Fanjava aroe nialandro Israelita aby io ta Ezipta, iro navy tamy Bongo Sinay. Iro nitoby tio. Mosesy nanonga tamy bongo io. Jehovah nikaiky izy ndreky nivolan̈a taminany: ‘Zaho nan̈avotro iro Israelita aby io. Ke iro koa man̈araka volan̈anaka ndreky mitandrin̈y lalàn̈anaka, iro hanjary olonaka manokan̈a.’ Mosesy nijotso ndreky nan̈ambara Israelita aby io raha nivolan̈iny Jehovah io. Hainao akory nivolan̈indro? Iro nivolan̈a: ‘Hataonay raha jiaby volan̈iny Jehovah aminay.’

Nanonga tamy bongo io ndraiky Mosesy. Jehovah nivolan̈a taminany: ‘Afaka telo andra zaho hikoran̈a aminao. Fa volàn̈a olo aby io baka tsy hanonga amy Bongo Sinay.’ Nijotso ndraiky Mosesy, baka io izy nivolan̈a taminolo aby io fa iro mila von̈ono hitandren̈yJehovah.

Koa nafaka telo andra io, iro Israelita aby io nahita tselatra ndreky rondro joby be tamy bongo io. Iro naharen̈y difibaratra naresaka ndreky feony antsiva. Nisy motro nirehitry nijotso tamy bongo io, ke nira nijotso tao Jehovah. Navozo mare Israelita aby io ke nangorohoro. Nihetsiketsiky mare bongo io, baka io feno setroko. Nahainare fo feony antsiva in̈y. Jehovah nivolan̈a tamindro: ‘Zaho Jehovah. Anaro tsy mahazo manompo zan̈ahary hafa.’

Loso koa Mosesy nanonga tan̈abony bongo tan̈y, ke tan̈y Jehovah nan̈amia izy lalàn̈a maro ahaizandro fomba tokony hanompoan̈a Jehovah ndreky raha tokony hataondro. Nisoratiny Mosesy lalàn̈a io, baka io nivakiny tamindro Israelita aby io. Iro Israelita aby io nivolan̈a: ‘Hataonay raha jiaby volan̈iny Jehovah aminay.’ Iro nifanta fa han̈ano zay raha volan̈iny Zan̈ahary amindro. Mba nitanandro edy ma volan̈andro zen̈y?