Atsika ndray efa mifen̈y man̈ano raha hampasambatra tokantran̈ontsika ndreky fianakavian̈antsika, mety mbala misy raha tsy ampoizin̈y fo hahavy atsika tsy ho sambatra. (Mpitoriteny 9:11) Zan̈ahary ten̈a tia atsika, ke zen̈y mahavy izy man̈amia toro lalan̈a amy Baiboly ao han̈ampian̈a atsika, izikoa fa misy raha manahiran̈a. Atsika koa man̈araka toro lalan̈a aby zen̈y, ho vitantsika hiatriky raha tsy ampoizin̈y mahazo atsika, ndray raha farany sarotro.

KORAN̈INY BAIBOLY: ‘Apitraha aminany raha jiaby mampiasa loha anaro, fotony izy mikarakara anaro.’ (1 Petera 5:7) Aza adin̈a fa Zan̈ahary tsy mampijaly atsika. (Jakoba 1:13) Anaro koa man̈aton̈o izy, hampiany anaro hahita fomba ten̈a tsara iatrefan̈a raha manahiran̈a io. (Isaia 41:10) “Koràn̈a aminany raha jiaby an̈aty fonaro.” —Salamo 62:8.

Hahazo angovo koa anaro, izikoa mamaky ndreky mianatra Baiboly isanandra. Ho hitanaro fa Jehovah ten̈a mankahery anaro koa fa misy raha mety mitsapa finoan̈a. (2 Korintianina 1:3, 4; Romanina 15:4) Izy hanamia anaro ‘fiadan̈ana Zan̈ahary, bebeny eritreritry jiaby.’ —Filipianina 4:6, 7, 13.

AKORY AN̈ANOVAN̈A ZEN̈Y?

• Mivavaha amy Jehovah baka fonao milamin̈y, ke anao hahavita hieritreritry tsarabe

• Zahava ndraiky hevitry jiaby hitanaro, ke fidiana zay hitanaro fa ten̈a mety amy raha manahiran̈a anaro

KORAN̈INY BAIBOLY: “Fonolo mahadiniky raha zen̈y mitady fomba hazahoany fahaizan̈a, baka io sofin̈inolo misain̈y zen̈y man̈iry hitandren̈y fahaizan̈a.” (Ohabolana 18:15) Koa fa misy raha manahiran̈a tsy ampoizin̈y, mila hainao raha ten̈a ilainaro tsiaraikiaraiky. Anao mila mikoran̈a amindro ndreky mitandren̈y iro.—Ohabolana 20:5.

Karakory fo izikoa sendra misy maty amy fianakavian̈anaro? Aza misalasala man̈aboaka alahelo. Aleva onon̈o fa ndray Jesosy mba nitomoan̈y. (Jaona 11:35; Mpitoriteny 3:4) Anao mila ampy toromaso tsarabe. (Mpitoriteny 4:6) Hiala tsihelihely asa lohanao ndreky hakajoan̈anao amy zen̈y.

AKORY AN̈ANOVAN̈A ZEN̈Y?

• Tsara anaro izikoa zatra mifampikoran̈a, amy zen̈y koa fa misy raha tsy ampoizin̈y miboaka, ho moramora hiatriky izy

• Man̈ontania olo efa nandalovany raha manahiran̈a karaha mahazo anaro io

KORAN̈INY BAIBOLY: “Olo ten̈a naman̈a zen̈y mira rahalahy, han̈ampy amy fotoan̈a jiaby, indraka eky amy fotoan̈a isiany raha mampiory.” (Ohabolana 17:17) Maro namanao man̈iry han̈ampy anao, fa iro fo tsy mahay ino raha ten̈a ilainao, izikoa anao tsy mivolan̈a amindro. Ke izikoa fa misy raha manahiran̈a tsy ampoizin̈y, aza matity vava. (Ohabolana 12:25) Aza adin̈a koa mankatsara fihavan̈anao amy Zan̈ahary. Mangataha hevitry aminolo mahay Soratra Masin̈y tsarabe.—Jakoba 5:14.

Mila tsy manapatapaka fivorian̈a anao, baka mahita olo maro ten̈a mino Jehovah ndreky raha koran̈iny amy Baiboly ao. Hahatsiaro mahivankivan̈a anao, izikoa miaraka amindro io. Tsara koa anao man̈ampy olo kivy mira anao, amy zen̈y anao manjary mahery. Koràn̈a aminolo raha inoanao momba Jehovah, an̈atinizen̈y fiain̈ana tsara hataony aminy amaray an̈y. Tsy mety izikoa anao mitokantokan̈a, fotony olo aby miaraka mivory aminao io ten̈a tia anao ndreky mikarakara anao. Man̈anova raha fo han̈ampian̈a olo.—Ohabolana 18:1; 1 Korintianina 15:58.

AKORY AN̈ANOVAN̈A ZEN̈Y?

• Koràn̈a aminolo ten̈a fankazatra anao raha mahazo anao, misy ahaizany raha mety an̈ampiany anao

• Ambarà raha ten̈a mampanahiran̈a anao