Tanteraka Faminanian̈an’ny Baiboly: Fizaran̈a 1

“Hataoko Firenena Maventy Anao”

An̈isan’ny raha ten̈a mampiavaka Baiboly faminanian̈a an̈atin’izio ao. Ke hikoran̈a momba zen̈y irô lahatsoratra mifampitohy misy fizaran̈a valo amy “Mifohaza!” ty. Misy fan̈ontanian̈a aby ty hivalin̈a amindrô lahatsoratra aby io: Izio ma olo nanoratra faminanian̈a amy Baiboly ao olo nahay raha sa irô nahazo fan̈ahy masin̈y baka amy Zan̈ahary? Diniha baka irô porofo aby ato.

OLO amy ziôty faran-draha tsy matoky olo ndreky mahimahin̈y fo amin’olo. Karaha zen̈y koa ataondrô amy Baiboly io. Ny raha mampalahelo, ankamarozandrô tsiary ndraiky nandany lera nandiniky tsarabe raha koran̈in’izio. Irô man̈ara-drôrony amy raha volan̈in’olo fo. Matoky zahay fa anao tsy man̈ano karaha zen̈y. Diniha baka raha nandalo taloha tan̈y, amy zen̈y anao hahita fa marin̈y raha ambaran’ny Baiboly ao.

Voanalohany, atsika handiniky tantaran’ny lelahy araiky mbala hajain’olo maro, na Kristianin̈y io na Jiosy na Silamo. Izio olo hebreo, velon̈o tamy taon̈o 2018-1843 T.K. a Abrahama an̈aran’ny lelahy io. b

Sasany amindrô faminanian̈a tamy voanivoanalohany amy Baiboly ao mikoran̈a momba Abrahama ndreky momba atsika amy ziôty koa. (Zahava efajoro “ Fitahian̈a Nin’ny ‘Firenena Jiaby’”) Izikoa zahan̈a bokin’ny Genesisy, irô raha aby ty koa tafidriky amy faminanian̈a io: 1) Taranakan’i Abrahama hanjary firenena mahery. 2) Fa alohan’izen̈y antsendriky irô mbala hanjary andevo antany hafa. 3) Havotan̈a irô, aviô ho azondrô tany Kanana. Hizahavantsika tsiaraikiaraiky irô hevitry aby io.

Faminanian̈a Telo Maventy

Faminanian̈a 1: “Hataoko firenena maventy anao [Abrahama].”​—Genesisy 12:2.

Fahatantirahany: Taranakan’i Abrahama baka tamin’Isaka ndreky Jakoba (na Israely) nanjary firenenan’Israely taloha tan̈y. Izio fanjakan̈a nahaliô ten̈a nanan̈a mpanjakanany.

Ino raha koran̈in’ny tantara?

● Koran̈in’ny Baiboly an-tsipiriany sasany amy tetirazan̈an’i Abrahama, an̈isan’izen̈y taranakanany baka tamin’i Isaka ndreky Jakoba, aviô zanakan’i Jakoba 12 lahy. Hita amy tetirazan̈a io koa irô mpanjaka maro nanjaka ta Israely na ta Joda. Misy 17 amindrô mpanjaka aby io koran̈in’ny boky araiky tsy baka amy Baiboly. Ke mifan̈araka tsara amy zen̈y raha koran̈in’ny Baiboly fa lôso firenena irô taranakan’i Abrahama baka tamin’Isaka ndreky Jakoba. c

Faminanian̈a 2: “Taranakanao [Abrahama] hanjary vahiny hipetraka amy tany tsy nindrô. Tsy maintsy hanompo olo an̈y irô ... Fa amy taranaka fahefatra ndraiky irô vo himpody eto.”​—Genesisy 15:13, 16.

