Jehovah namoron̈o fianakavian̈a, ke raimandreny nataony hikarakara zanakandro. (Kolosianina 3:20) Andraikitrinaro raimandreny man̈ampy zanakanaro ho tia Jehovah ndreky hanjary olo mahay mandray andraikitry. (2 Timoty 1:5; 3:15) Mila hainaro koa raha an̈aty fony zanakanaro tsiaraikiaraiky. Matetiky raha ataonaro fo arehany zanakanaro. Ke izikoa tianaro hampianatra zanakanaro Volan̈a Jehovah, anaro antsendriky mila mazoto mianatra izio.—Salamo 40:8.

KORAN̈INY BAIBOLY: Malakisa mitandren̈y, fa aza malaky mivolan̈a. (Jakoba 1:19) Tianaro zanakanaro tsy havozo hikoran̈a aminaro. Ataova hitany zanakanaro koa fa anaro von̈ono hitandren̈y iro, isaka misy raha tiandro volan̈iny. Anaro fivadiany koa hitandro mihavan̈a tsarabe, iro tsy havozo hikoran̈a aminaro. (Jakoba 3:18) Izikoa anaro masiaka fo, aza gaga fa iro tsy hazoto hikoran̈a aminaro. Aza mora meloko. Amia toky fo iro fa anaro ten̈a tia iro.—Matio 3:17; 1 Korintianina 8:1.

AKORY AN̈ANOVAN̈A ZEN̈Y?

• Zanakanao koa fa mila hikoran̈a aminao, tandrin̈esa fo izy

• Anaro mila zatra mikoran̈a amy zanakanaro, fa aza miambin̈y izy misy raha manahiran̈a

KORAN̈INY BAIBOLY: “Olo araiky koa mandiniky tsarabe man̈ano raha, hahomby raha ataony.” (Ohabolana 16:20) Ndraikindraiky anao mila mandiniky raha koran̈iny zanakanao aminao, fotony mety ho hafa raha volan̈iny, fa tsy zen̈y raha ten̈a tiany koran̈iny. Misy koa fivolan̈andro raha karaha matomboko, kanefa raha tsisy dikany aby koran̈indro aminao. ‘Olo araiky koa mamaly volan̈a mbala tsendriky ren̈iny, mira olo tsy misain̈y fo.’ (Ohabolana 18:13) Aza mora meloko.—Ohabolana 19:11.

AKORY AN̈ANOVAN̈A ZEN̈Y?

• Zanakanao koa fa misy raha volan̈iny aminao, aza masiaka, baka io aza tapahan̈a volan̈anany

• Aleva onon̈o fa anao koa mba efa navy tsaiky karaha iro io

KORAN̈INY BAIBOLY: “Tandrin̈esa tsarabe zanako, babanao ndreky reninao koa fa man̈anatra anao.” (Ohabolana 1:8) Na anao baba na anao reny, anaro samy namiany Jehovah fahifan̈a hamalavala zanakanaro. Dikanizen̈y, anaro tsy maintsy mampianatra zanakanaro han̈aja ndreky han̈araka volan̈anaro. (Efesianina 6:1-3) Ho hitany zanakanaro fo anaro fivadiany koa mitovy hevitry. (1 Korintianina 1:10) Izikoa fa misy raha tsy mampifan̈araka anaro, tsy tsara anaro mankany ankilandro, fotony tsy hajaindro anaro izikoa man̈ano zen̈y.

AKORY AN̈ANOVAN̈A ZEN̈Y?

• Anaro fivadiany mila mifan̈araka tsarabe izikoa fa man̈apetraka lalàn̈a amalavalan̈ana zanakanaro

• Izikoa tsy mira hevitrinaro momba fitaizan̈a zanakanaro, aleva onon̈o tsao mba tsara fo hevitry vadinao

KORAN̈INY BAIBOLY: “Rango iro mbala tsaiky efa zara mandeha amy lalan̈a tokony himboandro edy.” (Ohabolana 22:6) Tsy zay fomba hitarimianaro zanakanaro voatery hahomby fo. Tsara anaro mandiniky tsarabe fomba hitarimianaro iro, an̈atinizen̈y fomba amalavalan̈ana iro. (Salamo 127:4; Ohabolana 29:17) Mamalavala io tsy vitany man̈asazy iro fo. Mila ataonaro haindro antony mahavy anaro man̈ano zen̈y. (Ohabolana 28:7) Ampianara zanakanaro ho tia Volan̈a Jehovah ndreky hahay toro lalan̈a aby ao. (Salamo 1:2) Ho haindro tsarabe amy zen̈y mampiasa eritreritrindro.—Hebreo 5:14.

AKORY AN̈ANOVAN̈A ZEN̈Y?

• Ampianara zanakanaro hatoky ndreky hino Jehovah

• Ampia iro hahay han̈avaka ndreky tsy han̈ano raha mety hahavy iro han̈ano raha ratsy aboaka aminy Internet ndreky amy tranonkala ifandraisan̈a aminolo, karaha ataony Facebook. Ampianara iro raha tokony hatao, izikoa fa misy olo mitady han̈ano raha tsy manjary amindro