Nivolan̈iny Mosesy ndreky Arona tamy Farao hafatrany Zan̈ahary ty: ‘Koa tsy halefanao vahoakanaka aby io, handifasako lalitry maventy sady mamitiky amy tany ty.’ Feno lalitry tantran̈ondro Ezipsianin̈y jiaby, na tran̈onolo pan̈arivo, na tran̈onolo masikiny. Tany jiaby feno lalitry. Ta Gosena, tany nipitrahandro Israelita aby io tsisy foeky. Ezipsianin̈y aby io fo avoa, nanomboko taminy antambo fahefatra. Ho Farao: ‘Iraha adosony Jehovah kony lalitry aby io. Halefako edy vahoakanany.’ Lalitry aby io koa fa nadosony Jehovah, Farao efa nivadiky edy. Ombian̈a Farao vo ho hisy jery?

Ho Jehovah: ‘Koa mbala tsy halefany Farao fo vahoakanaka, harary ndreky hofoaty bibindro Ezipsianin̈y aby io.’ Niaraka andra kiaka, efa nisy biby naty edy. Tsisy naty bibindro Israelita aby io. Mbala nierin̈y Jehovah fo Farao, ke tsy nalefany vahoaka aby io.

Nampodiny Jehovah tamy Farao tan̈y ndraiky Mosesy. Nirahiny namafy jofo tamy tsiko izy. Jofo in̈y nanjary laposiera. Ke feno laposiera tsiko, baka io nipetaka taminy Ezipsianin̈y jiaby. Feno bay ain̈iny Ezipsianin̈y aby io ndreky bibindro koa. Mbala tsy nalefany Farao fo Israelita aby io.

Nirahiny Jehovah nimpody tamy Farao tan̈y ndraiky Mosesy hivolan̈a: ‘Mbala tsy halefanao fo vahoakanaka aby io? Handatsahako  mahalen̈y miaraka bolongany lagilasy maro eto amaray.’ Kiaka andra, Jehovah nandatsaka lagilasy, difibaratra, baka io motro. Sambany ta Ezipta nisy andra ratsy karaha io. Kakazo ndreky tsabo jiaby ta Ezipta tao robaka aby, fa tsisy raha robaka ta Gosena. Ho Farao: ‘Iangavia Jehovah han̈adoso andra ratsy io! Halefako edy anaro.’ Bolongany lagilasy ndreky mahalen̈y koa fa nijanon̈o, Farao efa nivadiky edy.

Ke ho Mosesy: ‘Hisy valala hihina kakazo jiaby tsy naty tamy mahalen̈iny lagilasy in̈y.’ Rakotro valala zay raha tavela tamy tsabondro, ndreky kakazo jiaby. Ho Farao: ‘Iangavia Jehovah han̈adoso valala aby io.’ Valala aby io ndray fa nadosony Jehovah, Farao mbala nierin̈y izy fo.

Ho Jehovah tamy Mosesy: ‘Injàn̈a manondro lan̈itry tan̈anao.’ Lan̈itry baka tio nanjary Joby be. Telo andra, nahiziky tamindro Ezipsianin̈y aby io, tsisy raha hita. Tamindro Israelita aby io ndraiky nazava fo.

Ho Farao tamy Mosesy: ‘Anao ndreky vahoaka aby io mindao. Bibinaro aby io fo ambilà eto.’ Mosesy nivolan̈a: ‘Bibinay jiaby mila man̈araka zahay koa, baka ataonay fan̈atitry amy Zan̈aharinay.’ Neloko mare Farao. Hoizy: ‘Alo mandeha an̈y! Hivoneko anao koa mbala mimpody atỳ.’