38, ino raha nampirisihiny Paoly hataony Kristianin̈y?

⁸ Karaha Jesosy, Apostoly Paoly koa tsy nanambady; nifantoko tamy fanompoan̈anany fo izy. Paoly tsiary ndraiky nampianatra fa olo Kristianin̈y zen̈y tsy mahazo manambady. Hainy fa samby olo amy fanapahankevitrinany. Ndray zen̈y, nandrisiky Kristianin̈y izy hieritreritry tsarabe tsao mba vitandro fo midôko tsy manambady ke hifantoko amy fanompoan̈a fo. (Vakia 1 Korintianina 7:7-9.) Paoly tsiary nan̈ambany olo tsy manambady. Ndray izy aby nifidy Timoty han̈ano andraikitry maventy, kanefa Timoty olo tsy nanambady. * (Fil. 2:19-22) Zen̈y ahaizantsika fa tsy miankiny amy rahalahy araiky manambady na tsy manambady ny hahavy izy hahafeno fepetra aminy andraikitry araiky.​—1 Kor. 7:32-35, 38.

9. Karakory tokony ho fiheverantsika olo manambady ndreky olo tsy manambady?

⁹ Jesosy ndreky Paoly samby tsy nivolan̈a fa olo Kristianin̈y zen̈y tsy maintsy manambady na tsy mahazo manambady. Ke karakory basy tokony hataontsika? Tsara fomba ivolan̈any Tilikambo Fiambesan̈a taminy 1 Oktobra 2012  (malagasy) raha zen̈y; ho izy: “Samby kadô baka amy Zan̈ahary aby na fanambadian̈a na fidokoan̈a ho tsy manambady. ... Amy Jehovah, fidokoan̈a ho tsy manambady zen̈y tsy honohono ho raha mampavoa baraka na mampahinakinaka foeky.” Dikanizen̈y, tsy maintsy hajaintsika mare iro rahalahy ndreky ranabavy tsy manambady aby io!

10. Ino raha tsy tokony hataontsika izikoa atsika man̈aja iro rahalahy ndreky ranabavy tsy manambady aby io?

¹⁰ Ty raha mila alaintsika onon̈o: Sasany amintsika io nifidy tsy hanambady foeky. Misy ndraiky tihanambady fa tsendriky nahita ny mety aminany. Iô koa ny maty vady. Tokony ho hita amy raha volan̈intsika ndreky raha ataontsika fo fa man̈aja fihetsehampondro atsika. Atsika tsy tokony hiforse iro hanambady na hivolan̈a amindro fa han̈ampy iro hitady vady. Mety hangataka fan̈ampian̈a amintsika sasany amindro io. Kanefa mety ho ino ma raha tsapandro izikoa atsika man̈ano zen̈y kanefa iro tsy nangataka fan̈ampian̈a tamintsika? (1 Tes. 4:11; 1 Tim. 5:13) Alô zahantsika raha nivolan̈iny sasany tamindro io.

11-12. Mety hampakivy iro olo tsy manambady aby io raha ataontsika. Amy karakory?

¹¹ Nivolan̈a rahalahy araiky fa maro raha vitany amy fanompoan̈a nohony izy tsy manambady. Piandraikitry faritry baka izy sady vitany tsara fanompoan̈anany. Kanefa, ndraikindraiky misy piaramanompo man̈ontany izy: “Ino mahavy anao tsy manambady?” Iro nieritreritry fa han̈ampy izy raha zen̈y, kanefa ny raha misy, raha zen̈y nampakivy izy. Misy rahalahy araiky tsy manambady, manompo amy birôny sampan̈a nivolan̈a: “Baka amy raha ataondro rahalahy ndreky ranabavy sasany ndraikindraiky, mahavy zaho mahatsapa fa mampahinakinaka olo tsy manambady. Nanjary karaha problemo mare tsy manambady zen̈y, kanefa ny marin̈y aminany izio kadô.”

¹² Misy ranabavy tsy manambady, manompo amy Betela nivolan̈a karaha ty: “Misy pitory mieritreritry fa mitady vady aby olo jiaby tsy manambady aby io. Miaraka iro mahita anten̈a miaraka aminolo maromaro, efa mitady vady edy an̈atiny jerindro. Zaho tandraraiky nirahin̈y han̈ano asa tamy tanàna araiky. Sendra nisy fivorian̈a taminy alin̈y naviako io, ke rahavavy nitobiako nivolan̈a taminaka: ‘Hitanao, zaho ndraiky tsy man̈iraka anao hizaha vady, fa misy ranadahy aroe zay amy fiangonan̈anay ao mitovitovy taon̈o aminao io.’ Niaraka zahay navy tampivorian̈a, zaho direkty nindesiny tamindro ranadahy aroe io. Samy votivoty be tio zahay telo in̈y!”