Fahatantirahany: Nifindra ta Ezipty sasany tamy taranakan’i Abrahama, fôtony nisy mosary ta Kanana, ke tamin’io taranaka efatra baka tamy taranakan’i Abrahama niala ta Kanana. Tamy voanalohany irô io vahiny fo, fa tafara tatỳ irô lôso andevo mpan̈amboatra briky tanimanga naharo tamy mololo. An̈isan’ny taranakan’i Abrahama nifindra tan̈y i Levy zafin’ny zafin’i Abrahama, aviô baban’i Levy efa matoe. Ty taranaka efatra mifan̈arakaraka baka amy Levy: 1) Levy, 2) Kehata zanakan’i Levy, 3)  Amrama zafin’i Levy, aviô 4)  Mosesy zafin’ny zafin’i Levy. (Eksodosy 6:16, 18, 20) Tamy taon̈o 1513 T.K., Mosesy nitariky irô Israelita aby io hiala ta Ezipty.​—Zahava irô  taon̈o miavaka ambany aby ty, aviô efajoro  “Daty Marin̈y Tsara.”

Ino raha koran̈in’ny tantara?

● James Hoffmeier manam-pahaizan̈a momba Testamenta taloha ndreky Arkeolozy mivolan̈a fa, aboakan’ny asa soratra ezipsianin̈y ndreky raha hita baka ambanin’ny tany fa taranakan’i Sema ndreky bibindrô, nambela hiditry ta Ezipty (an̈isan’izen̈y irô Hebreo taloha tan̈y), tan̈atin’ny mosary. Ke ten̈a lôso andevo tan̈y marin̈y ma irô Israelita aby io ke nirahin̈y nan̈amboatra briky?

● Aboakan’ny horonam-boky ndreky sary tamy fasan̈an’ny Ezipsianin̈y fa nisy vahiny nirahindrô nan̈ano briky tanimanga naharo mololo, nata tsy nivolan̈iny mivantan̈a fa izio mety ho irô Israelita. Aboakan’ny raha fandraisan̈a an-tsoratra ezpsianin̈y koa fa nisy sefo nangala an-tsoratra isan’ny briky vita, ke raha zen̈y mifan̈araka tsara amy raha koran̈in’ny Baiboly. (Eksodosy 5:14, 19) Karaha ty ho Hoffmeier: “Aboakandrô fandraisan̈a an-tsoratrandrô Ezipsianin̈y aby io fa vahiny tamy zen̈y nirahin̈y nan̈ano asa an-terivozon̈o, ke raha zen̈y kadirin’ny tamy fotoan̈a nampijalian̈a irô Israelita aby io. Dikan’izen̈y, mety marin̈y fo fa irô Hebreo aby io nifindra ta Ezipty tamy fotoan̈an’ny mosary, aviô irô lôso andevo tan̈y.”

Faminanian̈a 3: “Hamiako anao ndreky taranakanao … tany Kanana jiaby.”​—Genesisy 17:8.

Fahatantirahany: Mosesy nitariky irô Israelita aby io niala ta Ezipty fa Josoa zanakan’i Nona ndraiky nitariky irô niditry ta Kanana, tamin’ny 1473 T.K.

Ino raha koran̈in’ny tantara?

● Nivolan̈a K. Kitchen manam-pahaizan̈a momba Ezipty fa “nandeha ta Kanana ndreky nipetraka tan̈y marin̈y irô Israelita aby io”, nata tsy mitovy raha koran̈in’ny mpikaroko aby io momba daty nisian’izen̈y.

● Koran̈in’ny Baiboly fa ‘Josoa nan̈ôro Hazora’ tanànan’ny Kananita. (Josoa 11:10, 11) Tamindrô raha tavela tamy tanàna io tao koa nahitandrô mpikaroko aby io tempoly telo ravan̈a jiaby. Aviô irô nahita porofo fa niroan̈a tanàna io tamy taonjato faha-15 T.K. Mifan̈araka tsara amy raha voakoran̈a amy Baiboly raha zen̈y.