13. Modelinjovy ma ten̈a nankahery ranabavy araiky tsy manambady?

¹³ Misy ranabavy araiky hafa, manompo amy Betela koa nivolan̈a karaha ty: “Maro pisava lalan̈a efa ela sady tsy manambady kanefa iro hitako ravoravo fo amy fanompoan̈a sady manan̈a tanjon̈o. Iro mahay mandanjalanja, mahafoe ten̈a, ke iro ten̈a man̈ampy fiangonan̈a. Iro tsy man̈ambony ten̈a foeky ke mieritreritry olo hafa ambany. Iro ndray tsy manambady amanjanaka, iro tsy mahatsiaro perty.” Tsy hitanao tsara oe mivory miaraka amy piaramanompo, izikoa samby mifan̈aja ndreky mifankatia aby olo jiaby? Tsy man̈ano raha hampitseky anao foeky piaramanompo, baka io iro koa tsy be fô anao. Iro tsy mieritreritry anao ho raha mare mandilatra iro. Iro mitady raha mahatsara anao. Hainao fa iro ten̈a tia anao ankitin̈y.

14. Akory han̈aboahantsika fa man̈aja iro rahalahy ndreky ranabavy tsy manambady aby io atsika?

¹⁴ Misaora ravoravo iro rahalahy ndreky ranabavy tsy manambady aby io izikoa baka amy toetry tsarandro mahavy atsika tia iro! Tsy ataontsika raha mampalahelo mare mahita iro tsy manambady. Tokony hankasitraka  iro atsika, fotony iro mifen̈y tsy hivadiky. Izikoa atsika man̈ano zen̈y, iro tsy hahatsapa tsy ilain̈a foeky. (1 Kor. 12:21) Ho tsapandro fo fa atsika ten̈a man̈aja iro ndreky ravoravo miaraka amindro.

15. Ino ma fan̈ovoan̈a tsy maintsy nataony pitory sasany baka iro nahavita nampitombo fanompoan̈andro?

¹⁵ Tato ho ato, maro piaramanompo manjary mianatra volan̈a tsy ninany. Maro fan̈ovoan̈a tsy maintsy nataondro tamy fiain̈anandro. Iro niala tamy fiangonan̈a mampiasa volan̈andro, baka io iro nifindra amy fiangonan̈a mampiasa volan̈a hafa, fotony mila pitory maro amy fiangonan̈a io. (Asa. 16:9) Nifidy han̈ano zen̈y iro, fotony iro tihampitombo fanompoan̈a. Marin̈y ndraiky fa taon̈o taon̈o iro vo ten̈a mahay volan̈a io tsarabe, kanefa maro raha tsara vitandro. Nohony toetry tsarandro ndreky fahaizan̈a efa anan̈andro, manjary matanjaka fiangonan̈a. Ten̈a valera amintsika iro rahalahy ndreky ranabavy mahafoe ten̈a aby io!

16. Ino raha tokony hidinihindro antipan̈ahy aby io alohany iro hanolotro rahalahy araiky hanjary antipan̈ahy na pan̈ampy amy fanompoan̈a?

¹⁶ Antipan̈ahy tsy tokony hieritreritry fa tsy mety hatolotro hanjary antipan̈ahy na pan̈ampy amy fanompoan̈a rahalahy araiky fotony tsy mahay tsara volan̈a ampiasainy fiangonan̈a. Raha tokony hizahavandro aminazy, mahafeno fepetra aby koran̈iny Soratra Masin̈y ao ma olo io va tsy mahafeno, fa tsy oe mahay tsarabe volan̈a ampiasainy fiangonan̈a ma izy va tsy mahay.​—1 Tim. 3:1-10, 12, 13; Tit. 1:5-9.

17. Ino aby fan̈ontanian̈a mila saintsain̈iny raimandreny, izikoa mieritreritry hifindra amy tany hafa iro tran̈o araiky?