● Mahalian̈a atsika koa tanànan’ny kananita, karaha ataon’ny tanànan’i Gibeona. Izio kadiriny sivy kilometara baka a Jerosalema. Hitandrô mpikaroko raha ambanin’ny tany toeran̈a misy Gibeona io, izikoa irô fa nahita tahon’ny sajoa kadiriny 30 nisy an̈aran’ny tanàna io. Irô Gibeonita aby io nifen̈y nihavan̈a tamy Josoa, fa tsy karaha zen̈y ndraiky irô vahoakan’i Hazora aby io. Ke irô Gibeonita aby io nataon’i Josoa ‘mpantsaka rano.’ (Josoa 9:3-7, 23) Fa nan̈ino? Aboakan’ny 2 Samoela 2:13 ndreky Jeremia 41:12 fa tany nisy Gibeona io be rano. Mifan̈araka tsara amy raha koran̈in’ny Baiboly raha voakoran̈an’ny Dikan-teny Vaovao Iraisam-pirenena (angiley) ty: “Tany be rano Gibeona ke zen̈y raha ten̈a nampiavaka izio. Misy loharano maventy araiky, aviô loharano madiniky fito an̈y.”

● Misy boky hafa ankoatran’ny Baiboly man̈aporofo fa ten̈a nisy ankitin̈y irô olo aby koran̈in’ny Baiboly. An̈isan’izen̈y irô mpanjaka 17 taranakan’i Abrahama nanjaka ta Israely na ta Joda, voakoran̈a taloha tarỳ in̈y. Ohatra amy zen̈y Ahaba, Ahaza, Davida, Hezekia, Manase, aviô Ozia. Fisian’ny tantaran’ny mpanjaka aby io man̈ambara fa ten̈a nisy firenenan’Israely ankitin̈y navy ta Kanana tao aviô irô io nipetraka tao.

● Irô mpikaroko aby io koa nahita Tsangambaton’i Merneptah ta Thèbes, ta Ezipty tan̈y tamin’ny 1896. Hita ao poerapoeran’i Farao Merneptah tamin’izy nandresy Kanana kadirin’ny tamin’ny 1210 T.K. Io loharanon-kevitry voanalohany tsy baka amy Baiboly mikoran̈a momba Israely. Ke raha zen̈y lôso mahaiman̈aporofo fo fa ten̈a nisy ankitin̈y firenena io.

Ten̈a ilain̈a fahaizan̈a tsarabe irô raha tsiaraikiaraiky

Hitantsika fa Baiboly man̈amia tsipirian-draha momba olo ndreky toeran̈a aviô raha nandalo tantarain’izio. Ke lôso mahaihitantsika fo fa ten̈a tanteraka irô fampan̈antinan̈a amy Baiboly ao izikoa fa ampiran̈intsika amindrô boky tsy baka amy Baiboly irô tsipirian-draha tsiaraikiaraiky momba izio. Hita amy tantaran’i Abrahama ndreky irô taranakanany aby io fa tanteraka ankitin̈y fampan̈antinan̈an’ny Zan̈ahary. Ohatra iziô, lôso firenena taranakan’i Abrahama, aviô irô lôso andevo ta Ezipty, baka iô tafaran’izin̈y nazondrô tany Kanana. Mampatsiaro atsika volan̈an’i Petera mpanoratra Baiboly raha zen̈y. Petera natoky fa “tsisy faminanian̈a baka tamy sitrapôn’olombelon̈o, fa baka tamy Zan̈ahary nivolan̈andrô olo aby io, eraka nitondrasan’ny fan̈ahy masin̈y irô.”​—2 Petera 1:21.

Taon̈o maro tafaran’ny nazahoandrô tany Kanana, niova mare raha nisy tamy firenena io. Ten̈a ratsy vokatran’ny raha zen̈y. Irô mpanoratra Baiboly aby io efa nikoran̈a momba zen̈y tsialohaloha. Ke raha zen̈y ho hitantsika amy laharan̈a man̈araka ty.

[Lamariky amy pazy ambany]

[Efajoro]

 FITAHIAN̈A NIN’NY “FIRENENA JIABY”

Zan̈ahary nivolan̈a fa “firenena jiaby” han̈ano raha hazahoandrô hatsaran̈a amin’ny alalan’ny taranakan’i Abarahama. (Genesisy 22:18) Antony voanalohany nan̈anaovan’ny Zan̈ahary taranakan’i Abrahama hanjary firenena, baka hiboahan’ny Mesia. Mesia io baka han̈amia ain̈inany han̈avotan̈a olombelon̈o jiaby. d Ke mahakasiky anao fampan̈antinan̈an’ny Zan̈ahary nataony tamin’i Abrahama io. Karaha ty ho Jaona 3:16: “Zan̈ahary ten̈a tia zao tontolo zao, ke namiany zanany lahitokan̈a baka tsy hofoaty olo jiaby man̈aboaka finoan̈a izy, fa hahazo fiain̈ana tsisy farany.”

[Lamariky amy pazy ambany]

[Efajoro]

 DATY MARIN̈Y TSARA

Marin̈y tsarabe fotoan̈a koran̈in’ny Baiboly, aviô ten̈a ilain̈a raha zen̈y. Ohatra, koran̈in’ny 1 Mpanjaka 6:1 ombian̈a Mpanjaka Solomona nanomboko nan̈ôrin̈y tempolin’i Jerosalema. Karaha koran̈iny ao: “Nanomboko nan̈ôrin̈y tran̈o nin’i Jehovah i Solomona tamy taon̈o faha 480 [479 taon̈o feno], tafaran’ny niboahan’ny Israelita baka ta Ezipty, dikan’izen̈y tamy taon̈o fahefatra nanjakany tamin’ny Israely, tamy fanjava Ziva, fanjava faharoe.”

Tamy taon̈o 1034 T.K. taon̈o fahefatra nanjakan’i Solomona, erakany famaritan’ny Baiboly daty manan-tantara. Izikoa atsika mimpody amy taon̈o 479 baka amy taon̈o io, atsika avy amy taon̈o 1513 T.K., taon̈o nialan’ny Israelita aby io ta Ezipty.

[Efajoro/​Sary]

TEN̈A NISY ABRAHAMA

● Nahitan̈a an̈aran’ny tanàna miran̈a amin’ny an̈aran’ny havan’i Abrahama tamy takelaka tanimanga, tamy taonjato faha-18 T.K. An̈isan’izen̈y tanànan’i Palega, Seroga, Nahora, Tera, aviô Harana.​—Genesisy 11:17-32.

● Voakoran̈a amy Genesisy 11:31 ao fa niala baka ta “Oran’ny Kaldeanin̈y” i Abrahama ndreky fianakavian̈anany. Tatsimo antin̈ianan’Irak tan̈y nahitan̈a lambilambin-draha tavela ta Ora. Baiboly koa mivolan̈a fa Tera baban’i Abrahama naty ta Harana, aviô Saraha vadin’i Abrahama naty ta Hebrona. Mety ho tamy faritry misy Turquie amy ziôty nisy Harana io. An̈isan’ny tanàna efa ela be kanefa mbala misy olo mipetraka i Hebrona io. Izio marikitry Israely an̈y.​—Genesisy 11:32; 23:2.

[Tablô]

(Zahava gazety)

 TAON̈O MIAVAKA NIN’NY TARANAKAN’I ABRAHAMA NDREKY FIFINDRANDRÔ ISRAELITA ABY IO

Taranaka efatra baka amy taranakanan’i Abrahama

Levy

Kehata

Amrama

Mosesy

(T.K.)

1843 Abrahama naty

1728 Ery Jakoba nifindra ta Ezipty

1711 Jakoba naty

1657 Josefa naty

1593 Mosesy naty

1513 Mosesy nitariky irô Israelita aby niala ta Ezipty

1473 Mosesy naty. Josoa nitariky irô Israelita aby io niditry ta Kanana

Tamy Faha Mpitsara

1117 Samoela nan̈ôsotro Saoly ho Mpanjakan’ny Israely

1107 Teraka Davida

1070 Davida nanjary mpanjakan’ny Israely

1034 Solomona nanomboko nan̈ôrin̈y tempoly

[Sary]

Amy tsangambato ty misy misoratra “Tran̈on’i Davida”, aviô izio an̈isan’ny manon̈ono an̈aran’ny mpanjaka taranakan’i Abrahama sady nanjaka tan Israely na Joda

[Sary nazahoan̈a lalan̈a]

© Israel Museum, Jerusalem/​The Bridgeman Art Library International