¹⁷ Misy fianakavian̈a sasany nifindra antany hafa. Mety baka amy velonten̈a na problemo hafa misy amy firenenandro tan̈y navianizen̈y. Ke tsy maintsy mianatra volan̈a fampiasain̈y amy tany io iro fotony iro tihahita asa. Mety fivolan̈ana vaovao io foeky ampiasainiry zanany a lekoly. Akory fo basy izikoa amy tany io misy fiangonan̈a na antokopitory mampiasa volan̈andro? Tokony hivory amy fiangonan̈a mampiasa volan̈andro zen̈y ma iro? Sa iro tokony hivory amy fiangonan̈a mampiasa volan̈a fampiasainolo amy tany io?

18. Izikoa Galatianina 6:5 zahan̈a, akory han̈aboahantsika fa hajaintsika fanapahankevitry ataony lohany fianakavian̈a?

¹⁸ Anjarany lohany fianakavian̈a manapakevitry aia iro hivory. Tsy maintsy iritriretiny tsarabe aia ny ten̈a mahatsara vadiny ndreky zanany. (Vakia Galatianina 6:5.) Mila ikentsika ndreky hajaintsika fanapahankevitriny lohany fianakavian̈a io. Ino antony? Fotony zen̈y safidinany. Ke na ino na ino safidinany, mila raesintsika tsarabe fianakavian̈a nifindra amy fiangonan̈antsika io sady han̈aboahantsika fitiavan̈a fo.​—Rom. 15:7.

19. Ino raha tokony hikoran̈iny lohany fianakavian̈a amy Jehovah ndreky hidinihiny tsarabe?

 ¹⁹ Misy fianakavian̈a nifindra amy firenena hafa, fa iro fo mivory amy fiangonan̈a mampiasa volan̈andro. Ino antony? Mety tsy hazava amy zanakandro raha koran̈iny ampivorian̈a izikoa iro mivory amy fiangonan̈a mampiasa volan̈anolo amy tany nifindrandro. Ke ho sarotro amindro tsaiky aby io handroso arapan̈ahy. Karakory fo basy izikoa zanakandro tsy mahay volan̈a fampiasainolo amy tany naviandro? Izikoa karaha zen̈y raha misy, mila mivavaka amy Jehovah mare lohany fianakavian̈a araiky sady handiniky fomba mety han̈ampiany iry zanany hankatsara fifandraisan̈andro amy Jehovah ndreky amy piaramanompo. Izikoa ndraiky volan̈a amy tany io ny ten̈a hainiry zanany, avio an̈y koa iro mivory, mbala mety hampianariny lohany fianakavian̈a io iry zanany fo volan̈anolo baka amy tany faviandro. Ke na ino na ino fanapahankevitry raesiny, tokony hajainy fiangonan̈a amy tany hivoriandro fo iro. Olo an̈ivony fiangonan̈a tokony han̈amia toky iro, fa iro ten̈a valera.

20. Akory han̈aboahantsika fa hajaintsika iro rahalahy ndreky ranabavy mianatra volan̈a vaovao aby io?

²⁰ Baka amy raha jiaby nikoran̈intsika tio in̈y, maro rahalahy ndreky ranabavy amy fiangonan̈a maro mifen̈y angovo jiaby mianatra volan̈a vaovao. Mety tsy ho mora amindro han̈aboaka hevitrindro na eritreritrindro. Kanefa, izikoa atsika tsy mifantoko amy raha aby zen̈y, ho hitantsika fa ten̈a tia Jehovah ndreky tihanompo izy aby iro io. Ho hisy valerany amintsika koa iro piaramanompo amintsika aby io, ke han̈aja iro fo atsika ndray tsy dia mahay volan̈antsika iro. Atsika tsy mety hivolan̈a amindro karaha ty: “Zaho tsy mila anao.”

21-22. Ino ma tombontsoa maventy anan̈antsika?

²¹ Ten̈a mankasitraka Jehovah atsika fotony mbala amezany tombontsoa ho an̈isany fiangonan̈a. Valera aminany ndreky amy piaramanompo aby atsika jiaby io, na lelahy na man̈angy, na manambady na tsy manambady, na tsaiky na olobe, na mahay tsara volan̈a ampiasainy fiangonan̈antsika na tsy mahay tsarabe.​—Rom. 12:4, 5; Kol. 3:10, 11.

²² Irarian̈a atsika hifen̈y fo han̈araka raha tsara nianarantsika baka amy fan̈oharan̈any Paoly momba vatan̈anolombelon̈o. Hahita fomba hankahirezan̈a iro rahalahy ndreky ranabavintsika aby io atsika izikoa man̈ano zen̈y. Han̈ampy atsika ho tia ndreky han̈aja iro fo koa raha zen̈y.